5-11-2021, 05:43 | Latviyada peyvənd olunmayan işçilər işdən çıxarılacaq
Latviya parlamenti yekun oxunuşda COVID-19-un yayılmasına nəzarət haqqında qanuna düzəlişləri qəbul edib. Dəyişikliklərin lehinə 52 deputat, əleyhinə 27 deputat səs verib, 2 deputat bitərəf qalıb. Düzəlişlər işəgötürənə peyvənd və ya xəstəliyi təsdiq edən arayış olmadan işçiləri işdən çıxarmaq hüququ verir.
Həmçinin işəgötürənin işçidən COVID-19 sertifikatı tələb etmək hüququ var. İşçi 10 iş günündən gec olmayaraq peyvənd olunmağa borcludur. Noyabrın 15-dək işçi peyvənd prosesinə başlamazsa və ya başa vurmazsa, o zaman işəgötürənin onu işdən çıxarmaq hüququ olacaq. Bundan əlavə, işəgötürən, özəl sektorda çalışan işçinin işdən çıxarılması halında onun maaşını saxlaya bilər. Dövlət sektorunda bu seçim təmin edilmir. Qanun layihəsi Latviya prezidenti tərəfindən təsdiq edildikdən sonra qüvvəyə minəcək.
5-11-2021, 05:41 | "Fevrala qədər Avropada daha yarım milyon insan koronavirusdan ölə bilər"
Peyvənd edilmədən və epidemioloji təhlükəsizlik tədbirlərinə əməl olunmasa, 2022-ci ilin fevralına qədər Avropada qitənin yarım milyon sakini COVID-19-dan ölə bilər. bunu Ümumdünya Səhiyyə Təşkilatının (ÜST) Avropa departamentinin rəhbəri Hans Klüge deyib.
"Hazırda ölüm hallarının 75 faizi 65 və daha yuxarı yaşda olan insanlarda baş verir. Proqnozlara görə, belə davam edərsə, 2022-ci il fevralın 1-nə qədər COVID-19-dan əlavə yarım milyon ölümün şahidi olacağıq", - Klüge bildirib.
ÜST rəsmisinin sözlərinə görə, regionun 43 ölkəsi xəstəxana çarpayılarının çatışmazlığı ilə üzləşəcək.
Klüge həmçinin vurğulayıb ki, təşkilat regiondakı vəziyyətdən narahatdır. Belə ki, son həftələrdə Avropanın 57 ölkəsində bütün yaş qruplarında yoluxmaların sayı 55 faiz artıb. O, yeni halların koronavirusun "delta" ştammı ilə əlaqəli olduğunu qeyd edib. Bu səbəbdən ÜST 23 ölkənin koronavirusun yayılması ilə mübarizə tədbirlərini gücləndirmək qərarını dəstəkləyib və 7 dövlətin məhdudiyyətləri aradan qaldıran qərarı narahatlığa səbəb olub.
4-11-2021, 09:41 | Makron Merkelə şərəf nişanı verdi
Fransa Prezidenti Emmanuel Makron və xanımı Bricit Makron siyasətlə vidalaşmağa hazırlaşan Almaniya kansleri Angela Merkelin şərəfinə ziyafət verib.
Zziyafət Vougeot sarayında baş tutub.
Burada Makron Almaniya Kansleri kimi Fransaya son rəsmi səfərini edən Merkelə şərəf nişanı olan "Legion d'Honneur" fəxri medalını təqdim edib.
4-11-2021, 06:13 | Rusiyada koronavirusdan ölüm halında növbəti antirekord qeydə alınıb
Rusiyada son sutka ərzində daha 40 443 nəfər yeni növ koronavirus (COVID-19) infeksiyasına yoluxub.
Rusiyada COVID-19-a yoluxanların sayı 8 633 643 nəfərə çatıb.
Son sutka ərzində 1189 nəfərin koronavirusdan öldüyü bildirilib. Bu, pandemiya dövründə ölüm halında maksimum göstərici olub. Ümumilikdə koronavirusdan ölənlərin sayı 242 060 nəfərə çatıb.
Qeyd edək ki, Rusiya koronavirusa yoluxmaların sayına görə ABŞ, Böyük Britaniya və Türkiyədən sonra dördüncü yerdə gəlir.
3-11-2021, 07:59 | Bayden neftin qiymətinin artmasında Rusiya və OPEK ölkələrini ittiham edib
ABŞ Prezidenti Cozef Bayden neftin qiymətinin artmasında Rusiya və OPEK ölkələrini ittiham edib .
Bu barədə C.Bayden Qlazqoda keçirilən mətbuat konfransı zamanı deyib.
Onun sözlərinə görə, neftin qiymətinin artması OPEK ölkələrinin, xüsusən də Rusiyanın əlavə neft hasilatından imtinasının nəticəsidir:
"Benzinin, neftin qiymətlərinə nəzər salsanız, bu, Rusiya və ya OPEK ölkələrinin neft hasilatını artırmaqdan imtinasının nəticəsidir".
Trend
2-11-2021, 08:12 | Bayden Trampa görə üzr istədi
ABŞ Prezidenti Co Bayden BMT-nin İqlim Dəyişikliyi üzrə 26-cı konfransı zamanı Donald Tramp administrasiyasının yerinə üzr istəyib.
Bunu ABŞ-ın Tramp hakimiyyəti dövründə Paris İqlim Sazişindən çəkilməsinə görə edib.
Vəzifəsinə başlayan kimi Paris İqlim Sazişinə qayıtdığını bildirən Bayden "Məncə, üzr istəməməliyəm, ancaq keçmiş administrasiyanın Paris İqlim Sazişindən çəkilməsinə görə üzr istəyirəm" deyib. Bütün böyük iqtisadiyyatların istixana qazı emissiyaları ilə bağlı məqsədlərinə çatacağına ümid etdiyini vurğulayan Bayden, "ABŞ bu mövzuda əlindən gələni edəcək" söyləyib.
Xatırladaq ki, 2017-ci ildə hakimiyyətə gələn Donald Tramp vəzifəsinin ilk ilində Paris İqlim Sazişindən çəkiləcəklərini bəyan etmiş və bu müddət rəsmi olaraq 2020-ci ilin noyabrında başa çatmışdı.
2-11-2021, 08:09 | ABŞ-da yetkin yaşlı əhalinin 70 faizi COVID-19-a qarşı tam peyvənd olunub
ABŞ-da yetkin yaşına çatanların 70 faizi COVID-19-a qarşı tam peyvənd olunub, 80%-i isə peyvəndin ilk dozasını alıb.
Bu barədə Ağ Evin koronavirus üzrə koordinatoru Ceffri Zients bildirib.
O, həmçinin qeyd edib ki, Co Bayden administrasiyasının Xəstəliklərə Nəzarət və Profilaktika Mərkəzlərinin (CDC) də uşaqlar üçün peyvəndi tövsiyə etməsi şərti ilə 5-11 yaşlı uşaqları peyvənd etmək səyləri noyabrın 8-dən etibarən tam şəkildə həyata keçiriləcək.
Onun sözlərinə görə, administrasiya hüququ çatan bütün 28 milyon uşaqları peyvənd etmək üçün kifayət qədər "Pfizer" peyvəndi alıb.
2-11-2021, 08:01 | BMT-də Əfqanıstan, Yəmən və Suriya ilə bağlı iclas olacaq
BMT Təhlükəsizlik Şurası bu ay Əfqanıstan, Yəmən, Suriya və ümumilikdə Yaxın Şərqdəki vəziyyətlə bağlı iclaslar keçirəcək.
Bu barədə mətbuat konfransında Meksikanın BMT-dəki daimi nümayəndəsi, noyabrın 1-dən Təhlükəsizlik Şurasının sədri vəzifəsini icra edən Xuan Ramon de la Fuente Ramires bildirib.
Daimi nümayəndə bildirib: "Noyabrın 9-da bərabərsizlik və münaqişə ilə bağlı açıq debat keçiriləcək. Meksika prezidenti Andres Manuel Lopez Obrador sədrlik edəcək. Korrupsiyanın və qeyri-bərabərliyin münaqişələrə təsirinin vaxtında təhlil edilməsi [planlaşdırılır]. Bəyanatın qəbul edilməsinə ümid edirik".
Onun sözlərinə görə, noyabrın 16-da beynəlxalq sülh və təhlükəsizlik mövzusunda açıq debat keçiriləcək.
1-11-2021, 20:57 | Astronomlar Yerə maksimum yaxınlaşan meteoroiti aşkarlaya bilməyiblər
Dünya astronomları Yerlə toqquşa biləcək hər bir kosmik cismi izləməyə çalışırlar. Onların əksəriyyəti kiçikdir və təhlükə yaratmır, lakin kosmosda başqa bir obyektin diqqətdən kənarda qalması ehtimalı həmişə var. Bu yaxınlarda onlardan biri planetimizə yaxınlaşdıqdan sonra aşkarlanıb.
Bu barədə "Report" yazıb.
Alimlərin narahatlığı meteoroitin ölçüsünə görə deyil, gözlənilmədən ortaya çıxmasına görə yaranıb - problem ondadır ki, o, Günəş istiqamətindən gəlib və astronavtlar onun orada olduğunu belə, bilməyiblər. "2021 UA1" adlanan obyekt Yerdən təxminən 3 000 km məsafədən keçib. O, Antarktida üzərində uçub.
Qeyd edək ki, 3 000 km olduqca yaxındır: Beynəlxalq Kosmik Stansiyanın orbitindən çox yüksək (təxminən 400 km), lakin geostasionar orbitdəki rabitə peyklərindən daha yaxındır (təxminən 36 min km). Astronom Toni Dannın fikrincə, meteoroitin Günəş istiqamətindən uçması maraqlıdır, o, buna görə də yaxınlaşma anına qədər görünməz qalıb.
Qeyd edək ki, bundan əvvəl ötən ilin avqustunda "2020 QG" meteoriti Yerdən 2 950 km, 2020-ci ilin noyabrında isə "2020 VT4" adlı obyekt cəmi 370 km yüksəklikdən keçib.
1-11-2021, 20:51 | İranda daha 153 nəfər koronavirusdan öldü
İranda ötən sutka ərzində 153 nəfər koronavirusdan (COVID-19) ölüb, 9 857 nəfər yoluxub.
Bunu İranın Səhiyyə, Müalicə və Tibbi Təhsil Nazirliyi elan edib.
Bununla da İranda bu virusdan ölənlərin sayı 126 456 nəfərə, yoluxanların sayı isə 5 934 495 nəfərə çatıb. Virus daşıyıcılarından 3 859 nəfərin vəziyyəti ağır qiymətləndirilir.
İranda indiyədək 5 521 931 nəfər koronavirusdan sağalıb, 35,6 milyondan çox diaqnoz testi həyata keçirilib.
Ümumilikdə, İranda təxminən 88,2 milyon vaksin vurulub. Birinci mərhələ üzrə vaksinasiya olunanların ümumi sayı 52,9 milyon, ikinci mərhələ üzrə vaksinasiya olunanların sayı 35,2 milyon, üçüncü mərhələ üzrə vaksinasiya olunanların sayı 92,8 min təşkil edir.
