15-06-2021, 09:31 | "İnkişaf siyasəti Azərbaycan dövlətinin daimi prioritetidir"

Azərbaycan Prezidenti cənab İlham Əliyev xarici ölkə səfirlərinin etimadnaməsini qəbul etdiyi tədbirdə çıxışı zamanı bir sıra aktual mövzulara toxundu və öz mükəmməl nitqi üzərindən bütün dünyaya növbəti mesajlarını verdi. Dövlət başçısı dəqiq təhlillərə əsaslanaraq qeyd etdi ki, 2-ci Qarabağ savaşındakı qələbədən sonra Azərbaycanın yeni inkişaf mərhələsi başlayıb və həmin mərhələdə ölkəmiz daha böyük uğurlara imza atacaq.

Bunu Trend-ə Milli Məclisin deputatı Elşən Musayev deyib.

Deputat bildirib ki, bizim bu günə qədər ən böyük problemimiz torpaqlarımızın 30 ilə yaxın işğal altında qalması idi: "İndi isə Azərbaycanın suverenliyi tam bərpa olub, doğma Qarabağımız müzəffər Ali Baş Komandan İlham Əliyev və qəhrəman əsgərlərimizin sayəsində işğaldan azad olub. Demək ki, artıq qarşımızda maneə yoxdur, iqtisadi resurslarımız, gücümüz bundan sonra daha da artacaq, mövqeyimiz daha da güclənəcək.

İkinci Qarabağ müharibəsində Azərbaycanın qələbəsi dövlətimiz üçün həm də yeni stimul, mənəvi rahatlıq anlamını daşıyır. Bu stimul, rahatlıq isə işıqlı gələcəyin növbəti müjdəçisidir. Artıq işğaldan azad olunan torpaqlarda yenidənqurma, bərpa işləri gedir. Dövlətimiz bütün gücünü səfərbər edib ki, həmin torpaqlar yenidən dirçəlsin, insanlar tezliklə öz doğma yurd-yuvalarına qayıtsın. Üstəlik, bu planlı işlər olduqca sürətlə gedir. Həm də inanılmaz sürətlə. Ağıllı şəhər və kənd ideyası ilk gündən öz realizəsinə başlayıb, infrastrukrurun qurulması prosesi günbəgün irəliləyir, regiona böyük dövlət sərmayəsi cəlb edilib, yollar çəkilir, elektrik stansiyaları tikilir. Bir azdan Qarabağ çox dəyişəcək, çox gözəlləşəcək. Çünki artıq azaddır, çünki artıq rahat nəfəs alır, çünki artıq onun qeydinə qalan, onun qayğısını çəkən var".

E.Musayev əlavə edib ki, inkişaf siyasəti Azərbaycan dövlətinin daimi prioritetidir: "Ulu Öndər Heydər Əliyevin, möhtərəm Prezidentimiz İlham Əliyevin Azərbaycana rəhbərlik etdiyi dövrdə həmin inkişaf daim hiss edilib, Azərbaycan yalnız irəli gedib, uğurlara imza atıb, zəfər qazanıb. Heç şübhəsiz ki, məlum siyasət bundan sonra da ölkəmizi daha böyük inkişafa doğru aparacaq".

15-06-2021, 09:13 | "Kanal İstanbul" Türk Boğazlarından istifadə edən bütün ölkələr üçün böyük əhəmiyyət daşıyır - Adil Karaismailoğlu

"Kanal İstanbul" layihəsi Türkiyə ilə yanaşı Türk Boğazlarından istifadə edən bütün ölkələr üçün böyük əhəmiyyət daşıyır.

Bunu Trend-ə özəl müsahibəsində Türkiyənin nəqliyyat və infrastruktur naziri Adil Karaismailoğlu bildirib.

A.Karaismailoğlu qeyd edib ki, Türkiyə tarixi imkanları qazanca çevirmək üçün müasir nəqliyyat infrastrukturu yaratmaqdadır.

Nazirin sözlərinə görə, nəqliyyatın bütün sahələrində dünyamiqyaslı layihələr planlaşdırılarkən bölgədəki dəyişən ehtiyaclar və qlobal ticarət inkişafları prioritet olaraq nəzərə alınır və bu baxımdan "Kanal İstanbul"un təcili şəkildə həyata keçirilməsi strateji önəm daşıyır:

"Gəmilərin İstanbul boğazından keçidini tənzimləyən Montrö Boğazlar Konvensiyasının imzalandığı dövrdə boğazdan keçən gəmi sayı ildə 3000-ə yaxın idi. Bu gün, dünya ticarətində və Qara dəniz hövzəsindəki iqtisadi fəaliyyətdə dəniz yollarının əhəmiyyətinin artması səbəbindən, hazırda Bosfor boğazından keçən gəmilərin illik orta sayı 50 mini keçir. Bu rəqəmin növbəti onilliklərdə daha da artacağını və 86 minə çatacağını gözləyirik. Digər tərəfdən gəmilərin həcminin böyüməsi, təhlükəli, zəhərli maddələr daşıyan tankerlərin və onların yüklərinin artması İstanbul üçün ciddi risk qaynağıdır. Bünün bunlar - risklər və gəmi sayında artım "Kanal İstanbul" layihəsinə ciddi ehtiyac olduğunu ortaya qoydu".

A.Karaismailoğlu onu da bildirib ki, "Kanal İstanbul" layihəsi boğazlara düşən yükü azaldacaq və bu layihə sayəsində boğazlarda yükdaşımalarda yaranan tıxaclar və gözləmə müddəti azalacaq.

Nazir yeni kanalda ağıllı naviqasiya sistemlərindən istifadə edilərək gəmilərin tam etibarlı və sürətli keçidinin mümkün olacağını qeyd edib.

Onun sözlərinə görə, İstanbulun Küçükçekmece-Durusu dəhlizində yerləşəcək "Kanal İstanbul"un uzunluğu 45 kilometr, eni minimum 275 metr, dərinliyi təxminən 21 metr olacaq:

"Layihə başa çatdıqdan sonra uzunluğu 275 metr və eni 48 metr olan neft tankerləri, həmçinin uzunluğu 350 metr və eni 49 metr olan konteyner gəmiləri bu kanaldan keçə biləcəklər. "Kanal İstanbul" sayəsində Türkiyə "ticarət gölünə" çevrilmiş Qara dənizin lider ölkəsi olacaq, qlobal ticarətdə daha aktiv rol oynayacaq və beləliklə, beynəlxalq logistika dəhlizlərinin daha böyük bir hissəsini əldə edəcək".

A.Karaismailoğlu bildirib ki, kanalın inşası üçün hazırlıq işləri tamamlanıb və Ətraf Mühitə Təsirin Qiymətləndirilməsi Hesabatının alınması üçün müsbət qərar qəbul edilib.

"Kanalın inşası üçün yaxın zamanda tender elan ediləcək və inşaat prosesinə başlanılacaq. İyun ayında "Kanal İstanbul"da inşa ediləcək ilk körpünün təməlqoyma mərasimini keçirəcəyik"

15-06-2021, 08:06 | Müstəqilliyimizi əbədiyyətə qovuşduran qayıdış

XX əsr Azərbaycan tarixinin önəmli, əlamətdar bir mərhələsi var: 60-cı illərin sonundan başlayan və XXI əsrə adlayan tarixi zaman. İlk baxışda quru statistika və faktlarla dolu, möhtəşəm, ziddiyyətli enişli-yoxuşlu bir dövrün mənzərəsi yaranacaq. Lakin ikicə kəlmə söz tarix səhifələrini canlandırıb, uğurları, itkiləri, tərəqqi və inki­şafı onlarca müfəssəl cədvəldən, araşdırmalardan qat-qat tutumlu əks etdirə bilər: Heydər Əliyev. Tarix salnaməsinin XX əsr üçün taleyüklü səhifələrinin iştirakçısı, yaradıcısı, aparıcısı. 30 ildən artıq Azərbaycanın məsuliyyətini öz çiyinlərində daşıyan, onu bir dövlət, millət kimi tarixin sınaqlarından çıxaran Vətəndaş, Şəxsiyyət, Lider.

Tərəqqisi üçün çalışdığı, mədəniyyəti, keçmişi ilə fəxr etdiyi, nəsillərinin gələcəyi üçün düşündüyü Vətən – Azərbaycan taleyi onun adi insan taleyi ilə əbədi olaraq bağlandı. Azərbaycan üçün Heydər Əliyevin varlığı taleyin Tanrı payıdır.

Mehriban ƏLİYEVA
Azərbaycan Respublikasının Birinci vitse-prezidenti

Dünya siyasətçiləri, tanınmış politoloqlar Heydər Əliyev fenomeninə qiymət verilməsi istiqamətində müxtəlif fikirlər söyləmiş, araşdırmalar aparmışlar. Heydər Əliyevin böyüklüyünü, dünyamiqyaslı lider olduğunu onun siyasi rəqibləri də açıq etiraf edirlər. Zaman keçdikcə, bizi bu böyük insandan ayıran vaxt intervalı artdıqca, onun Azərbaycan üçün, xalqımız üçün etdiyi xidmətlər, gördüyü işlər daha aydın dərk olunacaq, onun Qafqaz regionu, MDB məkanı üçün əhəmiyyəti layiqincə qiymətləndiriləcək. Ümummilli liderimizin tarixi irsi, idarəçilik, dövlət quruculuğu təcrübəsi, konfliktləri həll etmək bacarığı, ölkədə və cəmiyyətdə sülhü və harmoniyanı təmin etmək tədbirləri və s. Azərbaycan və dünya siyasi elmi tərəfindən öyrənilir, tədqiq edilir, ümumiləşdirilir. Bu gün artıq cəsarətlə demək olar ki, Heydər Əliyev irsi dünya siyasi elminin, politoloji fikrin qiymətli nailiyyətinə çevrilib. Heydər Əliyev Azərbaycan xalqının bütün tarixi boyu yetirdiyi ən qüdrətli tarixi şəxsiyyətdir.


Ümummilli lider hakimiyyətə qayıdışı ilə Azərbaycanı inkişaf yoluna çıxardı. Bu gün ölkəmiz beynəlxalq aləmdə sabitlik diyarı, iqtisadiyyatı sürətlə inkişaf edən, demokratik ölkə kimi tanınır və qəbul olunur. Ümummilli lider Heydər Əliyevin əsasını qoydu­ğu düşünülmüş və məqsədyönlü siyasət bu gün Prezident İlham Əliyev tərəfindən uğurla davam etdirilir.

Heydər Əliyev Azərbaycanı dünyanın ən inkişaf etmiş dövlətləri səviyyəsinə çıxarmaq üçün olduqca gərəkli siyasi, iqtisadi qərarlar qəbul etdi. Ulu öndər Azərbaycanın uğurlarının neft strategiyası ilə bağlı oldu­ğunu bilirdi, buna görə də "28 May", "Günəşli" yataqlarının mənimsənilməsi, Dərin Özüllər Zavodunun istifadəyə verilməsi, dənizin Azərbaycan sektorunda yeni neft və qaz yataqlarının kəşfi bu gün əvəzolunmaz bazadır. Yəni ulu öndər imperiyanın milli ruhu sıxdığı illərdə də Azərbaycan üçün müstəsna əhəmiyyəti olan böyük işlər gördü.

Azərbaycan hələ İttifaq tərkibində olanda Heydər Əliyevin təşəbbüsü ilə respublikada nüvə enerjisinin dinc məqsədlərlə istifadəsi üzrə ilk infrastruktur, Radiasiya Tədqiqatları Sektoru ya­radıldı. Ulu öndər nüvə enerjisinin dinc məqsədlərlə istifadəsini həm də iqtisadi inkişafda vasitə bilirdi, elmi işlərin davamlılığına diqqətlə yanaşırdı, onun Azərbaycanda aktual elmi-texniki sahə kimi inkişafına xüsusi şərait yaradırdı. Ozon zavodu, Radiozavod, Məişət Kondisionerləri zavodu və s. kimi nəhəng sənaye müəssisələrinin açılması Azərbaycanın iqtisadi inkişafında mühüm əhəmiyyət kəsb edirdi. Həmin illərdə Azərbaycanda ən müasir və güclü radioizo­top mənbə kompleksi, elektron sürətləndiriciləri, müasir fiziki və kimyəvi laboratoriyalar yaradılmış­dı.

Heydər Əliyev hakimiyyətdə olduğu illərdə kadr siyasətini həmişə diqqətdə saxlayırdı. O illərdə yüzlərlə azərbaycanlı gəncin ittifaqın müxtəlif elm və təhsil ocaqlarında oxumaları təmin edildi. Mənbələrə istinadən deyə bilərik ki, o dövrlərdə Azərbaycan SSRİ-nin nüvə məktəblərində hazırlıq keçən gənclər, universitet, aspirantura təhsili almağa göndərilirdi. Yüzlərlə gənc Moskvanın, Obninskin nüvə sahəsində fəaliyyət göstərən insti­tutlarına da ezam edilmişdi.

Dövrün siyasət nəhəngi kimi tanınan Heydər Əlyev çətinliklə də olsa, Bakıda ibtidai hərbi məktəbin yaradılmasına nail oldu. Bu gün həmin məktəb Cəmşid Naxçıvanski adına Hərbi Lisey adlanır. Bu məktəbin məzunları keçmiş SSRİ-nin müxtəlif ali hərbi məktəblərində, o cümlədən, Bakıda ali hərbi təhsil alırdılar. Məzunların böyük əksəriyyəti istər Birinci Qarabağ müharibəsində, istərsə də Vətən müharibəsində mərdliklə döyüşdü və ali mükafatlara layiq görüldü .

Böyük tarixi şəxsiyyət Heydər Əliyev həmişə xalqa arxala­nırdı, xalqı dövlətçilikdə böyük qüvvə bilirdi. Məhz buna görə Azərbaycanda hakimiyyətdə olduğu illərdə xalqın iradəsinidə, xalqın dövlətçiliyə etimadını da, sədaqətini də yüksək dəyərləndirirdi. Buna görə də azərbaycançılığı ya­şam fəlsəfəsi kimi qəbul edən böyük tarixi şəxsiyyəti xalq son­suz məhəbbətlə sevir, onun hər kəlməsini müdrikcəsinə deyilmiş kəlam bilirdi...

Ermənistanın Azərbaycandan ərazi iddiası, bu iddianı Moskva­nın da dəstəkləməsi, ermənilərin Topxana meşəsində ağacları qıra­raq yerində zavod tikmək niyyəti respublikamızda böyük hiddətlə qarşılanmışdı. O vaxt milli-azadlıq hərəkatı yeni müstəviyə keçiril­di. Bu, ilhaq əleyhinə mübarizə, azadlıq hərəkatı idi. Rus imperiyası bu hərəkatı dayandırmaq üçün faciə törətmək dən də çəkinmədi – 1990-cı ildə 20 yanvar faciəsi törətdi.

“Azadlığı zərrə-zərrə, qram-qram“ istəməyən” (Xəlil Rza Ulu­türk) xalqın mübarizəsi – milli azad­lıq hərəkatı imperiyanı çökdürməklə Azərbaycanın dövlət müstəqilliyini bərpa etməyə yönəldildi. 1991-ci il oktyabrın 18-də Azərbaycanın dövlət müstəqilliyi haqqında Konsti­tusiya Aktı qəbul olundu...

Ötən əsrin sonlarında Azərbaycanda milli-azadlıq hərəkatı dünyada heyrət doğurmuşdu. Nəticədə, Azərbaycanın dövlət müstəqilliyi bərpa edildi. On illər sonra da o hadisələri xatırlayanlar qürurlanır. Yaşı o qürur gününün yaşından az olanlar oxuduqların­dan öyrənir. Hamısı deyir ki, bu günlərimizi, müstəqilliyimizi, azad­lığımızı həmin mübarizlərə borc­luyuq. O mübarizlərin əldə etdiyi müstəqilliyi dahiyanəliklə yaşadan dahi rəhbər Heydər Əliyevə borc­luyuq. Tarix müstəvisinə gətirilən dövlətçiliyi bu günün gəncləri qoru­yurlar. Onlar Vətən müharibəsində də bu amalla döyüşdülər. Ordumuz bu amalın ordusudur. ...

Hansı sahədə işləməsindən, harada təhsil almasından asılı ol­mayaraq, bütün vətəndaşlar Vətən müharibəsində qazanılmış zəfərin 15 İyun – Qurtuluş Günündən başladığını qürurla deyirlər. Böyük İpək Yolu, Bak – Tbilisi – Ceyhan neft kəməri və s. də ulu öndərin Azərbaycan dövləti naminə gördü­yü əvəzsiz xidmətlərdəndir.

Azərbaycanda hakimiyyətdə yaranmış boşluqlar, şəxsi niyyətlər, qarşıdurmalar, qruplaşmalar vəziyyəti vətəndaş müharibəsi həddinə çatdırmışdı. Xalq hiss edirdi ki, belə davam edərsə, Azərbaycan dövlətçiliyi süquta uğraya bilər. Yetmiş bir ildən sonra bərpa edilmiş dövlətçiliyi qorumaq üçün xalq ayağa qalxdı. Vəziyyət kəskinləşəndə – Gəncə hadisələri başlananda Azərbaycan dövlərçiliyinə böyük təhlükə ya­ranmışdı. Onda xalq təkidlə böyük tarixi şəxsiyyət Heydər Əliyevi hakimiyyətə dəvət etdi. Bu dəvət böyük inam idi, Azərbaycan naminə azərbaycançılıq coşqusu idi. Dünya da gördü ki, xalq rəhbərini dönməz məhəbbətlə sevir. Bu, bəşəri məhəbbət idi. Xalqa sonsuz sevgi­si, dönməz inamı ulu öndər Heydər Əliyevi iyunun 9-da Bakıya gətirdi.

Bu, Azərbaycanın real təhlükədən qurtuluşu idi. Ulu öndər ictimaiyyətin coşqusu ilə Gəncəyə getdi, vəziyyəti yerində öyrəndi, xoşagəlməz hadisələrin nədən başladığını dəqiqləşdirdi. Sonra Ba­kıya qayıtdı, reallığın nədən ibarət olduğunu Milli Məclisdə bəyan etdi Doğma xalqını, dövlətini fəlakətdən qurtarmaq üçün Azərbaycan Respublikası Ali Sovetinin Sədri seçilməsinə razılıq verdi.

Beləliklə, böyük tarixi şəxsiyyət Heydər Əliyev xalqın təkidli xahişinə əməl edərək siyasi hakimiyyətə qayıtdı. Həm vətəndaş müharibəsinin qarşısı alındı – dövlətçilik xilas edildi, həm də Azərbaycanın inkişafına real zəmin hazırlandı. Azərbaycan iqtisadi inkişaf mərhələsinə qədəm qoydu. Sonra Azərbaycanın dünyanın apa­rıcı dövlətləri ilə ikitərəfli, çoxtərəfli iqtisadi əlaqələri formalaşdı. Ordu quruculuğunda əsaslı islahatlara başlanıldı – yerli müdafiə batal­yonları ləğv edildi, orduda vahid komandanlıq yarandı. Az sonra ulu öndərin sərkərdəliyi ilə hücum əməliyyatı hazırlandı. Horadiz əməliyyatı qələbə ilə başa çatdı, ordumuz neçə kəndi, o cümlədən, bu gün yenidən qurulmuş Cocuq Mərcanlı kəndini işğaldan azad etdi. Şəxsi heyətin qələbə ruhu kükrədi, ordu da, ictimaiyyət də inandı ki, Azərbaycan Ordusu torpaqlarımızı işğaldan azad edəcəkdir.

Ulu öndər Heydər Əliyevin hakimiyyətə qayıdışı ilə dünya birliyi Azərbaycan reallıqlarını qəbul etdi, Azərbaycan əksər beynəlxalq qurumda təmsil olundu...

Azərbaycan gənc dövlət idi və onun inkişafı üçün mühüm islahat­lar keçirilməli idi. Ulu öndər bunu dahiyanəliklə, mərhələlərlə həyata keçirdi. Atəşkəs elan edilsə də, Azərbaycanda müharibə şəraiti davam edirdi. Prezident Heydər Əliyev deyirdi: “Bu gün qürur hissi ilə deyə bilərik ki, Azərbaycanda yeni bir sistem yaranıbdır. Dün­ya standartlarına yaxınlaşan, dünya standartlarına çatmağa çalışan hüquqi, demokratik, dünyəvi dövlət yaranıbdır. Budur bizim nailiyyətimiz... Bu, bütün sahələrdə özünü göstərir. Bizim Konstitusiyamız, qəbul etdiyimiz qanunlar, onların icrası, cəmiyyətə bütün sahələrdə verilən azadlıq, sərbəstlik – bunlar hamısı bizim dövlətçilik anlayışımızın tərkib hissələridir”.

Böyük tarixi şəxsiyyət Heydər Əliyevin ideyalarını Azərbycan Res­publikasının Prezidenti cənab İlham Əliyev böyük məsuliyyət, sonsuz sədaqət və sevgiylə davam etdirir. Ölkə başçısının daxili və xarici siyasəti Heydər Əliyev ideyalarının yaşarlılığını sübut edir.

Müasir Azərbaycan gəncliyi Qurtuluş Günü kimi tarixləşən gü­nün mahiyyətini yaşam fəlsəfəsi bi­lir, onun mahiyyətini düşüncəsindən ürəyinə köçürüb. Azərbaycanın dövlət müstəqilliyini də, ərazi bütövlüyünü də qorumaq onların vətəndaşlıq borcudur.

Vətən müharibəsi zəfərlə başa çatdı. Bu zəfər Azərbaycan Respublikasının Prezidenti Cənab İlham Əliyevin sərkərdəliyi ilə, ulu öndər Heydər Əliyevin formalaş­dırdığı Azərbaycan Ordusunun döyüş qabiliyyəti ilə, xalqın orduya güvənci, ordunun isə xalqa ar­xalanması ilə əldə edildi. Bütün bunlar 15 İyun – Qurtuluş Gününün davamıdır...

Müasir Azərbaycan ulu öndər Heydər Əliyevin şah əsəridir.


İlham Çıraqov ,
Laçın Rayon Çıraqlı kənd tam orta məktəbinin direktor.

15-06-2021, 07:21 | Vətənə sədaqətli xidmət nümunəsi

Əgər o vaxt, 1993-cü ildə Heydər Əliyev xalqın tələbi ilə Azərbaycana hakimiyyətə qayıtmasaydı, ölkə parçalana bilərdi. Demək olar ki, ölkə dünyada gedən bütün proseslərdən təcrid olunmuş vəziyyətdə idi. O çətin dövrdə, çətin vəziyyətdə onun nə silahı var idi, nə ordusu var idi, nə də dəstəsi var idi. Yalnız siyasi iradəsi, bir də xalqın inamı, dəstəyi var idi. O, bu dəstəyə arxalanaraq, on il ərzində Azərbaycanı böhrandan tərəqqiyə gətirdi. Bu gün Azərbaycan inamla irəliləyir, Azərbaycanın bütün sahələri inkişaf edir.

İlham ƏLİYEV
Azərbaycan Respublikasının Prezidenti



Hər bir xalq yaratdıqlarına görə tarixə düşür. Hər bir tarixi şəxsiyyət də xidmətlərinə görə tanınır və dillər əzbəri olur. Azərbaycan xalqı da tarix boyu ədalətinə və tolerantlığına görə dünya xalqları içərisində böyük nüfuz qazanıb.


Dünyanın qədim dövlətləri sırasında yer alan Manna, Albani­ya, Atropatena öz müstəqilliklərini qorumaq üçün düşmənə hər cür müqavimət göstərmiş və bu gün xalqımızın öyünməsi üçün şərəfli bir tarix miras qoymuşlar. Orta əsrlərin Eldənizlər, Qaraqoyunlu, Ağqoyunlu və nəhayət, Səfəvilər dövləti Şərqin ən qüdrətli dövlətləri sırasında yer ala bildilər. Səfəvilər dövləti bir az da irəli gedərək imperiya yaratmağa nail oldu. Azərbaycan xalqı bu dövlətin yaradıcısı Şah İsmayıl Xətaini min illərdir ki, tariximizin qəhrəmanı kimi anır və müstəqilliyimiz dövründə onun şərəfinə abidələr ucaldır.

Azərbaycan Xalq Cümhuriyyətinin qurucuları olan milli-demokratik ziyalılarımız müsəlman Şərqində ilk parlamentli respublikanın baniləri kimi tarixə düşdülər. İyirmi üç ay yaşayan bu dövlət 350 ilkə imza atmağa müvəffəq olmuşdu.

1920-ci ilin aprelindən sonra Azərbaycan müstəqil dövlət kimi yox, müttəfiq dövlət kimi fəaliyyət göstərməyə başladı. Hər bir müttəfiq respublika nəhəng sovet dövlətindən yararlanmaq istəyirdi. Bu daha çox müttəfiq respublikaya rəhbərlik edən şəxsdən asılı idi.

Heydər Əlirza oğlu Əliyev 1969-cu ilin iyulun­dan Azərbaycana rəhbərlik etməyə başladı. Həmin ilin martında mərkəzin tapşırığı ilə Azərbaycan SSR Ali Soveti Rəyasət Heyəti dörd min kvadrat kilometr Azərbaycan torpağının Ermənistana verilməsi haqqında qərar çıxartdı. Heydər Əliyev bütün hakimiyyəti dövründə bu qərarın icra olunmasına imkan vermədi.

1919-cu ildə əsası qoyulan Bakı Dövlət Universitetinin 50 illik yubi­leyi 1969-cu ildə keçirildi. Yubiley toplantısına rəhbərlik edən Heydər Əliyev öz nitqinə Azərbaycan dilində başladı. Bu o dövr üçün çox böyük siyasi hadisə idi.

Azərbaycanı aqrar ölkədən sənaye-aqrar ölkəsinə çevirən respublika rəhbəri ölkədə hərbi məktəb yaratmaq üçün uzun illər mübarizə apardı və istəyinə nail oldu. Azərbaycanda keyfiyyətli ziyalı ordusu yaratmaq üçün hər il minlərlə Azərbaycan gəncini SSRİ-nin ən nufuzlu ali məktəblərinə göndərməyə nail oldu.

1977-ci ildə SSRİ-nin növbəti Konstitusiyası qəbul edildi. Məqsəd ondan ibarət idi ki, müttəfiq dövlətlər milli dil məsələsində israr etməsinlər. Heydər Əliyev mərkəzin bütün təzyiqlərinə baxmayaraq, 1978-ci il Konstitusiyasında Azərbaycan dilinin dövlət dili kimi təsbit olun­masına nail oldu.

Ulu öndərə qədər Azərbaycan xalqının milli sərvəti olan neft və qaz qonşu respublikalara onların sərvəti kimi verilirdi. Heydər Əliyev mərkəzin bu siyasətini respublika­nın xeyrinə dəyişməyə nail oldu.

Heydər Əliyevə qədər hərbi xidmətə çağırılan azərbaycanlı gənclərin demək olar ki, əksəriyyəti tikinti batalyonlarına göndərilirdi. Ümummilli lider bu sahədə də dönüş yarada bildi. Azərbaycanlı gənclər də müa­sir silahlarla təchiz edilən hərbi hissələrdə xidmət etməyə başla­dılar.

Azərbaycan neftinin gələcək taleyini uzaqgörən siyasəti ilə müəyyən edən Heydər Əliyev Dərin Özüllər Zavodunun tikilməsinə nail oldu. Azərbaycan yenidən öz dövlət müstəqilliyini bərpa etdikdən sonra daha aydın görünən Heydər Əliyevin uzaqgörən siyasətinə heyran qal­mamaq olmur.

Respublikamızı uğurlu və ba­carıqlı siyasəti ilə müttəfiq respub­likalar arasında birincilərdən edən Heydər Əliyevin sovet dövlətinin idarəçiliyində də böyük xidmətləri olmuşdur. Heydər Əliyev yeganə türk-müsəlmandır ki, 70 ildən çox fəaliyyət göstərən bu dövləti idarə edənlərdən biri olmuşdur. Əgər imkan versəydilər, bu dövləti idarə edən birinci şəxs də ola bilərdi.

Sovet dövlətinin süqutundan sonra Heydər Əliyev Moskvada yox, Azərbaycanda öz xalqının yanında olmaq istəyirdi.1990-cı il 20 Yanvar qırğını göstərdi ki, Azərbaycan xalqı köməksiz vəziyyətdədir. Xalqın tələbi ilə hakimiyyətin istəyi üst-üstə düş­mürdü. Düşmən tərəf öz havadar­larının gücündən istifadə edərək, Azərbaycanın tarixi torpaqlarına sahib olmaq istəyirdi. Hakimiyyət bunları fikirləşə bilmir, Heydər Əliyevin Azərbaycana dönüşünü əngəlləmək üçün planlar hazır­layırdı. Azərbaycandan uzaq düşən Naxçıvan ağır blokada həyatı yaşamaqda idi. Heydər Əliyev Naxçıvanın harayına çatdı, bütün çətinliklərə baxmayaraq, əhalini həmin vəziyyətdən qurtara bildi. Qısa müddət ərzində qonşu dövlətlərlə səmimi münasibətlər qurmağa nail ola bildi. Muxtar respublikanın əhalisini inandı­ra bildi ki, Naxçıvanın bir qarış torpağı da düşmənə güzəştə gedilməyəcək. Bakıda hakimiyyət uğrunda mübarizə qızışan vaxtda Heydər Əliyev Azərbaycan Xalq Cümhuriyyətinin dövlət rəmzlərinin bərpası haqqında Naxçıvan Ali Məclisinin qərarını qəbul etdi.

1991-ci ilin oktyabında böyük fərəhlə Dövlət müstəqilliyi haqqın­da Konstitusiya aktı qəbul edən Azərbaycan xalqı 1993-cü ilin yayında çətin günlərini yaşayırdı. Düşmən Şuşanı, Laçını, Kəlbəcəri işğal etdi, Qarabağ və ətraf rayon­lar üçün böyük təhlükə yarandı. 20 Yanvar qırğınının mahiyyətini dünyaya çatdırmamış, Xocalı soy­qırımını yaşamağa məcbur edildik. Vətəndaş müharibəsinin ilk işar­tıları Azərbaycanı təhdid etməyə başladı. Hakimiyyət hərisləri ölkəni parçalanmaq və işğal təhlükəsi ilə üz-üzə qoydular. Hamı, hətta, siya­si hakimiyyət də ümidini Naxçıva­na bağlayır və nicat yolunu orada axtarırdı.

Heydər Əliyev xalqın təkidli tələbi ilə Azərbaycanı qurtar­maq üçün Bakıya çağırıldı. O, Azərbaycanı, onun bölgələrini parçalanmaq təhlükəsindən qurtarmaq üçün Bakıya köməyə gəldi. Düşmən yeni torpaqlar işğal edə bilməsin deyə, güclü liderə, Ali Baş Komandana ehtiyac var idi. Cümhuriyyətin acı taleyini yaşamamaq üçün qüdrətli dövlət başçısına ehtiyac var idi. Naxçı­vanda yenidən qaldırılan və bütün Azərbaycana şərəf gətirən üçrəngli bayrağı əbədi etmək üçün ümum­milli liderə hava, su qədər ehtiyac var idi. Heydər Əliyev də gəldi. İllərlə rəhbərlik etdiyi xalqının ən çətin günlərində onun yanında oldu.Heç bir təhlükə və heç bir təhdid onu yolundan döndərə bilmədi. Ulu öndər dağılmaq təhlükəsi ilə üz-üzə dayanan dövlətçiliyimizin sükanı arxasına keçdi və bu yolda əngəl olan bütün qüvvələri öz zəngin təcrübəsi və bacarığı ilə aradan qaldırdı.15 İyuna gələn yolun siyasi mənzərəsi bu şəkildə idi. Heydər Əliyev bu yolu xilas etdiyi kimi, 15 İyundan sonra da şərəfli bir tarixin əsasını qoydu. Ölkədə daxili sabitliyə nail oldu. Dövlət çevrilişləri cəhdləri zərərsizləşdirildi, təcavüzkar Ermənistanla atəşkəsə, Bakı neftini dünya bazarına çıxarmaq üçün “Əsrin müqaviləsi”ni imza­lamağa nail oldu, Azərbaycanı müəyyən təhdidlərdən qorumaq üçün Müstəqil Dövlətlər Birliyinə üzv qəbul etdirdi. 1990-cı il 20 Yanvar və Xocalı soyqırımına siyasi qiymət verilməsinə nail oldu, 31 Martın Azərbaycanlıların Soyqırımı Günü kimi təsbit edilməsinə, azərbaycanlıların Ermənistan SSR-dən deportasi­ya olunması haqqında fərmanın aşkara çıxmasına, Azərbaycanda ölüm hökmünün və senzura­nın ləğv edilməsinə nail oldu. ATƏT-in Lissabon Sammitində bu beynəlxalq təşkilatın 54 üzvündən 53-nün (Ermənistandan başqa) Dağlıq Qarabağ proble­minin həllində Azərbaycanın milli maraqlarına uyğun prinsiplərin açıq şəkildə müdafiə olunmasına, Azərbaycanın Avropa Parlament Şurasına üzv qəbul edilməsinə müvəffəq oldu.

Heydər Əliyev müstəqil dövlətin ilk Konstitusiyasının yaradılma­sına və ilk parlament seçkilərinin keçirilməsinə nail oldu. Aqrar islahatları həyata keçirməklə torpa­ğın təmənnasız şəkildə kəndlilərə verilməsinə nail oldu. Qonşu dövlətlərlə, o cümlədən, dünyanın nüfuzlu ölkələri ilə balanslaşdırıl­mış siyasətin həyata keçirilməsini, BMT-nin ali tribunasından Ermənistanın Azərbaycana qarşı təcavüzkar siyasətinin ifşa olunma­sını reallaşdırdı. Azərbaycançılıq ideologiyasının və “Bir millət, iki dövlət” konsepsiyasının həyata keçirilməsinə, Azərbaycanın müstəqilliyini əbədi etmək üçün bütün gücünü və bacarığını bu işə yönəltməyə nail oldu.

Ermənistanın Azərbaycana qarşı təcavüzünə qarşı mübarizə Heydər Əliyev siyasətinin ardıcıl da­vamçısı, möhtərəm Prezidentimiz İlham Əliyev tərəfindən uğurla davam etdirilir. Ermənistanın təcavüzkar siyasətinin kəskin tənqidi, Azərbaycanın haqq işinin nüfuzlu beynəlxalq təşkilatlar tərəfindən müdafiə olunması, güclü orduya və müasir silahlara malik olmağımız, xalq tərəfindən dövlətin siyasətinə hərtərəfli dəstək 2020-ci il sentyabrın sonlarında ölkəmizi öz ərazi bütövlüyünü təmin etmək üçün Vətən müharibəsinə başlama­ğa məcbur etdi. 44 günlük Vətən müharibəsi nəticəsində Azərbaycan öz ərazi bütövlüyünü təmin etdi. Düşmən ordusunu diz çökdürərək onu kapitulyasiya sənədini imzala­mağa məcbur etdi. 15 İyun öz tarixi nəticəsini verdi.

Bu gün ümummilli lider Heydər Əliyevin böyük dövlətçilik siyasəti dövlət başçısı İlham Əliyev tərəfindən uğurla davam etdirilir. Qarabağ Azərbaycandır!

Kərim Tahirov,
Azərbaycan Milli Kitabxanasının direktoru, Əməkdar mədəniyyət işçisi. Professor.

15-06-2021, 07:02 | Rəcəb Tayyib Ərdoğan Azərbaycana rəsmi səfərə gəlib - FOTO

Türkiyə Respublikasının Prezidenti Rəcəb Tayyib Ərdoğan iyunun 15-də Azərbaycan Respublikasına rəsmi səfərə gəlib.

AZƏRTAC bildirir ki, hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülmüşdü.

Türkiyə Prezidenti Rəcəb Tayyib Ərdoğanı və xanımı Əminə Ərdoğanı hava limanında Azərbaycan Respublikası Baş nazirinin birinci müavini Yaqub Eyyubov, xarici işlər nazirinin müavini Xələf Xələfov və digər rəsmi şəxslər qarşıladılar.

15-06-2021, 06:49 | Prezident İlham Əliyev Milli Qurtuluş Günü münasibətilə paylaşım edib - FOTO

Prezident İlham Əliyev rəsmi "Tvitter" səhifəsində Milli Qurtuluş Günü münasibətilə paylaşım edib.

AZƏRTAC bildirir ki, paylaşımda Ümummilli lider Heydər Əliyevin "Bizim ən böyük vəzifəmiz Azərbaycanın dövlət müstəqilliyini qorumaq, saxlamaq, möhkəmləndirmək, inkişaf etdirmək və onu əbədi etməkdir", - şüarı yer alıb.

15-06-2021, 06:43 | Azərbaycanda Milli Qurtuluş Günüdür

Bu gün Azərbaycanda Milli Qurtuluş Günü qeyd olunur.

Düz 28 il əvvəl - Milli Məclisin 1993-cü il iyunun 15-də keçirilən iclasındakı çıxışında ulu öndər Heydər Əliyev Azərbaycan dövlətçiliyinin gələcək inkişaf strategiyasını elan edib və bu gün Azərbaycan tarixinə Milli Qurtuluş Günü kimi daxil olub, Azərbaycan dövlətçiliyi yox olmaq təhlükəsindən qurtulub.

Həmin gün Azərbaycan xalqının tələbi ilə ikinci dəfə hakimiyyətə qayıdan Heydər Əliyev Ali Sovetin sədri seçilib. Bununla da uzun illər davam edən gərginlik və qarşıdurma səngiyib və ölkə vətəndaş müharibəsi və parçalanma təhlükəsindən xilas olub. Milli qurtuluş fəlsəfəsi sözün geniş mənasında Azərbaycanın mövcudluğunu, onun ən böyük tarixi nailiyyəti olan müstəqilliyini təmin edir.

Əgər müstəqilliyi qazanmaq ilkin şərt idisə, ikinci vacib məsələ suverenliyi qoruyub inkişaf etdirmək idi və bu ümummilli liderin iradəsi sayəsində reallığa çevrildi. O, Milli Azərbaycan dövlətçiliyi konsepsiyasını yaratdı. Bütün maneələrə baxmayaraq, ən qısa müddətdə ölkədə ictimai-siyasi sabitlik bərpa olundu.

Heydər Əliyev 1993-cü il iyunun 20-də Azərbaycan həqiqətlərinin dünya ictimaiyyətinə çatdırılması üçün yerli və xarici jurnalistlər üçün brifinq keçirdi, iyunun 21-də isə bir sıra ölkələrin diplomatları ilə görüşdü. Bu sahədə yürüdülən siyasət respublikanı informasiya blokadasından çıxardı. Dünyada Azərbaycanla bağlı formalaşan fikri müsbət yöndə dəyişdi. Məhz belə bir mürəkkəb siyasi şəraitdə Heydər Əliyevin böyük potensialı Azərbaycanın müstəqilliyinin qarantına çevrildi. Ümummilli liderin şəxsiyyəti, onun özünəməxsus siyasi idarəetmə qabiliyyəti, qətiyyəti və xarizması siyasi böhrana son qoydu və Azərbaycanın dünya birliyinə inteqrasiyası başlandı.

1997-ci ildə Milli Məclisin deputatları 15 iyun tarixinin təqvimə Azərbaycan Respubıikasının Milli Qurtuluş Günü kimi salınması təklifi ilə çıxış ediblər və parlament bu təklifi bəyənib. Həmin vaxtdan Heydər Əliyevin yenidən hakimiyyətə qayıdışı Milli Qurtuluş Günü kimi qeyd edilir.

Bu il ilk dəfədir ki, Azərbaycan xalqı Milli Qurtuluş Gününü ölkəmizin ərazi bütövlüyü şəraitində qeyd edir. Azərbaycanın 44 günlük Vətən müharibəsində şanlı qələbəsi məhz Ümummilli Lider Heydər Əliyevin ölkəyə yenidən rəhbərliyə qayıtdığı vaxtdan başlanılan genişmiqyaslı dövlətçilik, quruculuq, iqtisadiyyatın inkişaf etdirilməsi, ordunun gücləndirilməsi işlərindən başlayıb.

Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə 44 günlük Vətən müharibəsi ilə torpaqlarımızın işğaldan azad edilməsi çoxəsrlik Azərbaycan tarixinin çox şərəfli səhifəsidir. Bu Zəfər Ulu öndər Heydər Əliyevin müstəqil dövlətçilik ideallarının böyük təntənəsidir.

4-06-2021, 08:00 | Azərbaycan yaranan fürsətdən istifadə etməyi bacardı - ŞƏRH

"Azərbaycanın pandemiya ilə milli və qlobal müstəvidə gedən mübarizəyə verdiyi töhfələr, göstərdiyi təşəbbüslər və bunun nəticələri həqiqətən təqdirəlayiqdir və dünya üçün çox maraqlıdır".

Bunu milli.az-a açıqlamasında "Bakı xəbər" qəzetinin baş redaktoru, siyasi ekspert Aydın Quliyev deyib.

O bildirib ki, Azərbaycan o ölkələrdən olub ki, özünün gücünü və təşəbbüslərini təkcə milli səviyyədə sərf etməyib:

"Biz artıq dəfələrlə müxtəlif dünya tribunalarında Azərbaycanın bu saydığım istiqamətlərdə əldə etdiyi nəticələrin nə qədər böyük rol oynadığına lazımı qiymət verildiyinin şahidi olmuşuq və ölkə Prezidenti başda olmaqla müvafiq orqanların işi yüksək səviyyədə qeyd edilib. Ümumdünya Səhiyy Təşkilatının (ÜST) sonuncu videokonfransında Azərbaycan Prezidentinin etdiyi çıxışa da ölkəmizin bu yöndə əldə etdiyi nəticələrin dünya miqyasında növbəti dəfə və daha detallı təqdimatı üçün bir fürsət kimi baxmaq lazımdır.



Ədalət xatirinə demək lazımdır ki, bu fürsətdən Prezident İlham Əliyev dövlət və cəmiyyət mənafeləri naminə maksimum faydalandı və Azərbaycanın əldə etdiyi nailiyyətlərin dünya auditoriyası üçün təqdimatına verilən fürsətdən tam şəkildə istifadə olundu. Dünya bir daha eşitdi ki, pandemiya ilə mübarizədə Azərbaycan tək-tək ölkələrdən olub ki, özünün gücünü və təşəbbüslərini təkcə milli miqyasda, milli səviyyədə sərf etməyib, eyni zamanda qlobal səylərin birləşdirilməsinə və qlobal arenada pandemiya ilə mübarizə təcrübəsinin modelinin formalaşdırılmasına öz töhfəsini verib".

A.Quliyev deyib ki, Ümumdünya Səhiyyə Assambleyasının 74-cü sessiyasında Azərbaycan bir daha mövqeyini ortaya qoydu:

"Ölkəmizin sözsüz ki, ÜST-ə göstərdiyi birbaşa maliyyə yardımı (10 milyon dollar), eləcə də 30-dan artıq dünya ölkəsinə pandemiya ilə mübarizədə göstərdiyi müxtəlif səpgili dəstəklər barədə informasiyanın bu tribunada ölkə Prezidenti tərəfindən səsləndirilməsi ölkəmizin dünyadakı nüfuzuna və reytinqinə bir fayda gətirdi. Bundan başqa, Azərbaycan Prezidentinin qlobal müstəvidə pandemiya ilə mübarizə istiqamətində indiyə qədər göstərdiyi təşəbbüslərin sırasında ən qiymətlilərindən biri olan vaksinin ədalətli bölgüsü sahəsində mövqeyini bir daha ifadə etdi.



Dünya bir daha eşitdi ki, pandemiya ilə mübarizədə vaksinin ədalətlə bölünməsi dünyanın bütün ölkələrinin vaksinə bərabər çıxış imkanlarının təmin olunması, vaksin millətçiliyinin yolverilməzliyi ilə bağlı Azərbaycanın prinsipial mövqeyi var və bu mövqeni artıq 1 ildən çoxdur ki, Azərbaycan davam etdirir. Xüsusilə də Qoşulmama Hərəkatının pandemiya ilə mübarizə sahəsində ayrıca konfransının keçirilməsi, türk dövlət başçılarının Zirvəsində bu məsələnin müzakirə olunması, eləcə də Azərbaycanın təşəbbüsü ilə BMT-nin xüsusi sessiyasının keçirilməsi vaksin ədalətsizliyinə qarşı mübarizədə Azərbaycanın nə qədər prinsipial mövqe tutduğunu bir daha nümayiş etdirir. Çox təqdirəlayiq haldır ki, Azərbaycan Prezidenti çıxışının əsas leytmotivi olaraq dünya ölkələrinin vaksin ədalətsizliyinə qarşı mübarizədə qüvvələrinin və səylərinin birləşdirilməsi çağırışını bu konfransda bir daha etdi. Və düşünürəm ki, bu çağırış dünya dövlətlərinin vaksin ədalətsizliyi siyasətini aparan ölkələrə qarşı vahid bir platformasının formalaşdırılmasında öz təsirini göstərəcək".

Təhməz Əsədov

2-06-2021, 20:23 | Prezident İlham Əliyev Si Cinpin ilə telefonla danışıb

İyunun 2-də Azərbaycan Respublikasının Prezidenti İlham Əliyev ilə Çin Xalq Respublikasının Sədri Si Cinpin arasında telefon söhbəti olub.

AZƏRTAC bildirir ki, dövlət başçıları COVID-19 pandemiyası dövründə Azərbaycan və Çinin həqiqi dostluq nümayiş etdirərək, çətinliklərin öhdəsindən gəldiklərini və bir-birini dəstəklədiklərini məmnunluqla qeyd ediblər. Prezident İlham Əliyev COVID-19 pandemiyası ilə mübarizədə dəstəyə görə ÇXR Sədrinə təşəkkürünü bildirib.

Qeyd olunub ki, Azərbaycan və Çin siyasi, iqtisadi və nəqliyyat-logistika sahələrində uğurla əməkdaşlıq edirlər. Dövlətimizin başçısı Azərbaycanın Çinlə əlaqələri daha da möhkəmləndirməyə hazır olduğunu qeyd edib və Çin şirkətlərinin Azərbaycanda fəaliyyətinin daha da genişləndirilməsini alqışlayıb.

Prezident İlham Əliyev Çin Kommunist Partiyasının yaranmasının 100 illiyi münasibətilə səmimi təbriklərini ÇXR Sədri Si Cinpinə çatdırıb.

Si Cinpin Çin-Azərbaycan münasibətlərinin yeni tarixi mərhələnin astanasında olduğunu vurğulayıb və bildirib ki, hər iki ölkə ənənəvi dostluğu inkişaf etdirir, əməkdaşlığı dərinləşdirir və qarşılıqlı dəstəyi artırır. ÇXR Sədri Azərbaycanın "Bir kəmər bir yol" təşəbbüsünün reallaşdırılması istiqamətində vacib tərəfdaş olduğunu və Çinin Azərbaycan xalqının seçdiyi inkişaf yolunu dəstəklədiyini vurğulayıb.

Dövlət başçıları qeyd ediblər ki, 2022-ci ildə iki ölkə arasında diplomatik münasibətlərin yaradılmasının 30 illiyi qeyd olunacaq və bu əlamətdar hadisə iki ölkə arasında əlaqələrin daha da inkişafına imkan yaradacaqdır.

Dövlət başçıları hər iki ölkənin "Bir kəmər bir yol" layihəsinin inkişafı çərçivəsində fəaliyyətlərin birgə əlaqələndirilməsinin və mövcud imkanlardan faydalanmağın əhəmiyyətinə toxunublar. Həmçinin, iki ölkənin nəqliyyat və logistika sahəsində əməkdaşlığı dərinləşdirməsinin, Mərkəzi Asiya və Avropada nəqliyyat dəhlizlərinin yaradılmasını təşviq etməsinin zəruriliyi qeyd olunub.

Si Cinpin Çin şirkətlərinin Azərbaycana investisiya qoyuluşunu daha da təşviq etməyə, infrastruktur layihələri çərçivəsində əməkdaşlığı inkişaf etdirməyə hazır olduqlarını bildirib.

Söhbət əsnasında iki ölkənin hərtərəfli strateji tərəfdaşlıq əlaqələrinin inkişafını təşviq etmək üçün birgə səylər göstərməyə hazır olduğu qeyd edilib.

Dövlət başçıları qarşılıqlı olaraq ölkələrinin ərazi bütövlüyü və suverenliyinə dəstəklərini ifadə ediblər.

Prezident İlham Əliyev 2022-ci ildə keçiriləcək Pekin Qış Olimpiya və Paralimpiya Oyunlarının təşkilində Çin Xalq Respublikasına müvəffəqiyyətlər arzulayıb.

2-06-2021, 07:51 | Bölgədəki atəşkəs şəraitində Fransanın hər hansı rolunu görmürük - Leyla Abdullayeva

Öncə vurğulamaq istərdik ki, bölgədə atəşkəs təmin edilir və bunun əsasında Azərbaycan, Ermənistan və Rusiya liderlərinin 2020-ci il noyabrın 10-da imzaladığı birgə Bəyanat dayanır. Azərbaycan ərazisində müvəqqəti yerləşən Rusiya sülhməramlı qüvvələri sülhməramlı missiyanı yerinə yetirərək atəşkəsin təmin olunmasına çalışırlar. Bu məsələdə Fransanın hər hansı rolunu görmürük.

Bunu Azərbaycan Respublikası Xarici İşlər Nazirliyinin Mətbuat xidməti idarəsinin rəisi Leyla Abdullayeva Fransa Prezidenti Emanuel Makronun Ermənistan baş naziri ilə birgə mətbuat brifinqində səsləndirdiyi fikirlərə münasibət bildirərkən deyib.

Leyla Abdullayeva bildirib ki, Azərbaycan tərəfi hər zaman bütün hərbi əsirlərin "hamının hamıya" prinsipi əsasında dəyişdirilməsi mövqeyindən çıxış edib. Dəfələrlə bəyan etdiyimiz kimi, Azərbaycanda erməni əsilli hərbi əsir yoxdur, o ki, qaldı üçtərəfli Bəyanat imzalandıqdan sonra 2020-ci il noyabrın 26-da Azərbaycan ərazisinə göndərilən və burada terror aktı törədən diversant qrupun üzvlərinə, habelə mayın 27-də Kəlbəcər rayonu istiqamətində ərazimizə daxil olaraq yolların minalanmasına yönələn təxribatçı fəaliyyət cəhdi göstərən kəşfiyyat-diversiya qrupunun üzvlərinə, onlar hərbi əsir deyillər.

Ermənistan tərəfindən itkin düşmüş erməni əsgərləri ilə bağlı irəli sürülmüş saxta ittihamlar ilə bağlı qeyd etmək istərdik ki, bu günlərdə Ermənistanda aşkar edildiyi kimi itkin düşmüş erməni əsgərləri morqların birində soyuducuda saxlanılır və bu da Ermənistanda böyük qalmaqala səbəb olub. Azərbaycan isə öz tərəfindən humanitar prinsiplərdən çıxış edərək 1600-ə yaxın erməni hərbçisinin cəsədlərini tapmışdır və bu prosesdə Rusiya sülhməramlıları və Beynəlxalq Qızıl Xaç iştirak ediblər. Erməni əsgərlərinin cəsədləri qarşı tərəfə təhvil verilib. Lakin hələ 1-ci Qarabağ müharibəsi zamanı itkin düşmüş 4000-dək azərbaycanlı barədə məlumat bu günədək Ermənistan tərəfindən verilməyib.

Fransa Prezidentinin çıxışında müsəlman abidələrinin də bərpa olunmasına dair fikrini alqışlayırıq. Lakin Fransa Prezidentinin çıxışında istinad etdiyi Dağlıq Qarabağ adı ilə bağlı vurğulamaq istərdik ki, belə bir inzibati ərazi vahidi mövcud deyil.

Çıxışda istinad edilən birbaşa dialoq məsələsinə gəldikdə, bu artıq baş verir. 2021-ci il yanvarın 11-də Azərbaycan, Ermənistan və Rusiya liderlərinin imzaladığı Bəyanata istinadən baş nazirlərin müavinləri səviyyəsində görüşlər keçirilir və dialoq mövcuddur. Lakin Fransanın bu prosesdə hər hansı rolu yoxdur.

Delimitasiya və demarkasiya prosesinə gəldikdə, bəyan etdiyimiz kimi, Azərbaycan delimitasiya prosesinə başlamağı dəstəkləyir və bu proses danışıqlar yolu ilə öz həllini tapmalıdır.

Bir daha da qeyd etmək istərdik ki, Azərbaycan hərbiçiləri öz doğma torpaqlarında xidmət göstərirlər. Təəssüf hissi ilə qeyd etmək istərdik ki, 1997-ci ildən Fransa həmsədr qismində fəaliyyət göstərsə də Fransa tərəfindən heç zaman Ermənistan qoşunlarının işğal altında olan Azərbaycan torpaqlarından çıxarılması ilə əlaqədar çağırış edilməyib. Baxmayaraq ki, bu BMT Təhlükəsizlik Şurasının müvafiq qətnamələrinin tələbi idi.

Sərhəd məsələlərinin müzakirələr yolu ilə həll edilməsinə gəlincə bildirmək istərdik ki, Azərbaycan münaqişənin danışıqlar yolu ilə həllinin daim tərəfdarı olub və 28 il danışıqlar prosesində iştirak edib. Odur ki, Azərbaycan hər zaman müzakirələrə və danışıqlar prosesinə açıqdır.

Fransanın qəti şəkildə regiona qayıtması barədə açıqlama isə anlaşılan deyildir. Fransa həmsədr ölkədir və bu statusda 1997-ci ildən regional proseslərdə iştirak edir. Ona görə də bu açıqlama anlaşılan deyil.

Sirr deyil ki, Fransanın Ermənistana xüsusi rəğbəti vardır, amma Minsk Qrupunun həmsədri kimi bu ölkə rəsmi neytrallığını saxlamalıdır. Ümid edirik ki, həmsədrlik mandatına uyğun olaraq Fransa tərəfindən neytral və qərəzsiz mövqe sərgilənəcəkdir.

Milli.Az