8-05-2021, 07:54 | Nurlana Əliyeva YOLA SALINIR... - İDDİA
Aprelin 29-da Azərbaycanın müxtəlif mətbu orqanlarında Bakı Slavyan Universitetində “140 min manatı mənimsəyən şöbə müdirinə cinayət işi açıldı” sərlövhəli yazılar dərc edilib.
Bu informasiyaya cavab olaraq universitetdən bildirilib ki, BSU-nun rektoru, professor Nurlana Əliyeva bu ali təhsil müəssisəsinin “Əlavə və qiyabi təhsil şöbəsi”nin sabiq müdiri, dosent Dürdanə Əliyevanın çoxsaylı qanunsuz əməlləri (hətta universitetə aid olmayan) ilə bağlı müvafiq qaydada Təhsil Nazirliyinə və ölkənin Baş Prokurorluğuna müraciət edib. Hazırda intensiv istintaq tədbirləri davam etdirilir.
Dürdanə Əliyeva ölkədən qaçıb?
Əldə etdiyimiz bəzi məlumatlara görə isə Slavyan Universitetində baş verən olay keçən ilin hadisəsidir. Dürdanə Əliyeva hələ keçən ildən ölkəni tərk edib və bir daha geri qayıtmayıb.
140 min manat isə göstərilən kiçik məbləğdir. Şöbə müdiri təxminən 600 min manata yaxın pul ələ keçirərək Bakını tərk edib. Yığılan pullar isə tək təhsil haqqı deyil, şöbə müdirinin tələblərdən yığdığı rüşvət də daxildir. Rektorun bu vaxta qədər susmağı da buna görə imiş.
Ali təhsili olan hər kəs bilir ki, universitetin 140 min manat pul toplaması bir günün işi deyil. Çünki ali məktəblərdə “kommersiya maxenasiyaları” ya qəbul, ya imtahan, ya da müxtəlif müdafiələr zamanı reallaşdırılır. “Dəllal dekanlıqlar”ın kəsir şantajlı dilənçilikləri ən çox semestr sonlarına təsadüf edir. Yəni, yarımillik dövründə hansısa yollarla fakültə, kafedra, dekanlıq və universitet rəhbərləri olmuş bəzi insanların üzü gülməyə başlayır. Bura “qayıb dolya”ları da aiddir.
Rektor niyə indi prokurorluğa müraciət edib?
Bunları hamının bildiyi halda sual yaranır ki, “Şöhrət” ordeninin sahibi olan rektor həmsoyadı olan Dürdanə haqqında Baş Prokurorluğa niyə məhz indi müraciət etdi? Onun rəhbərlik etdiyi universitetin şöbə müdirinin 140 min manat mənimsədiyi barədə xəbərlərin sosial mediada yayıldığı tarixdə. Məgər rektor öz hazırkı, yaxud eks kollektivinin fəaliyyətindən xəbərsizdir?
Bir faktı da deyək ki, ali təhsil ocaqlarının rektorları hər dərs otağından tutmuş bufetə qədər bütün baş verənlərdən agahdırlar. Çünki çox vaxt pul dövr edən şöbələrə özlərinə yaxın insanları təyin edirlər. Azərbaycanda bu tendensiya təkcə universitetləri əhatə etmir. BSU rektoru isə təhsil sistemi ilə 2016-cı ildə tanış olmayıb. Belə ki, Nurlana Əliyeva 51 il öncə (1970) metodist, ardınca müəllim, kollec direktoru, 2004-cü ildə “Əməkdar müəllim” adına layiq görülüb və s.
Bundan dolayı, dosent Əliyevanın (Dürdanə) professor Əliyevaya (Nurlana) kələk gəlməsi inandırıcı deyil.
Slavyan Universitetində hansı rüşvət mexanizmi var?
Min tələbənin yarısının bir imtahan pulu 100 AZN, kurs işi 500, diplom işi 1000 manatdan hesablansa, 6 aya 800 minə yaxın pul edir. Bu üsulla “savad kağızı”na yiyələnənlərin sayını bir az da azaltsaq, yarımmilyon pul toplanır. “Məhsul yığımı”nda əziyyəti keçənlərin payını ayırmaqla da yığılan pul mənimsənildiyi deyilən məbləğdən qat-qat çoxdur. Həm də biz sadəcə 6 ayın toplamasını apardıq. 4 illik tələbəlikdə isə bu rəqəm hər kursda ikiyə vurulur. Hələ siyahıya təmir-tikinti, maddi-texniki bazaya dövlətdən ayrılan vəsaitləri daxil etmədik.
BSU-da da rüşvət ilə bağlı xəbərlər 2019-cu ildə yayılıb. Belə ki, tələbələrdən 60 min manat pul yığılıb. Hələ bu məbləğ əsassız illik ödənişləri borcu ilə bağlıdır. Sanki tələbəyə kreditə pul verilib.
Maraqlısı budur ki, belə xəbərlər BSU-nun əvvəlki rektoru Kamal Abdullanın dövründə elə də yox, məhz Nurlana Əliyevanın rektorluğunda nəzərə çarpıb. Çünki “Nurlana Əliyeva BSU-nu rüşvət yuvasına çevirdi” başlıqlı yazılar çoxdur.
BSU universitetlər arasında korrupsiya onluğuna necə düşdü?
Bir şey ki, 2016-cı ilin sonunda BSU adı rüşvətdə hallanan universitetlərin onluğuna da düşüb. Belə ki, həmin il Slavyan Universitetindəki rüşvətxorluq barədə 408 xəbər dərc olunub.
Qeyd edək ki, Nurlana Əliyevanın rektorluğunacan BSU korrupsiya beşlik və onluqlarında yer almırdı. Universitetin rəhbəri olan kimi isə Kamal Abdullanın dövründə çalışan kadrları uzaqlaşdırıb. Bəzilərinə bəhanə kimi “pensiya yaşının çatdığı”” göstərilib. Guya özünün neçə yaşı var…
Bütün faktlar və rüşvət elenentlərini nəzərdən keçirəndə bəlli olur ki, 140 min manat işin ancaq görünən tərəfidir. Şöbə müdirinə açılan cinayət işi, yaxud Dürdanənin istintaqı, hansısa əməkdaşların istefasında daha böyük kadr islahatlarını axtarmağa dəyər.
Bir vaxtlar heç kimin ağlına gəlməzdi ki, Abel Məhərrəmov BDU rektorluğu ilə vidalaşar… //aktualxeber.az//
8-05-2021, 07:18 | “Daxili işlər naziri cənab Vilayət Eyvazova təşəkkürümü bildirirəm”
Azərbaycan polisi — Daxili İşlər Nazirliyinin strukturuna daxil olan, həmçinin “Polis haqqında” Qanununa əsasən Azərbaycan Respublikasının icra hakimiyyətinə mənsub olan vahid mərkəzləşdirilmiş hüquq-mühafizə orqanıdır. “Polis haqqında” Qanunun 3-cü maddəsinin 1-ci hissəsində qeyd olunub ki, Azərbaycanda polisin təyinatı insanların həyatını, sağlamlığını, hüquq və azadlıqlarını, dövlətin, fiziki və hüquqi şəxslərin qanuni mənafelərini, mülkiyyətini hüquqa zidd əməllərdən qorumaqdan ibarətdir. Həmçinin bu Qanunun 5-ci maddəsinin 1-ci bəndində də qeyd olunub ki, polis üzərinə düşən vəzifələrini yerinə yetirərkən irqindən, milliyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən, siyasi partiyalara, həmkarlar ittifaqlarına və digər ictimai birliklərə mənsubiyyətindən asılı olmayaraq, bütün şəxslərin Azərbaycan Respublikasının Konstitusiyasında və tərəfdar çıxdığı dövlətlərarası müqavilələrdə nəzərdə tutulmuş hüquqlarını və qanuni mənafelərini hüquqa zidd əməllərdən qoruyur.
Faktdır ki, ötən ilin əvvəllərindən başlayaraq bəşəriyyəti ağuşuna alan, həmçinin ölkəmizdə geniş yayılan koronavirus pandemiyası ilə mübarizə tədbirləri çərçivəsində, Daxili İşlər nazirliyinin əməkdaşları operativ fəaliyyət göstərdilər. Yəni, belə bir vaxtda Azərbaycan polisi hər kəsin tibbi maskalardan istifadə etməsinə, sosial məsafə saxlmasına, küçəyə çıxmaq üçün icazənin olub-olmamasına, paralel olaraq ictimai asayişin qorunub saxlanmasına çalışdılar. Bir sözlə, xüsusi karantin rejimi qaydalarının tətbiq olunduğu vaxtlarda Azərbaycan polisi üzərinə düşən vəzifələrinin öhdəsindən layiqincə gəlməyi bacardı. Bütün bunlar onu sübut edir ki, polis əməkdaşları hər zaman ölkə əhalisinin təhlükəsizliyinin təmin olunmasında, ictimai asayişin qorunub saxlanmasında, qanun-qaydanın bərpasında və s. xüsusi rola malik olurlar. Adicə bir faktı qeyd edim ki, bir neçə gün bundan öncə üz-üzə qaldığımız olayın varlığı, məhz yuxarıda qeyd etdiklərimi bir daha sübuta yetirir. Belə ki, azyaşlı övladım Abşeron rayonu, Masazır qəsəbəsində yaşadığımız evdən küçəyə çıxır və o, yolu azaraq başqa istiqamətə üz tutur. Bir neçə saat qonşularla birlikdə azyaşlı övladımızın axtarışını həyata keçirsək də, son anda nəyəsə nail ola bilmədik. Nəhayət, bir qədər vaxt keçdikdən sonra bizə xəbər çatdırdılar ki, ərazidə xidməti vəzifələrini yerinə yetirən Abşeron RPİ post-patrul xidmətinin əməkdaşları Mikayıl Məmmədov, Rəvan Qarayev və Əli Quliyev azyaşlı uşağın hərəkətlərində şübhəli davranışları hiss edirlər və dərhal ona nəvazişlə yaxınlaşıb uşağı yaxınlıqdakı dükana aparırlar. Hətta azyaşlını sakitləşdirmək məqsədilə, ona mağazadan istədiyi hər şeyi alacaqlarını da vəd edirlər. Çox keçmədi ki, post-patrul xidmətinin əməkdaşları uşağı bizə təhvil verdilər və sevincimizin üstünə yeni bir sevinc hissi qatdılar. Belə bir sevinc hissini ailəmizə yaşadan və yuxarıda adlarını hallandırdığım post-patrul xidmətinin hər üç əməkdaşına şəxsən minnətdarlığımı bildirirəm.
Hörmətli Vilayət müəllim! Şəxsən Sizə də minnətdarıq ki, bu gün xidməti borcunu şərəflə yerinə yetirən və hər an ayıq-sayıqlıq nümayiş etdirən belə bir polis əməkdaşlarımız var. Bundan əlavə, Abşeron RPİ-nin rəhbərliyinə və şəxsi heyyətin hər bir üzvünə də, məhz dərin minnətdarlığımızı çatdırırıq. Baş verən olay bir daha onu sübut etdi ki, bu gün Abşeron polisi də xalqın keşiyində şərəflə, vicdanla xidməti borcunu yerinə yetirməkdədir. Biz bir daha əmin olduq ki, hər cür çətin və anlaşılmaz hallarda tək deyilik və bu gün bizi güclü, ayıq-sayıq Azərbaycan polisi qoruyur. Bir sözlə, bu gün daşıdığı adına, tutduğu mövqeyinə, milli dövlətçilik idealogiyasına sadiq qalan, xalqının daha çox etimadını qazanan, Vətəninə, xalqına ləyaqətlə, şərəflə xidmət edən polis əməkdaşlarımız var. Odur ki, eşq olsun Azərbaycan Polisinə!
Arif Məmmədov
Nyus.Az saytının təsisçisi və baş redaktoru.
8-05-2021, 07:12 | "Ata, biz qalib gələcəyik, mən şəhid olsam da, siz öz doğma yurdunuza qayıdacaqsınız" - FOTO
Zəfər yürüşünün qəhrəmanlarından olan şəhid Məhəmmədəli İsmayıllının doğum günü - 25 yaşı qeyd edilib. Atası ilə danışanda "Biz qalib gələcəyik, mən şəhid olsam da, siz öz doğma yurdunuza qayıdacaqsınız" demişdi.
Azərbaycan tarixinin şanlı səhifəsinə adları yazılan qəhrəman şəhidlərimiz öz qısa ömürlərini Vətən uğrunda fəda etsələr də, daim qəlblərdə yaşayacaqlar. Belə qəhrəmanlarımızdan biri də əslən Füzuli rayonundan olan İsmayıllı Məhəmmədəli Elxan oğludur. Məhəmmədəli hələ dünyaya gəlmədən öncə ailəsi Füzuli şəhərindən didərgin düşmüşdü. Onun ailəsi Horadiz əməliyyatlarında azad edilən 22 kənddən biri olan Yuxarı Kürdmahmudluda məskunlaşmışdı. Məhəmmədəli 1996-cı ildə bu kənddə dünyaya göz açıb.
Şəhidin atası Elxan Quliyev qəhrəman övladı haqqında qürurla danışaraq bildirib ki, hələ uşaq yaşlarından cəbhə bölgəsində yaşa dolan Məhəmmədlinin bir arzusu vardı - ailəsinin ata-baba yurduna qayıtması. Bu arzu uğrunda yaşayan Məhəmmədli həm istedadlı, həm də idmançı kimi böyüdü. Hələ yeniyetmə yaşlarında karate üzrə peşəkarlaşan Məhəmmədəli Azərbaycan çempionatında və beynəlxalq yarışlarda qalib olub. O, beynəlxalq turnirlərdə 38 dəfə çıxdığı döyüşdə bircə dəfə də olsun, məğlubiyyət nədir bilməyib. 2011-ci ildə respublika çempionu , Gürcüstanda keçirilən Beynəlxalq turnirin qalibi, Türkiyədə isə Dünya çempionu adını qazandı. 2013-cü ildə həqiqi hərbi xidməti Hərbi Dəniz Qüvvələrində keçdikdən sonra mülki həyatda mühafizə xidmətinin leytenantı olaraq işinə davam edib. Lakin uşaqlıqdan hərbçi olmaq istəyirdi deyə, müddətdən artıq hərbçi kimi Vətənə xidmət etməyə başladı. Beləcə Məhəmmədli ömrünün son iki ilini Vətən keşiyində dayandı.
Vətən müharibəsinin ilk günündən cəbhəyə atılan Məhəmmədli hərbi tibb maşını idarə edirdi. O, gecə-gündüz demədən vəzifəsinin öhdəsindən layiqincə gəlmək üçün çalışıb, yüzlərlə yaralını döyüşün ən qaynar nöqtələrindən çıxararaq xilas edib. Son telefon danışığında isə ailə üzvlərindən halallıq alıb. Məhəmmədəlinin yaddaşlara həkk olan cümləsi isə atasına dediyi ifadə olub: "Ata müharibə başlayacaq və biz qalib gələcəyik, torpaqlarımız azad olacaq. Mən şəhid olsam da, siz öz ata-baba yurdunuza qayıdacaqsınız".
Şəhid anası Arzu Quliyeva Məhəmmədəlinin doğum günündə gözləri yaşlı danışsa da övladının qəhrəmanlığı ilə qürur duyduğunu söyləyir: "Məhəmmədli çox cəsur, qorxmaz övlad idi. O, elə bir ürəyə sahib idi ki, Vətəni ilə anasını eyni sevgi ilə sevirdi. O, bir an tərəddüd etmədən cəbhədə gecə-gündüz döyüşlərdə öz xidmətini yerinə yetirdi. İstəmirdi ki, döyüşçü yoldaşları şəhid olsun, yoldaşlıqda da hər zaman sadiq biri idi. Hətta hərbidə çalışan zaman bayram günlərində növbələrdə özü qalardı ki, ailəli olan iş yoldaşları övladları ilə bayramlarını qeyd etsinlər. Vətən deyə yaşayırdı, Vətən uğrunda da canını fəda etdi".
Şəhid Məhəmmədəlinin indi onsuz keçən ilk doğum günü qeyd edilir. Ailəsi ilə birlikdə onun döyüşçü yoldaşları da Məhəmmədlinin xatirəsini əziz tuturlar.
Məhəmmədlinin qəhrəman döyüşçü olduğunu söyləyən hərbi tibb bacısı Elnarə Səfərova bildirib ki, onun haqqında danışmaq nə qədər çətindirsə, bir o qədər də qürurvericidir: "O, ölümü heç zaman özünə yaraşdırmırdı, lakin bir arzusu vardı - torpaqlarımız azad olsun, bu yolda lazımdırsa canını fəda etsin. Məhəmmədlinin çox arzuları vardı, lakin ən böyük arzusu Vətənlə bağlı idi. Məhəmmədəli yüzlərlə döyüşçümüzün həyatını xilas etdi. Allah bütün şəhidlərimizə rəhmət eləsin".
Şəhidin hərbçi yoldaşı Hilal Eminov isə bildirib ki, Məhəmmədəlini əvəz edə bilməsələr də, daim onun ata-anası üçün bir övlad olaraq üzərlərinə düşən vəzifəni yerinə yetirməyə hazırdırlar.
Məhəmmədəli oktyabrın 26-da Füzuli rayonu ərazisində gərgin döyüşlər zamanı atəş xəttindən yaralıları çıxaran zaman özü də düşmən gülləsinə tuş gələrək şəhidlik zirvəsinə ucalıb. Doğulub boya-başa çatdığı Yuxarı Kürmahmudlu kənd qəbiristanlığında torpağa tapşırılıb. Ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə" və "Cəsur döyüşçü" medalları ilə təltif edilib. //AZƏRTAC//
8-05-2021, 06:36 | Əziz Şuşa, sən azadsan! - Bu 8 May Şuşadayıq
8 May. Bu tarix 28 illik Şuşa həsrətinin simvoludur. Çünki Azərbaycan milli mədəniyyətinin baş tacı olan Şuşa 1992-ci ilin məhz bu günü işğal edilmişdi. O gün-bu gün, düz 28 il məhbusluq həyatı yaşadı Şuşa. Onunla bərabər, Azərbaycan xalqı da ağrı-acılar və həsrət içində qıvrıldı. Hər ilin 8 mayı gələndə qaysaq bağlamış yaralar yenidən qanadı, yenidən ağrıdı. Lakin Azərbaycan insanının ümidi heç bir zaman itmədi, məhz bu səbəbdən 28 illik əsarətə dözdü, tab gətirdi. Budur, Şuşa artıq azaddır. Bütün yaralar sağalıb.
Azərbaycan Prezidenti, Silahlı Qüvvələrin Ali Baş Komandanı İlham Əliyevin "Əziz Şuşa, sən azadsan! Əziz Şuşa, biz qayıtdıq! Əziz Şuşa, biz səni dirçəldəcəyik!" ifadələri xalqımızın bütün acılarını dindirdi. Artıq mayın 8-i də öz bədbinliyini itirib. Xalqımız daha Şuşanın işğal gününü xüsusi həssaslıqla da qeyd eməyəcək. Onun 28 illik iztirabı bundan sonra bir ömürlük xoşbəxtliklə əvəzlənəcək - Qara gün kimi təqvimə düşən "8 mayı", işıqlı "8 noyabr" əvəzlədiyi kimi...
Şuşa şəhəri tarixən Azərbaycanın tarixi-mədəni, ictimai-siyasi həyatının mühüm mərkəzlərindən biri olub. 1977-ci ildə xalqımızın Ümummilli Lideri Heydər Əliyevin təşəbbüsü ilə "Şuşa şəhərinin tarixi hissəsini tarix-memarlıq qoruğu elan etmək haqqında" qərar qəbul edilib. Həmin qərar nəticəsində Şuşada abidələrin qorunması, görkəmli mədəniyyət və incəsənət xadimlərinin xatirələrinin əbədiləşdirilməsi istiqamətində əhəmiyyətli addımlar atılıb.
Ağır işgəncələrlə müşayiət olunan məhbusluq həyatı
Azərbaycana qarşı başladığı hərbi təcavüz nəticəsində Ermənistan 1992-ci il mayın 8-də Şuşa şəhərini işğal etdi və şəhərdə xalqımızın tarixi-mədəni irsinin məhv edilməsi siyasətini həyata keçirdi.
Lakin Ordumuzun qətiyyətli mübarizəsi ilə tarixi ədalət bərpa edildi. Belə ki, 2020-ci il noyabrın 8-də Şuşa şəhəri işğaldan azad olundu. Bununla da Azərbaycanın, xüsusən də Qarabağın baş tacı olan Şuşa şəhəri illərin əsarətdən, ağır işgəncələrlə müşayiət olunan məhbusluq həyatından xilas edildi. Azadlığının ilk günündən etibarən, şəhərə, onun tarixi-mədəni irsinə və təbiətinə vurulmuş zərərin təxirəsalınmadan inventarizasiyası aparıldı və bərpa işlərinə başlanıldı. Hazırda Şuşanın əvvəlki görkəmini özünə qaytarması, eləcə də dünyanın ən gözəl şəhərlərindən birinə çevrilməsi üçün sürətli işlər aparılır. Bərpa-quruculuq işlərinin təşkilində çevikliyi və səmərəliliyi təmin etmək üçün Şuşada dövlət idarəetməsinə də böyük diqqət yetirilib. Belə ki, Azərbaycan Respublikası Prezidentinin işğaldan azad olunmuş ərazilərdə ilk xüsusi nümayəndəsi məhz Şuşa rayonuna təyin edilib. Çünki tarixi-mədəni əhəmiyyəti və Azərbaycan xalqı üçün müstəsna mənəvi dəyərə malik olması Şuşaya xüsusi qayğı və həssaslıqla yanaşılmasını zəruri edir. Bu baxımdan, Şuşada dövlət idarəetməsinin və hüquqi tənzimləmənin daha da təkmilləşdirilməsi şəhərdə tarixi-mədəni irsin bərpasına və qorunub saxlanmasına xidmət etməklə yanaşı, onun daimi inkişafına şərait yaradacaqdır.
8 May günü öz mənəvi-psixoloji təsirini itirmiş olsa da...
Bütün bunları gözə alan Azərbaycan Prezidenti İlham Əliyev Şuşa şəhərinin Azərbaycanın mədəniyyət paytaxtı elan edilməsi haqqında sərəncam imzaladı. Beləliklə, Şuşa azadlığının ilk dövrünə mədəniyyət paytaxtı kimi qədəm qoydu. Şübhə yoxdur ki, Şuşa çox yaxın illərdə nəinki Azərbaycanın, dünyanın mədəniyyət mərkəzlərindən birinə çevriləcək. Bunun üçün ortada yüksək potensial və möhkəm iradə mövcuddur...
Bütün bunlarla yanaşı, xalqımız heç bir zaman öz dədə-baba yurdlarının işğal tarixlərini də unutmayacaq. Ona görə 8 May günü də öz mənəvi-psixoloji təsirini nə qədər itirmiş olsa da, tarixiliyini bir o qədər qoruyub saxlayır. Odur ki, qısa da olsa bu yaxın tarixə nəzər salmaq istərdik;
Bütün tarixi faktlar Şuşanın məhz xəyanətin qurbanı olduğunu göstərir
İşğaldan əvvəl - 1992-cil ilin may ayının əvvəlində şəhər əhalisinin əhval-rühiyyəsi yüksək olub. Onlar Şuşanı tərk etmək barədə fikirləşməyiblər belə. Ermənilər şəhərə hücum edəndə ən əsas problem silah çatışmazlığı olub. Qeyri-bərabər döyüşdə şəhəri yalnız könüllü batalyonlar mətanətlə qoruyublar. Lakin o zaman riyaziyyat müəllimi, hərbi sahədə heç bir bilik və təcrübəyə malik olmayan, bacarıqsız müdafiə naziri Rəhim Qazıyevin yarıtmazlığı üzündən pərakəndə aparılan döyüşlər, daxili hərc-mərclik Şuşanın müdafiəsini olduqca çətinləşdirdi. Ermənilərin özləri də etiraf edirlər ki, Şuşanın işğalında 100-ə qədər zirehli maşın və tank, 11 min canlı qüvvə ilə birlikdə xarici dövlətlərdən gətirilmş müzdlulardan, havadarların yardımından istifadə olunub.
Şuşa işğal edilərkən burada 25 min nəfərədək əhali yaşayırdı. Şəhərin müdafiəsi zamanı 195 dinc sakin şəhid oldu, 165 nəfər yaralandı. Ermənilər tərəfindən əsir götürülərək Şuşa həbsxanasında saxlanılan 114 azərbaycanlı sonradan xüsusi qəddarlıqla qətlə yetirildi. Şəhərin 58 sakini itkin düşdü. Artıq şəhər sakinləri hökumətə inanmırdı. Buna səbəb həm Şuşada, həm də az əvvəl Xocalıda baş verən soyqırımı hadisəsi idi. Bununla belə, Şuşanı tərk etmək istəməyən sakinlər məcburən şəhərdən çıxarıldı. Beləcə, əsrlərdən bəri alınmaz qala kimi düşmən hücumlarına mətanətlə sinə gərən Şuşa ermənilərin əsiri oldu. Məhz belə bir vaxtda Rəhim Qazıyevin başçılıq etdiyi Müdafiə Nazirliyindən isə bildirirdilər ki, Şuşaya hücum xəbəri yalandır. Beləliklə, bu qədim şəhər məhz xəyanətin qurbanı oldu.
AXC-Müsavat cütlüyünün çirkin niyyəti
Azərbaycan Prezidenti İlham Əliyev bu il yanvarın 27-də Aydın Kərimovu Prezidentin Şuşa rayonunda xüsusi nümayəndəsi təyin olunması ilə əlaqədar qəbul edərkən bir daha bu məsələyə toxundu. Bildirdi ki, Şuşanın 1992-ci il mayın 8-də itirilməsinin günahkarları AXC-Müsavat cütlüyüdür:
"O vaxt Azərbaycanda hakimiyyət uğrunda mübarizə gedirdi. AXC-Müsavat cütlüyü hakimiyyətə can atırdı, o vaxtkı hakimiyyəti yıxmaq üçün bu təxribatı törətdi, Şuşanı faktiki olaraq düşmənə təhvil verdi. O vaxt Azərbaycan müdafiə naziri AXC-Müsavat cütlüyünün törəməsi idi, onların quyruqlarından idi. Şuşanı satan birinci o olmuşdur. Sonra da demişdi ki, mənim günahım yoxdur. Necə sənin günahın yoxdur, satqın, xain. Demişdi ki, Şuşa əldən getsə, başıma güllə çaxacağam. Bu günə qədər də bu gülləni çaxmayıb öz satqın başına. AXC-Müsavat cütlüyü öz çirkin niyyətlərinə çatıb. Şuşa və ondan bir neçə gün sonra Laçın rayonunun işğal altına düşməsi nəticəsində o vaxtkı hakimiyyət kənarlaşdırılıb və hərbi çevriliş nəticəsində AXC-Müsavat hakimiyyətə gəlib. Ondan sonra Şuşanı unudub, Şuşanı faktiki olaraq ermənilərə bağışlayıb və sonra digər xəyanət törədib - 1993-cü ilin aprel ayında Kəlbəcəri düşmənə təhvil verib. Günahsız, əliyalın insanları orada tək qoyub, xilas edə bilməyib, qoruya bilməyib. Ondan sonra da nə edib?! Fərarilik edib, qaçıb. Ali Baş Komandan fərari, dövlət katibi fərari, parlamentin sədri fərari, digər fərarilər qaçıb gizləndilər, biri Kələkidə, biri xaricdə. Əgər müharibə dövründə Ali Baş Komandan qaçırsa, bunun adı fəraridir, başqa adı yoxdur. Hamı bunu bilməlidir, heç kim bunu unutmamalıdır".
Dövlət başçısının bu fikirlərindən sonra Şuşanın necə işğal edilməsi ilə bağlı artıq qaranlıq məqamlar qalmır. Odur ki, xalqımız bu yaxın tariximizi unutmamalı və gələcək nəsillərə də unuttdurmamalıdır. Çünki tarix elə bir ortaq sərvətdir ki, ondan hər xalq öz fərasətinə görə pay götürür.
Elgün Mənsimov
Trend
8-05-2021, 00:00 | Bu şəhərlərdə məktəblər açılır
Təhsil Nazirliyi Kollegiyasının müvafiq qərarına əsasən, Bakı, Sumqayıt, Gəncə və Şəki şəhərlərinin, Abşeron rayonunun ərazisində yerləşən ümumi və məktəbdənkənar təhsil müəssisələrində 17 may 2021-ci il tarixindən əyani tədris forması qismən bərpa ediləcək.
Təhsil Nazirliyindən bildirilib ki, həmin tarixdən etibarən Bakı və Sumqayıt şəhərlərində, Abşeron rayonunda yerləşən ümumi təhsil müəssisələrinin məktəbəhazırlıq mərhələsində və ümumi orta təhsil səviyyəsində (V-IX siniflərdə) tədris həftədə 2 dəfə, ibtidai təhsil səviyyəsində isə (I-IV siniflərdə) həftədə 3 dəfə olmaqla əyani formada təşkil ediləcək.
Gəncə və Şəki şəhərlərində yerləşən, layihə tutumu və şagird sıxlığı təhsilalanlar arasında ən azı 1.5 metr məsafəni gözləməyə imkan verən məktəblərin icma əsaslı təlim qrupları və məktəbəhazırlıq mərhələsində tədris həftədə 4 dəfə, ümumi orta təhsil səviyyəsində (I-IX siniflərdə) həftədə 5 dəfə əyani şəkildə təşkil olunacaq. Qeyd olunan şəhərlərdə layihə tutumu və şagird sıxlığı təhsilalanlar arasında ən azı 1.5 metr məsafəni gözləməyə imkan verməyən məktəblərin icma əsaslı təlim qrupları və məktəbəhazırlıq mərhələsində isə həftədə 2 dəfə, ümumi orta əhsil səviyyəsində (I-IX siniflərdə) həftədə 3 dəfə olmaqla əyani aparılacaq.
Kollegiyanın qərarına əsasən, Bakı, Sumqayıt, Şəki və Gəncə şəhərlərinin, Abşeron rayonunun ərazisində yerləşən xüsusi məktəblər, xüsusi internat məktəbləri və inteqrasiya təlimli internat tipli təhsil müəssisələrinin xüsusi siniflərində (I-IX siniflərdə) həftədə 5 dəfə olmaqla dərslər əyani bərpa ediləcək. Xüsusi məktəblərin ibtidai və ümumi orta təhsil səviyyəsində (I-IX siniflərdə), karlar, zəif eşidən və sonradan karlaşmış və kor şəxslər, həmçinin nitqi qüsurlu şəxslər üçün xüsusi internat məktəblərinin ibtidai və ümumi orta təhsil səviyyəsində tədris (I-XI, I-XII, I-X, I-IX siniflərdə) həftədə 5 dəfə olmaqla əyani keçiriləcək.
Həmçinin Bakı, Sumqayıt, Şəki və Gəncə şəhərlərinin, Abşeron rayonunun ərazisində yerləşən məktəbdənkənar təhsil müəssisələrində aşağı və orta yaş qruplarında (I-IX siniflər) dərnək məşğələləri həftədə 2 dəfə olmaqla əyani aparılacaq.
23-04-2021, 08:36 | Yay fəslinin yaxınlaşması bağ evlərinin qiymətini artırıb
Yay fəslinin yaxınlaşması Bakıda fərdi yaşayış və bağ evlərinin qiymətində artıma səbəb olub.
"MBA Group" konsaltinq şirkətinin direktoru, əmlak məsələləri üzrə ekspert Nüsrət İbrahimov Trend-ə deyib ki, mart ayında fərdi yaşayış və bağ evlərinin qiyməti 1,25% bahalaşıb.
Fərdi yaşayış və bağ evlərinin orta qiyməti 971 manat/kv.m təşkil edib. Ekspert bildirib ki, yay mövsümü yaxınlaşdıqca Bakıda bağ evlərinin qiymətində artım olacağı gözlənilən idi.
N.İbrahimov bildirib ki, hər il yay mövsümü yaxınlaşdıqca bağ evlərinin qiymətində artım olur və bu il də istisna deyil.
Ekspertin sözlərinə görə, həmçinin bağ evlərinin kirayə qiymətlərində də artım müşahidə olunur. Belə ki, fərdi yaşayış və bağ evlərin kirayə qiymətləri +3,58% artıb. O qeyd edib ki, yay mövsümündə insanlar istirahət üçün bağ evlərinə üz tutur və bağ evlərinə tələbat xeyli artır.(milli.az)
23-04-2021, 07:51 | Hüseynbala Mirələmov YAP-dan çıxarılır - AÇIQLAMA
"Yeni Azərbaycan Partiyasının hər hansı üzvü partiyanın imicinə və əsasnaməsinə uyğunsuz hərəkət edirsə, bundan kənara çıxırsa, onunla bağlı tədbir görülməlidir".
Bunu Yeni Azərbaycan Partiyasının Veteranlar Şurasının üzvü, deputat Tahir Rzayev deyib.
O, Şuranın üzvü, sabiq deputat Hüseynbala Mirələmovun yayılan qeyri-etik videosuna görə partiyadan çıxarıla biləcəyini istisna etməyib:
"Bu məsələ təsdiqini taparsa, nə isə demək olar. Hesab edirəm ki, partiyamızın hər bir üzvü öz hərəkətlərinə, danışığına sədd qoymalıdır. Hər şey ölçüb-biçilməlidir. Mən də partiyanın nüfuzuna, nizamnaməsinə uyğun olmayan hərəkət edən hər bir üzvün çıxarılmasının tərəfdarıyam".
Tahir Rzayev Hüseynbala Mirələmovla bağlı məsələnin Veteranlar Şurasında müzakirə edilə biləcəyini də söyləyib:
"Partiyanın Mərkəzi Aparatı, Veteranlar Şurasının sədri və digər rəhbərlərin fikrindən sonra bu məsələ kollegial qaydada müzakirə oluna bilər. Yaxud İdarə Heyətində və rayon təşkilatında müzakirə də aparıla bilər. Hüseynbala Mirələmov həm də Xətai rayon təşkilatının sədridir. Qaydaya görə, onun partiya üzvlüyündən çıxarılması təşkilat tərəfindən irəli sürülə bilər".
23-04-2021, 00:00 | Ramazanın 10-cu gününün duası
Ramazan ayının 10-cu günüdür. Qafqaz Müsəlmanları İdarəsinin açıqladığı Ramazan təqviminə əsasən sabah imsak saat 04:14, iftar isə saat 19:42-dədir.
İmsak duası: "Allahumməc-əlni fihi minəl-mütəvəkkilinə əleyk. Vəc-əlni fihi minəl-faizinə lədeyk. Vəc-əlni fihi minəl-müqərrəbinə ileyk. Biihsanikə ya ğayətət-talibin".
Tərcüməsi: "İlahi, bu ayda məni Öz həsənatlarının sayəsində Sənə təvəkkül edənlərdən, Sənin yanında bu ayda uğur qazananlardan və Özünə yaxınlardan qərar ver Öz yaxşılığınla, ey istək sahiblərinin son Qayəsi!"
Allah orucunuzu qəbul etsin!
22-04-2021, 12:08 | Xalq artisti telekanalları günahlandırdı - Zövqsüz mahnılar meydan sulayır
"Bizim əsasnaməmizdə birinci şərt odur ki, sənin bəstəkarlıq diplomun olmalıdır. Bu çox sadə bir şərtdir. Mahnı yazan insana deyə bilmərik ki, yazma, yazırsa daha yaxşı. Amma bir mahnı yazmağla bəstəkar olmurlar. Bəstəkarlıq diplomu olmayan sənətçini ittifaqımıza üzv edə bilmərik"
Bunu moderator.az-a açıqlamasında Bəstəkarlar İttifaqının sədri, Xalq artisti Firəngiz Əlizadə deyib. Sənətkar pandemiyanın musiqi sənətimizə gətirdiyi fəsadlardan da danışıb.
"Artıq ikinci ildir ki, İpək yolu festivalı keçirilmir. Bu il də yəqin ki, keçirilməyəcək, hələ ki, bizə yekun bir cavab deyilməyib. Çünki festivala hazırlıq hər il dekabr-yanvar ayından başlayırdı. Amma zoom vasitəsilə bu festivalı keçirməyə biz hazırıq. Bizim digər ölkənin mədəniyyət xadimləri ilə əlaqələrimiz də var, bilirsiz ki, hər il həmin incəsənət xadimləri bu festivala görə Azərbaycana, Şəkiyə gəlirdilər. Biz hər il bu festivala teatr tamaşalarını aparırdıq, indi axı teatrlarımızın da fəaliyyəti yoxdur. Teatrlar işləmir, orkestrlar fəaliyyətsiz qalıb. Deyirlər ki, Şəkidə də vəziyyət ürəkaçan deyil, mən əlaqə saxlayıram, orada yoluxma sayı çoxdur. Bu pandemiya musiqimizə böyük zərbə vurdu, biz də müxtəlif yollar axtarırıq ki, fəaliyyətimizi saxlamayaq. Hər ay bizim ittifaqda "Nizami və musiqi" adlı konfranslarımız keçirilir" deyə ittifaq sədri bildirib.
Firəngiz Əlizadə son illərdə meydan sulayan zövqsüz mahnılardan da danışıb.
"Mənə elə gəlir ki, burada televiziya kanallarının da, kütləvi informasiya vasitələrinin də üzərinə böyük məsuliyyət düşür. Bəzən görürük ki, efirdə həddən ziyadə bərbad mahnılar səslənir, musiqilər yazılır. Biz də öz növbəmizdə televiziyalara məktublar yazıb, etirazımızı bildiririk. Biz elə bir zəmanədə yaşamırıq ki, mütləq şəkildə zövqsüz mahnılara qulaq asaq! Bu mahnıları 5-6 nəfər disk alıb evində dinləyə bilər, amma 10 milyonluq xalqımıza belə mahnılar lazım deyil. Təbii ki, zövqlər müxtəlifdir. Düzdür, indi insanlar ruhdan düşüb, pandemiyadır, onların əhval-ruhiyyəsini qaldırmaq lazımdır. Amma səviyyəli mahnılarla. Televiziya kanalları bu işlərlə ciddi məşğul olmalıdır. Səviyyədən kənar mahnılara görə televiziya kanallarına müraciət edəndə deyirlər ki, bizə reytinq gətirir, biz belə pul qazanırıq. Çox müxtəlif cavablar alırıq. Hətta etiraz edəndə biri mənə dedi ki, bizim əmək haqqımızı siz verəcəksiniz? Mən bu cavaba çox üzüldüm, yaxşı ki, o insanı artıq vəzifəsindən azad etdilər. Hər şeyi pula, maddiyata bağlamaq da düzgün deyil. Azərbaycan xalqı musiqidə çox istedadlıdır, çox az xalqlar var ki, musiqi duyumu var. Ona görə də musiqimizi qorumaq lazımdır" deyə Firəngiz Əlizadə bildirib.
22-04-2021, 11:54 | Məhdudiyyətlərin tətbiqi üçün səbəb yoxdur - Millət vəkili - VİDEO
Bu gün koronavirusla bağlı məhdudlaşdırılmanın tətbiq edilməsi üçün hər hansı səbəb yoxdur.
Bunu ARB24-ün "İş vaxtı" verilişinə açıqlamasında millət vəkili İlham Məmmədov deyib. O bildirib ki, gündəlik yoluxma sayının 2000 civarında olması epidemioloji vəziyyətin nəzarət altında olmasının göstəricisidir:
"Vaksinasiyanın sürətləndirilməsi və yayadək əhalinin 50-60 faizinin peyvəndlənməsi virusla mübarizəmizin əsas mərhələsini keçməyimizi şərtləndirən vacib məqamlardan biridir. Bundan sonra sanitar-epidemioloji vəziyyət nəzərə alınaraq məhdudiyyətlərin ləğv edilməsi istiqamətində müəyyən addımlar atıla bilər".
Millət vəkili onu da qeyd edib ki, həftəsonları avtobuslarla bağlı tətbiq edilən məhdudiyyətlər yoluxmanın azalmasına xidmət edir.
