1-11-2021, 21:05 | Bakıda qadın marixuana satarkən tutuldu - VİDEO - FOTO
Paytaxtın Nizami rayonunda keçirilən əməliyyat zamanı narkotiklərin satışı ilə məşğul olan 1-i qadın olmaqla 3 nəfər saxlanılıb.
Nizami Rayon Polis İdarəsinin Narkotiklərlə Mübarizə Bölməsinin əməkdaşlarının həyata keçirdikləri əməliyyat-axtarış tədbirləri nəticəsində narkotik vasitələrin qanunsuz dövriyyəsi ilə məşğul olan 3 nəfər saxlanılıb. Əməliyyat zamanı əvvəlcə Bakı şəhər sakini Əsmər Kazımova Qara Qarayev prospektində narkotik vasitələrin satışını həyata keçirən zaman tutulub. Onun üzərində şəxsi axtarış aparılarkən 17 bükün satış üçün qablaşdırılan narkotik vasitə marixuana aşkar edilib. Əsmər Kazımova ifadəsində narkotik vasitələri Bəxtiyar və Elmir adlı şəxslərdən aldığını bildirib. Əməliyyat tədbirlərinin davamı olaraq həmin qadına narkotik vasitəni satan Bəxtiyar Qasımlı və Elmir Ağamalılı da saxlanılaraq istintaqa təqdim ediliblər. Hər iki şəxsin üzərindən bir kibrit qutusu marixuana aşkar olunub. Əlavə olaraq Bəxtiyar Qasımlının Suraxanı rayonu Bülbülə qəsəbəsində yerləşən mənzilinə baxış zamanı 19 kibrit qutusunda satış üçün saxladığı marixuana aşkar olunaraq götürülüb.
Saxlanılan şəxslərin hər biri izahatlarında Nizami, Suraxanı və paytaxtın digər rayonlarında narkotik vasitələrin satışı ilə məşğul olduqlarını etiraf ediblər. Faktla bağlı Nizami Rayon Polis İdarəsində araşdırmalara başlanılıb, narkotik vasitələrin mənbəyinin müəyyən edilməsi istiqamətində əməliyyat-istintaq tədbirləri davam etdirilir.
1-11-2021, 21:01 | Yoluxanların sayında azalma var - 27 nəfər ölüb
Azərbaycan Respublikasında koronavirus (COVID-19) infeksiyasına 1200 yeni yoluxma faktı qeydə alınıb, 1174 nəfər müalicə olunaraq sağalıb.
Nazirlər Kabineti yanında Operativ Qərargahdan verilən məlumata görə, COVID-19 üçün götürülən analiz nümunələri müsbət çıxmış 27 nəfər vəfat edib.
1-11-2021, 20:28 | Məşhur türkiyəli aktrisa vəfat etdi
Türkiyənin məşhur aktrisası Semra Dinçer 56 yaşında dünyasını dəyişib.
Bu barədə ifaçı Haluk Levent tvitterdə bildirib.
Onun sözlərinə görə, aktrisa iki il idi ki, ağciyər xərçəngindən əziyyət çəkirdi.
Qeyd edək ki, S. Dinçer 1965-ci il iyulun 25-də Ankarada anadan olub. O, tamaşaçılara daha çox "Kuzey Güney", "İstanbullu gelin", "Kaybolan Yıllar", "Kavak Yelleri", "Kırmızı Oda" seriallarından tanışdır.
22-10-2021, 09:05 | Bakıda 9 mərtəbəli yaşayış binasında yanğın baş verib
Bakının Nərimanov rayonunda doqquzmərtəbəli yaşayış binasının 8-ci mərtəbəsində ümumi sahəsi 60 m² olan 3 otaqlı mənzilin 1 otağında divan, kreslo və stol yanıb.
Fövqəladə Hallar Nazirliyindən verilən məlumata görə, yüksək temperaturdan otağın lambirindən ibarət tavanı 4 m² sahədə əriyib.
Mənzilin qalan hissəsi yanğından mühafizə olunub.
Yanğın yanğından mühafizə bölmələri tərəfindən söndürülüb.
22-10-2021, 09:03 | "8 yaşlı qızımı binadan atandan sonra məni də öldürmək istəyirdi"
Bakıda valideynlərinin mübahisələrinə, atasının anasını döyməyinə dözməyərək intihar etdiyi deyilən səkkiz yaşlı qızla bağlı məhkəmə prosesi başa çatıb, məhkəmə ata Vahid Nadirovla bağlı qərar verib.
Hadisə ötən il noyabrın 27-də paytaxtın Nizami rayonunda, M.Abbasov küçəsində yerləşən binanın 13-cü mərtəbəsində baş verib.
Fərəh Nadirova atası ilə anası Dilarə Bağıyevanın mübahisəsi zamanı yaşadıqları evin pəncərəsinə çıxaraq özünü oradan atıb.
Məhkəmədə ifadə verən Dilarə Bağıyeva bildirib ki, həyat yoldaşı Vahid Nadirovla evliliyi hər ikisinin ikinci nikahı olub:
"Vahidlə 10 il idi ki, evli idik, əvvəlki nikahlardan ikimizin də övladı var idi. Oğlum anam və atamla birgə yaşayırdı. Mən, Fərəh və Vahid bir evdə yaşayırdıq. Vahidlə bir dəfə 3-4 il əvvəl içki içdiyi üçün boşanmışdım. Sonra gəlib üzr istədi, barışmaq üçün yalvardı, mən də barışdım. And içdi ki, bir də içki içməyəcək. Lakin hadisə baş verməmişdən bir müddət əvvəl o, yenidən içkiyə qurşanmışdı, məni başqa qadınlarla aldadırdı.
Nəsə deyəndə məni uşağın yanında döyürdü. Hadisə baş verməmişdən əvvəl, noyabrın 19-da Vahid evə gələndə gözləri qızarmışdı, onun içkili olduğunu bildim. Vahid evin qapısına baxıb "bu nə qapıdır qoyublar, bu necə qapıdır düzəldiblər?", - dedi. Mən də cavabımda "usta adamsan, bəyənmirsən, təmir edərsən", - dedim. Vahid isə mənə mənzildə heç bir iş görməyəcəyini bildirdi. Bu zaman aramızda mübahisə yarandı, Fərəh də səsə oyanıb gəldi".
D.Bağıyevanın sözlərinə görə, əri Vahid Nadirov bundan sonra ona işgəncə verməyə başlayıb:
"Pultu üstümə ataraq qışqırıb "səsini kəs", - dedi. Sonra məni divara dirəyərək deyirdi ki, "səni öldürəcəyəm, səni boğacağam, sən yaşamayacaqsan". Valideynlərimi, bacımı nalayiq ifadələrlə təhqir etdi. Mən də Vahidə cavab qaytardım. Vahid məni divara dirəyib boğdu, boynumu qaçıranda az qalmışdı ki, boynum qırılsın. Mən onun əlindən çıxmaq istəyəndə yenə məni divara itələdi.
Fərəh də aramızda qalmışdı, yalvarırdı ki, "ata, anamı burax, öldürmə". Sonra məni yatağa atdı, üstümə çıxıb yenə boğmağa başladı. Bu zaman burnumu da, ağzımı da tutmuşdu ki, səsimi çıxara bilməyim. Sonra məni ayaqlarımdan tutub yerə atdı, mən də beli üstdə yerə dəydim. Yenə məni yerdə döyməyə başladı. Fərəh gəlib bizi ayırdı. Mən Vahidə dedim ki, bir də evə gəlməsin. O da mənə "sənin acığına hər gün gələcəyəm", - dedi".
Qadın bildirib ki, həmin hadisədən sonra qızı intihar edən günə kimi əri Vahidlə danışmayıb:
"Noyabrın 27-si evə gəldi, ərzaqlar almışdı, onları mətbəxə qoyub hamama getdi. Bir neçə dəqiqə sonra səs eşitdim, hamama keçəndə şüşənin sındığını, Vahidin üstünün qan olduğunu gördüm. Ona dəsmal, yod, pambıq verdim ki, qanını təmizləsin. Bundan sonra yenə mübahisə yarandı. Vahid çaynikin suyunu dəyişməyini bəhanə edərək, dalımca gəlib məni divara dirədi, qarnından yumruqla vurdu.
Sonra saçımdan tutub sürüyə-sürüyə yataq otağından dəhlizə gətirdi. Fərəh də qaçıb yanıma gəldi. Vahid başımı yerə vurmağa başladı, burnumdan qan açıldı. Ona "burnumdan qan da açıldı, bəsdir də, nə istəyirsən?" dedim, Vahid "öldürəcəyəm səni" deyə cavab verdi. Məni stulun altına salıb üstümdə oturdu, ayaqlarımı bağlayıb əllərimi tutdu. Gah burnumu, gah ağzımı tuturdu ki, nəfəs ala bilməyim.
Fərəh ağlaya-ağlaya yalvararaq "ata, nə olar, burax anamı, öldürmə" deyirdi. Vahid Fərəhə, onun göz yaşlarına, çabalamasına əhəmiyyət vermirdi. Vahid qulağımı qanatdı, sonra barmağımı qoparacağanı dedi. Fərəh yenə də "ata, eləmə, burax" deyərək yalvarırdı. Sonra Vahid artıq taqətimin qalmadığını, boğulduğumu görüb buraxdı.
Fərəhi götürüb qapını açıb getmək istəyəndə Vahid yenə arxadan onu tutub "hara gedirsən?" deyərək, dala darta-darta içəri saldı. Vahid Fərəhin qolunun altından tutub sürüyə-sürüyə yataq otağına apardı, Fərəhə "buradan çıxsan, meyitini sərərəm sənin" dedi və qapını bağladı. Mən şok vəziyyətində idim, Vahid məni yerə yıxıb yenə döyməyə başladı, sürüyərək mətbəxə apardı, orada da yenə döyüb başımı yerə çırpırdı.
Mən halsızlaşanda Vahid eyvana çıxdı, bir dəqiqə sonra qayıtdı. Məni dartaraq mətbəxdən dəhlizə gətirdi, orada da döydü. Vahid mənim yaxamdan tutub eyvana aparmaq üçün dartanda müqavimət göstərdim. Mətbəxin ortasında burnumu, ağzını tuturdu ki, boğulub ölüm.
Gördüm ki, Vahid geyinir, hadisəni törədib qaçmaq istəyirdi. Ona "hara gedirsən, bunlara görə cavab verəcəksən!" dedim. Sonra Fərəhin olduğu otaqdan səs gəlmədiyinə görə həmin otağa getdim. Qızım otaqda yox idi, onu çağırsam da, cavab gəlmədi. Elə bildim ki, Fərəh qorxusundan gizlənib, ona görə də otaqda olan şkafa baxdım, amma tapmadım.
Yataq otağının qapısını açanda pəncərənin açıq olduğunu gördüm. Mənim arxasımca Vahid də otağa girdi, pəncərəyə yaxınlaşıb baxdı və Fərəhin orada olmadığını dedi. Evdən çıxdıq, Vahid liftə mindi, mən pilləkənlə "Fərəh" deyə-deyə düşdüm. Çölə çıxanda qonşuların, bəzi polislərin orada olduğunu gördüm. Bir neçə dəqiqədən sonra qonşulardan biri Fərəhin meyitinin binanın ikinci mərtəbəsində olan eyvanın yanındakı beton çıxıntının üzərində olduğunu dedi".
Dilarə Bağıyeva qeyd edib ki, uşağının ölüm səbəbkarı birbaşa əri Vahid Nadirovdur:
"Fərəhi pəncərədən Vahid atıb. Vahid məni sürüyə-sürüyə mətbəxə aparanda dedi ki, məni 13-cü mərtəbədən atmağa aparır. Məni atmaq istəyirdi ki, sonra desin uşaqdan sonra anası da özünü atıb".
Məhkəmədə şahid qismində dindirilən Gülay Məhərrəmova hadisə baş verən zaman eyvanda olduğunu deyib:
"Həmin binada yaşayıram. Saat 21.30 radələrində kombidə nasazlıq yarandı. Eyvana çıxıb kombini düzəltmək istəyəndə 10-11-ci mərtəbə arasındakı divarından bir qızın güclə tutduğunu gördüm. Kömək edilməsi üçün qışqırırdı. Tez polisə zəng etdim. Həmin vaxt onların pəncərəsində, yəni 13-cü mərtəbədə heç kim yox idi. Uşaq bir az dayanıb yerə yıxıldı".
Məhkəmdə dindirilən Vahid Nadirov mübahisəni həyat yoldaşının yaratdığını deyib:
"Hadisə baş verən gün, yəni noyabrın 27-də işdən evə gəldim. Hamamda duş kabinəsini açmaq istəyəndə cəftə əlimdə qaldı. Şüşə də qırılıb yerə töküldü. Səs-küyə Dilarə ilə Fərəh də gəldi, Dilarə yod və pambıq gətirdi. Əlimin qanı dayanandan sonra mənlə mübahisə etməyə başladı ki, düz-əməlli usta tapmırsan, mən özüm usta gətirəcəyəm dedi. Mən də ona "Sən evə yad kişi sal, onda görərsən", - dedim, o da mənə "əcəb edirəm, edəcəyəm də", - dedi. Fərəh bizim dalaşdığımızı görüb "ata, nə olar, dalaşmayın", - dedi. Mən də Fərəhə "Anan dalaşır da, mən nəsə deyirəm ki?", - dedim. Bu zaman Dilarə telefonu Fərəhə verib babasına zəng etməyi tapşırdı.
Mən də internet kabelini qırdım, sonra Dilarə qapını açıb Fərəhə getməsini, özünün də onunla bərabər gedəcəyini bildirdi. Mən də hər ikisinin qolundan tutub içəri saldım. Sonra Fərəhin ağladığını gördüm. Onu o biri otağa apardım ki, orada otursun. Özüm də yataq otağına keçdim. Dilarə arxamca gəlib, o biri nikahdan olan qızıma qarğışlar, söyüşlər söyməyə başladı. Mən də onu vurdum, sonra Fərəhin yanına getdi.
Dilarə Fərəh pəncərədən yıxılanda mənə şər atdı ki, uşağı sən atmısan. Mən qızıma bir dəfə də olsun əl qaldırmamışam. Ekspertizada da var ki, uşaq heç bir fiziki şiddət görməyib. Elə bir şey olmayıb, Fərəh pəncərədən yıxılanda mən yataq otağında idim".
Vahid Nadirov sadəcə arvadına işgəncə verdiyi üçün ittiham edilib. Qızı Fərəhin intiharına səbəb olması ilə bağlı başlanan cinayət işinə xitam verilib. Bu ilin avqust ayında istintaq düzgün aparılmadığına görə yenidən Cinayət Məcəlləsinin 125-ci maddəsi ilə cinayət işi başlanılıb.
Bakı Şəhər Nizami Rayon Məhkəməsinin qərarı ilə Vahid Nadirova 1 il 6 ay müddətinə azadlıqdan məhrum etmə cəzası təyin edilib. İstintaq dövründə azadlıqda qalan V.Nadirov oktyabrın 14-də məhkəmə zalında həbs olunub.
"qafqazinfo"
22-10-2021, 09:00 | Abşeronda üç avtomobil toqquşub, xəsarət alan va
Masazır qəsəbəsində yol qəzası zamanı 1 nəfər xəsarət alıb.
Hadisə Əliağa Vahid küçəsində baş verib.
Belə ki, "Vaz 2106" markalı nəqliyyat vasitəsinin sürücüsü sola manevr edərkən qəfil onunla üzbəüz hərəkətdə olan "Vaz 2107"-nin sürücüsü idarəetməni itirərək manevr etmək istəyən maşına çırpılıb. Zərbənin gücündən "Vaz 2106" hərəkətdə olan "Niva"-ya çırpılıb.
Qəza nəticəsində "Vaz2106"-nın sürücüsü xəsarət alıb.
Fakt araşdırılır.
(APA)
21-10-2021, 11:04 | Sumqayıtda qadın özünü altıncı mərtəbədən atdı
Sumqayıtda 30 yaşlı qadın özünü binadan atıb.
Hadisə şəhərin Ərşad Kərimov küçəsində qeydə alınıb.
1991-ci il təvəllüdlü Əliyeva Şəhla Cahid qızı özünü yaşadığı hündürmərtəbəli binanın 6-cı mərtəbəsindən ataraq intihar edib. İntiharın səbəbləri bilinmir. Meyit aidiyyatı üzrə təhvil verilib.
Faktla bağlı araşdırma aparılır.
21-10-2021, 08:56 | Bakıda əks yola çıxan avtomobil qəza törədib, xəsarət alanlar var
Bakıda ağır yol-nəqliyyat hadisəsi baş verib.
Hadisə gecə saat 00:40 radələrində, paytaxtın Binəqədi rayonu, İlqar Cümşüdov küçəsində qeydə alınıb.
Hadisə şahidlərinin sözlərinə görə, 4-cü mikrorayon dairəsi kimi tanınan ərazidən 9-cu mikrorayon istiqamətində hərəkət edən "Chevrolet Cruze" markalı avtomobil işıqforun qırmızı işığında keçərək əks yola daxil olub.
Nəticədə "Chevrolet Cruze" markalı nəqliyyat vasitəsi Çevik Polis Alayının əməkdaşı tərəfindən idarə olunan "Mercedes" markalı avtomobil və "Toyota Prius" markalı avtomobillərlə toqquşub.
Zərbənin təsirindən "Mercedes"in sükanı arxasında olan polis əməkdaşı çətinliklə avtomobildən çıxarılaraq əraziyə gələn təcili tibbi yardım maşını ilə xəstəxanaya çatdırılıb. "Toyota Prius"da olan sürücü və sərnişinlər də xəsarət alaraq xəstəxanaya yerləşdiriliblər.
Faktla bağlı araşdırma aparılır.
Report"
21-10-2021, 08:47 | Şabranda avtomobillə vurulan gənc Bakıya gətirilib
Şabran rayonunda xəsarətlə nəticələnən yol-nəqliyyat hadisəsi baş verib.
Hadisə rayonun mərkəzində qeydə alınıb.
Belə ki, 2001-ci il təvəllüdlü Əliyev Qulu Teyyub oğlu yolu keçmək istəyərkən avtomobil onu vurub. O, təcili tibbi yardımın köməkliyilə Şabran rayon Mərkəzi Xəstəxanasına çatdırılıb. Daha sonra Bakı şəhərinə gətirilib.
Müayinə zamanı ona sağ almacıq sümüyünün sınığı diaqnozu qoyulub. Faktla bağlı araşdırma aparılır.
Report
20-10-2021, 09:28 | Canəli Əkbərov və həyat yoldaşı koronavirusa yoluxub, vəziyyəti ağırdır - Foto
Xalq artisti Canəli Əkbərov və həyat yoldaşı koronavirusa yoluxub.
81 yaşlı xanəndə ev şəraitində müalicə asla da, vəziyyəti ağırdır.
Qeyd edək ki, Azərbaycanın Əməkdar və Xalq artisti fəxri adlarına layiq görülmüş muğam ustası bundan əlavə, "Əmək", "Şərəf" və "Şöhrət" ordenləri ilə də təltif edilib.
oxu.az-
