31-12-2021, 09:06 | Moskvada azərbaycanlı qadınların macərası: Gün ərzində 3-4 kişi ilə...
Gəncə şəhər sakini, 1980-cı il təvəllüdlü Samirə iki qadını aldadaraq Moskvaya aparıb və orada cinsi istismara məruz qoyub.
teleqraf.com-a istinadən xəbər verir ki, Samirə Ağır Cinayətlərə dair İşlər üzrə Məhkəmənin 2010-cu il 5 noyabr tarixli hökmü əsasında Cinayət Məcəlləsinin 144-1.2.2.-ci (təkrar insan alveri törətmək) və 144-1.2.5-ci (qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən insan alveri törətmək) maddələri ilə təqsirli bilinib, əmlakı müsadirə olunmamaqla 2 il müddətinə azadlıqdan məhrumetmə cəzasına məhkum olunub.
Buna baxmayaraq o, 2012-ci il noyabrın sonlarında Leyla (zərərçəkmişlərin, onların ailə üzvlərinin adları şərti verilib - red.) ilə mobil telefon əlaqəsi saxlayıb. Onu Moskva şəhərində işə düzəldəcəyi adı ilə aldadıb, cinsi istismar məqsədi ilə ölkədən xaricə aparıb.
Leyla onunla Moskvaya getməyə razılıq verdikdən sonra yol bileti alıb, 2012-ci il dekabrın 3-də Gəncə hava limanından keçərək Moskva şəhərinə getməsini təşkil edib. Leylanı 2013-cü il fevralın 28-dək həmin şəhərdəki müxtəlif ünvanlarda öz nəzarəti altında pul ödənişləri müqabilində kişi müştərilərlə görüşdürüb.
Bundan başqa, Samirə 2014-cü il iyunun sonlarında Bakı şəhəri, Yasamal rayonu, İnşaatçılar prospektində ünvanı tam bəlli olmayan mənzildə kirayədə yaşayan Xumarı Moskva şəhərində işə düzəldəcəyi adı ilə həmin ölkəyə aparıb. Orada Xumarı müxtəlif kişilərlə görüşdürüb, pul müqabilində cinsi əlaqədə olmasına şərait yaradıb.
Hər iki zərərçəkmiş Azərbaycana qayıtdıqdan sonra İnsan Alveri Baş İdarəsinə müraciət ediblər. Müraciət əsasında Samirənin barəsində axtarış elan olunub. O, 2019-cu ilin dekabrın 17-də həbs olunub.
İstintaq orqanı tərəfindən Samirənin barəsində Cinayət Məcəlləsinin 144-1.2.1-ci-ci (iki və ya daha çox şəxs barəsində insan alveri törətmək), 144-1.2.2-ci (təkrar insan alveri törətmək) və 144-1.2.4-1-ci (insan alveri qurbanını Azərbaycan Respublikasının dövlət sərhədindən keçirməklə törədildikdə) maddələri ilə ittiham elan edilib.
Cinayət işi üzrə təqsirləndirilən şəxs qismində ifadə verən Samirə elan olunmuş ittiham üzrə özünü qismən təqsirli bilib. O bildirib ki, Leyla və Xumarı yaşadığı Gəncə şəhərindən tanıyır: "Onlar mənə dolanışıqları olmadığını bildirdilər. Mən də Moskva şəhərində qadınların fahişəliyə cəlb edilməsi ilə məşğul olduğumu dedim. Heç bir etiraz etmədi, Rusiyaya getmələrinə kömək etdim, onları fahişəliyə cəlb etdim.
Razılaşmaya əsasən, müştəriləri qadınlarla tanış edərək cinsi əlaqədə olduqdan sonra alınan pulun 10-20 faizi mənə çatıb. Axırıncı dəfə Xumarı fahişəliyə cəlb etmişəm. Bundan sonra onlarla əlaqəm olmayıb. İstintaqa dəvət edilərkən Moskva şəhərində olmuşam. Səhhətimdə problemlər olduğu üçün həmin zaman Azərbaycana gələ bilməmişəm.
Həyatımı dəyişmişəm, normal işdə işləyirəm. Qeyri-rəsmi nikahda yaşamışam, əvvəllər insan alverinə görə məhkum edildiyimdən yenidən tutulacağımdan qorxmuşam".
Cinayət işi üzrə zərərçəkmiş şəxs qismində ifadə verən Leylanın sözlərinə görə, 2012-ci il noyabrın ortalarında Samirə ilə tez-tez "skayp" vasitəsilə əlaqə saxlayıb: "Samirə məni Moskva şəhərinə dəvət etdi, mənim üçün şərait yaradacağını söylədi. Onunla razılaşdım. Samirənin aldığı təyyarə bileti ilə 2012-ci il dekabrın 3-də Gəncə hava limanından Moskva şəhərinə uçdum.
Samirə məni qarşıladı, hansısa bina evinin birinci mərtəbəsindəki mənzilə apardı, orada tanımadığım bir neçə nəfər qadınla görüşdürdü. İki-üç gündən sonra Samirə evin kirayə pulunu ödəməkdə çətinlik çəkdiyini, məni müxtəlif saunalarda fahişəliyə cəlb edəcəyini söylədi.
Samirəyə etiraz etdim, evdən çıxmaq istədiyimi dedim. Samirə çəkdiyi xərcləri ödəməyimi tələb etdi. Məcburiyyət qarşısında qalaraq könülsüz şəkildə razılaşdım".
Leyla qeyd edib ki, bundan sonra Samirə onu və Mətiş ləqəbli qadını özü ilə birlikdə saunaya aparıb: "Məni cinsi əlaqədə olmaq üçün kişi müştərilərinə təqdim etdi. Eyni qaydada Samirənin təşkilatçılığı ilə gün ərzində 3-4 kişi müştəri ilə intim münasibətdə olmuşam. 2013-cü il fevralın 28-dək cinsi istismara məruz qalmışam. Bir gün əvvəl Samirəyə azyaşlı qızımı anamın yanında qoyaraq gəldiyimi, onlara pul aparmalı olduğumu bildirdim. Bundan sonra Samirə mənə pul verdi, bilet aldı. Növbəti gün Azərbaycana qayıtdım".
Leyla qeyd edib ki, təqsirləndirilən şəxslə barışıb, ona qarşı şikayəti yoxdur.
Digər zərərçəkmiş Xumarın sözlərinə görə, Gəncə şəhərindən qonşusu Samirə 2014-cü il mayın ortalarından onun "Facebook" sosial şəbəkəsindəki profilinə mesaj yazıb və mobil telefon nömrəsini verib:
"Samirə mənim maddi vəziyyətimlə maraqlandı, Moskva şəhərində bizneslə məşğul olduğunu bildirdi. Ondan məni də işə düzəltməsini xahiş etdim. Samirə məni tanış restoranlardan birində inzibatçı kimi işə düzəldəcəyini vəd etdi. Onun göndərdiyi pulla təyyarə bileti aldım və 2014-cü il iyunun 25-də Moskva şəhərinə uçdum.
Məni qarşılayan Samirə öz yaşadığı mənzilinə apardı. Sonra imkanlı və nüfuzlu tanışları olduğunu, tapdığı müştərilərlə cinsi əlaqədə olmaq yolu ilə pul qazanacağımı söylədi. Etiraz etməyimə baxmayaraq Samirə mənə qulaq asmadı.
Başqa işlə təmin edə bilməyəcəyini, ya fahişəliklə məşğul olmağımı, ya da məni çölə atacağını dedi. Məcburiyyət qarşısında qaldığımdan bir həftə ərzində Samirə məni müxtəlif otellərə apardı, fahişəliyə cəlb etdi. Samirə ilə tez-tez mübahisə etdim, məni buraxmasını tələb etdim. Bu səbəbdən Samirə məni 2014-cü il iyulun 8-də Bakı şəhərinə yola saldı".
Xumar ifadəsinin sonunda təqsirləndirilən şəxslə barışdığı üçün şikayətçi olmadığını deyib.
Bu cinayət işinə Bakı Ağır Cinayətlər Məhkəməsində baxılıb.
Samirə 8 il müddətinə azadlıqdan məhrum edilib.
28-12-2021, 09:22 | Bakıda 52 yaşlı qadını motosiklet vurub
Bakıda xəsarətlə nəticələnən yol-nəqliyyat hadisəsi baş verib.
"Report"a istinadən bildirir ki, hadisə Nizami rayonunda qeydə alınıb.
Belə ki, 1969-cu il təvəllüdlü Nəzərova Lətafət Əmir qızını motosiklet vurub.
Yaralı təcili tibbi yardımın köməkliyilə xəstəxanaya çatdırılıb. Müayinə zamanı ona burunun sınığı diaqnozu qoyulub.
Faktla bağlı araşdırma aparılır.
28-12-2021, 09:17 | Bakıda bankomatdan pul çıxaran qadına xəsarət yetirilib
Bakıda 42 yaşlı qadın hücuma məruz qalaraq xəsarət alıb.
"Report"a istinadən bildirir ki, hadisə Suraxanı rayonunda qeydə alınıb.
Belə ki, 1979-cu il təvəllüdlü Abdullayeva Məlahət Aydın qızı bankomatdan pul çıxararkən tanımadığı şəxs ona xəsarət yetirib.
O, müxtəlif dərəcəli bədən xəsarətləri alaraq xəstəxanaya yerləşdirilib. Faktla bağlı araşdirma aparılır.
28-12-2021, 09:07 | APA-nın əməkdaşları hücuma məruz qalıblar
Masazır qəsəbəsində yol qəzası zamanı bir nəfər xəsarət alıb.
APA-ya istinadən xəbər verir ki, hadisə Masazır qəsəbəsi Novxanı şosesində qeydə alınıb.
Yolu keçən 1999-cu il təvəllüdlü Nurəliyeva Əfsanə Sahib qızını Qasımzadə İman Seyran oğlu idarəetməsində olan 99-SG-213 dövlət nişanlı "VAZ-21012" markalı avtomobillə vurub. Yaralının yaxınları APA-ya bildirib ki, təcili yardım xidməti əraziyə 30 dəqiqədən gec gəlib.
Hadisəni işıqlandıran "APA Group"un əməkdaşı Nurlan Əli və operator Hüseyn Qurbanov sürücünün yaxınları tərəfindən təzyiqə məruz qalıblar. Onlar çəkiliş olmamasını tələb edərək hadisə yerində olan əməkdaşın mobil telefonu və kamerasını əlindən alıblar. Buna görə də Daxili İşlər Nazirliyinin 102 zəng mərkəzinə məlumat verilib. Əraziyə gələn post patrul xidmətinin əməkdaşları baş verən insidentin qarşısını alıb.
Qeyd edək ki, insident zamanı Abşeron Rayon Dövlət Yol Polis Şöbəsinin əməkdaşları hadisə yerində olub. Onlar hərəkətsizlik göstəriblər.
Daha sonra əraziyə Təcili Yardım Xidməti gəlib yaralı Ə.Nurəliyeva xəstəxanaya aparılıb. Sözügedən təcili yardım xidmətinin əməkdaşı bildirib ki, ərazidə müraciət çox olduğu üçün ləngimə yaranıb.
28-12-2021, 09:05 | Oğuzda qohumunun evindən oğurluq edən şəxs saxlanılıb
Oğuz şəhəri ərazisində fərdi yaşayış evindən qızıl-zinət əşyaları və pul oğurlayan şəxs rayon polis şöbəsinin cinayət axtarış bölməsinin əməkdaşlarının keçirdikləri əməliyyat nəticəsində saxlanılıb.
DİN-in Mətbuat Xidmətinin Şəki regional qrupundan verilən məlumata görə, "Gənclik" küçəsində yerləşən fərdi yaşayış evindən 5 min manat dəyərində qızıl-zinət əşyaları, eləcə də pulun oğurlanması barədə polisə müraciət daxil olub.
Müraciət əsasında keçirilən əməliyyat-axtarış tədbirləri nəticəsində cinayət əməlini törədən şəxsin rayonun Şirvanlı kənd sakini, zərərçəkmişin qohumu Ramazan Məmmədzadə olduğu müəyyən edilib və o, şübhəli şəxs qismində saxlanılıb.
R.Məmmədzadə ifadəsində əməlini etiraf edib, qızılları oğurladıqdan sonra Bakı şəhərinə getdiyini və orada satdığını bildirib. Faktla bağlı cinayət işi başlanılıb, istintaq aparılır.
27-12-2021, 11:25 | 15 yaşlı qızın başına gələn dəhşəti məktəb psixoloqu üzə çıxardı
Azərbaycanda 15 yaşlı qız 4 il boyunca atası və qardaşı tərəfindən cinsi istismara məruz qalıb.
"Qafqazinfo"ya istinadən xəbər verir ki, istintaqın qənaətinə görə, 2006-cı il təvəllüdlü G. Fuadzadənin (şərti) anası 2015-ci ildə xərçəng xəstəliyindən vəfat edib. Anası rəhmətə gedəndən sonra uşaq atası və qardaşı ilə birlikdə yaşayıb.
Cinayətin üstü yalnız məktəbli qızın hadisəni öz sinif yoldaşı olan qonşusuna danışmasından sonra açılıb. Belə ki, qonşu qız bu barədə anasına məlumat verib. Qadın isə olanları qızın təhsil aldığı məktəbin psixoloquna danışmağı tövsiyə edib. "Məktəblinin dostu" layihəsi çərçivəsində şagirdlərlə söhbət aparmaq üçün məktəbə gələn psixoloq olanları öyrənib və bundan sonra hüquq-mühafizə orqanlarına məlumat verilib.
Bakı Ağır Cinayətlər Məhkəməsində qızın qardaşı Cinayət Məcəlləsinin 150.3.3-cü (Seksual xarakterli zorakılıq hərəkətləri) maddəsi ilə təqsirli bilinərək 13 il azadlıqdan məhrum edilib.
Məhkəmədə dindirilən qardaş isə ittihamları qəbul etməyib: "Ona qarşı heç vaxt əxlaqsız hərəkət etməmişəm. Bir dəfə qolunu şüşə ilə kəsmişdi. Bunun səbəbini soruşanda anama görə darıxdığı üçün etdiyini demişdi".
G.Fuadzadə isə ifadəsində göstərib ki, atasına etiraz etsə də, gücü çatmayıb.
Məhkəmədə dindirilən qonşu qadın bildirib ki, uşaq hərdənbir onlara qonaq gəlib: "Bir dəfə mənə rəfiqəsinin telefonu ilə zəng edib "xala, məktəbə psixoloq gələcək, məni uşaq evinə verəcəklər" dedi. Ona dedim ki, hər şeyi məktəbin psixoloquna danışsın. Hadisəni ərimə danışdım. Ərim onlara gedib hadisəni uşağın öz dilindən öyrənib".
Ekspretiza da 15 yaşlı qızın dediklərini təsdiq edib.
Qardaş Bakı Ağır Cinayətlər Məhkəməsinin hökmündən apellyasiya şikayəti verib. Məhkəmə şikayəti əsassız hesab edərək cəza müddətini dəyişdirmədən saxlayıb.
Bundan əlavə, atanın törətdiyi əməllə bağlı da ayrıca cinayət işi başanılıb və məhkəmənin hökmü ilə o da azadlıqdan məhrum edilib.
27-12-2021, 06:07 | Bakıda tələbə dəm qazından boğulub öldü - Ən yüksək bal toplayanlardan biri imiş... -FOTO
Bakıda dəm qazı daha bir can alıb.
"qafqazinfo"-ya istinadən xəbər verir ki, Azərbaycan Universitetinin tələbəsi Elimxan Əliyev dəm qazından zəhərlənərək vəfat edib.
22 yaşlı gənc bu universitetdə MBA üzrə magistratura təhsili alırmış.
E.Əliyev magistraturaya qəbul imtahanında 93 bal toplayaraq, respublika üzrə ən yüksək nəticə göstərənlərdən biri olub.
O, 2016-cı ildə ali məktəblərə qəbul imtahanında da yüksək nəticə əldə edərək, 636 balla Azərbaycan Universitetinin tədrisi ingilis dilində aparılan maliyyə ixtisasına qəbul olub.
Həmçinin, 2017/2018-ci tədris ilinin yaz semestrini "Erasmus+" mübadilə proqramı çərçivəsində Almaniyanın tərəfdaş Koblenz Universitetində oxuyub.
24-12-2021, 05:22 | Bakıda gənc qız dəm qazından zəhərlənib
Bakıda zəhərlənmə hadisəsi baş verib.
"Report"a istinadən bildirir ki, hadisə Xətai rayonunda qeydə alınıb. 1997-ci il təvəllüdlü Sultanova Samirə Habil qızı Polad Həşimov küçəsində yaşadığı evdə dəm qazından zəhərlənib.
Zərərçəkən təcili tibbi yardımın köməkliyi ilə xəstəxanaya çatdırılıb.
Faktla bağlı araşdırma aparılır.
15-12-2021, 07:25 | 20 yaşlı dayısı oğlunu ürəyindən bıçaqladı
Ağstafada qətl hadisəsi baş verib.
Milli.Az APA-ya istinadən xəbər verir ki, hadisə rayonun Köçüəsgər kəndində qeydə alınıb.
2001-ci il təvəllüdlü Vəlizadə Çingiz Aslan oğluna yaşadığı evin önündə 1999-cu il təvəllüdlü Əsgərov Əli Mübariz oğlu ürək nahiyəsindən bıçaq zərbəsi endirib.
O, hadisə yerində dünyasını dəyişib. Mübahisə edənləri aralamaq istəyən kənd sakini, 1997-ci il təvəllüdlü Vəliyev Nurlan Kələntər oğlu da bıçaq xəsarəti alıb.
O, xəstəxanaya yerləşdirilib, vəziyyətinin kafi olduğu bildirilir.
Hadisə yerinə hüquq-mühafizə orqanlarının əməkdaşları cəlb olunub.
Hadisəni törədən şəxs tutulib.
Faktla bağlı araşdırmalara başlanılıb.
Qeyd edək ki, Çingiz Vəlizadə ilə Əli Əsgərov dayıoğlu-bibioğludurlar.
27-11-2021, 07:40 | Goranboyda maşın aşıb, sürücü ağır xəsarət alıb
Goranboyda yol-nəqliyyat hadisəsi baş verib.
APA-ya istinadən bildirir ki, hadisə rayonun Səfikürd kəndində qeydə alınıb.
Hərəkətdə olan "Mercedes" markalı minik avtomobili idarəetmədən çıxıb.
Nəticədə avtomobil yoldan çıxaraq aşıb. Qəza zamanı sürücü xəsarət alaraq xəstəxanaya yerləşdirilib, vəziyyətinin kafi olduğu bildirilir.
Faktla bağlı araşdırma aparılır.
