17-12-2023, 10:54 | Bu gün dövlət qulluğuna qəbul imtahanı keçiriləcək
Dövlət İmtahan Mərkəzi (DİM) bu gün dövlət qulluğunda inzibati vəzifələrin B növünə (inzibati icraçı vəzifələr) aid olan BA və BB qruplarına uyğun vəzifələr üzrə dövlət qulluğuna qəbul imtahanı keçirəcək.
Respublica.Az xəbər verir ki, imtahan bütün binalarda eyni vaxtda - saat 11:00-da başlanacaq və 3 saat davam edəcək.
Saat 10:45-dən sonra gələn namizədlər imtahana buraxılmırlar. İmtahan binasına buraxılış vərəqəsində qeyd olunan vaxtda gəlmək lazımdır. İmtahan binasına mobil telefon və digər rabitə vasitələri, elektron cihazlar, kalkulyator, elektron məlumat daşıyıcısı, kitab, dəftər, jurnal, konspekt, məlumat kitabçası, lüğət, cədvəl, çanta və digər yardımçı vəsaitlər gətirmək qadağandır. İştirakçılardan imtahan binasına əlavə əşyaları gətirməmələri xahiş edilir. Bütün bunlar buraxılış rejimi işinin səmərəli təşkilinə və onun vaxtında başa çatdırılmasına mane olur.
İmtahanda iştirak etmək üçün qeydiyyatdan keçmiş namizədlər DİM-in internet saytına daxil olaraq "İmtahana buraxılış vərəqəsi"ni çap etməlidirlər. Buraxılış vərəqəsi ilə yanaşı onlara "Namizədin yaddaş kitabçası" da təqdim olunub. Burada namizədlərə imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılıb.
Namizədlər imtahana aşağıdakı sənədləri gətirməlidirlər:
- şəxsiyyəti təsdiq edən sənədin əsli;
- "İmtahana buraxılış vərəqəsi".
İmtahan kağız daşıyıcılar vasitəsilə Bakı və Naxçıvan şəhərlərində 13 binada təşkil olunacaq. İmtahanda iştirak etmək üçün BA qrupu üzrə 625, BB qrupu üzrə 2 588 olmaqla, ümumilikdə 3 213 namizəd qeydiyyatdan keçib. İmtahanının keçirilməsi üçün 13 ümumi imtahan rəhbəri, 35 imtahan rəhbəri, 293 nəzarətçi‑müəllim, 45 buraxılış rejimi əməkdaşı ayrılıb.
Respublica.Az
14-12-2023, 09:27 | Bakı Təşəbbüs Qrupunun təşkilatçılığı ilə Cenevrədə neokolonializmlə bağlı beynəlxalq konfrans başlayır
Bu gün İsveçrənin Cenevrə şəhərində yerləşən BMT Ofisində Bakı Təşəbbüs Qrupunun təşkilatçılığı ilə “Neokolonializm: İnsan Hüquqları, Sülh və Təhlükəsizlik” adlı beynəlxalq konfrans öz işinə başlayacaq.
Respublica.Az"Report"a istinadən xəbər verir ki, konfrans üçün 14 dekabr tarixinin seçilməsi təsadüfi hal deyil. Belə ki, BMT Baş Assambleyası 14 dekabr 1960-cı ildə 1514 (XV) saylı qətnamə üzrə müstəmləkə ölkələrinə və xalqlarına müstəqilliyin verilməsi haqqında Bəyannaməni qəbul edib. O vaxtdan 14 dekabr dünyada “dekolonizasiya günü” kimi qeyd olunur.
Konfransda 22 ölkədən – ABŞ, Böyük Britaniya, Fransa, Türkiyə, İsveçrə, Əlcəzair, Pakistan, Serbiya, Qətər, Seneqal, Kamerun, Vyetnam, Qəmər Adaları İttifaqı, Qvadelupa, Fransız Qvianası, Yeni Kaledoniya, Korsika, Martinik, Fransız Polineziyası, Korsika, Valis və Futuna, Solomon Adaları, eləcə də 2 beynəlxalq təşkilatdan – İslam Əməkdaşlıq Təşkilatı və BMT-dən (Qadınlara qarşı Zorakılığın Ləğv edilməsi üzrə Komitə) 50-ə yaxın nümayəndənin iştirakı təsdiq olunub. Bununla yanaşı, insan hüquqları və dekolonizasiya üzrə ixtisaslaşan QHT rəhbərləri və xarici media təmsilçiləri də tədbirdə iştirak edəcək.
İnsan hüquqlarının beşiyi sayılan BMT-nin Cenevrə ofisində Fransanın keçmiş və indiki koloniyalarından olan nümayəndələr tərəfindən öz ölkələrində Fransa tərəfindən insan hüquqlarının kobud şəkildə pozulması hallarının əks olunduğu çıxışlar nəzərdə tutulur. Bir sıra ölkə rəsmiləri öz milli bəyanatlarını səsləndirəcəklərinə dair məlumat veriblər.
Xatırladaq ki, insan hüquqlarının müdafiəsi ilə məşğul olan "CAGE" adlı QHT rəhbəri, Böyük Britaniya vətəndaşı Muhammad Rabbani bu konfransda iştirak etmək üçün İsveçrəyə gəlsə də, Fransanın tələbi ilə İsveçrə polisi tərəfindən saxlanılıb. Polis məhdudlaşdırmanın səbəbinin Fransa olduğunu etiraf edib. Hüquq müdafiəçisi Rabbaninin özünün və vəkilinin haqlı tələblərinə baxmayaraq, İsveçrə polisi onu buraxmaqdan imtina etməkdə davam edir.
Konfransın sonunda bəyannamənin iştirakçılar tərəfindən imzalanması nəzərdə tutulur.
Qeyd edək ki, İsveçrənin Cenevrə şəhərində BMT-nin Baş qərargahında həyata keçirilən konfrans Bakı Təşəbbüs Qrupunun təşkilatçılığı ilə 2023-cü il üzrə kolonializmə qarşı mübarizə aparan və azad olmağa çalışan xalqları dəstəkləməyə həsr olunmuş IV beynəlxalq tədbirdir.
Respublica.Az
14-12-2023, 08:57 | Yağış yağan kimi Bakını niyə su basır? - səbəb...
Paytaxtda kanalizasiya sistemindəki problem; AYDAA rəsmisi: “Yağış kollektorları Bakı şəhərində çox az saydadır, məcbur oluruq ki...”
Uzun illərdir Bakının həllini gözləyən problemlərindən biri də hər dəfə yağış, qar yağanda paytaxtın bir çox küçələrini, prospektlərini su basmasıdır. Son iki gündə paytaxta bir qədər yağış yağdı, nəticədə Binəqədi, Nəsimi rayonlarında acınacaqlı mənzərə yarandı - küçələr, qəsəbələri su basdı.
Mütəxəssislər deyir ki, bu, kanalizasiya sisteminin tikinti şirkətləri tərəfindən bərbad hala salınması ilə bağlıdır. Belə ki, əksər hissələrdə kanalizasiya sistemi normadan bir neçə dəfə artıq yüklənir. Bəzi yerlərdə isə ümumi kollektora çıxış belə olmadığı iddia olunur.
Sürücü Kəramət Qasımov “Yeni Müsavat”a açıqlamasında deyib ki, illərdir yağış yağanda yollarda tıxaclar yaşanır ki, bu da sürücülərə böyük çətinliklər yaradır: “Hər dəfə qış aylarında Bakıya yağış yağanda çətinliklə üz-üzə qalırıq. Adətən hər dəfə uzun-uzadı tıxac olur. Təkcə avtomobillərin sıxlıq təşkil etdiyi yollarda deyil, məhəlləarası bəzi küçələrdə gölməçələr yaranır. Aidiyyəti qurumlar da nəyə görəsə hələ də bu problemi həll etmir və yaxud etmək istəmir”.
Sürücü İbrahim Abbasov da aidiyyəti qurumların bu problemə diqqət etməməsindən şikayətlənib: “Bu məsələ ilə məşğul olan məmurlar hara baxır, başa düşə bilmirik. Yağı yağır, gölməçələr yaranır, çünki kanalizasiya sistemləri işləmir. Bu problemə nəhayət ki, çarə tapmaq lazımdır”.
Bəs niyə hər dəfə yağış yağanda Bakını su basır? Bu problemi aradan qaldırmaq niyə mümkün olmur?
Anar Cəbrayıllı
Məsələ ilə bağlı “Azərsu” Açıq Səhmdar Cəmiyyətinin mətbuat katibi Anar Cəbrayıllı Cebhe.info-ya bildirib ki, kanalizasiya sistemində heç bir problem yoxdur: “Barmaqlıqları olan küçələrdə və yollarda heç bir narahatlıq yoxdur. Kanalizasiya sistemi tam şəkildə rahat su axınının qarşısını ala bilir. Bəzi küçələrdə kanalizasiya sistemində problem varsa, "Azərsu" Açıq Səhmdar Cəmiyyətinin su və kanalizasiya qəza xidməti dərhal yaranmış problemi aradan qaldırır. Ümumiyyətlə, avtomobil yollarındakı kanalizasiya sistemləri Azərbaycan Avtomobil Yolları Dövlət Agentliyinin (AAYDA) nəzərətindədir".
Azərbaycan Avtomobil Yolları Dövlət Agentliyinin mətbuat katibi Anar Nəcəfli isə məsələ ilə bağlı “Yeni Müsavat”a açıqlamasında deyib: “Qeyd edim ki, AAYDA yolların çəkilməsi, yenidən qurulması işləri ilə məşğul olur. Yəni kanalizasiya xətlərinin və yaxud kollektorların çəkilişini aparmır. Biz yolların yolların təmiri, tikintisi zamanı əgər ərazilərdə yağış axıdılması üçün lazım olan sistemin qurulmasına ehtiyac varsa, bu sistemi qurub, mövcud kanalizasiya kollektorlarına qoşulur. Yağış kollektorları Bakı şəhərində çox az saydadır. Məcbur oluruq ki, kanalizasiya kollektorlarına qoşulma edilsin. Bu da əgər yaxınlıqda mümkündürsə. Mümkün deyilsə, artıq həmin ərazidə yağış axıdılması sisteminin yaradılması hər hansı məna kəsb etmir.
Anar Nəcəfli
Normadan artıq yağış yağdıqda hansı küçələrdə yağış kanalizasiya sistemi var, o sistemdən suyun geri daşması müşahidə olunur ki, bu zaman da kollektorların eyni vaxtda suyu ötürməyə gücü çatmır.
Sonradan yağış azaldıqca o su çəkilib gedir.
AAYDA yaranandan bu günə qədər harada mümkün idisə, yağış kanalizasiya sisteminin qurulması işlərini həyata keçirib.
Əvvəllər yollarda su dolurdu, yağı bitdikdən sonra da su çəkilmirdi, yığılıb ortada qalırdı. Amma indi hazırda yol ərazilərində su toplantısı yoxdur".
Qeyd edək ki, iki gün ərzində paytaxta intensiv yağış yağması bəzi yollarda hərəkəti çətinləşdirməklə yanaşı, çökmə halına da səbəb olub. Belə ki, dekabrın 13-də səhər saatlarında Nəsimi rayonunun Əbdülvahab Salamzadə küçəsi ilə Tiflis prospektinin kəsişməsində yerləşən yol ötürücüsünün üzərində ("Qələbə" dairəsidən Ziya Bünyadov prospekti istiqamətində) asfalt-beton örtüyünün bir hissəsində aşınma yaranıb. Nəticədə küçənin hər iki istiqamətində və “Qələbə” dairəsində sıxlıq yaranıb. Azərbaycan Avtomobil Yolları Dövlət Agentliyinin məsələyə müdaxiləsindən sonra çökmə aradan qaldırılıb.
Xalidə GƏRAY,
“Yeni Müsavat”
14-12-2023, 07:40 | Əsirlərin dəyişdirilməsi: Azərbaycanın yaratdığı yeni reallıq öz bəhrəsini verir - VİDEO
Bu gün humanizm dəyərlərini rəhbər tutaraq və xoşməramlı addım olaraq, Azərbaycan Respublikası 32 erməni hərbçini azad edib. Ermənistan Respublikası öz növbəsində 2 azərbaycanlı hərbçini azad edib. Bu bir daha göstərdi ki, Azərbaycan öz mövqeyində haqlıdır və iki ölkə arasında vasitəçi olmadan aparılan danışıqlar daha səmərəli nəticələr verir.
Respublica.Az xəbər verir ki, məsələ ilə bağlı Trend-ə açıqlama verən Milli Məclisin deputatı Mahir Abbaszadə bildirib ki, əsirlərin dəyişməsi Azərbaycan və Ermənistan arasında münasibətlərin normallaşması baxımından önəmli bir hadisədir.
"Çünki müharibədən sonra əsirlərin dəyişdirilməməsi sülh prosesinə mane olan bir məsələdir. Sülhə töhfə verilməsi baxımından əsirlərin dəyişdirilməsi olduqca vacib məsələdir. Eyni zamanda bu proses vasitəçi olmadan həyata keçirilir. Bu o deməkdir ki, Ermənistan və Azərbaycan digər məsələlərdə də danışıb razılığa gələ bilər", - deyə M.Abbaszadə qeyd edib.
Daha geniş videomüsahibəni təqdim edirik:
Respublica.Az
13-12-2023, 15:15 | Vergi ödəyicilərinə Xəbərdarlıq
Vergi ödəyicilərindən 15 dekabr tarixinə qədər məcburi dövlət sığorta, işsizlikdən sığorta və icbari tibbi sığorta haqlarının ödənilməsi tələb olunur.
Bu barədə Dövlət Vergi Xidməti məlumat yayıb.
Həmçinin məlumatda qeyd olunur ki, cari ilin dekabrın 20-i xüsusi notariuslar üzrə gəlir vergisi, idman mərc oyunları, lotereyalar, habelə digər yarışlar və müsabiqələr üzrə gəlir vergisi, əlavə dəyər vergisi, aksizlər, yol vergisi, mədən vergisi, pul vəsaitlərinin nağd qaydada çıxarılması üzrə sadələşdirilmiş vergi, muzdlu işlə əlaqədar ödəmə mənbəyindən tutulan vergi, sığorta müqaviləsi vaxtından əvvəl xitam verildikdə ödəmə mənbəyindən tutulan verginin ödənilməsinin son günüdür.
Ödənişlər vaxtında həyata keçirilmədikdə əlavə faizlər hesablanacaq.
Respublic.Az
13-12-2023, 13:02 | MDB missiyası Azərbaycanda seçkiləri müşahidə edəcək
Müstəqil Dövlətlər Birliyinin (MDB) müşahidəçilər missiyası Azərbaycanda 2024-cü ilin fevral ayında keçiriləcək seçkilərin monitorinqində iştirak edəcək.
Bu barədə MDB-nin baş katibi Sergey Lebedev jurnalistlərə deyib.
Onun sözlərinə görə, MDB-nin İcra Komitəsi artıq seçkilərin müşahidəsinə hazırlıq görür.
MDB-nin baş katibi müşahidə missiyasının Azərbaycanla yanaşı, Belarusda və Rusiyada keçiriləcək prezident seçkilərində də iştirak edəcəyini qeyd edib. Lebedev müşahidə missiyasının göndərilməsi ilə bağlı yalnız Azərbaycandan yazılı dəvət daxil olduğunu, Rusiya və Belarusun isə şifahi dəvət göndərdiyini qeyd edib.
Qeyd edək ki, dekabrın 7-də Prezident İlham Əliyev Azərbaycanda növbədənkənar prezident seçkilərinin elan edilməsi barədə sərəncam imzalayıb. sərəncama əsasən, fevralın 7-də növbədənkənar prezident seçkiləri keçiriləcək.Trend
12-12-2023, 12:34 | Müstəqil Azərbaycanı Zəfər yoluna çıxaran lider
Ümummilli liderimiz, Azərbaycanın dünyaya bəxş etdiyi dahi şəxsiyyət Heydər Əliyevin həyatı doğma xalqına, canından əziz bildiyi Vətəninə, soydaşlarına xidmət etmək nümunəsidir. Onun şərəfli ömrünün bütün dövrləri buna əyani sübutdur. Ulu öndərimizin “Mənim həyatımın məqsədi Azərbaycandır, Azərbaycan xalqıdır, Azərbaycan Respublikasıdır, Azərbaycan vətəndaşıdır”- ifadəsi ömrü boyu bu böyük insanın başlıca məfkurəsi və həyata keçirdiyi bütün işlərdə əsas ideyası olmuşdur.
Dahi öndər hələ Azərbaycana rəhbərliyinin birinci dövründə – 1969-1982-cit illərdə bütün varlığı ilə sevdiyi xalqının xoşbəxt gələcəyi naminə əlindən gələni əsirgəməmişdir. Qısa müddət ərzində ümummilli liderimiz Azərbaycanı o vaxtkı SSRİ-nin geridə qalmış, aqrar bölgəsindən güclü sənaye respublikasına, elm, mədəniyyət və təhsil sahələrində böyük nailiyyətlərin əldə olunduğu çiçəklənən bir diyara çevirmişdi. Bugünkü müstəqil Azərbaycanın təməli məhz Heydər Əliyev dühası, uzaqgörənliyi və böyük zəhməti sayəsində təşəkkül tapmışdır.
1993-cü ildə ölkəmizin başını qara buludlar alanda, Azərbaycan bir dövlət kimi dünya xəritəsindən silinmək təhlükəsi qarşısında qalanda xalqımız yeganə ümid yerinə – dahi şəxsiyyət və böyük vətənpərvər Heydər Əliyevə üz tutdu, ona pənah gətirdi. Doğma xalqının təkidli tələbi ilə ikinci dəfə hakimiyyətə qayıdan ulu öndərimiz tez bir vaxt ərzində səriştəsiz rəhbərlərin “fəaliyyəti” nəticəsində məhv olan Azərbaycanı, sözün əsl mənasında, həyata qaytardı. Ümummilli liderimiz öz zəngin idarəçilik təcrübəsi, əzmkarlığı və prinsipiallığı sayəsində qısa müddətdə ölkəmizdə sabitliyi bərqərar etdi, cəbhədə atəşkəsə nail oldu, iqtisadiyyatımızı labüd fəlakətdən xilas etmək üçün təcili tədbirlər görməyə başladı. Heydər Əliyev Azərbaycanın yeni neft strategiyasının müəllifi oldu, bütün çoxsaylı maneələrə və təzyiqlərə baxmayaraq, həmin proqam 1994-cü ildə imzalanmış “Əsrin müqaviləsi” ilə reallaşmağa başladı. Dahi siyasətçinin ərsəyə gətirdiyi bu layihə müstəqil dövlətimizin qüdrətli inkişafının rəhni oldu.
Ulu öndərmizin rəhbərliyi ilə hazırlanaraq 1995-ci il noyabrın 12-də qəbul edilmiş müstəqil Azərbaycanın ilk Konstitusiyası vətəndaş cəmiyyəti quruculuğunun hüquqi əsaslarını yaratmışdır. Ölkəmizdə çoxpartiyalılıq əsasında demokratik parlament seçilmiş, siyasi plüralizm, söz, mətbuat, vicdan və sair azadlıqlar bərqərar olmuşdur. Ümummilli liderimizin “Azərbaycan Respublikasında dövlət hakimiyyətinin yeganə mənbəyi Azərbaycan xalqıdır” – deyimi Konstitusiyanın 1-ci maddəsində təsbit olunmuşdur.
Heydər Əliyevin apardığı uğurlu xarici siyasət Azərbaycanın bir çox ölkələrlə, mötəbər beynəlxalq təşkilatlarla əlaqəsini gündən-günə möhkəmləndirdi. Bu gün Azərbaycanın ATƏT, Avropa Şurası, NATO Parlament Assambleyası, İslam Konfransı Təşkilatı və digər beynəlxalq təşkilatlarla sıx əlaqə saxlaması və bu qurumlarda bilavasitə iştirakı hüquq islahatları sahəsində təcrübə qazanmaqda respublkamıza çox böyük fayda verir.
Azərbaycanın dünya miqyasında tanınması ümummilli liderimiz Heydər Əliyevin adı və şəxsiyyəti ilə bağlıdır. Məhz bu dahi şəxsiyyətin rəhbərliyi ilə Azərbaycan bütün dünyaya sübut etdi ki, o müstəqil yaşamaq istəyir və ərazisinin sahibi olmağa, bütün sərvətləri ilə bağlı müstəqil qərar qəbul etməyə qadirdir. Azərbaycan Heydər Əliyevin, bu gün isə möhtərəm Prezidentimiz İlham Əliyevin yeritdiyi uğurlu xarici siyasət sayəsində dünya birliyində layiqli yer tutmuşdur.
Heydər Əliyevin müəyyənləşdirdiyi strateji inkişaf kursu, ulu öndərimizin Azərbaycanın qüdrətlənməsinə və xalqımızın rifah halının yaxşılaşmasına yönəlmiş siyasəti bu gün möhtərəm Prezidentimiz İlham Əliyev tərəfindən əzm və uğurla davam etdirilir.
Yüz minlərlə yeni iş yerlərinin yaradılması, regionların sosial-iqtisadi inkişafı, yaşayış səviyyəsinin gündən-günə yüksəldilməsi, elm, təhsil, səhiyyə, mədəniyyətin inkişafına dövlət qayğısının artması, Azərbaycanın enerji idxal edən ölkədən enerji ixrac edən ölkəyə çevrilməsi, insan hüquq və azadlıqlarının əsas məqsədlərdən biri olması, balanslaşdırılmış xarici siyasət kursu və hərbi qüdrətinin artırılması möhtərəm dövlət başçımız İlham Əliyevin fəaliyyətinin əsas qayəsini təşkil edir.
Ulu öndərin hüquqi və demokratik dövlət quruculuğu xəttini dövrün tələblərinə uyğun davam etdirən Prezident İlham Əliyev ötən 20 il ərzində ölkədə insan və vətəndaş hüquq və azadlıqlarının təmini istiqamətində kompleks tədbirlər həyata keçirmişdir. Məhz 2003-cü ildə Azərbaycan Prezidenti seçilərkən, xalqımızın qarşısında and icərkən verdiyi sözü tutub, düşmən işğalına son qoydu, suverenliyimizi və ərazi bütövlüyümüzü bərpa etdi. 2020-ci ilə qədər münaqişənin dinc yolla nizama salınmasında yeganə məqsəd məhz Vətən övladlarımızın şəhid olmasının qarşısını almaq idi. Təəssüf ki, Ermənistan heç zaman sülh istəmədi, işğalçılığına son qoymadı, təcavüzü dayandırmadı, əksinə sistemli olaraq təxribatlar törətdi.
Necə ki, 2020-ci ilin 10 noyabr tarixində üçtərəfli bəyanat imzalanarkən Qarabağdan çıxarılmasını üzərinə vəzifə olaraq götürdü, lakin, 3 ilə yaxın müddət ərzində yenə bu öhdəliyini icra etmədi, qoşunlarını Qarabağdan çıxartmadı. Nəticə etibarı ilə bu ilin sentyabr ayının 19-da başlamış və 24 saatdan da az davam edən lokal xarakterli antiterror əməliyyatları zamanı düşmənə növbəti dəfə sarsıdıcı zərbə vuruldu. Azərbaycan Ordusu yüksək peşəkarlıq göstərək hərbi obyektləri sıradan çıxarıb, strateji yüksəklikləri ələ keçirdi və nəticədə düşməni təslim olmağa məcbur etdi. Bu təslimiyyət özü ilə birlikdə qondarma rejimin də birdəfəlik sonunu gətirdi.
Ölkəmizdə bütün sahələrdə böyük inkişaf və tərəqqi davam edir. Azərbaycan artıq regionun lider dövlətinə çevrilmişdir. Hər bir azərbaycanlı bu uğurlara görə ümummilli liderimiz Heydər Əliyevə və onun siyasi kursunun layiqli davamçısı Prezident İlham Əliyevə borcludur.
Azərbaycanın xilaskarı, Azərbaycan dövlətinin memarı və qurucusu, bütün şərəfli ömrünü xalqının səadətinə həsr etmiş Heydər Əliyev xalqımızın qəlbində və tariximizdə əbədi yaşayacaqdır.
Nizami ƏLİYEV,
"Qaradağ” şadlıq sarayının icracı direktoru.
23-11-2023, 06:29 | Ermənistan-Azərbaycan sərhədində vacib görüş olacaq
Noyabrın 29-u və 30-da Ermənistan-Azərbaycan sərhədində delimitasiya komissiyasının iclası keçiriləcək.
Respublica.Az report-a istinadən xəbər verir ki, bu barədə "Caliber"ə diplomatik mənbələrdən məlumat daxil olub.
Müvafiq razılaşmalar hər iki tərəf tərəfindən təsdiqlənib.
İki ölkənin delimitasiya məsələlərini vasitəçi olmadan özlərinin həll etməyə çalışması, şübhəsiz müsbət göstəricidir.
Xatırladaq ki, sərhədin delimitasiyası komissiyası ötən müddət ərzində iki dəfə, ən son isə bu ilin iyulunda iclas keçirib.
22-11-2023, 09:07 | Xankəndidən YENİ GÖRÜNTÜLƏR: Azərbaycan və Türkiyə bayraqları yan-yana asıldı - VİDEO
AzTv Azərbaycanın Xankəndi şəhərinin küçələrindən ilk dəfə görəcəyiniz kadrlar yayımlayıb.
Epizodların birində Xankəndi Şəhər Xəstəxanası önündə Azərbaycan və Türkiyə bayraqlarının yan-yana asıldığı əks olunub.
Həmin görüntüləri təqdim edirik:
[[[media=https://www.youtube.com/live/DcNFV_i4R7s?si=t0XYvwTNT6MAjdh4]
21-11-2023, 15:48 | Şuşanın “İslam dünyasının mədəniyyət paytaxtı” elan edilməsi ilə bağlı tədbirlər hazırlanacaq
Prezident İlham Əliyev Şuşa şəhərinin 2024-cü il üçün "İslam dünyasının mədəniyyət paytaxtı" elan edilməsi ilə bağlı tədbirlər haqqında sərəncam imzalayıb.
Respublica.Az AZƏRTAC-a istinadən bildirir ki, sərəncamda deyilir:
"2023-cü il sentyabrın 25-də Qətər Dövlətinin paytaxtı Doha şəhərində keçirilən İslam Dünyası Mədəniyyət Nazirlərinin 12-ci Konfransında Azərbaycanın mədəniyyət paytaxtı Şuşa şəhəri 2024-cü il üçün "İslam dünyasının mədəniyyət paytaxtı" elan edilmişdir. Bu qərar Azərbaycanın tarixi-mədəni, ictimai-siyasi həyatının mühüm mərkəzlərindən biri olub İslam mədəniyyətinin zənginliklərini dolğun təzahür etdirən Şuşaya xüsusi ehtiramın ifadəsidir və İslam dünyasının həmrəyliyinin yeni rəmzinə çevrilməklə qarşılıqlı əməkdaşlıq münasibətlərinin daha da genişləndirilməsində özünəməxsus rol oynayacaqdır.
Azərbaycan Respublikasının Nazirlər Kabineti Şuşa şəhərinin 2024-cü il üçün "İslam dünyasının mədəniyyət paytaxtı" elan edilməsi ilə bağlı tədbirlər planı hazırlayıb həyata keçirsin"
