10-05-2026, 18:18 | Ulu Öndər Heydər Əliyevin anadan olmasının 103 illiyinə həsr olunmuş stolüstü tennis turniri keçirilib
Ulu Öndər Heydər Əliyevin anadan olmasının 103 illiyinə həsr olunmuş və BrendSport.az saytının, “Azal Binə Stolüstü Tennis Klubu”nun baş sponsorluğu və təşkilatçılığı,
"Scallezioni", “Natural Hali” və “Soel Parfum”un sponsorluğu ilə keçirilən stolüstü tennis üzrə komanda yarışı uğurla başa çatıb.
Yarış eyni zamanda məktəblərdə stolüstü tennisin təbliği və Azərbaycanda idmanın inkişafına dəstək məqsədilə təşkil olunub. Tədbir Azərbaycan Respublikasının Dövlət Himninin səsləndirilməsi ilə başlayıb.
Tədbirin aparıcısı və təşkilatçısı Yeganə Bağırova sözü layihə rəhbərinə verib.
Açılış nitqi ilə çıxış edən tədbirin layihə rəhbəri, BrendSport.az saytının baş redaktoru və stolüstü tennis müəllimi Bəhruz Səmədov Ulu Öndərin xatirəsinin bir dəqiqəlik sükutla yad edilməsini müəllim və şagirdlərdən xahiş edib. Daha sonra yarışın açıq elan olunduğunu bildirərək bütün iştirakçılara uğurlar arzulayıb.
8–9 may 2026-cı il tarixlərində keçirilən yarışda kiçik yaş qrupunun şagirdləri böyük həvəslə iştirak ediblər. İki gün davam edən turnirdə azyaşlı uşaqlardan ibarət 14 komanda mübarizə aparıb. Yarışda 6–10 yaşlı məktəblilərdən ibarət komandalar iştirak edib. Hər komanda 3 oğlan və 2 qız olmaqla 5 kiçik yaşlı şagirddən, həmçinin 11–16 yaşlı tennisçilərdən ibarət 1 oğlan və 1 qız şagirddən təşkil olunub.
Böyük siniflərdə təhsil alan tennisçi şagirdlər öz kiçik yaşlı məktəblilərinə dəstək olmaq və yarışın daha maraqlı keçməsinə töhfə vermək məqsədilə komandaların tərkibində yer alıblar. Beləliklə, komandalar ümumilikdə 7 nəfərlə yarışda iştirak ediblər.
Yarış boyunca yüksək rəqabət, maraqlı qarşılaşmalar və əsl komanda ruhu müşahidə olunub. Şagirdlər öz bacarıqlarını nümayiş etdirərək həm idmansevərlərə, həm müəllimlərə, həm də valideynlərə xoş anlar yaşadıblar.
Gərgin və maraqlı keçən mübarizələrin yekun nəticələrinə əsasən 3 “E” komandası yüksək nəticə göstərərək birinciliyi qazanıb.
I yer — 3 “E”
Komandanın rəhbəri Nərmin Qədimova.
Komandanın üzvləri:
1. Əsədzadə Məsumə
2. Əlibəyli Məryəm
3. Qafarov Emil
4. Kazımov Elşad
5. Pascasious Aaron
6. Səmədzadə Hüseyn
7. Əlizadə Məhəmmədhüseyn
II yer — 3 “A”
Komandanın rəhbəri Pərvanə Əkbərova.
Komandanın üzvləri:
1. Zeynəb Mirzəzadə
2. Məryəm Babayeva
3. Onur Mirzəzadə
4. Əli Əlizadə
5. Ərtoğrul Əliyev
6. Yasin Babayev
7. Hüseyn Əliyev
8. Məryəm Heybətova
III yer — 4 “D”
Komandanın rəhbəri Günel Məmmədova.
III yer — 4 “B”
Komandanın rəhbəri Əfsanə Salayeva.
Yarışın ən fəal və əzmkar komandaları isə 6 yaşlı tennisçilərdən ibarət kollektivlər olub. 5-ci yeri tutan 1 “E” komandasının rəhbəri Ülviyyə Zamanova və 6-cı yeri tutan 1 “M” komandasının rəhbəri Nisə İsmayılova olan komandaların şagirdləri xüsusi fəallıqları ilə seçiliblər.
Qalib komandaya keçici kubok və diplomlar təqdim olunub. II və III yerləri tutan komandalar isə diplomlar və sponsorlar tərəfindən təqdim edilən müxtəlif hədiyyələrlə mükafatlandırılıblar.
Uşaqların stolüstü tennisə marağının daha da artırılması məqsədilə stolüstü tennislə daim məşğul olan şagirdlərə sponsorlar tərəfindən xüsusi hədiyyələr təqdim olunub.
Tədbirin sonunda qalib komandanın rəhbərinə təşəkkürnamə və sponsor hədiyyələri təqdim olunub. Həmçinin yarış ərzində komandalarını fəal şəkildə dəstəkləyən rəhbərlər də xüsusi təşəkkürnamələrlə təltif ediliblər.
Tədbirin baş hakimi, fiziki tərbiyə müəllimi Seyfəli Səmədov yarış boyu kiçik məktəblilərə ədalətli və peşəkar hakimlik edərək öz missiyasını yüksək səviyyədə yerinə yetirib.
Tədbirin təşkilatçıları Könül Əliyeva, Günel Məmmədova, Pərvanə Əkbərova, Ruslan Bağırov, Ülkər Məmmədova, Aygül Cəbiyeva, Günel Əzizova, Məhəmmədəli Səmədzadə və layihə rəhbəri Bəhruz Səmədov çıxışlarında bildiriblər ki, bu cür yarışların keçirilməsi məktəblilər arasında idmana marağın artırılması, sağlam həyat tərzinin təbliği və komanda ruhunun formalaşdırılması baxımından mühüm əhəmiyyət daşıyır.
Bəhruz Səmədov eyni zamanda Heydər Əliyevin, onun siyasi davamçısı İlham Əliyevin və Mehriban Əliyevanın idmana göstərdiyi diqqət və qayğının davamı olaraq idmana dəstək göstərən bütün məktəb kollektivlərinə təşəkkürünü bildirib.
Sonda BrendSport.az saytı adından tədbirin sponsorları — "Scallezioni" italyan kişi geyimləri mağazası, Azərbaycanın böyük xalça mağazalarından biri olan “Natural Hali” və parfum brendlərinin şahı sayılan “Soel Parfum”a sonsuz təşəkkür ifadə olunub.
10-05-2026, 17:54 | Ulu Öndər Heydər Əliyev dühası sübut etdi ki...
Tarixdə elə şəxsiyyətlər var ki, onların fəaliyyəti yalnız yaşadıqları dövrə deyil, gələcək nəsillərə də təsir göstərir. Heydər Əliyev məhz belə Liderlərdən biri idi. Onun adı Azərbaycan dövlətçiliyi, milli birlik və müstəqillik anlayışları ilə birgə çəkilir.
Azərbaycan xalqı çətin və mürəkkəb dövrlərdən keçdiyi zamanlarda Heydər Əliyev öz qətiyyəti və uzaqgörən siyasəti ilə ölkəni ağır böhrandan çıxarmağı bacardı. 1993-cü ildə xalqın tələbi ilə yenidən hakimiyyətə qayıdan Ulu öndər ölkədə sabitliyi təmin etdi, dövlətçiliyin möhkəmlənməsi istiqamətində mühüm addımlar atdı və Azərbaycanın gələcək inkişafının əsasını qoydu. O, yalnız bir siyasətçi deyil, həm də milyonlarla insanın inandığı Lider idi.
Müstəqilliyi əldə etmək üçün möhkəm təməl, iqtisadi inkişaf lazım idi. Buna görə də 1969-cu ildən başlayaraq Azərbaycan iqtisadiyyatının gücləndirilməsi Ulu Öndərimizin siyasi xəttinin əsasını təşkil edirdi. Həmin illərdə isə iqtisadi vəziyyət acınacaqlı idi.
Ulu Öndərimizin həyata keçirdiyi məqsədyönlü iqtisadi siyasət nəticəsində 1969-cu ilə qədər SSRİ-nin aqrar əyaləti kimi tanınan Azərbaycan həmin tarixdən sonra inkişaf etmiş sənaye ölkəsinə, elmi-texniki tərəqqinin geniş şəkildə tətbiq olunduğu respublikaya, yüksək mədəniyyəti ilə bütün dünyada tanınan diyara çevrilmişdir. Müstəqilliyə qovuşmaq məqsədilə reallaşdırılan həmin tədbirlər nəticəsində 1969-1985-ci illərdə Azərbaycanda 213 yeni iri sənaye müəssisəsi istismara verilmiş, dünyanın 65 ölkəsinə 350 adda məhsul ixrac olunmuşdur. Moskvanın, eləcə də keçmiş SSRİ-nin digər şəhərlərinin 170 aparıcı elm və təhsil ocağına 10 mindən çox azərbaycanlı oğlan və qız təhsil almağa göndərilib. Bu, Ulu Öndər Heydər Əliyev siyasi müdrikliyinin və uzaqgörənliyinin göstəricisi idi.
Ümummilli Lider Heydər Əliyev hər zaman xalqına bağlı lider kimi tanınıb. O, insanların rifahını, ölkənin təhlükəsizliyini və gənclərin gələcəyini əsas prioritet hesab edirdi. Ulu Öndərin “Təhsil millətin gələcəyidir” fikri bu gün də öz aktuallığını qoruyur. Onun təşəbbüsü ilə minlərlə gənc yüksək təhsil almaq imkanı qazandı və ölkənin inkişafına töhfə verdi.
1994-cü ildə imzalanan “Əsrin müqaviləsi” Azərbaycanın iqtisadi həyatında dönüş nöqtəsinə çevrildi. Bu müqavilə ölkəyə xarici investisiyaların cəlb olunmasına, iqtisadiyyatın güclənməsinə və Azərbaycanın dünya miqyasında tanınmasına böyük şərait yaratdı. Məhz bu siyasətin nəticəsində Azərbaycan regionun güclü dövlətlərindən birinə çevrildi.
Ulu Öndər Heydər Əliyev milli-mənəvi dəyərlərin qorunmasına da xüsusi önəm verirdi. Onun “Mən həmişə fəxr etmişəm, bu gün də fəxr edirəm ki, mən azərbaycanlıyam” sözləri hər bir azərbaycanlı üçün qürur mənbəyinə çevrilmişdir. Bu fikir insanlarda vətənə sevgi, dövlətə bağlılıq və milli birlik hissini daha da gücləndirmişdir.
Bu gün Azərbaycanın qazandığı uğurların təməlində ulu öndərin müəyyən etdiyi siyasi kurs dayanır. Ulu Öndər Heydər Əliyev yalnız bir dövlət başçısı deyil, həm də xalqın yaddaşında əbədi yaşayan böyük Liderdir. Onun zəngin irsi və dövlətçilik ideyaları hər zaman örnək olub və gələcək nəsillər üçün daim örnək olacaqdır.
Qasım Muradovun ,
"Aysberq" Pivə İstehsalat Müəssisəsinin təsisçisi .
12-04-2026, 08:49 | Bu gün 52 mindən çox şagird buraxılış imtahanı verəcək
Bu gün 52 687 şagird ümumi (9 illik) orta təhsil səviyyəsi üzrə buraxılış imtahanı verəcək.
Bu barədə Respublica.Az Dövlət İmtahan Mərkəzindən xəbər verilib.
Məlumata görə, imtahan Bakı şəhərinin Sabunçu (I hissə), Xəzər (I hissə), Yasamal, Binəqədi rayonlarında, Sumqayıt (I hissə),Gəncə (II hissə), Mingəçevir şəhərlərində, Abşeron (I hissə), Daşkəsən, Şəmkir (II hissə), Qazax, Qəbələ, Oğuz, Lənkəran (II hissə), Cəlilabad (I hissə), Masallı (I hissə), Beyləqan, Füzuli, Füzuli (M.Uluqbəy adına 1 nömrəli 12 aprel tam orta məktəb), Zəngilan (Ağalı kənd tam orta məktəbi), Cəbrayıl (M.Mehdizadə adına tam orta məktəb), Ağdaş, Ağsu, Qobustan, Sabirabad (I hissə), Neftçala, Şirvan, Xaçmaz (I hissə), Quba (I hissə) rayonlarında keçiriləcək.
İmtahanda 34 nəfər sağlamlıq imkanları məhdud (gözdən əlil, serebral iflic, eşitmə əngəlli və digər) şagird də iştirak edəcək. Onların rahat şəkildə imtahan verməsi üçün imtahan binalarında xüsusi zallar ayrılıb, orqanizmin funksiyalarının 81-100 faiz pozulmasına görə gözdən əlilliyi müəyyən edilmiş şəxslərə isə fərdi nəzarətçilər təyin edilib. Hərəkət məhdudiyyətli şagirdlərin bina və zala daxil olması və hərəkəti üçün də şərait yaradılıb.
İmtahan keçirilən şəhər və rayonlarda ümumilikdə 216 imtahan binası, 3837 imtahan zalı ayrılıb. İmtahanların idarə olunmasına 627 imtahan rəhbəri və ümumi rəhbər, 4800 nəzarətçi, 701 buraxılış rejimi əməkdaşı (mühafizə) və 216 bina nümayəndəsi ayrılıb.
İmtahan saat 11:00-də başlanır. İmtahanın başlanmasına 15 dəqiqə qalmış – saat 10:45-də buraxılış rejimi başa çatır. Bundan sonra gələn iştirakçılar imtahan binasına buraxılmırlar.
Respublica.Az
12-04-2026, 06:51 | Kollektorun daşması nəticəsində yaranmış fəsadlar aradan qaldırılır - FOTO
05-06 aprel 2026-cı il tarixlərində intensiv yağan yağışlar nəticəsində Bakı dairəvi magistral kollektorunda su həcminin kəskin artması səbəbindən Keşlə qəsəbəsinin M.Ə. Sabir və K.Əfkari küçələrinin kəsişməsindən keçən hissəsindən daşması nəticəsində ərazidə yaranmış fəsadların aradan qaldırılması və infrastrukturun bərpası istiqamətində tədbirlər həyata keçirilir.
Respublica.Az xəbər verir ki, Nizami rayonunun kommunal xidmət sahələri tərəfindən görülən işlər çərçivəsində ərazidə genişmiqyaslı sanitar-təmizlik işləri aparılır, həyətyanı sahələr və keçid yolları palçıq və lildən təmizlənərək yuyulur.
Həmçinin, gələcəkdə belə halların təkrarlanmaması və preventiv tədbirlərin görülməsi məqsədilə aidiyyatı qurumlara müraciətlər ünvanlanmışdır.
Hazırda ərazidə davamlı olaraq dezinfeksiya işləri aparılır.
Respublica.Az
12-04-2026, 06:45 | Keşlə qəsəbəsində kollektorun daşmasının fəsadları aradan qaldırılır
Mart ayının son günlərində ümumən respublika ərazisinə, o cümlədən paytaxt Bakıya düşən normadan artıq yağıntı miqdarının yaratdığı çətinliklərə baxmayaraq, şəhər təsərrüfatı təbiət hadisəsinin fəsadlarının aradan qaldırılması istiqamətində üzərinə düşən vəzifələrin öhdəsindən layiqincə gəldi.
Yağışların intensiv yağdığı həmin günlərdə yaşanan çətinliklərin aradan qaldırılması yönündə operativ qərarlar verən Nizami Rayon İcra Hakimiyyətinin başçısı cənab Coşqun Cəbrayılov vəziyyəti şəxsi nəzarətinə götürərək, Mənzil-Kommunal Təsərrüfatı Birliyinə (MKTB) ərazidə problemli nöqtələri çevik müəyyən etmək, yağış sularının normal axını üçün drenaj xətlərini diqqət mərkəzində saxlamaq göstərişi verdi. Nizami Rayon İcra Hakimiyyətinin əməkdaşları, Rayon Mənzil-Kommunal Təsərrüfatı Birliyi, Nizami Rayon Sukanal İdarəsi və Fövqəladə Hallar Nazirliyinin xüsusi texnikaları ilə canlı qüvvəsi koordinasiyalı şəkildə prosesə cəlb olundu. Görülmüş operativ işlər çərçivəsində rayonun müxtəlif ünvanlarında toplanmış yağış suları qısa müddətdə ərazidən çəkilərək kənarlaşdırıldı.
Xüsusi gücləndirilmiş iş rejimində çalışan kommunal xidmətlər tərəfindən nəqliyyatın və piyadaların hərəkətində fasiləsizliyi təmin etmək məqsədilə, yağış barmaqlıqlarının funksionallığının bərpası və yığılmış suların xüsusi nasoslarla kənarlaşdırılması üçün mütəmadi tədbirlər görüldü, yarana biləcək ciddi risklərin fəsadları vaxtında aradan qaldırıldı.
Güclü yağışların fəsadlarının aradan qaldırılması və şəhərin sanitar-təmizlik səviyyəsinin lazımı səviyyəyə çatdırılması məqsədilə paytaxtda genişmiqyaslı iməciliklərin keçirilməsi barədə Bakı Şəhər İcra Hakimiyyətinin qərarına uyğun olaraq, martın 30-da Nizami rayonunda da ümumrayon iməciliyi təşkil edildi. İməcilik çərçivəsində kommunal-təsərrüfat xidmətlərinin xüsusi texnikası vasitəsilə bitki və canlılara zərər verməyən yuyucu maddələrlə əsas küçə və prospektlər, məhəllədaxili və ara yollar yuyuldu, bordürlər, işıq dirəkləri və məhəccərlər yuyularaq palçıqdan təmizləndi.
İməcilik zamanı prospekt və küçələr boyunca yerləşən ictimai iaşə, ticarət və digər obyektlərin vitrinləri, köşklər və avtobus dayanacaqları yuyuldu, ətrafı təmizləndi. Eyni zamanda, kommunal xidmətlərin əməkdaşları tərəfindən yaşayış binalarında, həyət və yaşayış məhəllələrində, məişət tullantılarının atıldığı konteyner meydançalarının ətrafında əlavə təmizlik işləri görüldü.
Yaşıllaşdırma Təsərrüfatı Birliyi tərəfindən yaşıllıqlara aqrotexniki qulluq göstərilib, ağacların zədələnmiş budaqları budanıb, yeni güllər əkilib, müxtəlif rəngli güllərdən kompozisiyalar yaradılıb.
Bildiyimiz kimi, paytaxtın Nizami rayonunda aramsız yağan yağışın fəsadları daha çox Keşlə qəsəbəsində özünü göstərdi. Belə ki, 05-06 aprel 2026-cı il tarixlərində intensiv yağan yağışlar nəticəsində Bakı dairəvi magistral kollektorunda su həcminin kəskin artması səbəbindən Keşlə qəsəbəsinin M.Ə.Sabir və K.Əfkari küçələrinin kəsişməsindən keçən hissəsi daşmışdı. Məlum olmuşdur ki, hadisəyə səbəb Xətai rayonu, R.Bağırov küçəsində, magistral kollektorda bir müddət öncə baş vermiş çökmədir. Çökmə nəticəsində tullantı sularının axın istiqaməti məcburi qaydada dəyişdirilərək alternativ xətlərə yönəldilmişdir. Qəza vəziyyəti drenaj-kanalizasiya sistemində kəskin yüklənmə yaradaraq magistral xətlərdə hidravlik təzyiqin kəskin artmasına səbəb olmuş, nəticədə M.Ə.Sabir küçəsinin relyef baxımından çökəklik ərazidə yerləşməsi, kənarlaşdırıla bilməyən suların məhz bu nöqtədə intensiv toplanmasına şərait yaratmışdır. Ərazidə suyun səviyyəsinin sürətlə yüksələrək 1.2-1.5 metrə çatması nəticəsində 31 fərdi yaşayış evinə su dolma halı yaranmış, sakinlərin təhlükəsizliyi risk altına düşmüşdür. Ərazidəki evlər əsasən 30-40 il əvvəl inşa edildiyi üçün köhnə tikililərin konstruksiyasına ciddi maddi ziyan dəymişdir.
Dərhal Nizami Rayon İcra Hakimiyyətinin təşəbbüsü ilə əraziyə FHN-in müvafiq qurumları, kommunal xidmət sahələrinin əməkdaşları və təcili tibbi yardım briqadaları cəlb olunmuşdur. FHN-in müvafiq xidmətləri və Nizami Rayon İcra Hakimiyyətinin əməkdaşları tərəfindən ərazidə 203 nəfər sakinlə bağlı operativ tədbirlər görülmüşdür. Eyni zamanda, ərazidə suyun səviyyəsinin aşağı salınması üçün xüsusi təyinatlı nasoslar və motopompalar cəlb olunmuşdur. Təxliyə olunan sakinlər yaradılmış qərargahda yerləşdirilərək qida, isti geyim və tibbi-psixoloji yardımla təmin olunmuşlar. Nizami RİH-nin başçısının Keşlə qəsəbə inzibati ərazi vahidi (İƏD) üzrə nümayəndəsi Anar Ağayev həmin günlərdə ərazidə suyun səviyyəsinin qısa müddətdə əhəmiyyətli dərəcədə azaldılmasına və sakinlərin gündəlik həyatına mənfi təsirinin minimuma endirilməsinə yönəlik tədbirlərə var gücü ilə dəstək vermişdir.
Daxili İşlər Nazirliyinin (DİN) əməkdaşları tərəfindən ərazidə ictimai asayişin qorunması və mühafizə tədbirləri həyata keçirilmişdir. Sonrakı günlərdə ərazidə bərpa və təmizləmə işləri fasiləsiz davam etdirilmiş, fəsadların aradan qaldırılması istiqamətində kompleks tədbirlər görülmüşdür.
Bu günlər Nizami rayonunun kommunal xidmət sahələri tərəfindən görülən işlər çərçivəsində ərazidə genişmiqyaslı sanitar-təmizlik işləri aparılır, həyətyanı sahələr və keçid yolları palçıq və lildən təmizlənərək yuyulur.
Həmçinin, gələcəkdə belə halların təkrarlanmaması və preventiv tədbirlərin görülməsi məqsədilə aidiyyatı qurumlara müraciətlər ünvanlanmışdır.
Hazırda ərazidə davamlı olaraq dezinfeksiya işləri aparılır.
Nisa Şirvanlı
Respublica.Az
26-02-2026, 10:13 | Xalq artistinin mirası üstündə qalmaqal: DİN-dən reaksiya
Mərhum Xalq artisti Roza Cəlilovanın mirası və dəyərli əşyalarının talanması ilə bağlı yayılan qalmaqallı iddialara Daxili İşlər Nazirliyi (DİN) münasibət bildirib.
Sənətkarın nəvəsi Lalə Aslanovanın mənimsəmə və oğurluq halları ilə bağlı irəli sürdüyü ittihamlara cavab olaraq DİN-in Mətbuat Xidmətinin əməkdaşı, polis leytenantı Elbrus İbrahimov Oxu.Az-a açıqlamasında bildirib ki, məsələ artıq hüquqi müstəvidə araşdırılır:
"Səsləndirilən iddialar hazırda araşdırma predmetidir. Qeyd olunan xüsusatlarla bağlı zəruri istintaq hərəkətləri davam etdirilir", - deyə E.İbrahimov vurğulayıb.
------
Mərhum Xalq artisti Roza Cəlilovanın dəyərli əşyalarının oğurlandığı iddia olunur.
Bu iddia ilə sənətkarın nəvəsi Lalə Aslanova çıxış edib.
Bildirib ki, Xalq artisti vəfat edən gün onun mənzilində ciddi qanunsuzluqlar baş verib. Lalə Aslanovanın sözlərinə görə, nənəsinin qızı Yeganə Aslanova və onun qızı Leyla Seyidəlizadə Xalq artistinin öldüyü gün yaxın məsafədə yaşamalarından istifadə edərək dərhal mənzilə yollanıblar və onun dəyərli əşyalarını, bank kartlarını mənimsəyiblər. O, iddia edir ki, polis əməkdaşları və təcili tibbi yardım briqadası mərhumun oğlunun olub-olmaması ilə maraqlanarkən Yeganə Aslanova onun oğlu olmadığını bildirib və Lalə Aslanovanın atası barədə nalayiq ifadələr işlədib.
"Nənəmin nəşini dərhal Təzəpir məscidinə apardılar. Daha sonra isə nəşi məsciddə qoyaraq yenidən evə qayıtdılar. Roza xanımın bütün fəxri fərmanlarını, "Şərəf" və "Şöhrət" ordenlərini, o cümlədən Mədəniyyət Nazirliyi tərəfindən təqdim edilmiş sənədləri, SSRİ dövrünə aid mükafat və sənədləri, bank kartlarını, pul vəsaitlərini və digər dəyərli əşyaları götürərək mənzildən uzaqlaşıblar", - deyə Lalə Aslanova bildirib.
Onun sözlərinə görə, məsələ ilə bağlı hüquq-mühafizə orqanlarına müraciət edilib. Bildirilir ki, polis tərəfindən mənzilə baxış keçirilib və protokol tərtib olunub. İşin Səbail Rayon Prokurorluğuna və polis idarəsinə təqdim edilməsinə baxmayaraq, indiyədək hər hansı ciddi tədbir görülməyib.
Lalə Aslanova, həmçinin iddia edib ki, qarşı tərəf beş dövlət qurumunu etibarsız sənədlərlə aldadaraq müəyyən üstünlüklər əldə edib. O bu barədə sorğularına rəsmi cavab aldığını və Ədliyyə Nazirliyinin Yeganə Aslanovanın qanunvericiliyə zidd şəkildə sənədlər əldə etməsi ilə bağlı müraciətinə cavab verdiyini qeyd edib. İddialara görə, hətta Səbail Rayon Məhkəməsinə də etibarsız sənədlər təqdim olunaraq qərardad çıxarılmasına nail olunub.
"Nənəmin ölümündən istifadə edərək atama qarşı şər və böhtan atılıb. Bütün videogörüntülər, səsyazıları və şahid ifadələri təqdim olunsa da, indiyədək həmin şəxslər barəsində tədbir görülməyib. Məsələnin obyektiv araşdırılmasını və günahkarların cəzalandırılmasını tələb edirik", - deyə Lalə Aslanova vurğulayıb.
Yeganə Aslanova bildirib ki, Xalq artistinin bacısı qızı yox, doğma qızıdır və hələlik məsələ ilə bağlı mövqe bildirmək istəmir.
Qeyd edək ki, Xalq artisti, rəqqasə Roza Cəlilova Yeganə Aslanovanı sağlığında polisə vermişdi. Səbail Rayon 9-cu Polis Bölməsinə müraciət edən sənətkar qızının ondan zinət əşyalarını alıb qaytarmadığını iddia etmişdi. O, bildirmişdi ki, dörd ədəd brilyant qaşlı sırğa və başqa bahalı aksesuarlarını qızından ala bilmir. Musavat.com-
16-02-2026, 15:07 | Vüqar Qurbanov vəzifəsindən AZAD EDİLDİ - RƏSMİ
Tibbi Ərazi Bölmələrini İdarəetmə Birliyi (TƏBİB) publik hüquqi şəxsin Müşahidə Şurasının qərarı ilə qurumun İcraçı direktoru Vüqar Qurbanov vəzifəsindən azad edilib.
Bu barədə TƏBİB-dən məlumat verilib. Bildirilib ki, Müşahidə Şurasının digər qərarı ilə İcraçı direktor vəzifəsinin müvəqqəti icrası Anar İsrafilov-a həvalə olunub.
Qeyd edək ki, Vüqar Qurbanovun vəzifədən azad edilməsinin səbəbləri hələlik açıqlanmayıb. Məsələ ilə bağlı əlavə məlumat veriləcəyi gözlənilir.
16-02-2026, 15:02 | Növbəti köç karvanları Hadrut və Qırmızı Bazar qəsəbələrinə çatıb - YENİLƏNİB
Növbəti köç karvanları Xocavənd rayonunun Hadrut və Qırmızı Bazar qəsəbələrinə çatıb.
Bu mərhələdə Hadruta 10 (47 nəfər), Qırmızı Bazara isə 20 ailənin (91 nəfər) qayıdışı təmin olunub./Report
_______________
Xocalı şəhəri, Xocavənd rayonunun Hadrut və Qırmızı Bazar qəsəbələrinə ümumilikdə 60 ailədən ibarət növbəti köç karvanları yola salınıb.
Milli.Az xəbər verir ki, qeyd olunan yaşayış məntəqələrinə köç edənlər ölkənin müxtəlif bölgələrində, əsasən yataqxanalarda, sanatoriyalarda və inzibati binalarda müvəqqəti məskunlaşmış ailələrdir.
Bu mərhələdə Xocalı şəhərinə 30 (149 nəfər), Hadrut qəsəbəsinə 10 (47 nəfər), Qırmızı Bazar qəsəbəsinə isə 20 ailənin (91 nəfər) qayıdışı təmin olunub./Report
7-02-2026, 09:22 | ETSN-də yeni təyinat olub.
Ekologiya və Təbii Sərvətlər Nazirliyi yanında Meşələrin İnkişafı Xidmətində cənub bölgəsinə Coğrafi İnformasiya Sistemləri (CİS) üzrə baş mütəxəssis vəzifəsinə yeni təyinat olub.
Sözügedən vəzifəyə Ağayev Kərəm Isabala oğlu gətirilib
O, bu vəzifəyə təyin olunana qədər 11 saylı Regional Meşə Təsərrüfatı Mərkəzində meşə uçotu və kadastrı üzrə baş mühəndis vəzifəsində çalışıb.
Kərəm Ağayev Azərbaycan Dövlət Aqrar Universitetində "Yerquluşu və torpaq kadastrı" ixtisasi üzrə bakalavr təhsili alıb. Əmək fəaliyyətinə Əmlak Məsələləri Dövlət Komitəsi yanında Daşınmaz Əmlakın Kadastrı və Ünvan Reyesteri Xidmətinin tabeliyində olan Cəlilabad Yerquruluşu və Kadastr Layihə-Tədqiqat Idarəsində başlayıb.
7-02-2026, 09:14 | Azərbaycanda bu idarələr ləğv edildi
Azərbaycanda iki idarə ləğv olunduğunu elan edib.
Bunlar Neftçala Melioservis İdarəsi və Gəncə İxtisaslaşdırılmış Təmir-Quraşdırma və Sazlama İdarəsidir.
Qeyd edək ki, Neftçala Melioservis İdarəsi 2002-ci ildə yaradılıb. İdarənin rəisi Nizami Nəsirovdur. İdarənin hazırda dövlətə 93285.84 manat borcu vardır. Gəncə İxtisaslaşdırılmış Təmir-Quraşdırma və Sazlama İdarəsi isə 1995-ci ildə yaradılıb və rəisi Ramis İsmayılovdur./İqtisadiyyat.az
