30-11-2020, 14:34 | "Koronavirusa yoluxmanın qarşısını almaq üçün 2-3 həftəlik sərt karantin rejimi tətbiq olunmalıdır" - İnfeksionist
"Hazırda koronavirusla bağlı epidemik durum kritikdir".
Bunu Azərbaycan Tibb Universitetinin Yoluxucu xəstəliklər kafedrasının əməkdaşı, infeksionist Vüqar Cavadzadə deyib.
O bildirib ki, gündəlik yoluxmanın 4000 üzərində olması yüksək göstəricidir: "Tədbirlər görülməsə, bu göstərici gündəlik 5000-dən çox olacaq. Yoluxmanın əsas səbəbi əhalinin profilaktik tədbirlərə tam riayət etməməsi, maskalardan və dezinfeksiyaedici vasitələrdən istifadə olunmaması, eyni zamanda havaların soyuması ilə əlaqədar virusun virulentlik və patogenliyinin artması nəticəsində daha çox yayılmasıdır. Havalar soyuduqca insanlar qapalı məkanlara daha çox üz tutur. Qapalı məkanlar da virusun daha tez yayılmasına gətirib çıxarır".
İnfeksionist vurğulayıb ki, hazırda xəstəlik iyun-iyul aylarına nisbətən yüngül keçir: "Yay aylarında ağır, stasionar müalicəyə ehtiyacı olan xəstələrin sayı daha çox idi. Amma indi yoluxma halı çox olsa da, ağır xəstələrin sayı yaya nisbətən azdır. Bunu klinik olaraq gündəlik xəstələr arasında görürük.
Hazırda xəstəlik əvvəlki aylarda olan simptomlarla özünü biruzə verir. Fərqli bir xüsusiyyət yoxdur. Xəstələrdə, əsasən, hərarətin olması, quru öskürək, iy və dadbilmə qabiliyyətinin itməsi, bəzi xəstələrdə ishalın olması - bu kimi əlamətlər daha çox özünü göstərir. Yəni bu əlamətləri daha çox müşahidə edirik".
V. Cavadzadə qeyd edib ki, koronavirusun ürəkdə müəyyən problemlər yaratması ilə bağlı fikirlər doğrudur: "Koronaviruslu xəstələrlə işlədiyim müddətdə xüsusən yaşlı insanlarda ürəkdə problemləri şəxsən müşahidə etmişəm. Bu xəstələrdə daha çox perikardit əlamətləri olub, bu, perikard boşluğunda mayenin miqdarının artmasıdır. Bundan başqa ikincili intoksikasiya fonunda yarana bilən və ya ağciyər fəaliyyətinin pozulması nəticəsində olan problemləri müşahidə edirik".
İnfeksionistin sözlərinə görə, hazırda gündəlik 4000 yoluxma ancaq test aparılanlarda üzə çıxan rəqəmdir: "Lakin evdə olan, test olunmayan xəstələr də var. Demək olar ki, yoluxma daha çoxdur. Fikrimcə, yoluxmanın qarşısını almaq üçün 2-3 həftəlik sərt karantin rejiminə keçmək lazımdır. Hesab edirəm ki, yoluxmalar daha çox ictimai nəqliyyatda olur. Nəqliyyatda insanların sayı həddən artıq çoxdur. Bu da yoluxmanın sürətlə yayılmasına səbəb olur. Sərt karantinə getmək lazımdır ki, xəstəliyin sayı daha da artmasın".(milli.az)
Nyus.Az
30-11-2020, 12:21 | Mövcud yoluxma səviyyəsi sərt karantinin tətbiqini qaçılmaz edir - XƏBƏRDARLIQ
Azərbaycanda COVİD-19-a yoluxma sayının getdikcə artması ilə müşahidə edilən mövcud durum sərt karantin tədbirlərinin tətbiqini qaçılmaz edir.
Bunu Trend-ə tibb üzrə fəlsəfə doktoru Yazgül Abdiyeva deyib.
Onun sözlərinə görə, mövcud tendensiya onu deməyə əsas verir ki, qarşıdan gələn günlərdə ölkəmizdə koronavirusa yoluxma hallarının sayı gündə 5000-6000 nəfərə çatacaq.
Hazırda bütün dünyada, o cümlədən Azərbaycanda COVİD-19 xəstələrinin sayının sürətlə artdığını deyən Y.Abdiyeva qeyd edib ki, son 10-14 gündə ölkəmizdə aktiv xəstələrin sayı iki dəfə artaraq 45 000 nəfəri ötüb. Əgər dekabr ayının ilk 10 günlüyündə xəstəliyin artım sürəti dəyişməzsə, aktiv xəstələrin sayı 90 000 nəfərə çatacaq. Bu isə xəstələrin çarpayılarla təminatı, xəstəxanalara çatdırılması, vaxtında tibbi müdaxilənin edilməsi, təmaslarının izlənilməsi kimi zəruri tədbirlərin görülməsini qeyri-mümkün edəcək.
Mütəxəssis əlavə edib ki, yoluxma hallarının qarşısının alınması üçün hökumətin məhdudiyyət tədbirləri hələlik minimal miqyasda həyata keçirilir:
"Lakin heç kəs "artıq sərt karantin tədbirləri olmayacaq" deyib rahatlanmamalıdır. Ölkədəki real vəziyyət artıq onu göstərir ki, səhiyyə sistemi üçün real təhlükə yaranır, onun yükü hədsiz şəkildə artır. Dəfələrlə bildirilib ki, bu virusdan qorunmağın yeganə yolu fiziki məsafənin saxlanılması, tibbi maskadan istifadə edilmə, kütləvi tədbirlərdə iştirak etməməkdir. İnsanlar bilməlidirlər ki, bunlara əməl edilmədikcə yoluxma sayı gündən-günə artacaq. Nəticədə isə hökumət tam təcrid edilmə, SMS icazənin tətbiqi və s. bu kimi tkarantin tədbirlərinin yenidən həyata keçirilməsinə məcbur olacaq.".
Y.Abdiyeva bildirib ki, bütün bunların baş verməməsi üçün vətəndaşlarımız öz davranışları ilə vəziyyətin yaxşılaşmasına töhfə verməli, daha məsuliyyətli olmalı, davranışlarını mövcud tələblərə uyğunlaşdırmalıdırlar:
"Bəzən heç bir kliniki əlaməti olmayan şəxslər laborator müyainədən keçəndə məlum olur ki, o, aktiv COVİD daşıyıcısıdır. Belə insanlar bu xəstəliyi yüngül əzələ ağrısı ,yorğunluq hissi ilə asimptamatik formada, ayaqüstə keçirirlər. Belə daşıyıcılar bu dövrdə işdə, avtobusda və getdiyi digər məkanlarda maskanı çənəsindən asırsa, gün ərzində adi burun tənəffüsü vasitəsilə 100-lərlə insanı virusa yoluxdurur. Çalışın çox insanla kontaktda olmayın, olsanız da maskadan düzgün istifadə edin. Maskanı gün ərzində 3-4 dəfə dəyişin, çünki avtobusda, marketdə, işdə sizin bilmədiyiniz nə qədər COVİD daşıyıcısı var. Qəti surətdə ad günləri, yas və s. yerlərə getməyin. "Kiminsə xətrinə dəyər, qoy, ad gününə gedim" deyərək hansısa məclisə gedirsinizsə, çox böyük səhv edirsiniz. Siz bu səhvlə həm özünüzü, həm də ətrafınızı təhlükəyə atırsınız".
30-11-2020, 12:19 | BDU-dan bayrağa hörmətsizlik edən tələbə ilə bağlı AÇIQLAMA
Xəbər verdiyimiz kimi, Bakı Dövlət Universitetinin (BDU) Mexanika-riyaziyyat fakültəsinin Mexanika ixtisası üzrə I kurs əyani tələbəsi Məhəmmədov Pərviz Əlipənah oğlu Bakı Dövlət Universiteti tərəfindən verilmiş müvafiq əmrlə 23 noyabr 2020-ci il tarixindən Universitet tələbələri sırasından xaric edilmişdir.
Sosial şəbəkədə yayılan məlumata görə, tələbə universitetə bərpa olunub.
azxeber.com məsələni dəqiqləşdirmək üçün universitetlə əlaqə saxlayıb.
BDU-nun İctimaiyyətlə əlaqələr və informasiya şöbəsinin müdiri Günel Orucəliyeva deyib ki, tələbənin işinə bu gün baxılacaq:
"Pərviz Əlipənah oğlu Məhəmmədov Bakı Dövlət Universitetinin rektoru Elçin Babayevə ərizə ilə müraciət edərək bu əmrə yenidən baxılmasını xahiş etmişdir.
Bununla əlaqədar BDU rektorunun müvafiq əmri ilə komissiya yaradılmışdır.
Komissiyanın qərarına 30 noyabr 2020-ci il tarixdə keçiriləcək BDU Elmi Şurasında baxılaraq müvafiq qərar qəbul ediləcəkdir".
30-11-2020, 12:17 | Təhsil naziri qəzada ölən tələbələrdən yazdı
Təhsil naziri Emin Əmrullayev yol qəzasında ölən tələbələrlə bağlı sosial şəbəkədə paylaşım edib.
Nazir qeyd edib ki, gecə baş verən ağır yol-nəqliyyat hadisəsi nəticəsində koronaviruslu xəstələr üçün nəzərdə tutulan modul tipli xəstəxanada könüllü çalışan 3 tələbə həlak olub, 1 tələbəmiz isə ağır yaralanıb:
"Bu səhər çox üzücü bir xəbər aldıq. Gecə baş verən ağır yol-nəqliyyat hadisəsi nəticəsində koronaviruslu xəstələr üçün nəzərdə tutulan modul tipli xəstəxanada könüllü çalışan 3 tələbəmiz həlak olub, 1 tələbəmiz isə ağır yaralanıb. Həlak olanlar Azərbaycan Tibb Universitetinin əczaçılıq fakültəsinin V kurs tələbəsi Sahil Mustafazadə, müalicə profilaktika fakültəsinin V kurs tələbəsi Tuncay Məmmədov və eyni fakültənin VI kurs tələbəsi Yeganə Məmmədovadır. Müalicə profilaktika fakültəsinin V kurs tələbəsi İlkin Ağamirzəyev isə hadisə nəticəsində ağır yaralanıb. Allahdan həlak olanlara rəhmət, yaralı tələbəmizə isə şəfa diləyirəm!Trend
30-11-2020, 12:15 | İşıq pulu ilə bağlı əhaliyə ŞAD XƏBƏR
2022-ci ildən Azərbaycanda elektrik enerjisi tarifləri günün saatından asılı olaraq dəyişə bilər. Yəni, ölkədə gecə-gündüz tariflərinin tətbiq edilməsi nəzərdə tutulub.
Artıq bununla bağlı hökumətdə müzakirələr gedir.
Energetika Nazirliyinin "Kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi"nə uyğun hazırladığı layihə aidiyyəti dövlət qurumlarına göndərilib. Layihəyə əsasən, günün pik saatlarında elektrik enerjisi nisbətən baha, qeyri-pik və gecə saatlarında isə nisbətən ucuz olacaq.
Xatırladaq ki, bir neçə il bundan əvvəl Asiya İnkişaf Bankı Azərbaycanda sözügedən layihənin hazırlanmasına 1 milyon ABŞ dolları qrant ayırmışdı.
Hazırda ölkədə əhali qrupu abunəçiləri üçün elektrik enerjisinin 1 kVt/saatının qiyməti ay ərzində 300 kVt/s-a qədər istifadə edildikdə 7 qəpik, 300 kVt/s-dan artıq istifadə edildikdə isə 11 qəpikdir. (baxar.az)
30-11-2020, 12:05 | Qazi Elçin Səmədov Bakıya gətirilib, əməliyyat olunacaq
Döyüşlərdə yaralanan qazi Elçin Səmədov Bakıya gətirilib.
Bu barədə Trend-ə Qəbələ Rayon İcra Hakimiyyətindən bildiriblər. Qeyd olunub ki, Elçin bu gün səhər Bakıya göndərilib və hazırda Silahlı Qüvvələrin Baş Klinik Hospitalındadır:
"Elçin hələlik əməliyyat olunmayıb. O, bu gün səhər saat 06:30-da Bakıya göndərilib. Onu ilk öncə müayinə edəcəklər, daha sonra əməliyyat olunacağı gözlənilir. Elçin hərbi vəzifəlidir və onun müalicəsi ilə Müdafiə Nazirliyi məşğuldur".
İH rəsmisi əlavə edib ki, Elçin Səmədovun səhhəti yaralandığı gündən dövlət səviyyəsində nəzarətdə saxlanılır:
"Elçin yaralandığı gündən rəhbərlik tərəfindən diqqətdə saxlanılır. Bu bizim borcumuzdur, ona lazım olan bütün şərait yaradılıb və səhhətindən başqa heç bir problemi yoxdur. İnşallah, o da yaxın günlərdə öz həllini tapar".
E.Səmədov Suqovuşan kəndində baş verən döyüşlər zamanı böyük qəhrəmanlıq göstərərək ürək nahiyəsindən ağır yaralanıb.
30-11-2020, 12:01 | Azərbaycanda hotellərə veriləcək ulduzlar beynəlxalq platformada da tanınacaq
Azərbaycanda yeni milli ulduz təsnifatı əsasında veriləcək ulduzlar beynəlxalq platformada da tanınacaq.
Azərbaycan Hotel Assosiasiyasının Baş icraçı direktoru Günay Sağlam deyib.
Onun sözlərinə görə, cari ilin oktyabr ayından etibarən Azərbaycan Hotel Assosiasiyası (AHA) yüksək səs çoxluğu ilə "HotelStars" Birliyinin ulduz təsnifatı üzrə icraçı üzvü seçilib. Bu status vasitəsilə AHA artıq milli ulduz təsnifatını HOTREC və "HotelStars" Birliyi tərəfindən müəyyənləşdirilmiş Avropa hotel standart və meyarlarına əsasən həyata keçirəcəyini rəsmi olaraq təsdiqləyib: "Bununla da hotellərin təmin olunacağı ulduz nəinki yerli, həmçinin beynəlxalq platformada da digər Avropa hotelləri ilə birgə digital şəkildə nümayiş etdiriləcək və tanıdılacaq. Qeyd edim ki, AHA 2019-cu ilin may ayında HOTREC və Hotelstars Birliyinin müşahidəçi üzvüdür. Dekabrın 6-da isə Azərbaycan Turizm Bürosuna Azərbaycan Akkreditasiya Mərkəzi tərəfindən hotellərə ulduz verilməsinə görə uyğunluğun qiymətləndirilməsi üzrə akkreditasiya attestatı ilə təmin olunub. Ulduz təsnifatının icrası üzrə Azərbaycan Hotel Assosiasiyası və Azərbaycan Turizm Bürosu arasında qarşılıqlı əməkdaşlıq müqaviləsi bağlayıb".Trend-
30-11-2020, 11:54 | Vətən müharibəsi zamanı əməliyyatların minimum itkilərlə həyata keçirilməsi böyük uğurdur
Prezident, Müzəffər Ali Baş Komandan İlham Əliyevin rəhbərliyi ilə Ermənistanın işğalı altındakı torpaqlarımızı azad etmək üçün rəşadətli Azərbaycan Ordusunun sentyabrın 27-də Qarabağda başladığı genişmiqyaslı və uğurlu əks-hücum əməliyyatları nəticəsində noyabrın 9-dək 5 şəhər, 4 qəsəbə və 286 kənd işğaldan azad edilib. Bu əməliyyatlar və 44 gün davam edən Vətən müharibəsi zamanı Zəngilan, Füzuli, Cəbrayıl, Qubadlı şəhərləri və həmin rayonların kəndləri, Şuşa şəhəri, eləcə də bir neçə strateji yüksəkliyin işğaldan azad olunması azərbaycanlılara böyük sevinc və qürur hissi yaşadıb. Bu zəfər və Prezident, Ali Baş Komandanı İlham Əliyevin nümayiş etdirdiyi qətiyyətli mövqe hərbçilərimizdə və xalqımızda böyük ruh yüksəkliyi yaradıb.
Bu fikirləri bu hərbi uğurun Azərbaycan Ordusu üçün əhəmiyyətini şərh edən ehtiyatda olan polkovnik Şair Ramaldanov deyib.
Polkovnik Şair Ramaldanov bildirib ki, düşmən mürəkkəb relyefə malik işğaldan azad edilmiş ərazilərdə otuz il istehkamlar yaradaraq Ordumuzun böyük itkilər verəcəyinə zənn edirdi: "Lakin Ordumuzun ən müasir silahlarla təchiz olunması zamanı bu relyef, dağlıq, meşəlik ərazilər nəzərə alınmaqla təmin edilmişdi. Həmçinin Azərbaycan Ordusunun şəxsi heyəti döyüş meydanında irəlilədikcə onun vətənpərvərlik ruhu yüksəlir, qələbəyə inam daha da artırdı. Digər tərəfdən işğaldan azad edilmiş ərazilər bizə başqa istiqamətlərdə növbəti addımlar atmaq üçün şərait yaradırdı. Bunların hamısının strateji önəmi vardı.
Müharibəyə hazırlıq dövründə Azərbaycan Ordusu daim kəşfiyyat aparırdı. Təlimlər və döyüş hazırlıqlarında məhz həmin ərazilər və düşmənin istehkamları nəzərə alınmışdı. İrimiqyaslı təlimlər döyüş başlayacağı halda müəyyən ssenarilər nəzərə alınaraq təşkil edilmişdi. Azərbaycan Ordusu XXI əsrdə döyüş əməliyyatlarını aparmağa imkan verən ən müasir, beşinci nəsil silahlarla təchiz olunmuşdu. Bütün bu illərdə Silahlı Qüvvələrimiz torpaqlarımızı güc yolu ilə azad etməyə hazırlığı davam etdirirdi. Biz bu kompleks hazırlıqların nəticəsini Ordumuzun yüksək döyüş ruhunu və vətənpərvərliyini əməliyyatlar başlayan zaman müşahidə etdik. Döyüşlərə atılan əsgərlərimiz Qarabağın işğalı ilə barışmadığı vətənpərvər mühitdə tərbiyə alıblar. Dövlətimizin başçısı işğal altındakı torpaqlarımızın tezliklə azad olunacağını hər zaman bəyan etmişdi. Məhz belə mühitdə gənclərimiz böyüyürdü. Şəhid Mübariz İbrahimov və digər qəhrəmanlarımız gənclərimizin daxilindəki Qarabağ alovunu göstərirdi".
Ş.Ramaldanov qeyd edib ki, əsgərlərimiz qısa müddətdə Ermənistanın keçilməz saydığı müdafiə xətlərini yarıb, düşməni torpaqlarımızdan qovmağa başlayıb. Sonra ən strateji istiqamət olan Şuşa şəhəri düşməndən azad edilib. Bu, Azərbaycan Ordusunun yüksək döyüş hazırlığının göstəricisidir. Cənub istiqamətində Şuşayadək döyüşlər Ordumuzun daha çox müasir texnika və silahlarla təminatını, onları idarə edən heyətin peşəkarlığını göstərib. Şuşa əməliyyatı isə Azərbaycan Ordusunun peşəkarlığını, yüksək səviyyədə hazırlığını və döyüş ruhunu nümayiş etdirib. Sıldırım qayalardan çıxılaraq düşmənlə yaxın döyüşdə qəhrəmanlıq nümunələri göstərilib və Şuşa işğaldan azad edilib. Bu döyüşdə taktiki cəhətdən düzgün istiqamətlər seçilib, bütün hesablamalar dəqiqliklə aparılıb və böyük uğur qazanılıb. Düşmənin ürəyinə Azərbaycan bayrağı sancılıb. Həmçinin 70 yaşayış məntəqəsi düşməndən təmizlənib və Ermənistanın kapitulyasiya bərabər bəyanatı imzalamasına nail olunub.
Ermənistanın çoxsaylı silah-sursatının, hərbi texnikasının məhv edilməsindən danışan ehtiyatda olan polkovnik qazanılan hərbi uğurlarda Ali Baş Komandan İlham Əliyevin hərbi sahədə siyasətindən, müharibəyə kompleks hazırlıqdan, ordumuzun arsenalındakı müasir hərbi silahlarından söz açıb. Vurğulayıb ki, Azərbaycan Silahlı Qüvvələri Prezident İlham Əliyevin bilavasitə diqqəti və qayğısı sayəsində sürətlə inkişaf edərək bu gün dünyanın ən peşəkar ordular arasında yer alıb. Dövlətimizin başçısı ordumuzun ən müasir silah-sursatlarla, eləcə də maddi-texniki təminatına yüksək diqqət göstərib.
Azərbaycan Ordusunun texniki üstünlüyü barədə məlumat verən polkovnik deyib ki, vaxtilə keçirilən genişmiqyaslı təlimlər döyüş zamanı aparılan əməliyyatların uğurla keçirilməsinə töhfə verib. Azərbaycan Ordusunda hərbi döyüş qabiliyyətini müəyyənləşdirən vəzifələrdə müddətdən artıq xidmət edən heyət çoxluq təşkil edir. Bu da Azərbaycan Ordusunun peşəkarlığını göstərir. Bu gün Azərbaycan Ordusunun cəmiyyətdəki nüfuzu da yüksəkdir.
Hərbi ekspert vurğulayıb ki, Azərbaycan Ordusunun yeni müharibə strategiyası əsgərlərimizin həyatının daha çox qorunmasına imkan verib. Qazanılan hərbi qələbələrin əsasında Prezident İlham Əliyevin rəhbərliyi ilə formalaşmış və ən son texnoloji silahlarla təchiz edilmiş müasir ordu dayanır. Azərbaycan Ordusu ən müasir döyüş standartları əsasında hərbi əməliyyatlar aparıb.
İkinci Qarabağ müharibəsində itkilərin az olduğunu bildirən Ş.Ramaldanov qeyd edib ki, hətta NATO-nun Baş Qərargah rəisi Azərbaycan Ordusunun həyata keçirdiyi bu nümunəvi əks-hücum əməliyyatlarının gələcəkdə öyrənilməsinin vacibliyini vurğulayıb. Çoxsaylı müdafiə-istehkam qurğuları, mürəkkəb relyef şəraitində Şuşanın işğaldan azad edilməsi nəticəsində düşmən kapitulyasiyaya imza atıb. Minimum itkilərlə bu əməliyyatların həyata keçirilməsi böyük uğurdur. Hərb elmində döyüşdəki bütün mərhələlər planlaşdırılır. Xarici hərbi ekspertlərin qiymətləndirmələrinə əsasən, Azərbaycan Ordusu bütün torpaqları işğaldan azad etmək üçün qarşıdan gələn qış mövsümündəki şəraiti də nəzərə alsaq, çoxsaylı itki verə bilərdi. Məhz Prezident İlham Əliyevin müdrik qərarları sayəsində və Ali Baş Komandan bir sərkərdə kimi istiqamətləri müəyyənləşdirməklə döyüşlərdə Azərbaycan Ordusunun şəxsi heyəti arasında itkilərin minimum olmasına nail olunub. Dövlətimizin başçısının bu sərkərdəlik məharəti və Azərbaycan Ordusunun yüksək döyüş hazırlığı, həmçinin müasir silahların və texnikaların peşəkarlıqla idarə edilməsi sayəsində XXI əsrin tələblərinə cavab verən əməliyyatlar aparılıb. Azərbaycan Ordusu düşmənə maksimum zərbə endirməklə onu zəiflədib və beləliklə öz şəxsi heyəti arasında itkilər az olub.
Döyüşlərdə düşmənin çoxsaylı canlı qüvvə itkilərinə məruz qalmasının, onun texnikasının, döyüş infrastrukturunun, hərbi sursatının məhv edildiyini bildirən polkovnik xatırladıb ki, Ermənistan müharibə zamanı dağıdıcı silahlardan, artilleriyadan, raket-yaylım sistemlərindən istifadə edib. Zəfərlə yekunlaşan müharibədə az da olsa, itkilər olur. Bu gün əsgər analarımız səbir, təmkin nümayiş etdirir və deyirlər ki, təki Vətən sağ olsun. Onlar bu gün qürur hissi keçirirlər ki, övladları qələbə qazanan Ordunun sıralarında döyüşlərdə iştirak edib və torpaqlarımızın azadlığı uğrunda şəhid olublar. Xalqımızın və dövlətimizin şəhid ailələrinə qayğısı onların ağrı-acılarını azaldır. Artıq Vətən müharibəsi zəfərlə yekunlaşıb, düşmən diz çöküb və Azərbaycan ərazi bütövlüyünü bərpa edib. Bu gün Azərbaycan Ordusunun müasir döyüş strategiyasına hərbi aləmdə yeni təcrübə kimi yanaşılır. Ordumuzun arsenalındakı ən müasir silahlar və texnikalar isə Vətən müharibəsi zamanı şəxsi heyətimiz arasında itkiləri minimuma endirmiş döyüş taktikasını seçməyə imkan verib.AZƏRTAC
30-11-2020, 11:44 | Yaralı olduğu halda əsgər yoldaşını xilas edən qazi: "Bütün əsgərlərimiz qorxmadan, şir kimi döyüşürdü" - FOTO
Döyüş meydanında qəhrəmanlıqlar göstərən igid Azərbaycan oğullarının şücaətləri dillərə dastan oldu. Torpaqlarımızı işğaldan azad etmiş Vətən oğullarının hər birinin döyüş yolu, müharibə xatirələri var. Onların keçdiyi bu şərəfli yol olduqca maraqlı və qürurvericidir.
Tovuzun Əsrik Cırdaxan kəndindən olan Bədir Süleymanov rayonun Bozalqanlı kəndində yaşayır. O Vətən müharibəsinə könüllü qatılıb, döyüşlərdə iştirak edib. Bədir kəndlərindən onlarla dost-tanışının döyüşlərə getdiyini eşidəndə evdə otura bilmədiyini deyib.
Qazi Bədir Süleymanov torpaqlarımızın işğaldan azad olunması zamanı əldə edilən qələbənin bir səbəbi kimi isə əsgərlərin döyüş ruhunun həddindən artıq yüksək olmasını göstərir: "Ordumuzda əhval-ruhiyyə çox yüksək idi. Bu, elə bil inam yaradırdı ki, erməni ilə üz-üzə gələndə onların biri bizə ancaq 5-10 güllə ata bilərdi, sonra isə avtomatı tullayıb qaçırdı. Onda bilirdik ki, qalib gəlirik və düşməni qovmağa başlayırdıq... Bütün əsgərlərimiz qorxmadan, şir kimi döyüşürdü. Şükür ki, biz qalib gəldik. Prezidentimizin tutduğu yumruq kimi bir olduq, birlikdə qalib gəldik".
Fizuli, Laçın və Xocavənd istiqamətində döyüşlərdə iştirak edən Bədir Süleymanov əlindən yaralansa da, yaralı əsgər yoldaşını da döyüş meydanından çıxararaq onu xilas edib.
Bədirin iki körpə övladı var. Atalarının gəlişinə ən çox sevinən də elə onlardır. Qazimizin anası Aybəniz Salmanova isə övladı ilə fəxr etdiyini deyir: "Bədir mənim fəxrimdir. Müharibə başlayanda mənə zəng edib dedi ki, könüllü olaraq cəbhəyə gedirəm. Mən onun övladlarının yanına gəldim. O, cəbhəyə yollandı, Xocavənddə yaralandı. Gələndə onu qəhrəman oğul kimi qarşıladım. Mən ordumuzla, Prezidentimizlə fəxr edirəm. Çünki xalqımız, ordumuz dövlətimizin başçısının ətrafında bir yumruq kimi birləşərək düşməni əzdi, torpaqlarımızı işğaldan azad etdi".
Əlindən yaralanan Bədir sağalacağı günü gözləyir. Fikri-zikri döyüş yoldaşlarının yanında olan igid hərbçimiz sağalan kimi silahdaşlarının yanına qayıdacağını deyir.AZƏRTAC
27-11-2020, 09:56 | Ağsunun icra başçısı ölməyib, vəziyyəti ağırdır - Xəstəxana
Ağsu Rayon İcra Hakimiyyətinin başçısı Vahid Tağıyevin dünyasını dəyişməsi ilə bağlı məlumat yalandır.
Barədə Trend-ə icra başçısının müalicə aldığı tibb müəssisəsindən məlumat verilib.
Müəssisədən qeyd ediblər ki, V.Tağıyev hazırda tibb müəssisiəsində müalicəsini davam etdirir: "İcra başçısının vəziyyəti ağırdır. Amma onun dünyasını dəyişməsi ilə bağlı məlumat yalandır"
