24-06-2022, 13:19 | Tərtərdə 21 yaşlı qızı iki dəfə qaçırdılar: Anasının yanında döyüb, nömrəsiz maşınla aparıblar - İDDİA
Tərtərdə 21 yaşlı qız qaçırılıb.
Oxu.az-a istinadən xəbər verir ki, bu barədə məlumat sosial şəbəkələrdə paylaşılıb. İddia edilir ki, 21 yaşlı qız naməlum şəxslər tərəfindən nömrəsiz avtomobil ilə qaçırılıb.
Qızın anasının yanında döyülərək qaçırıldığı iddia olunur. Məlumatda qeyd edilir ki, sözügedən qız daha əvvəl də - 31 may 2022-ci il tarixində razılığı olmadan Ağdaşda oxuduğu kollecin qarşısından qaçırılıb, lakin ailə tərəfindən öz evinə qaytarılıb.
Ətraflı
Hadisə növbəti dəfə ötən gün saat 12 radələrində təkrarlanıb. İddiaya görə, dörd nəfər nömrəsiz avtomobil ilə qızı anasının yanından yenidən qaçırıb. Ailənin hadisə ilə bağlı Tərtər rayon hüquq-mühafizə orqanlarına məlumat verdiyi, eləcə də Daxili İşlər Nazirliyinin "102" qaynar xəttinə müraciət belə etdiyi qeyd edilir.
Məsələ ilə bağlı DİN-in Mətbuat Xidmətinin Bərdə regional qrupunun baş inspektoru, polis baş leytenantı Aslan Qiyaslı Oxu.az-a açıqlamasında bildirib ki, bu barədə iyunun 23-də Tərtər Rayon Polis Şöbəsinə məlumat daxil olub. Hazırda polis əməkdaşları tərəfindən intensiv əməliyyat-axtarış tədbirləri davam etdirilir.
22-06-2022, 12:32 | Tarixi abidəni qazan şəxslər tutuldu
İyunun 20-də Şəki Şəhər Rayon Polis Şöbəsinə rayonun Orta Zəyzid kəndi ərazisində yerləşən tarixi abidədə qanunsuz qazıntı işlərinin aparılması ilə bağlı məlumat daxil olub.
DİN-in Mətbuat Xidmətinin Şəki regional qrupundan verilən məlumata görə, polis əməkdaşları tərəfindən həmin yerə baxış keçirilib, iş üçün əhəmiyyət kəsb edən maddi sübutlar götürülüb. Keçirilmiş təxirəsalınmaz əməliyyat-axtarış tədbirləri nəticəsində əməli törədənlərin rayon sakinləri - Şamil Kərimov və Bayram Ağaməmmədov olduqları müəyyən edilib. Onlar ifadələrində abidənin giriş hissəsində qanunsuz qazıntı işləri apardıqlarını etiraf ediblər, oradan tarixi əşya və yaxud maddi mədəniyyət nümunəsi tapmadıqlarını bildiriblər.
Faktla bağlı Şəki Şəhər Rayon Polis Şöbəsində araşdırma aparılır.
Qeyd edək ki, qanunsuz qazıntı işləri aparılan həmin tarixi abidənin hər hansısa bir hissəsinə ziyan dəyməyib.
19-06-2022, 13:43 | Şəmkirdə gənc oğlan dostunun qız qohumuna mesaj yazdı və sonra... - Şok təfərrüat
Şəmkir rayonunda 2003-cü il təvəllüdlü Rəvan Hüseynov tanışı və yaşıdı Əhliman Tağıyevi qətlə yetirib.
Teleqraf.com-a istinadən bildirir ki, 2021-ci il yanvarın 5-də Şəmkir şəhər sakini Əhliman Tağıyevin öldürülməsi barədə rayon prokurorluğuna məlumat daxil olub.
Aparılan araşdırmalarla mərhumu tanışı Rəvan Hüseynovun şəxsi münasibətlər zəminində aralarında yaranan mübahisə zamanı qətlə yetirməsi müəyyən edilib.
İstintaq orqanı tərəfindən Rəvanın barəsində Cinayət Məcəlləsinin 120.2.2-ci (xuliqaqnlıq niyyəti ilə adam öldürmə) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Rəvan bildirib ki, həbs edildiyi günə qədər nənəsi Durdanə ilə birlikdə Şəmkir rayonu Zəyəm qəsəbəsində yaşayıb: "Əhlimanı 2020-ci ildə Şəmkir şəhərində yerləşən "Xan" şadlıq sarayında ofisiant işlədiyim vaxtlardan tanımışam. Həmin vaxtdan münasibətlərimiz yarandı. 2020-ci ilin yay aylarında Əhlimanla aramızda narazılıq oldu. Mənim Əhlimanın qohumu olan Aysun adlı qızdan xoşum gəlirdi. Sonra Aysunun "instagram" sosial şəbəkəsində olan səhifəsini taparaq tanışlıq məqsədilə ona mesajlar yazdım. Aysun mənə başqa bir oğlanla danışdığını bildirdi və mənimlə tanış olmaq istəmədi. Yenidən mesajlar yazsam da, cavab vermədi".
Təqsirləndirilən şəxsin sözlərinə görə, sonradan Aysun bu barədə Əhlimana deyib: "Buna görə Əhlimanla aramızda narazılıq oldu. Lakin Əhlimanı bıçaqla Aysuna görə yox, sonradan haqqımda doğru olmayan ifadələr işlətdiyinə görə vurmuşam".
Rəvan qeyd edib ki, 1 yanvar 2021-ci ildə "Neska" ləqəbli dostu Nəzmi ilə mağazada olublar: "Bu zaman Əhliman Nəzmini kənara çəkib, ona mənimlə dostluq etməyin məsləhət olmadığını dedi. Bunu sonradan Nəzmindən öyrəndim və Əhlimanın anamın ikinci dəfə ailə qurmasını, "yaxşı oğlanın anası ikinci dəfə ailə qurmaz, Rəvana salam verən, mənə salam verməsin" kimi sözlərini deməsi xətrimə dəydi. Əhliman dəfələrlə uşaqların yanında anamın ikinci dəfə ailə qurmasına görə pisikdirib.
Mobil telefonla İnstaqram sosial şəbəkəsi vasitəsi ilə Əhlimana səsli mesaj yazdım. Əhliman da cavab olaraq ünvanıma ana-bacı söyüşü işlətdi, məni söhbətə çağırsa da, həmin gün görüşə getmədim".
Ətraflı
Rəvan deyib ki, bundan sonra Əhlimanın Məmməd adlı dostu ona zəng edib və Əhliman ilə aralarında olan mübahisənin doğru olmadığını, bir yerdə çay içib, söhbətin bağlanmasını, münaqişənin "mehribanlıq" ilə bitməsini istəyib: "Mən də buna razı olduğum üçün Məmmədə razılıq etdim. Yanvarın 5-də saat 13 radələrində Şəmkir şəhəri, 5-ci küçəsində yerləşən poçtun yanında Məmməd ilə görüşdüm və birlikdə köhnə stadionun yanına getdik. Orada Əlimanı gözlədik. Əhliman gələcəyini desə də, gəlmədi".
Təqsirləndirilən şəxs qeyd edib ki, bundan sonra evə gedib, yemək yeyən zaman Məmməd ona zəng edib, Əhlimanın gəldiyini deyib: "Zəyəm qəsəbəsinə getməli olduğum üçün görüşü təxirə salmasını xahiş etdim. Məmməd də Əhlimanın gəldiyini və məni söydüyünü deyərək telefonu Əhlimana verdi.
Telefonla danışanda mənə təkrar ana-bacı söyüşləri etməyə başladı. Evdə olduğuma görə telefonu söndürdüm, çölə çıxdım. Təkrar Məmmədə zəng etdikdə telefonu Əhliman götürdü və məni telefonda yenidən nalayiq söyüşlərlə təhqir edərək görüşə çağırdı.
Bundan sonra Məmmədlə danışaraq onları məktəbin həyətində gözlədiyimi dedim. Həmin vaxt Məmməd mənə Əhlimanın üzərində bıçaq ola biləcəyini söylədi. Bir az sonra Əhliman, Məmməd, Sənan, Aydın və Həsən gəldilər.
Əhliman əynindəki pencəyi çıxararaq əlini belinə atıb məktəbin həyətindəki təpədən aşağı düşdü, mənim üzərimə gəldi. Məni yenidən söydüyündən əsəbiləşdiyim üçün üzərimdə olan bıçağı çıxardım, Əhlimanı qorxutmaq məqsədilə üzərinə getdim. Əhliman gəldiyi istiqaməti dəyişərək məndən aralandı, qaçmağa başladı. Qaçanda ayağı büdrəyərək yıxıldı. Ona söyüş söyməməsi barədə xəbərdarlıq etdim.
Əhliman şam ağacları əkilmiş təpənin başına qalxdı, yerdən daş götürərək mənə tərəf atdı, arxaya çevirildiyim üçün daş sol çiynimə dəydi. Yenidən əyilərək daş götürüb mənə tərəf atmaq istəyəndə bıçaqla qorxutmaq üçün ona bir zərbə vurdum. Əhliman təpədən aşağı düşərək yerə çökdü. Sonra ayağa qalxaraq bir-iki addım atdıqdan sonra yerə yıxıldı. Hadisə yerində olan uşaqlar Əhlimanın yanına qaçdılar. Məmməd bildirdi ki, Əhlimanın qardaşına zəng etmişik, qaç burdan, onlar da gəlib, səni vura bilərlər. Mən də qorxduğum üçün məktəbin arxasına getdim".
Bu cinayət işinə Gəncə Ağır Cinayətlər Məhkəməsində baxılıb.
Rəvan 9 il 6 ay müddətinə azadlıqdan məhrum edilib.
19-06-2022, 13:35 | Bərdə sakini qonşusunu öldürdükdən sonra özünü güllələyib
Bərdədə qonşusunu tüfənglə öldürən kişi daha sonra intihar edib.
APA-ya istinadən bildirir ki, hadisə rayonun Şatırlı kəndində baş verib.
Kənd sakini 1963-cü il təvəllüdlü Hüseynov Namiq İsmayıl oğlu qonşusu 1988-ci il təvəllüdlü Hüseynov Anar Malik oğlunu qətlə yetirib. Daha sonra Namiq Hüseynov özünə tüfənglə atəş açaraq intihar edib.
Hadisənin qısqanclıq zəminində baş verdiyi bildirilir.
Faktla bağlı araşdırma aparılır.
19-06-2022, 13:22 | Mingəçevirdə yıxılan qadın icazəsiz qonşunun evinə necə girib? - Film kimi olayın TƏFƏRRÜATLARI - VİDEO
Mingəçevirdə qonşunun evinə icazəsiz keçən qadın oradan yıxılıb. Müxtəlif bədən xəsarətləri alan qadın xəstəxanaya çatdırılıb. Bəs maraqlıdır həmin qadın niyə qonşunun evinə gizlicə girməyə çalışıb?
27 yaşlı qadın 4-cü mərtəbədən yıxılıb.
Xəzər TV-yə istinadən bildirir ki, sözügedən ünvanda kirayədə yaşayan qadın öz mənzilindən deyil, qonşu mənzilin pəncərəsindən yerə çırpılıb. Bina sakinlərinin sözlərinə görə, 27 yaşlı qadın həmin mənzildə kimsə olmadığı zaman daxil olub. Ev sahibləri 4-cü mərtəbəyə qalxan zaman isə qapının arxadan kilidləndiyinə şahidlik ediblər. Bir qədər sonra isə həmin mənzildən qadının yerə düşdüyü məlum olub.
Hündürlükdən yerə düşərək ağır bədən xəsarətləri alan qadın Mingəçevir şəhər xəstəxanasına yerləşdirilib. Onun vəziyyətinin stabil olduğu bildirilir.
Qonşunun mənzilinə icazəsiz daxil olub, daha sonra həmin evin pəncərəsindən yerə düşən qadının hansı məqsədlə ora girməsini polis əməkdaşları araşdırırlar.
Qeyd edək ki, Rüfanə İbişova hadisə baş verən ünvanda 1 ilə yaxındır bir övladı ilə kirayədə yaşayır. Hadisənin baş vermə səbəbləri araşdırılır.
19-06-2022, 13:13 | Ağdaşda kişi 14 illik arvadını niyə döyüb? - Təfərrüat
Ağdaş rayonunda 1985-ci il təvəllüdlü Səlim şəxsi münasibətlər zəminində arvadı Faziləyə (adlar şərti verilib - red.) xəsarət yetirib.
Teleqraf.com-a istinadən bildirir ki, hadisə rayonun Aral Bir kəndində baş verib. Səlim bu ilin martın 1-də yaşadıqları evdə şəxsi münasibətlər zəminində mübahisə zamanı arvadını döyərək, ona müxtəlif dərəcəli bədən xəsarətləri yetirib.
İstintaq orqanı tərəfindən Səlimin barəsində Cinayət Məcəlləsinin 128-ci (qəsdən sağlamlığa yüngül xəsarət yetirmə) maddəsi ilə ittiham elan edilib.
Cinayət işi baxılması üçün Ağdaş rayon Məhkəməsinə göndərilib. İş hakim Cavid Sultanovun sədrliyi ilə araşdırılıb.
Məhkəmədə təqsirləndirilən şəxs qismində ifadə verən Səlim ona elan olunmuş ittiham üzrə özünü təqsirli bilib. O bildirib ki, zərərçəkmiş Fazilə ilə təxminən 14 ildir evlidir: "Bizim 3 övladımız var. Son zamanlar arvadımla aramızda tez-tez söz-söhbət olurdu. Səbəb Fazilənin Bakı şəhərinə köçüb, orada yaşamaq istəyidi. Mən isə bir neçə dəfə Faziləyə Tovuz rayonuna gedib, orada işləməyi təklif etsəm də, təklifimi qəbul etmədi, Bakı şəhərinə getməkdə israrlı olduğunu dedi".
Təqsirləndirilən şəxs qeyd edib ki, martın 1-də saat təxminən 10.00-da yaşadığı evə gəlib: "Fazilədən mənə yemək verməsini istədim. Yemək yeyən zaman 3-5 günə Tovuz rayonuna işləməyə gedəcəyimi söylədim. Ondan mənimlə getmək istəyib-istəmədiyini soruşdum. Fazilə də Tovuz rayonuna getməyəcəyini söylədi. Həmçinin dedi ki, sən də Tovuz rayonuna getmə, sən orada olanda çox içirsən.
Mən də Faziləyə içki içmədiyimi, əgər inanmırsa, mənimlə Tovuz rayonuna gedib, orada spirtli içki içib-içmədiyimə nəzarət etməsini söylədim. Lakin o, sözlərimə məhəl qoymadı, yenə də Bakı şəhərinə getməkdə israrlı olduğunu dedi. Buna görə aramızda mübahisə baş verdi. Mübahisə zamanı əsəbləşdim, yediyim yeməyin boşqabını yerə vurdum. "Sənə 15 dəqiqə vaxt verirəm, paltarını geyin çıx get atanın evinə, mənə sənin kimi arvad lazım deyil" deyə söylədim. Sonra özüm də çölə çıxdım".
Təqsirləndirilən şəxs bildirib ki, təxminən 15 dəqiqə sonra yataq otağına gəlib və Fazilənin orada görüb: "Faziləyə "sənə demədim çıx get" deyə söylədim. Fazilə də nalayiq ifadə işlədərək "mən bu evdə qalmayacağam, uşaqlarımı anamın yanına qoyub, oradan da Bakı şəhərinə tək gedib, orada işləyəcəyəm" deyə cavab verdi. Bu zaman anam yanımıza gəldi. Fazilə anamı görəndə ona nalayiq ifadə işlədərək "sənsən bu işləri başıma açan" deyə söylədi. Mən də Fazilənin sözlərinə əsəbləşdim. Ona "haraya gedirsən get" deyərək saçından tutdum, dartdım. Bir neçə dəfə yumruqla baş, qol nahiyəsindən nahiyələrindən vurdum. Sonra isə oradan getdim".
Cinayət işi üzrə zərərçəkmiş Fazilə ifadəsində ərinin dediklərini təkrarlayıb. Qeyd edib ki, əri ilə barışıb, ondan şikayəti yoxdur.
Hakim hökm çıxaran zaman ər-arvadını barışmasını nəzərə alıb. Səlimin barəsində olan cinayət təqibinə xitam verilib. O, cinayət məsuliyyətindən azad olunub.
19-06-2022, 13:02 | Hacıqabulda toyda kütləvi zəhərlənmə
Hacıqabulda toyda kütləvi zəhərlənmə olub.
APA-ya istinadən bildirir ki, hadisə Hacıqabul şəhərində fərdi yaşayış evlərindən birində qurulan çadırda keçirilən toy mərasimində baş verib.
Hazırda toyda iştirak edən 10-dan çox rayon sakini Şirvan və Hacıqabul rayonlarında yerləşən xəstəxanalara aparılıb.
Faktla bağlı araşdırma başlanıb.
18-06-2022, 08:41 | Azərbaycanda sabiq nazir vəfat etdi
Azərbaycanın sabiq kənd təsərrüfatı naziri Müzamil Abdullayev vəfat edib.
teleqraf.com-a istinadla xəbər verir ki, o, 81 yaşında dünyasını dəyişib.
Mərhum Gəncədə torpağa tapşırılacaq.
Qeyd edək ki, Müzamil İmran oğlu Abdullayev 1993-cü ilin iyulundan 1994-cü ilin oktyabrınadək kənd təsərrüfatı naziri vəzifəsində çalışıb.
Müzamil Abdullayev 1941-ci ildə Gəncə şəhərində anadan olub. 1996-ci ildə "Surət Hüseynov olayı"na görə vətənə xəyanət ittihamı ilə təqsirləndirilən eks-nazirə əvvəlcə ölüm hökmü kəsilib, sonra bu hökm ömürlük azadlıqdan məhrumetmə ilə əvəzlənib. Daha sonra isə cəzası 15 illik həbslə əvəz edilib. 1999-cu ildə isə ölkə başçısının əfv fərmanı ilə azadlığa buraxılıb.
18-06-2022, 08:20 | Tovuzda VAZ yanıb
Tovuz rayonunda minik avtomobili yanıb.
Fövqəladə Hallar Nazirliyindən verilən məlumata görə, rayonun Böyük Qışlaq kəndində "VAZ" markalı minik avtomobilinin yanar hissələri yanıb.
Yanğın yanğından mühafizə bölmələri tərəfindən söndürülüb.
18-06-2022, 08:01 | Şamaxıda qəzada xəsarət alan məktəblinin anası: “Zərbə qızımı avtobusun ön şüşəsindən atıb” - FOTO
İyunun 12-də Bakı-Şamaxı yolunda avtobusun iştirakı ilə ağır yol-nəqliyyat hadisəsi baş verib. Avtobusda 279 saylı məktəbin müəllimləri, şagirdləri və onların valideynləri olub. Anası ilə birlikdə kiçik qardaşını səfərdə müşayiət edən 9-cu sinif şagirdi Aleksandra Efimenko (14 yaş) qəzada ağır xəsarət alıb.
media.az qəzada xəsarət alan məktəblinin anası ilə söhbətləşib.
Qızın anası Natalya Varapayeva bildirib ki, 4-cü sinif şagirdlərinin valideynləri Şamaxıya tur barədə məlumatı sosial şəbəkələrdə "Empathy travel" turizm agentliyinin səhifəsindən əldə ediblər. Agentliyin işçisi ilə əlaqə saxladıqdan sonra səfərin təşkili ilə bağlı razılığa gəliblər.
"Səyahət agentliyi bizə proqramı və cədvəli göndərdi, həmçinin sürücüsü olan avtobus və iki qız bələdçi ilə təmin etdi", - deyə N.Varapayeva bildirib.
Uşaqlar və böyüklər Bakıya eyni avtobusla geri qaytarılıb. Qadının sözlərinə görə, nəqliyyat vasitəsinin sürücüsü avtomobili yüksək sürətlə idarə edib və özünü aqressiv aparıb.
"Mən onun arxasında oturmuşdum və gördüm ki, sürət hətta bir anda 120 km/saata çatıb. Orada isə yol çox dar və təhlükəlidir. Biz valideynlər dəfələrlə ondan sürəti azaltmağı xahiş etdik. O isə kobud cavab verərək işini daha yaxşı bildiyini və ümumiyyətlə proqramda göstərilən vaxtdan (23:00) gec gəlsək, şirkətin ona pul verməyəcəyini bildirdi. Üstəlik də bizi hədələdi və "Hamınıza pis olacaq" deyərək söydü", - deyə Varapayeva əlavə edib.
Zərərçəkənin anası avtobusun döngədə sürüşdüyünü, sürücünün idarəetməni itirdiyini və nəticədə avtobusun beton hasara çırpıldığını iddia edir.
"Qızım ön şüşədən uçdu və beton baryerin arxasında olan dərin dərəyə düşdü. Mən də yıxıldım və hasara dəydim. Məni çıxartdılar, Saşanı axtarmağa başladım. Qızımın uzanmış qanlı siluetini görəndə elə bildim ki, övladımı itirmişəm...
Yoldan keçən Sadıq adlı vətəndaş dayandı və qızımı dərədən çıxarmağa kömək etməyə başladı", - deyə Natalya Varapayeva əlavə edib.
Onun sözlərinə görə, valideynlər dərhal təcili yardım çağırıblar: "Həkimlər heç cür gəlmirdi, bizim üçün isə hər saniyə önəmli sayılırdı. Həmin şəxs bizi ən yaxın xəstəxanaya, Qobustan Mərkəzi Rayon Xəstəxanasına aparmağı təklif etdi. Biz ona çox minnətdarıq".
Qanlar içində olan 9-cu sinif şagirdi maşının arxa oturacağına qoyularaq xəstəxanaya çatdırılıb. Xəstəxanada ona qan köçürülüb, ilkin tibbi yardım göstərilib, dizi tikilib, anasının isə çənəsi yerinə bərkidilib.
"Ən çox Saşanın ayağı xəsarət almışdı, parçalanmışdı, sanki əks tərəfə bükülürdü, ayağı əvvəlkindən qısalıb sanki. Onun bütün bədəni, xüsusən də başı və üzü dəhşətli dərəcədə zədələnib", - deyə Natalya Varapayeva bildirib.
Məktəbli qızın anası (çənə və dişlərinin zədələnməsi istisna olmaqla) və onun oğlu nisbətən yüngül bədən xəsarətləri alıblar. Qobustan Mərkəzi Rayon Xəstəxanasından həkimlər A.Efimenkonun Bakının Sabunçu Xəstəxanasına göndərilməsini istəyiblər. Lakin qadın qızının Mərkəzi Klinikaya göndərilməsində təkid edib.
"Saşanı müayinə etdilər, yaraları tikildi və altı saat davam edən iki çətin əməliyyat aparıldı. Onun ombası və dizini sözün əsl mənasında yenidən hissə-hissə birləşdirirdilər. İndi ayağına dəmir implantlar qoyulub ki, bu da üzündəki çapıqlar kimi, ömürlük qala bilər. Qızım üçün indi həm mənəvi, həm də fiziki cəhətdən çox çətindir. Çox sayda ağrıkəsicilər onun vəziyyətini yüngülləşdirmir. Bir valideyn kimi bu, mənim üçün böyük zərbədir", - deyə zərərçəkənin anası kədərini ifadə edib.
Onun sözlərinə görə, müalicə üçün artıq 7 min manat ödəyib. Qadın rus dili və ədəbiyyatı müəllimi işləyir və bu məbləği təkbaşına ödəyə bilmədiyi üçün köməyinə həmkarları və dostları gəlib.
"Bütün bu müddət ərzində turizm agentliyindən bir dəfə də olsun uşağın vəziyyətini öyrənmək üçün zəng etmədilər. Burada hətta maliyyə dəstəyindən də söhbət getmir. "Empathy travel"in əməkdaşı yalnız üç digər uşağın tibbi müayinəsi üçün pul ödəyib, həmçinin deyib ki, tur zamanı bələdçi fotoaparatını itirib və səfər üçün ödədiyimiz pul yoxa çıxıb, əgər pulu tapsa, qalan xəsarət alanların da müalicə xərclərinin ödənilməsi barədə düşünəcək", - deyə Varapayeva qeyd edib.
Qarşıda Aleksandra Efimenkonu uzun reabilitasiya dövrü gözləyir. Tezliklə o, dizini necə bükməyi yenidən öyrənməli olacaq. Həkimlərin proqnozlarına görə, o, yalnız altı aydan sonra ayaqüstə dura biləcək və bu zaman da axsayaraq yeriyəcək.
Qeyd edək ki, A.Efimenko əlaçı tələbə olub, iki model agentliyində çalışıb, həmçinin moda nümayişlərində və müxtəlif məktəb tədbirlərində iştirak edib.
Qızın anası yol qəzasının araşdırılmasını tələb edir və həm sürücü, həm də turizm agentliyinin direktorunun günahkar olduğunu hesab edir.
"Cəmi dörd gün sonra polis əməkdaşları valideynlərdən ifadə almaq üçün məktəbə gəldilər. Mənimlə heç kim əlaqə saxlamayıb, baxmayaraq ki, mən daim Mərkəzi Klinikadayam və onlarla danışmağa hazıram. Mən sürücü və şirkət müdiri ilə bağlı düzgün araşdırma aparılmasını və onların ədalətli şəkildə cəzalandırılmasını tələb edirəm".
Media.az adıçəkilən qurumun əməkdaşı Kamran Məmmədovla əlaqə saxlayıb. Söhbətin əvvəlində həmin şəxs bu şirkətdə çalışıb-çalışmadığına qərar verə bilməyib, gah "Muradın (turun təşkilatçısı) yaxın dostu olduğunu" və agentliklə heç bir əlaqəsinin olmadığını deyib, gah əməkdaşı olduğunu, gah başqa şirkətin sahibi olduğunu...
K.Məmmədov qəzanı belə şərh edib: "Siz küçəni keçərkən və ya maşınla evə qayıdarkən sizə heç nə olmayacağına zəmanət verə bilərsinizmi? Restoranda müştəri yemək yeyib boğularaq ölüb. İndi heç kim yemək yeməsin? Bunlar real həyat hadisələridir. Bununla bağlı zəng edib vaxtınızı itirməyə dəyməz".
Media.az özünü Murad Qəhrəmanov kimi təqdim edən turun təşkilatçısı ilə də danışıb. O, Kamran Məmmədovun onların turizm agentliyinin əməkdaşı olduğunu təsdiqləyib.
Həmin şəxs qəzada "Empathy travel" şirkətinin iştirakını qəti şəkildə təkzib edib.
"Valideynlər turizm agentliyi ilə müqavilə imzalamayıblar, ona görə də bizim hadisə ilə heç bir əlaqəmiz yoxdur. Səfər şirkət adından deyil, fərdi şəkildə təşkil olunub. Onları avtobus və bələdçilərlə təmin etdim. Bu mənim şəxsi məsuliyyətimdir. Sadəcə sürücünün nömrəsini verdim. Qəzaya görə də o məsuliyyət daşıyır".
Elə öz sözlərinin də əksinə olaraq agentliyin hazırladığı tur proqramı ilə bağlı suala cavabında M.Qəhrəman bunun ümumi şablon olduğunu deyib.
O bildirib ki, zərərçəkənlərin yerləşdirildiyi xəstəxanaya baş çəkib, bəzilərinin müalicəsini ödəyib: "Hər kəsə kömək edə bilmərəm, məcbur da deyiləm. Vəkilimlə danışdım və o, günahsız olduğumu təsdiqlədi. Mən hadisə yerində deyildim. Sürücü isə avtobus sahibinin işçisidir", - deyə turun təşkilatçısı bildirib.
Onun sözlərinə görə, ağır yaralanan Aleksandra Efimenkodan bu yaxınlarda xəbər tutub: "Mən onun anasının telefon nömrəsini götürdüm və qızın vəziyyəti ilə maraqlanacam".
