Azərbaycanın Kəlbəcər rayonunu hərbi əməliyyat keçirmədən, siyasi yolla işğaldan azad etməsi böyük bir qələbədir. Kəlbəcər 1993-cü ilin aprel ayının 3-də Ermənistan ordusu tərəfindən işğal edilmişdi. Cənab Prezident İlham Əliyevin Kəlbəcərin işğaldan azad olunması ilə əlaqədar xalqa təbrik müraciətində də qeyd etdiyi kimi Kəlbəcər və bütövlükdə torpaqlarımızın işğal altına düşməsində əsas günahkar Azərbaycan Xalq Cəbhəsidir.

Bunu Trend-ə politoloq Şəbnəm Həsənova deyib.

Politoloq bildirib ki, vaxtilə xalqın tələbi ilə hakimiyyətə gələn, dövlətçiliyin əldən getməsinin qarşısını alan ulu öndər Heydər Əliyevin varisi İlham Əliyev bu gün Şuşanı, Kəlbəcəri, Qarabağı qaytardı və Azərbaycanın ərazi bütövlüyünü bərpa etməklə yanaşı, bizi dünyaya qürurlu xalq olaraq tanıtdı:

"Dünya Ermənistanı məğlub edilmiş, Azərbaycanı isə zəfər çalmış ölkə kimi tanıyır. Qalibiyyətimiz isə təkcə Ermənistan dövləti üzərində əldə edilmiş qələbə deyil. Prezident İlham Əliyev eyni zamanda erməni faşizmini məhv etdi.

Şuşanın azad olunmasından bir gün sonra 70-dən çox kəndin azad edilməsi ilə düşmən diz çökdü, kapitulyasiya aktına imza atdı. Rusiya, Azərbaycan Prezidentləri və Ermənistan baş naziri arasında imzalanmış üçtərəfli bəyanatda Ermənistanın işğal etdiyi 3 rayonun heç bir döyüş əməliyyatı olmadan Azərbaycana təhvil verməsi və bununla da Azərbaycanın ərazi bütövlüyünün tamamilə bərpa edilməsi nəzərdə tutulurdu ki, Ağdamdan sonra artıq Kəlbəcər də Azərbaycana qaytarıldı. Ermənilər bölgəni tərk etmək üçün verilən vaxtdan əlavə möhlət istəyərək güzəşt edilən on gün ərzində Kəlbəcərdə vəhşi qəbilə kimi yaşayış binalarına, tarixi yerlərə və təbiətə qarşı törədilən amansız rəftarlar həyata keçirdilər, Azərbaycan ordusu düşməni Şuşadan qovanda düşmən oraya gedən su xəttini sıradan çıxardı.

Buna baxmayaraq cənab Prezidentin də qeyd etdiyi kimi əsgərlərimiz Ağdam rayonunun bir kəndində erməni əhalisinə çıxmaq üçün şərait yaratdı. Budur Azərbaycan ilə Ermənistan arasında olan fərq və bunu bizi nədəsə ittiham etmək istəyən qüvvələr görməlidir. Azərbaycana dəymiş bütün ziyan beynəlxalq ekspertlərin iştirakı ilə hesablanacaq və Ermənistan belə vandal əməllərinə görə beynəlxalq məhkəmələr qarşısında cavab verəcək. Azərbaycan isə çox yaxın gələcəkdə Kəlbəcəri bərpa edəcək və yenidən quracaq, burada kənd təsərrüfatı, xüsusilə heyvandarlıq inkişaf edəcək. Kəlbəcər bizimdir, Kəlbəcər Azərbaycandır!".