11-11-2020, 12:25 | "Azərbaycan müharibədən bir neçə qat güclənərək çıxdı"
44 günlük müharibənin nəticələri münaqişənin həllinə dair Azərbaycan Prezidentinin hərbi və hərbi-siyasi həll konsepsiyasının mütləq doğruluğunu və reallığını qəti sübut etdi.
Bunu Trend-ə açıqlamasında "Bakı xəbər" qəzetinin baş redaktoru, siyasi ekspert Aydın Quliyev deyib.
O bildirib ki, Ali Baş Komandan "münaqişənin hərbi həll yolu yoxdur" deyərək əslində 30 il vəziyyəti Ermənistanın xeyrinə dondurmaq istəyən dünya qüvvələrinin planlarını və taktikasını alt-üst etdi: "Sentyabrın 27-dən başlanmış əks-hücum müharibəsi Azərbaycanın gücünü və regionda möhkəm sülhə doğru ən düzgün və qısa yolda olduğunu sübut etdi. Müharibənin ilk günlərindən Azərbaycan Prezidentinin ortaya qoyduğu real və ədalətli sülh şərtləri öz bəhrəsini verdi. Azərbaycan silahlı qüvvələrinin yaratdığı siyasi reallıqlarla hamı barışmağa məcbur oldu. Azərbaycan Prezidenti dünya hərb taktikaları tarixində unikal bir yenilik etdi- Azərbaycan on illər boyu uğurlu diplomatiya ilə kənar qüvvələri neytrallaşdırmaqla təcavüzkar Ermənistanı hərb meydanında təkləmək, Ermənistanın heç cür qəbul etmədiyi əsas prinsiplər deyilən çərçivənin mühüm hissəsini hərbi güclə təkbaşına icra etmək və bundan sonra təcavüzkarı kapitulyasiya masasına əyləşdirmək kimi uğurlu formul ortaya qoydu. Uğurlu diplomatiya-hərbi təzyiq-danışıqlar masasında şərt diktə etmək bundan sonra bir çox ölkələrin də karına gələcək Azərbaycan modelidir".
Ekspert bildirib ki, dinc şəkildə ədalətə və beynəlxalq normalara uymayan Ermənistan Azərbaycanın hərbi gücü ilə buna məcbur edildi: "Azərbaycan Prezidenti eyni vaxtda həm diplomatik, həm hərb arenasında, həm də informasiya müharibəsi meydanında bütün qüvvələri vahid hədəfə yönəltməyin əla nümunəsini yaratdı.
Düşmənin provakasiyalarına uymadan yalnız hərbi hədəflərlə müharibə aparan Azərbaycan dünyaya həm də müharibə qanunlarını pozmadan hədəfə yetişməyin mümkün olduğunu da sübut etdi. 44 gün ərzində 30 illik təcavüz və etnik təmizləmə siyasətinin qanunsuz nəticələrini ləğv etmək Azərbaycan tarixinin həqiqətən şanlı səhifəsidir. Prezident İlham Əliyev haqqımızı dünyaya təlqin edə-edə bu böyük nəticələri əldə etdi. Azərbaycanın haqqına hörmət edən, etməyə məcbur edilən, ya da heç olmasa neytral qalan ölkələrin sayı və dairəsi genişləndi. Azərbaycan Prezident İlham Əliyevin sayəsində müharibədən bir neçə qat güclənərək çıxdı.
Atəşkəs bəyannaməsinin imzalanması Azərbaycan Prezidentinin ağır intellektual və fiziki səylərinin ümummilli əhəmiyyətli nəticəsidir. Dünya tarixi müharibə tam bitməmiş düşmənin "əlinin arxasını yerə qoyduğu" az-az məqamlar tanıyır ki, bunun da ən klassık nümunəsini Azərbaycan Prezidenti yaratdı".
Baş redaktor deyib ki, Azərbaycanın qalibiyyətli müharibəsi Azərbaycan-Türkiyə qardaşlığını daha da güclü hala gətirdi: "Naxçıvanın tam blokadadan çıxışı regionumuzun geosiyasi mənzərəsini dəyişdirən əhəmiyyətli faktorlardan biri olacaq. Azərbaycan Prezidenti elə bir sülh sonluğu yaratdı ki, təcavüzkar Ermənistan güclü Rusiya-Türkiyə tandemi sayəsində uzun illər üçün cilovlandı. Sülhyaratma missiyasının icrasında qardaş Türkiyənin legitim rolunun rəsmən təmin edilməsi Prezident İlham Əliyevin tarixi geosiyasi uğurlarından biridir".
11-11-2020, 12:23 | Qarabağ və ətraf rayonlardakı 67 məscidin 63-ü tamamilə dağıdılıb
Dağlıq Qarabağ və ətraf rayonlarda rəsmi fəaliyyət göstərən 67 məscidin 63-ü tamamilə, 4 məscid isə qismən dağıdılaraq yararsız hala salınıb.
Azərbaycan Milli Elmlər Akademiyasından milli.az-a bildirilib ki, bu məlumatlar Beynəlxalq Türk Mədəniyyəti və İrsi Fondu, AMEA Hüquq və İnsan Haqları İnstitutu və UNESCO üzrə Azərbaycan Respublikasının Milli Komissiyasının birgə əməkdaşlığı çərçivəsində "Azərbaycanın işğal olunmuş ərazilərindəki tarix və mədəniyyət abidələrinə vurulan zərər" adlı iri layihənin həyata keçirilməsi nəticəsində əldə edilib.
Layihənin ideya müəllifi, Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı İctimai Birliyinin sədri, AMEA Hüquq və İnsan Haqları İnstitutunun əməkdaşı Faiq İsmayılov qeyd edib ki, Laçın rayonunda 74, Kəlbəcərdə 91, Qubadlıda 71, Cəbrayılda 93, Zəngilanda 56, Füzulidə 71, Ağdamda 140, Xocavənddə 93, Şuşada 215, Xocalıda 28 tarix və mədəniyyət abidəsinə zərər dəyib.
Dövlət tərəfindən qeydə alınan 903 abidə arasında həm yerli və regional, həm də beynəlxalq əhəmiyyətli abidələr var. Həmçinin bu ərazidə 1647 dövlət qeydiyyatında olmayan abidələr yerləşir.
F.İsmayılov daşınan abidələrə vurulan ziyanın milyardlarla ABŞ dolları həcmində olduğunu bildirir.
Layihə müəllifi ermənilər tərəfindən işğal olunan ərazilərdə erməni xaçdaşlarının yerləşdirilməsi, alban xaçdaşlarının mənimsənilməsi, erməni kilsələrinin inşası və alban memarlıq abidələrini dəyişdirib erməniləşdirilməsi nəticəsində Azərbaycan torpaqlarının öz adlarına çıxarıldığını da açıqlayıb.
11-11-2020, 12:10 | Ombudsman Səbinə Əliyeva Aparatın kollektivi ilə Fəxri xiyaban və Şəhidlər xiyabanını ziyarət edib - FOTO
Noyabrın 10-da Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva və Ombudsman Aparatının kollektivi Azərbaycanın Ermənistan tərəfindən işğal edilmiş torpaqlarının azad edilməsi ilə nəticələnən tarixi qələbə münasibətilə Fəxri xiyaban və Şəhidlər xiyabanını ziyarət ediblər.
Ombudsman Aparatından milli.az-a bildirilib ki, əvvəlcə Fəxri xiyabanda müstəqil Azərbaycanın memarı ulu öndər Heydər Əliyevin məzarı ziyarət edilib, xatirəsinə ehtiram ifadə olunub.
Daha sonra Ombudsman və Aparatın kollektivi Şəhidlər xiyabanı və II Fəxri xiyabanda Azərbaycanın azadlığı, ərazi bütövlüyü uğrunda canından keçmiş şəhidlərin məzarlarını ziyarət edərək, onların xatirəsinə dərin ehtiramlarını bildiriblər.
Azərbaycanın inamlı qələbə qazanmasında xüsusi rəşadət göstərən ordumuzun şəhid olmuş hərbi qulluqçularına rəhmət diləyir, yaralılara tezliklə sağalmalarını arzu edirik.
11-11-2020, 12:02 | Azərbaycanda yaşayan xalqların nümayəndələri Prezident İlham Əliyevi təbrik ediblər
Azərbaycanda yaşayan xalqların nümayəndələri Azərbaycan Respublikasının Prezidenti İlham Əliyevə təbrik məktubu ünvanlayıblar.
Məktubda deyilir:
Möhtərəm cənab Prezident!
Biz - Azərbaycanda yaşayan xalqların nümayəndələri Sizin və rəşadətli Ordumuzun misilsiz şücaəti sayəsində vətənimiz Azərbaycanın ayrılmaz hissəsi olan Qarabağın mənfur düşmən işğalından azad edilməsi münasibətilə ürəkdən təbrik edir, yorulmaz fəaliyyətinizdə Sizə yeni-yeni uğurlar arzulayırıq. Məhz Sizin komandanlığınız altında şanlı Ordumuzun erməni işğalçıları üzərində qazandığı zəfərlər hər birimizdə qürur, iftixar hissləri yaradır. İşğal altında olan ərazilərimizin erməni faşistlərindən təmizlənməsi uğrunda aparılan mübarizə bir daha sübut etdi ki, Azərbaycan xalqı özünün etnik, dini müxtəlifliyinə baxmayaraq, vahid, yenilməz və bölünməzdir. Məkrli düşmənin və onun əlaltılarının illər boyu apardıqları pozuculuq fəaliyyəti, təxribat cəhdləri nəinki tamamilə iflasa uğradı, eyni zamanda, Vətən müharibəsi bizim əbədi və sarsılmaz qardaşlıq tellərimizi daha da möhkəmləndirdi. Azərbaycan xalqlarının bütün nümayəndələri Azərbaycanın ərazi bütövlüyü uğrunda mübarizədə böyük fədakarlıq, vətənpərvərlik nümunəsi göstərdilər. Biz Azərbaycan əsgərlərini və şəhidlərimizi etnik və ya dini kimliklərinə görə ayırmırıq, onların hər biri bizim fəxrimiz, övladlarımız, bütöv Azərbaycan xalqının oğullarıdır.
Vətən müharibəsinin həyəcan, lakin böyük ümid dolu dövründə elə gün olmadı ki, ölkənin fərqli inanc yerlərində, müxtəlif dillərdə qəhrəman Azərbaycan Ordusuna, müasir Azərbaycan tarixinin yeni qalibiyyət səhifəsini yazmış Müzəffər Ali Baş Komandanımıza dualar edilməsin, Vətən torpaqlarının erməni işğalçılarından azad olunmasında fədakarlıq göstərən əsgər və zabitlərimizə Uca Rəbbimizdən cansağlığı, qələbə müjdəsi arzuları dilə gətirilməsin. Misilsiz tarixi Qələbəmizin əldə olunmasında Sizin müdrik dövlət başçısı, qətiyyətli sərkərdə və Azərbaycan xalqının böyük oğlu, ümummilli lider Heydər Əliyev məktəbinin layiqli davamçısı kimi misilsiz xidmətlərinizi və nailiyyətlərinizi yüksək dəyərləndirir, 30 illik intizardan sonra bizə qələbə sevincini yaşatdığınıza görə Azərbaycanda yaşayan bütün xalqlar adından dərin minnətdarlığımızı bildiririk.
Möhtərəm cənab Prezident, Sizi bir daha əmin edirik ki, Azərbaycan Respublikasının ərazisində yaşayan xalqlar həm doğma Vətənimizin müdafiəsində, milli dövlətçiliyimizin daha da inkişaf etməsində, ərazi bütövlüyümüzün qorunmasında, həm də dinc quruculuq işlərində Sizin fəaliyyətinizi bundan sonra da daim dəstəkləyəcək və yanınızda olacaqlar. Sizinlə fəxr edirik! Qarabağ bizimdir! Qarabağ Azərbaycandır!
Dərin hörmət və ehtiramla,
Kamal Abdullayev - Bakı Beynəlxalq Multikulturalizm Mərkəzinin Himayəçilik Şurasının sədri
Rəvan Həsənov - Bakı Beynəlxalq Multikulturalizm Mərkəzinin icraçı direktoru
İmamverdi Həmidov - Azərbaycanda talış icmasının ağsaqqalı
Əhməde Həpo - Azərbaycanda kürd icmasının ağsaqqalı
İmran Rzayev - "Samur" Ləzgi Mərkəzinin sədri
Məhəmməd Nooyev - Azərbaycan-Avar İctimai Birliyinin sədri
Mixail Zabelin - Azərbaycanda Rus İcmasının sədri, Milli Məclisin deputatı
Elman Əhmədov - "Azəri" Tat Mədəniyyət Mərkəzi İctimai Birliyinin sədri
Milix Yevdayev - Bakı Dağ Yəhudiləri Dini İcmasının sədri
Robert Mobili - Alban-Udi Xristian Dini İcmasının sədri
Aleksandr Şarovski - Avropa Yəhudilərinin Bakı Dini İcmasının sədri
Rafiq Abdullayev - "Buduq" Xeyriyyə Cəmiyyətinin sədri
Gülcan Miəsautova - "Tuqan tel" Tatar Mədəniyyəti Cəmiyyətinin sədri
Ismayıl Rəhimov - Azərbaycanda Yaşayan Axısxa Türklərinin "Vətən" İctimai Birliyinin sədri
Sevinc Bulacova - Azərbaycanda ingiloy icmasının rəhbəri
Rafael Qvaladze - Azərbaycanda yaşayan gürcü icmasının sədri.
Azərbaycan Respublikası, Bakı şəhəri AZƏRTAC
11-11-2020, 12:00 | "2020-ci il noyabrın 10-u Azərbaycan tarixinə qızıl hərflərlə yazıldı"
2020-ci il noyabrın 10-u Azərbaycan tarixinə qızıl hərflərlə yazıldı. Otuz il ərzində torpaqlarımızı işğal altında saxlayan Ermənistan nəhayət ki, ölkəmiz qarşısnda diz çökdü. Mən bu qələbə sevincini bizə bəxş edən cənab Prezident, Müzəffər Ali Baş Komandan İlham Əliyevə, o cümlədən rəşadətli ordumuza özüm və seçicilərim adından dərin təşəkkür edirəm.
Trend-ə Milli Məclisin deputatı Vüqar İskəndərov deyib.
Deputat bildirib ki, noyabrın 10-da Azərbaycan Respublikasının Prezidenti İlham Əliyev, Ermənistan Respublikasının baş naziri Nikol Paşinyan və Rusiya Federasiyasının Prezidenti Vladimir Putin tərfindən imzalanan birgə bəyanat işğalçı ölkənin təslimçilik aktıdır: "Lakin ölkəmiz bu uğuru heç də asanlıqla əldə etməyib. Bu uğurun əsas qəhrəmanı cənab Ali Baş Komandan İlham Əliyevdir. Məhz sentyabrın 27-də işğalçı ölkənin növbəti genişmiqyaslı hərbi təxribatına cavab olaraq başlanan Vətən müharibəmiz cənab İlham Əliyev başda olmaqla Azərbaycan Ordusunun və xalqımızın düşmən üzərində həlledici qələbə qazanması ilə başa çatdı".
"Noyabrın 10-da Azərbaycan xalqına müraciətində Prezident, Müzəffər Ali Baş Komandan İlham Əliyev bu məqama xüsusi olaraq toxundu. Cənab Prezident dedi ki, "biz döyüş meydanında, siyasi müstəvidə, istənilən formatda gücümüzü göstərmişik, müstəqilliyimizi göstərmişik. Gün gələcək müharibə dövrünün ictimaiyyətə açıqlana biləcək bəzi məqamları yəqin ki, açıqlanacaq. Ola bilsin ki, mən də hansısa məsələnin üstündən o pərdəni götürə bilərəm. Onda hər kəs görəcək ki, biz nə qədər böyük sınaqlardan çıxdıq, nə qədər böyük təzyiqlərə məruz qaldıq. Demək olar ki, gündəlik rejimdə, dayanın, dayanın, dayanın, dayanın. Amma biz qabağa getdik. Çünki mən xalqın dəstəyini hiss edirdim, xalqın inamını görürdüm. Məni heç nə dayandıra bilməzdi. Çünki mən bilirdim ki, biz haqlıyıq. Biz öz ərazi bütövlüyümüzü bərpa edirik, öz torpaqlarımızı qaytarırıq". Bəli, cənab Prezidentin bəyan etdiyi kimi, bu müharibə bütün dünyaya Azərbaycan xalqının nə qədər böyük xalq olduğunu göstərdi - yenilməz xalq, dəmir iradəli xalq, müzəffər xalq, müzəffər ordumuz. Biz xalqımızla, ordumuzla fəxr edirik" deyə, deputat əlavə edib.
Əldə edilən razılaşmanın tarixi əhəmiyyətinə gəlincə Vüqar İskəndərov deyib ki, bununla da Azərbaycanın ərazi bütövlüyü tam bərpa olundu: "Eyni zamanda, Qarabağa heç bir status verilməyəcək, Naxçıvanla Azərbaycanın quru əlaqəsi açılacaq, Naxçıvan blokadadan çıxacaq, qardaş Türkiyə sülhməramlı prosesində iştirak edəcək. Bütün bunlar Azərbaycanın tarixi qələbəsi, işğalçı Ermənistanın və dünya erməniliyinin isə ölümcül məğlubiyyətidir".
9-11-2020, 20:04 | İlham Əliyev Şuşa və Xankəndi arasındakı kəndlərin də azad olunduğunu elan etdi
Müzəffər Azərbaycan Ordusu Xocavəndin Mets Tağlar, Salakətin, Zoğalbulaq, Aragül, Tağavard, Böyük Tağavard, Zərdanaşen, Şəhər, Xocalının Şuşakənd, Muxtar, Daşaltı, Füzulinin Aşağı Güzdək, Qovşatlı, Mirzəcamallı, Şəkərcik, Mərdinli, Şıxlı, Qaraməmmədli, Dövlətyarlı, Hacılı, Hüseynbəyli, Saracıq, Zəngilanın Sobu, Qaragöz, İsgəndərbəyli kəndlərini, Bartaz qəsəbəsini, Bartaz strateji yüksəkliyini (2300 metr), Sığırt yüksəkliyini (1370 metr), Şükürataz yüksəkliyini (2000 metr) və əlavə 5 adsız strateji yüksəkliyi, Cəbrayılın Qalacıq, Mollahəsənli, Əsgərxanlı, Yuxarı Nüsüs, Aşıq Məlikli, Niftalılar, Qərər, Çələbilər, Qubadlının Qaramanlı, Xəndək, Həmzəli, Mahrızlı, Hal, Ballıqaya, Ulaşlı, Tinli, Xocahan, Boyunəkər, Qaraqoyunlu, Çərəli, Laçının Güləbürd, Səfiyan, Türklər kəndlərini işğaldan azad etmişdir. Eşq olsun Azərbaycan Ordusuna! Qarabağ Azərbaycandır!
Bunu Azərbaycan Respublikasının Prezidenti İlham Əliyev özünün rəsmi "Twitter" səhifəsində yazıb.
Müzəffər Azərbaycan Ordusu Xocavəndin Mets Tağlar, Salakətin, Zoğalbulaq, Aragül, Tağavard, Böyük Tağavard, Zərdanaşen, Şəhər, Xocalının Şuşakənd, Muxtar, Daşaltı, Füzulinin Aşağı Güzdək, Qovşatlı, Mirzəcamallı, Şəkərcik, Mərdinli, Şıxlı, Qaraməmmədli, Dövlətyarlı,
— İlham Əliyev (@azpresident) November 9, 2020
(Virtualaz.org)
9-11-2020, 05:36 | Mehriban Əliyeva: "Biz Şuşamızı qaytardıq"
Mehriban Əliyeva: "Biz Şuşamızı qaytardıq"
Azərbaycanın Birinci vitse-prezidenti Mehriban Əliyeva İnstaqram hesabında Şuşanın işğaldan azad edilməsi ilə bağlı paylaşım edib.
Paylaşımda deyilir:
"Bu anlarda bütün xalqımız təsvirəgəlməz qürur və sevinc hissləri keçirir! Şuşa işğaldan azad edilib! Bu münasibətlə bütün həmvətənlərimizə səmimi təbriklərimi çatdırıram! İllər boyu davam etmiş kədər, həsrət, faciəli hadisələrdən sonra tarixi ədalət bərpa olunur! Vətənimizi müdafiə edən və əzəli Azərbaycan torpaqlarını işğaldan azad edən qəhrəmanlar nəslinin bugünkü igidlikləri Azərbaycan tarixinə əbədi daxil olacaq və hər birimizin yaddaşında həmişəlik qalacaq! Azərbaycan torpaqlarının hər qarışının azad edilməsi bizim rəşadətli əsgərlərimizin qəhrəmanlığı və igidliyi, dözümlülüyü və qələbə əzmi sayəsində mümkün olur! Vətən naminə canlarından keçmiş şəhidlərimizə Allah rəhmət eləsin!
Əziz qardaşlar və bacılar!
Biz Şuşamızı qaytardıq! Bu əlamətdar tarixi hadisə münasibətilə hamınızı bir daha təbrik edirəm. Qoy bizim bütün uğurlarımızın və nailiyyətlərimizin, bütün qələbələrimizin qarantı olan xalq-Prezident birliyi günbəgün möhkəmlənsin!
Bu gün məhz bu birlik Azərbaycanın öz gücünü nümayiş etdirməsinə imkan yaradır! Milli həmrəylik, xalqın etimadı, inamı və dəstəyi sayəsində bizim Prezidentimiz bütün mürəkkəb məsələlərin öhdəsindən uğurla gəlməyi bacarır! Qoy Uca Tanrı ordumuzu, xalqımızı, Vətənimizi və Prezidentimizi qorusun! Şuşa bizimdir! Qarabağ Azərbaycandır!".
Посмотреть эту публикацию в Instagram
Bu anlarda bütün xalqımız təsvirəgəlməz qürur və sevinc hissləri keçirir! Şuşa işğaldan azad edilib! Bu münasibətlə bütün həmvətənlərimizə səmimi təbriklərimi çatdırıram! İllər boyu davam etmiş kədər, həsrət, faciəli hadisələrdən sonra tarixi ədalət bərpa olunur! Vətənimizi müdafiə edən və əzəli Azərbaycan torpaqlarını işğaldan azad edən qəhrəmanlar nəslinin bugünkü igidlikləri Azərbaycan tarixinə əbədi daxil olacaq və hər birimizin yaddaşında həmişəlik qalacaq!Azərbaycan torpaqlarının hər qarışının azad edilməsi bizim rəşadətli əsgərlərimizin qəhrəmanlığı və igidliyi, dözümlülüyü və qələbə əzmi sayəsində mümkün olur! Vətən naminə canlarından keçmiş şəhidlərimizə Allah rəhmət eləsin! Əziz qardaşlar və bacılar! Biz Şuşamızı qaytardıq! Bu əlamətdar tarixi hadisə münasibətilə hamınızı bir daha təbrik edirəm. Qoy bizim bütün uğurlarımızın və nailiyyətlərimizin, bütün qələbələrimizin qarantı olan xalq-Prezident birliyi günbəgün möhkəmlənsin! Bu gün məhz bu birlik Azərbaycanın öz gücünü nümayiş etdirməsinə imkan yaradır! Milli həmrəylik, xalqın etimadı, inamı və dəstəyi sayəsində bizim Prezidentimiz bütün mürəkkəb məsələlərin öhdəsindən uğurla gəlməyi bacarır! Qoy Uca Tanrı ordumuzu, xalqımızı, Vətənimizi və Prezidentimizi qorusun! Şuşa bizimdir! Qarabağ Azərbaycandır!
Публикация от Mehriban Aliyeva (@firstvicepresidentazerbaij(
(Virtualaz.org)
8-11-2020, 14:13 | Ali Baş Komandan İlham Əliyevin rəhbərliyi altında Azərbaycan Ordusu işğalçılara layiqli cavab verir - Türkiyə hökuməti
Prezident, Ali Baş Komandan İlham Əliyevin rəhbərliyi altında Azərbaycan ordusu cəbhənin büün istiqamətlərində işğalçı qüvvələrə layiqli cavab verir.
Bunu Trend-ə Türkiyə hökumətindən bildiriblər.
Qeyd olunub ki, Azərbaycanın bütün uğurları, o cümlədən Şuşa şəhərinin azad olunması Türkiyənin hədsiz sevindirir:
"Şuşa Azərbaycanın əzəli torpağıdır və bu gün bu şəhər erməni işğalından azad edilib".
Türkiyə hökumətindən bildiriblər ki, Azərbaycan özü öz ərazilərini azad etməklə, faktiki olaraq BMT Təhlükəsizlik Şurasının qətnamələrinin tələblərini icra edir.
8-11-2020, 13:58 | Siyasi partiyalar Prezident İlham Əliyevə təbrik məktubu ünvanlayıblar
Azərbaycanda fəaliyyət göstərən 50 siyasi partiya Şuşanın işğaldan azad edilməsi münasibətilə Ali Baş Komandan, Prezident İlham Əliyevə təbrik məktubu ünvanlayıb.
"Cənab Ali Baş Komandan!
Zati-alinizin hakimiyyətdə olduğu illərdə uğurla həyata keçirdiyiniz siyasət nəticəsində Azərbaycanın ən yeni tarixi qızıl hərflərlə yazılır. Heç şübhəsiz, bu, Sizin geniş dünyagörüşünüzün, siyasi uzaqgörənliyinizin, diplomatik bacarıqlarınızın, hərbi-strateji dühanızın, iqtisadi islahatlarınızın, xalqımızın Sizə göstərdiyi yüksək etimadın, xalq-dövlət-vətəndaş cəmiyyəti arasında qarşılıqlı anlayış və hörmətin ən ali təcəssümüdür.
Sizin ölkə rəhbəri kimi, sadəcə, iqtisadi, sosial və siyasi sahələrdə deyil, müasir ordu quruculuğu sahəsində də gördüyünüz böyük işlər danılmazdır. Ali Baş Komandan olaraq ordumuzun həm maddi-texniki təminatının və döyüş qabiliyyətinin, həm də şəxsi heyətin peşəkarlıq səviyyəsinin yüksəldilməsi istiqamətində gördüyünüz işlər bugünkü Qələbəmizi təmin edən əsas amillərdir.
Cari il sentyabrın 27-də Ermənistanın atəşkəs razılaşmasını pozaraq, genişmiqyaslı hərbi əməliyyatlara başlamasından dərhal sonra Sizin əks-hücum əmrinizlə şanlı Azərbaycan Ordusu 30 ilə yaxındır Ermənistanın işğalında olan Füzuli, Qubadlı, Zəngilan, Cəbrayıl şəhərlərini və 200-dən çox kəndlərimizi qısa müddətdə işğaldan azad etdi. Digər rayon və şəhərlərimizin azad edilməsi uğrunda Azərbaycanın şanlı ordusunun hərbi əməliyyatları uğurla davam edir.
Azərbaycan işğal atındakı torpaqlarını azad etmək üçün uğurlu hərbi əməliyyatlara davam etdiyi zaman Ermənistan və onun havadarlarının ölkəmizə təzyiq cəhdləri Sizin diplomatik bacarığınız, beynəlxalq münasibətləri doğru dəyərləndirməyiniz, məntiqli arqumentləriniz sayəsində qısa zamanda iflasa uğradı.
Torpaqlarımızın düşmən işğalından azad edilməsi, əlbəttə, bizim və Azərbaycan xalqının illərdir arzu etdiyi xəyalların gerçəkləşməsi deməkdir.
Əks-hücum əməliyyatları başladığı gündən bütün Azərbaycan xalqı kimi, ölkədə fəaliyyət göstərən siyasi partiyalar da ətrafınızda yumruq kimi birləşərək, Sizi qeyd-şərtsiz dəstəklədi. Qələbəyə təşnə olan xalqımız Sizin apardığınız böyük qalibiyyət yolu ilə inamla addımladı.
Vətən torpağının hər bir qarışı bizim üçün müqəddəsdir. Ermənistanın işğalından azad olunan bütün torpaqlarımıza qısa zamanda sülh və əmin-amanlıq gələcək.
Sizin dediyiniz "Əlbəttə ki, Şuşasız bizim işimiz yarımçıq olar" ifadəsi artıq vətənpərvərlik harayına çevrilib. Şuşa Azərbaycanın incisidir, mədəniyyət və musiqi beşiyidir. Şuşa, heç şübhəsiz, işğaldan azad edilməli idi. Bu böyük işi Sizin komandanlığınız ilə müzəffər Azərbaycan Ordusu bacardı. Şuşanın Azərbaycana, Azərbaycanın Şuşaya olan 28 illik həsrətinə Siz son verdiniz. Xalqımızın 30 ilə yaxındır həsrətində olduğu Şuşa şəhəri artıq düşməndən geri alınıb. Şəhidlərimizin qanı yerdə qalmadı! Şəhidlərimizin ruhu şaddır!
Əlbəttə, hərbi əməliyyatlar hələ də davam edir. Amma Şuşa qələbəsi Böyük Zəfərin ilk müjdəçisidir və Ermənistanın işğalı altında olan bütün torpaqlarımız azad edilənə qədər Azərbaycan mübarizəyə davam edəcək.
Bu mübarizədə hər zaman olduğu kimi, Azərbaycan xalqı ilə birlikdə Sizin yanınızdayıq və hər bir əmrinizə tabeyik.
İşğal altında olan hər qarış Vətən torpağının, xüsusilə də Şuşanın düşmən tapdağından azad edilməsi üçün göstərdiyiniz dəyanət, qətiyyət və səbrə görə Sizi və Azərbaycan xalqını ürəkdən təbrik edirik.
Şuşa qələbəsindən sonra Böyük Zəfər müjdənizi səbirsizliklə gözləyirik!
Yaşasın Azərbaycan!
Yaşasın Ali Baş Komandan!
Yaşasın müzəffər Azərbaycan Ordusu!
Qarabağ Azərbaycandır!
8 noyabr 2020-ci il
1. Yeni Azərbaycan Partiyası - Əli Əhmədov
2. Vətəndaş Həmrəyliyi Partiyası - Sabir Rüstəmxanlı
3. Ana Vətən Partiyası - Fəzail Ağamalı
4. Böyük Quruluş Partiyası - Fazil Mustafa
5. Bütöv Azərbaycan Xalq Cəbhəsi Partiyası - Qüdrət Həsənquliyev
6. Demokratik İslahatlar Partiyası - Asim Mollazadə
7. Vəhdət Partiyası - Tahir Kərimli
8. Vətəndaş Birliyi Partiyası - Sabir Hacıyev
9. Azərbaycan Demokratik Maarifçilik Partiyası - Elşən Musayev
10. Milli Cəbhə Partiyası - Razi Nurullayev
11. ReAL Partiyası - İlqar Məmmədov
12. Azərbaycan Ümid Partiyası - İqbal Ağa-zadə
13. Milli Dirçəliş Hərəkatı Partiyası - Fərəc Quliyev
14. Azərbaycan Demokrat Partiyası - Sərdar Cəlaloğlu
15. Azərbaycan Xalq Partiyası - Pənah Hüseyn
16. Ədalət Partiyası - İlyas İsmayılov
17. Klassik Xalq Cəbhəsi Partiyası - Mirmahmud Fəttayev
18. Azad Demokratlar Partiyası - Sülhəddin Əkbər
19. Azərbaycan Liberal Partiyası - Əvəz Temirxan
20. Azərbaycan Milli İstiqlal Partiyası - Arzuxan Əlizadə
21. Aydınlar Partiyası - Qulamhüseyn Əlibəyli
22. Azərbaycan Respublikaçılar Partiyası - Sübut Əsədov
23. Azərbaycan Sosial Demokrat Partiyası - Araz Əlizadə
24. Azərbaycan Sosial Rifah Partiyası - Əsli Kazımova
25. Böyük Azərbaycan Partiyası - Elşad Musayev
26. Milli Vəhdət Partiyası - Yunus Oğuz
27. AĞ Partiya - Tural Abbaslı
28. Müasir Müsavat Partiyası - Hafiz Hacıyev
29. Azərbaycan Liberal Demokrat Partiyası - Fuad Əliyev
30. Azərbaycan Yurddaş Partiyası - Mais Səfərli
31. Azadlıq Partiyası - Əhməd Orucov
32. Azərbaycan Naminə Alyans Partiyası - Abutalıb Səmədov
33. Azərbaycan Azad Respublikaçılar Partiyası - Kamil Seyidov
34. Cümhuriyyət Xalq Partiyası - Bədrəddin Quliyev
35. Milli Həmrəylik Partiyası - Əlisahib Hüseynov
36. Yeni Zaman Partiyası - Musa Ağayev
37. Vətəndaş və İnkişaf Partiyası - Əli Əliyev
38. Azərbaycan Xalq Demokratik Partiyası - Rafiq Turabxan
39. Azərbaycan Kommunist Partiyası - Hacı Hacıyev və Rauf Qurbanov
40. Milli Konqres Partiyası - İxtiyar Şirinov
41. Müstəqil Xalq Partiyası - Əflan İbrahimov
42. Vahid Azərbaycan Milli Birlik Partiyası - Hacıbaba Əzimov
43. Azərbaycan Milli Demokrat Partiyası - Tufan Kərimov
44. Azərbaycan Təkamül Partiyası - Teyyub Əliyev
45. Birlik Partiyası - Xudadat Xudiyev
46. Gələcək Azərbaycan Partiyası - Ağasif Şakiroğlu
47. Azərbaycan Milli Hərəkat Partiyası - Samir Cəfərov
48. Azərbaycan Mübarizləri Partiyası - Ağadur Müslümov
49. Qorqud Partiyası - Firudin Kərimov
50. Milli Demokrat İdrak Partiyası - Osman Əfəndiyev".(AZƏRTAC)
8-11-2020, 13:48 | Mövlud Çavuşoğlu: "Şuşanın azadlığı mübarək olsun
“Azərbaycanın mədəni paytaxtı, qədim Şuşa şəhərinin azadlığı mübarək və uğurlu olsun. Bayraq günündə şanlı Azərbaycan bayrağı bir daha enməməklə Şuşada da dalğalanacaq. Üçrəngli bayrağınla məsud yaşa, Azərbaycan!”
Türkiyə Xarici İşlər naziri Mövlud Çavuşoğlu “Tvitter”də yazıb.
Azerbaycan’ın kültür başkenti kadim şehir Şuşa’nın azatlığı kutlu ve uğurlu olsun. Bayrak gününde şanlı Azerbaycan bayrağı bir daha inmemek üzere Şuşa’da da dalgalanacak.
Üç renkli bayrağınla mesut yaşa AZERBAYCAN!
— Mevlüt Çavuşoğlu (@MevlutCavusoglu) November 8, 2020
Qeyd edək ki, bu gün Azərbaycan Respublikasının Prezidenti, Müzəffər Ali Baş Komandan İlham Əliyev Şəhidlər xiyabanından xalqa etdiyi müraciətdə Şuşa şəhərinin işğaldan azad edildiyini bəyan edib.(Virtualaz.org)
