3-11-2021, 08:03 | "Facebook" üz tanıma sistemindən imtina edəcək
"Facebook" sosial şəbəkəsinin rəhbərliyi üz tanıma sistemindən imtina etmək qərarına gəlib.
Bu barədə sosial şəbəkənin məxsus olduğu "Meta" şirkətinin açıqlamasında deyilir.
Açıqlamada bildirilir: "Biz "Facebook"da üz tanıma sistemindən istifadəni dayandırırıq. Bundan istifadə etməyə razılıq verən insanlar artıq foto və videolarda avtomatik müəyyən edilməyəcəklər. Bir milyarddan çox insanın fərdiləşdirilmiş üz tanıma şablonlarını siləcəyik".
2-11-2021, 08:21 | Təngənəfəsliyə səbəb olan XƏSTƏLİKLƏR
Böyüklər 1 dəqiqə ərzində orta hesabla 16-18 nəfəsalma hərəkəti edir (1 nəfəsalma hərəkəti = 1 nəfəs alma + 1 nəfəs vermə). İdmançılarda bu daha az, uşaqlarda daha çox olur.
Sağlam insan sakit vəziyyətdə nəfəsalmasına fikir vermir. Fiziki gərginlik (idman, fiziki iş və s.) və həmçinin stress zamanı orqanizmin oksigenə olan təlabatı artır, beyin bu haqda məlumat alır və nəfəsalmanın tempini artırmağa əmr verir. Bu vəziyyətdə insan nəfəsalmasını hiss etməyə başlayır. Saglamolun.az bildirir ki, buna "fizioloji təngənəfəslik" deyilir. Lakin bu sağlam insanda güclü diskomfort yaratmır və insan sakitləşdikdə və ya fiziki gərginlik azaldıqda nəfəsalma tez bir zamanda normaya düşür. Daim idman və ya bədən tərbiyəsi ilə məşğul olan, aktiv insanlarda idmanla məşğul olmayan, passiv insanlarla müqayisədə eyni fiziki gərginlik zamanı təngənəfəslik daha az olur və nəfəsalma daha tez sabitləşir.
Əgər təngənəfəslik yüngül fiziki gərginlik (adi tempdə yerimə, hər hansı adi ev işləri zamanı) və hətta sakit vəziyyətdə, gecə yuxu zamanı inkişaf edirsə, bu patoloji haldır və buna ciddi fikir vermək lazımdır. Belə patoloji təngənəfəslik bir çox ağır xəstəliklərinin və pozulmalarının simptomu ola bilər.
Patoloji təngənəfəsliyin səbəbləri:
- Anemiya (qanazlığı)
- Nəfəsalma sistemi xəstəlikləri (vərəm, bronxial astma, bronxit, pnevmoniya, ağciyər emfizeması, xroniki obstruktiv ağciyər xəstəliyi, ağciyər xərçəngi və s.)
- Ürək-damar sistemi xəstəlikləri (ürəyin işemik xəstəliyi, kardiopatiyalar, ürəyin qüsurları, xroniki ürək çatışmazlığı və s.)
- Piylənmə
- Tireotoksikoz (qalxanvari vəzinin fəaliyyətinin artması)
- Şəkərli diabet
- Skolioz, döş fəqərələrinin qüsurları, Bexterev xəstəliyi. Bu xəstəliklər zamanı döş qəfəsinin forması dəyişilir ki, bu da nəfəsalmanı çətinləşdirir.
- Nevroz
Əgər adi fiziki aktivlik sizdə təngənəfəsliyə səbəb olursa və ya təngənəfəslik sizdə "səbəbsiz" inkişaf edirsə, mütləq həkimə müraciət edin. İlk növbədə terapevtin müayinəsindən keçin. Nəticələrdən asılı olaraq terapevt sizi digər mütəxəssislərin (kardioloq, pulmonoloq, nevropatoloq və s.) müayinələrinə göndərə bilər.
2-11-2021, 08:07 | Daha gümrah və sağlam olmaq üçün günə bu 4 prosedurla başlayın
Sağlamlığınızı qorumaq üçün müntəzəm sürətdə sağlamlığınıza diqqət etməlisiniz.
Bunun üçün bir çox müxtəlif prosedurlar mövcuddur, ancaq ən effktiv olanları səhər yuxudan ayılandan sonra edilənlərdir. Bu prosedurlar 5 dəqiqədən artıq vaxtınızı almayacaq və həmçinin də sağlamlığınıza çox fayda verəcək. Bu zaman ən əhəmiyyətli məqam müntəzəmlikdir. Başlanğıcda biraz çətin ola bilər, ancaq bir müddətdən sonra bu, vərdiş halına gələcək. Bu prosedurların həyata keçirilməsi üçün isə sizə sadəcə olaraq limon, su, bal və hidrogen-peroksid lazım olacaq.
Dilin təmizlənməsi
Hər kəs səhərlər dişlərini fırçalayır, ancaq olduqca vacib olan bir amil - dilin təmizlənməsi barədə unudulmamalıdır. Bu prosedurun əhəmiyyəti və vacibliyi barədə insanlar hələ qədim dövrlərdən məlumatlıdır. Orta əsrlərdə yaşamış ən böyük və tanınmış təbiblərdən biri olan İbn Sina dilin təmizlənməsini ağız boşluğuna gündəlik qulluq prosedurlarına daxil etməyi qətiyyətlə tövsiyyə edirdi. Bunu diş fırçası və ya xüsusi fırça vasitəsilə etmək mümkündür.
Dilin təmizlənməsi nəyə lazımdır:
1. Bu, mədəyə düşərək müxtəlif xəstəliklər əmələ gətirə biləcək bakteriyalardan xilas olmağı təmin edir.
2. Dildəki bakteriyalar ağızdan xoşagəlməz qoxu gəlməsinin, həmçinin ağız boşluğu xəstəliklərinin əsas səbəblərindən biridir.
Bir stəkan qaynar su
Çoxları yuxudan sonra maye balansını bərpa etməyin necə önəmli olduğundan xəbərdardır. Qaynamamış, filtrdən süzülmüş suyu qaynar olana qədər qızdırın. Qaynamamasına diqqət edin. Bir stəkanı tam şəkildə bu su ilə doldurun, içinə limon dilimi atın və ya sadəcə biraz limon şirəsi sıxın. Yeməkdən 20 dəqiqə əvvəl kiçik udumlarla yavaş-yavaş için.
Bu sadə içki nə ilə faydalıdır?
1. Su həzm sistemini normaya salır, orqanizmi qida qəbuluna hazırlayır.
2. Maddələr mübadiləsini yaxşılaşdırır və arıqlamağa yardımçı olur.
3. Qaraciyəri təmizləyir.
4. Limon şirəsində çox sayda mikroelementlər (kalsium, fosfor, kalium, natrium, maqnezium, dəmir), həmçinin B və C vitaminlər qrupu mövcuddur.
Yeməkdən əvvəl bal
Səhər yeməyindən 10 dəqiqə əvvəl bir çay qaşığı bal yeyin və üzərindən su için. Bal təbii və təzə bal olmalıdır.
Səhərdən bir qaşıq bal yemək nə üçündür?
1. Bal - mikroelementlər və vitaminlər qaynağıdır. Balın tərkibində böyük miqdarda fruktoza və qlükoza vardır ki, bunlar da orqanizmə enerji verərək beynin fəaliyyətini gücləndirir və iş qabiliyyətini artırır.
2. İmmuniteti gücləndirir.
3. Antioksidant xüsusiyyətlərə malik olan bu məhsul orqanizmin yaşlanmasının və gücdən düşməsinin qarşısının alınmasına yardımçı olur.
Ağzın hidrogen-peroksid məhlulu ilə yaxalanması
Səhər yeməyindən sonra ağzınızı hidrogen-peroksid həll olunmuş su ilə yaxalayın. 3 % faizli hidrogen-peroksid məhlulundan 5-7 damcını 50 mq qaynamayan su ilə qarışdırın.
Ağzı belə məhlulla yaxalamaq nə üçün lazımdır?
1. Kariesə, diş və diş əti ağrılarına qarşı mükəmməl profilaktikadır.
2. Ağızdan xoşagəlməz qoxunu itirir.
3. Dişləri yüngül ağardır.
Bu prosedurları hər səhər təkrar edin və özünüzü daha yaxşı hiss etdiyinizi görəcəksiniz.
2-11-2021, 08:05 | "Instagram"ın işində fasilələr yaranıb
Bir sıra ölkələrdə "Instagram" sosial şəbəkəsinin işində fasilələr müşahidə olunur.
Bu barədə Downdetector xidmətinin saytında bildirilib.
Ən çox şikayət ABŞ, Kanada və Böyük Britaniyadan gəlir. Bildirilib ki, ABŞ-da problemlərlə bağlı şikayət edən istifadəçilərin 53 faizi proqramın işindən şikayət edir, 24 faizi sayta daxil ola bilmir, 23 faizi öz hesablarına daxil ola bilmir.
2-11-2021, 08:03 | Bədəndəki ən böyük hüceyrə qadın yumurtasıdır… İnsan bədəni haqqında inanılmaz gerçəklər!
İlk baxışdan sadə görünən və bəzən nə qədər möcüzəvi xüsusiyyətlərə malik olduğu haqqında düşünmədiyimiz insan bədəninin potensialı bitib-tükənməzdir.
Life Fitness Akademiyasının mütəxəssisi Bünyamin Aysoy insan bədəninə dair bəzi inanılmaz gerçəkləri açıqlayıb. Habertürk.com saytında dərc olunan bu yazıda bununla bağlı olduqca heyrətamiz faktlar yer alır. Belə ki...
- Normal insan bədənində mövcud olan elektrik 25 Watt-lıq bir lampanı dəqiqələr boyu yandırma gücünə malikdir.
- Parmaq izləri bənzərsiz və təkrarolunmaz olduğu kimi, hər kəs də bənzərsiz və analoqsuz bir dil izinə sahibdir.
- Yetkin insanlarda körpə uşaqdan daha az sümük vardır. İnsan doğulduqda təxminən 270 sümüyü olur, ancaq inkişaf müddəti ərzində sümüklər əriyib bir-birinə qarışır və yetkin yaşa çatdıqda bədəndə sadəcə 206 sümük qalır.
- Bədəninizin hər kvadrat santimetrinə düşən tük sayı şimpanzenin tük sayı ilə eynidir. Xoşbəxtlikdən insanların tükləri daha açıq rənglidir və çox insanlarda əhəmiyyətli hissəsi görünmür.
- Mədənin selikli qişasının xarici təbəqəsinin ömrü çox qısa olduğu üçün onun 3-4 gündən bir yeniləndiyini bilirdinizmi? Əgər yenilənməsəydi, mədənizə düşən qidaları həzm etmək üçün istifadə edilən güclü turşular eyni zamanda mədəyə də zərər verəcəkdi.
- Qulaq çirki qulağın sağlamlığı üçün lazımlıdır. Bir çox insan bundan xoşlanmasa da, qulaq çirki qulağın müdafiə sisteminin çox önəmli bir parçasıdır. Daxili qulağı bakteriyalardan, göbələklərdən, çirkdən və həşəratlardan qoruyur. Həmçinin içini yağlayır və təmizləyir.
- Qadınlar anadangəlmə kişilərdən daha yaxşı dad bilir. Araşdırmalar qadınların iyləri ayırd etməkdə də kişilərdən daha yaxşı olduğunu göstərib. Xüsusilə sitrus meyvələri, vanil, darçın və qəhvə iylərini qadınlar daha yaxşı bilir.
- Burnumuz itlərinki qədər həssas deyil, ancaq 50 min fərqli iyi xatırlaya bilir.
- Elm adamlarının fikrincə, insanın IQ səviyyəsi yüksəldikcə o, daha çox yuxu görməyə başlayır. Bu doğru ola bilər, ancaq ayıldıqdan sonra yuxularınızı xatırlamırsınızsa, özünüzü pis hiss etməyin.
Bir çoxları gecə gördüyü yuxuların böyük bir qismini xatırlamır və bu yuxular ən çox 2-3 saniyə davam edir.
- İnsan bədənində dərinin hər kvadrat santimetrində təxminən 32 milyon bakteriya yaşayır. Bunların böyük əksəriyyəti zərərsizdir.
- Sarışınlar daha çox saça sahibdirlər. Saç rəngi saçımızın ne qədər çox olduğunu müəyyən etməyimizə yardımçı olur. Buna görə də sarışınlar ən üst cərgədə yer alır.
Bir insanda orta hesabla 100 min saç qılı olduğu halda, sarışınlarda bu say orta hesabla 146 min təşkil edir. Qara saçlılarda təxminən 110 min, qəhvəyi rəngli saçlılarda 100 min, qızılı saçlı insanlarda isə saç qılı daha az - təxminən 86 minə qədərdir.
- İnsan bədənindəki ən böyük hüceyrə qadının yumurtasıdır. Ən kiçik hüceyrə isə sperma hüceyrəsidir.
Normal halda hüceyrələr görülə bilməyəcək qədər kiçikdir, ancaq bir yumurta hüceyrəsi 1mm-lik diametri ilə açıq gözlə görülə bilər. Sperm hüceyrəsi isə bir hüceyrə toxumasından biraz böyükdür, ancaq yenə də çox kiçik hüceyrədir.
- Öz-özünüzü qıdıqlamanız mümkün deyil. Ən çox qıdıqlanan insanlar belə özlərini qıdıqlama qabiliyyətinə sahib deyil. Bunun səbəbi beyninizin parmaqlarınızın hərəkətini idarə edərkən qıdıqlama istəyini təxmin etməsidir. Beyniniz qıdıqlamanın hardan gələcəyini bildiyi üçün başqası qıdıqladığı zaman verdiyi reaksiyanı vermir.
- Həftələrlə heç nə yeməsəniz, ölməzsiniz, lakin yuxusuz qalsanız, 11 gündən sonra yuxusuzluğa dözə bilməz və sonsuza qədər yuxuya gedərsiniz.
2-11-2021, 07:58 | Orqanizmdə maqnezium çatışmazlığının əsas əlamətləri
Maqnezium - bədəninizdəki hər orqan üçün olduqca vacib olan elementdir.
Maqneziuma xüsusilə ürək, əzələlər və böyrəklər ehtiyac duyur. Əgər davamlı olaraq yorğunluq hiss edirsinizsə, ürək fəaliyyətinizdə pozğunluq müşahidə olunursa, qıcolmalar (sudurğa) və əzələ ağrılarından əziyyət çəkirsinizsə, o zaman böyük ehtimalla, bu, maqnezium çatışmazlığının əlamətidir. Göz səyirməsi və qəfil əzələ spazmları da bu əvəzolunmaz maddənin çatışmazlığının göstəricisi ola bilər. Çünki maqnezium qanın züllalarının tərkibində mövcuddur və bədənimizin 300-dən artıq fermentində aşkar olunub. Maqnezium bir çox kimyəvi reaksiyaların aktiv iştirakçısıdır və bədəndə gedən olduqca çox proseslər bu maddədən asılıdır. Bu səbəbdən də maqnezium çatışmazlığı ciddi xəstəliklərin səbəbkarı ola bilər.
Əzələlərin aktivliyi və sinir ucları ilə siqnalın keçiricilik qalibiyyəti birbaşa orqanizmdə maqneziumun yetərli miqdarda olmasından asılıdır. Maqnezium bədənə züllaların, yağların və karbohidratların həzm olunması və parçalanmasında yardımçı olur. Bu maddə bütün biokimyəvi proseslər üçün enerji mənbəyi olan adenozin trifosfatı (ATF) stimullaşdıraraq enerji istehsalında aktiv şəkildə iştirak edir. DNT-nin sintezi maqneziumum köməyilə reallaşır. Bu səbəbdən də əgər orqanizmdə maqnezium kifayət qədər deyilsə, bədən əziyyət çəkməyə başlayır.
Maqnezium çatışmazlığı zamanı aşağıdakı xəstəliklər ortaya çıxa bilər:
- sistit, böyrəklərin müxtəlif xəstəlikləri;
- bağırsaq xəstəliyi, orqanizmin intoksikasiyası (zəhərlənməsi);
- depressiya, yuxusuzluq, keylik;
- ürək xəstəlikləri;
- hipertoniya;
- diabet, hipoqlikemiya;
- sonsuzluq, qadınlarda ginekoloji pozğunluqlar;
- osteoporoz (sümük əriməsi);
- karies.
Maqnezium çatışmazlığı səbəbilə yarana biləcək xəstəliklərin siyahısını hələ çox uzatmaq olar. Bu zaman özünü büruzə verən ilk əlamətlər iştahın itməsi, başağrısı, ürəkbulanması, zəiflik, yorğunluqdur. Xoşbəxtlikdən, bu əlamətlərin aradan qaldırılması mümkündür. Sadəcə olaraq qida rasionuna maqneziumla zəngin məhsulları daxil etmək və həyat tərzinizi yenidən gözdən keçirmək lazımdır.
Maqnezium çatışmazlığı ilə mübarizənin ən etibarlı üsulu hər gün yaşıl tərəvəz şirələrinin və təzə tərəvəzlərin qəbul edilməsidir. Dəniz yosunu və yarpaqlı yaşıl tərəvəzlər (məsələn, ispanaq) olduqca yüksək dərəcədə maqnezium tərkibinə malikdir. Maqneziumun digər mükəmməl mənbələri lobya, qoz və günəbaxan tumlarıdır. Qida rasionuna vaxtaşırı küncüt toxumlarının daxil edilməsi xüsusilə önəmlidir (küncüt həmçinin kalsiumla da zəngindir). Avakadonun tərkibində yüksək miqdarda maqnezium vardır.
Bütün bu qidalardan istifadə olunmasına baxmayaraq orqanizmdə yenə də maqnezium çatışmazlığı yarana bilər. Əgər düzgün həyat tərzi keçirmirsinizsə, maqnezium tam şəkildə orqanizm tərəfindən udula bilmir. Məlum olduğu kimi, orqanizmdə hər şey bir-biri ilə bağlıdır. Belə ki, əgər tez-tez alkoqoldan istifadə edirsinizsə, D vitamini bədən tərəfindən tam sorula bilmir, maqneziumun sorulması (udulması) üçün isə D vitamini həddindən artıq vacibdir. Əgər çox miqdarda şirniyyat yeyilirsə, o zaman maqnezium sürətli şəkildə böyrəklər vasitəsilə xaric olunur. Maqneziumun xaric olunmasına həmçinin həddindən artıq qəhvə qəbulu, diuretiklərdən (sidikqovucu preparatlar), antibiotiklərdən, kortikosteroidlərdən çox istifadə olunması da imkan yaradır. Yaşın çox olması və həzm sisteminin yaxşı fəaliyyət göstərməməsi də maqneziumun sorulmasına təsir edən mühüm faktorlardır.
Unutmayın ki, maqnezium preparatını əlavə olaraq ancaq həkim təyin edə bilər, özbaşına müalicə əsla məsləhət görülmür. Adətən maqneziumun kalsium və D vitamini ilə birlikdə qəbulu tövsiyə olunur.
2-11-2021, 06:52 | Texnikanın uşaq psixikasının inkişafına təsiri
Müasir dövrdə texnologiyanın sürətlə inkişaf etməsi nəticəsində günün tələblərinə uyğun olaraq kompüter, televizor və telefon həyatımızın ayrılmaz hissəsinə çevrilib.
Lakin adını çəkdiyimiz cihazlardan istifadə nə qədər zəruri olsa da, hamımıza məlumdur ki, sağlamlıq hər şeydən vacibdir. Kompüter, televizor və telefondan ən çox istifadəyə meyilli olanlar isə uşaqlardır. Uşaqların saatlarla televizor, telefon və ya kompüterə bağlı qalmaları onların sosial mühitlə əlaqələrini zəiflədir, bu kimi cihazlardan asılı vəziyyətə salır. Bu asılılıq yetkinlik yaşındakı uşaqlarda özünəqapanma, məktəb yoldaşları və ətrafına qarşı aqressiv davranışlara və digər xoşagəlməz hallara gətirib çıxarır.
Kompüterin, telefonun və televizorun uşaq orqanizmi və psixologiyası üçün mənfi və müsbət cəhətləri vardır. Təəssüf hissi ilə qeyd etmək olar ki, bunların mənfi cəhəti müsbət cəhətlərindən daha çoxdur.
Müsbət cəhəti ondan ibarətdir ki, uşaqlar internet vasitəsilə kifayət qədər sürətli məlumat əldə etmək imkanına malikdirlər. İnternet, televizor uşaqlara onları maraqlandıran suallara cavab tapmaqda köməklik edir. Yaxşı ilə pisi bir-birində ayırmağa, fantaziyasının inkişaf etdirilməsinə, müxtəlif elm sahələrində yeni məlumatlar əldə etməsinə köməklik etməklə bərabər onların məntiqini, təfəkkürünü inkişaf etdirir.
Mənfi cəhəti isə ondan ibarətdir ki, internetdən çox istifadə etdikdə bu , ilk növbədə, uşaqlarda kompüter asılılığı yaradır. Bu asılılıq da, xəstəliyə çevrilir ki, bunu da narkomaniyaya, alkoqolizmə və digər asılılıqla eyniləşdirmək olar. Texnologiya vasitələrindən asılılıq uşaqların səhhətinə ciddi surətdə zərər vurur. Belə ki, ilk növbədə, görmə qabiliyyətini aşağı salır, onurğa sütununun düzgün inkişafına mane olur, tənəffüs sistemində problemlər yaradır, baş ağrıları əmələ gətirir, yuxu pozulmasına, yorğunluğa və narahatlığına səbəb olur.
Həmçinin uşaqların kompüterin, televizorun və telefonun qarşısında çox vaxt keçirmələri onları dərsdən yayındırmaqla yanaşı dərs hazırlamalarını arxa plana keçirir.
Həssas uşaqlarda döyüş və ölüm səhnələri ilə bol olan emosional kompüter oyunlarından və televiziyada nümayiş etdirilən filmlərdən sonra, aqressivlik, qəddarlıq və zorakılıq hissləri üstünlük təşkil edir, həmin hisslərlə yanaşı, onlarda qorxu hissi əmələ gəlir.
Televizor, telefon, kompüter uşaqların demək olar ki, ən yaxın dostlarından birinə çevrilir. Bu da uşaqların valideynləri, ailə üzvləri və dostları ilə çox az ünsiyyətdə olmasına səbəb olur. Uşaqlar qrammatik cəhətdən düzgün danışmamağa, öz fikirlərini düzgün ifadə edə bilməməyə başayırlar.
Uşaqda televizor, telefon və kompüter haqqında ilk yanlış məlumatı məhz valideyn yaradır. Əli yeni-yeni əşya tutan uşağın ilk oyuncağı telefon və kompüter olur. Uşaqlar buna əyləncə kimi baxır, qorxunc cizgi filmləri ilə başlarını qatırlar. Valideyn isə öz işi ilə məşğul olur və uşaq ona mane olmasın deyə telefonu özü uşağına verir. Bununla da uşaqda texniki vasitələrə qarşı yanlış yanaşma üsulu formalaşır.
Bir çox hallarda uşaqların xüsusilə internetdən düzgün istifadə etməməsində valideyinləri günahlandırmaq olar. Belə ki, bəzi valideynlər kiçik yaşlarında uşaqlarını mobil telefonla və kompüterlə təmin etməyə çalışırlar. Bu da, uşaqlarda kompüter oyunlarına marağı daha da artırmış olur. Valideynlər uşaqlarını belə hədiyyələrlə sevindirməkdən maksimum yayınmalıdırlar. Yaxşı olar ki , valideynlər övladları ilə ünsiyyətə daha çox vaxt sərf etsinlər. Uşaqların maraq dairəsinə daxil olan məsələləri onlarla birlikdə müzakirə etməli və onlarla fikir mübadiləsi aparmalıdırlar. Ünsiyyət zamanı uşaqların gün ərzində nə ilə məşğul olduqları ilə maraqlansınlar. Uşaqlara internetdən biliyin artırılması məqsədilə istifadə etməsini öyrətməli və buna həvəsini artırmalıdır. Ailəliklə teatra, muzeyə, konsertə, kafelərə və təbiətin qoynuna getməlidirlər. Hər bir valideyn bilməlidir ki, uşaqlar üçün ən əsas valideynləri ilə ünsiyyətdə olmaqdır.
Sevinc Əgərova
(milli.az)
2-11-2021, 06:37 | Balıqları seyr etmək stressi aradan qaldırır
Akvarium balıqlarının həvəskarları bilirlər ki, onları seyr etmək əsil zövqdür.
Balıqların bitkilərin arasında, parıldayaraq və gözoxşayan görünüşlə üzmələri əhval-ruhiyyəni qaldırır. Hər hansı yerdə - qonaq gedərkən, zoomağazada və ya ticarət mərkəzində akvarium gördükdə qeyri-ixtiyari qarşısında ayaq saxlayır və onları izləməyə başlayırıq.
Sübut olunub ki, balıqları izləmək sadəcə estetik zövq deyil, eyni zamanda üzən canlılara baxmaq sağlamlıq üçün faydalıdır. Balıqların orqanizmə rahatladıcı, sakitləşdirici təsiri şübhəsizdir. Bununla bağlı araşdırma aparan alimlər bu nəticəyə özləri də təəccübləniblər.
Plimut və Ekseter universitetlərindən olan britaniyalı alimlər maraqlı bir təcrübə keçiriblər. Onlar insanların Milli Dəniz Muzeyini ziyarət etməsindən sonra fiziki və psixi vəziyyətlərinin necə dəyişdiyini izləyiblər. Ziyarətçilərdə ürək ritminin və arterial təzyiqin azalması müşahidə olunub. Onlar özlərini sanki meditasiya seansından çıxmış kimi hiss ediblər. Hər kəsdə əhval-ruhiyyə yüksəlib, insanlar akvarum olan zallardan balıqları heyranlıqla, sakitliklə izləyərək və xoşbəxt halda çıxıblar. Ziyarətçilər nə qədər çox balıq seyr etsələr, özlərini bir o qədər yaxşı hiss ediblər.
Alimlər bu fikrə gəliblər ki, akvarium balıqlarını seyr etmənin insanlara təsir gücündən geniş şəkildə istifadə etnək lazımdır. Artıq bəzi stomatolji kabinetlərdə, xəstəxanaların qəbul şöbələrində, ticarət mərkəzləri, kinoteatr, restoranlar kimi insanların sıx olduğu məkanlarda akvariumların quraşdırılması kimi praktika mövcuddur. Bəzi psixonevroloji xəstəxanalar var ki, orda akvariumlardan dərman preparatları ilə birlikdə sakitləşdirici vasitə kimi istifadə olunur. Bu metodun geniş tətbiq olunması çox faydalı ola bilər. Bu, böyük şəhərlərdə yaşayan insanlarda stress səviyyəsinin azalmasına və psixi sağlamlığın güclənməsinə öz töhfəsini verər.
Akvarium - gözəl görünüşlü rahatlama oazisidir. Əgər ev akvariumuna sahib olma imkanınız yoxdursa, hərdənbir akvariumların olduğu məkanlara balıqları izləməyə getməyiniz məsləhət görülür. Bu, boş vaxtınızı səmərəli və gözəl keçirməyinizi təmin edəcək.
2-11-2021, 06:32 | Qarın ağrılarına səbəb ola biləcək 3 zərərli qida vərdişi
Heç kim inkar etməz ki, qida orqanizmə enerji və güc verməli və gün ərzində gümrah olmanı təmin etməlidir.
Lakin bəzən elə olur ki, kafedə, qonaqlıqda və ya evdə qida qəbulundan sonra yorğunluq, yuxululuq, süstlük və hətta qarın şişkinliyi və ishal kimi hallar baş verir. Məhsulların təzə olduğuna və yeməyi təzəcə odun üzərindən götürüb yediyinizə əmin olsanız da, iş qabiliyyətinizin azaldığını və mədənizin gözlənilmədən fərqli reaksiya verdiyini hiss edirsiniz. Bəs bunun səbəbi nə ola bilər?
Sən demə, qida orqanizmi gücləndirmək və sağlamlığını təmin etməklə yanaşı həm də bu enerjini ala bilər. Buna səbəb isə bəzi qida vərdişləridir ki, bu vərdişləri dəyişmək məsləhətdir.
Beləliklə, bu qida vərdişləri hansılardır?
1. Nişasta və zülalın birləşməsi
Yəqin ki, bir çoxlarınız kartof püresinin yanında qarnir olaraq mal ətindən kotlet, qızartma və ya steyk yeməyə üstünlük verirsiniz. Və ya balığı çörəklə, sıyığı ətlə yeməyi sevənlər var. Belə nümunələrdən çox gətirmək olar. Əsas olan bir qaydanı unutmamaqdır: nişasta və zülalları ayrı-ayrı vaxtarda qəbul edin! Başqa sözlə, çörək, sıyıqlar, kartof və digər bu kimi nişastalı məhsulları ət, balıq, yumurta, pendir, kəsmik, qoz və digər züllallı qidalardan ayrılıqda yeyin.
Nişasta tez, zülal isə gec həzm olunur və nişastalı məhsullar tezliklə nazik bağırsağa düşmək əvəzinə züllaların həzm olunması üçün bir neçə saat "növbədə gözləməli olur". Bu isə mədə-bağırsaq pozğunluqları, mədədə yanğı, gəyirmə və qarında şişkinliklə nəticələnə bilər. Unutmayın ki, nişasta və züllallarla daha çox tərəvəzlərin yeyilməsi məqbuldur.
2. Soyuq içkilər içmək vərdişi
Yayın istisində çox az adam əvvəlcədən soyuducuya qoyularaq soyudulmuş su və digər içkilərlə sərinləmək həzzindən vazkeçə bilər. Lakin buzlu su qan damarlarını daraldır, orqanizmə qidanı həzm etməyə mane olur və qida maddələrini özünə çəkir. Bu isə birbaşa piylənməyə gətirib çıxarır.
Əgər qazlı və ya adi su içmək istəyirsinizsə, otaq temperaturunda və buzsuz olmasına diqqət edin.
3. Yeməyin yanında su içmək vərdişi
Su - olduqca faydalıdır. Nə qədər çox içsən, bir o qədər də orqanizm toksinlərdən və zərərli tullantılardan təmizlənir, su balansı tənzimlənir, sağlamlıq göstəriciləri yaxşılaşır. Ancaq yemək mədəyə düşdükdə bir neçə stəkan suyun içərisində "boğulursa" - bu, həzm pozğunluğu, qarın şişkinliyi, sancılar və digər narahatlıqlara səbəb ola bilər. Bu səbəbdən də suyu yeməkdən 1 saat əvvəl və ya yeməkdən 1 saat sonra için. Əgər mütləq su içmək ehtiyacı duyursunuzsa, o zaman heç olmasa sadəcə 1 stəkanla kifayətlənin.
Əgər zərərli qida vərdişlərinizi tərgidərək bu sadə tövsiyələrə əməl etsəniz, onda qəbul etdiyiniz qida sizə güc, gümrahlıq və iş qabiliyyəti bəxş edəcək.
2-11-2021, 06:19 | Qurdların orqanizmdə olmasının ƏLAMƏTLƏRİ
İshal və ya qəbizlik, anemiya, sarılıq, dəridə səpgilər, öskürək və s. kimi bir çox müxtəlif problemlər orqanizmdə qurdların olması ilə bağlı ola bilər.
Çirkli su, yuyulmamış və ya pis yuyulmuş meyvə, tərəvəz, göyərti, çiy və ya yarıbişmiş ət və balıq - bütün bunlar orqanizmə qurdların düşməsinə səbəb ola bilər.
Adi gigiyenik qaydalara riayət etmədikdə (yeməkdən əvvəl əllər yumaq və s.), pis vərdişlər (dırnaq yemək) orqanizmə qurdların daim düşməsinə səbəb olur. Belə daim yoluxma xüsusilə təhlükəlidir.
Qurdlar insan orqanizmində müxtəlif pozulmalara səbəb olur. Bir çox hallarda biz bu pozulmaları qurdlarla deyil, digər səbəblərlə əlaqələndiririk.
- Qurdlar bağırsaqların mənfəzini bağlayaraq qəbizliyə və hətta bağırsaq keçilməzliyinə səbəb ola bilər. Digər parazitlər (amyob və bəzi digərləri) əksinə ishalın inkişafına səbəb olur.
- Qurdalar öd axarlarına düşə bilər və burada ödün axmasına mane ola bilər. Nəticədə ödün axması pozulur və insanda mexaniki sarılıq inkişaf edə bilər, qara ciyərin fəaliyyəti pozula bilər.
- Qurdlar bağırsaq disbakteriozuna səbəb olur. Disbakterioz özünü həzm pozulmaları, köp, meteorizm (bağırsaqda qazlar), qarın ağrıları və s. kimi simptomlarla büruzə verir. Əgər bu simptomlar sizi uzun müddət ərzində narahat edirsə, bu orqanizmdə qurdların olmasının əlaməti ola bilər.
- Qurdlar avitamonozlara (vitamin və mikroelementlərin çatışmazlığı), anemiyaya (qanazlığı) səbəb ola bilər.
- Qurdlar qan axını ilə oynaqlara və əzələlərə düşə bilər və nəticədə burada ağrılarına səbəb olur.
- Orqanizm boyu "səyahət edən" qurdlar nəfəsalma sisteminə də düşür. Nəticədə insanı xroniki "səbəbsiz" öskürək narahat edir. Belə öskürək adi müalicəyə tabe olmur.
- Parazitlər orqanizmdə allergik reaksiyalara səbəb olur - dəridə müxtəlif səpgilər, qaşınma əmələ gəlir.
- Orqanizmdə qurdların olması əksər hallarda iştahanın pozulmasına və arıqlamağa səbəb olur. Xüsusilə bu uşaqlara aiddir.
- Qurdlar orqanizmə toksiki təsir edir (orqanizmi zəhərləyir) və bu insanın sinir sisteminə çox mənfi təsir edir, insanda nevroloji problemlər (əsəbilik, depressiya, xroniki yorğunluq) əmələ gəlir.
Gördüyünüz kimi, orqanizmə düşdükdə qurdlar müxtəlif və bəzən də çox ciddi pozulmalara səbəb ola bilər. İlk növbədə bu immun sistemi zəif olan insanlara aiddir - uşaqlar, xroniki xəstəliklər nəticəsində zəifləmiş insanlar, yaşlı insanlar və s. Sağlam insanın immun sistemi orqanizmə düşən istənilən mikroblar, infeksiyalar, parazitlər və s. ilə uğurla mübarizə aparır. Lakin nəzərə almaq lazımdır ki, qurdlarla daim yoluxma hətta ən güclü immun sistemini zəiflədə bilər. Bu səbəbdən qurdlara yoluxmamaq üçün insan daim profilaktik tədbirlər görməlidir - gigiyenik qaydalara əməl etmək, təmiz su içmək, meyvə-tərəvəz, giləmeyvə, göyərtiləri yaxşı yumaq və s. Bu çox vacibdir.
Orqanizmdə qurdların olub-olmamasını yoxlamaq asan deyil. Bunun üçün yalnız nəcis analizi kifayət etmir. Xüsusi qan analizləri istifadə olunur.
Qurd xəstəliklərinin müayinəsi və müalicəsi ilə parazitoloq məşğul olur. Əgər müayinələr nəticəsində insanda qurdlar aşkar olunarsa, həkim xüsusi müalicə təyin edir. Aşkar olunmuş parazitdən asılı olara müxtəlif dərmanlar istifadə oluna bilər. Bəzi hallarda müalicə xəstənin bütün alə üzvlərinə təyin olunur.
Lakin müalicə insanı gələcəkdə qurdlarla yoluxmadan müdafiə etmir. Əgər insan müalicədən sonra gigiyenik qaydalara əməl etməzsə və s. qurdlar tez bir zamanda onun orqanizmində məskən salacaq.
