1-11-2021, 21:08 | Borcgötürən bank kreditini ödəyə bilməyəndə zamin nə etməlidir? - AÇIQLAMA
Son zamanlar məhkəmələrə ən çox müraciət edilən məsələlərdən biri kredit götürüləndə zamin olan vətəndaşlarımızın həmin borcu qaytarmağa məcbur olmasıdır.
Məsələ ilə bağlı açıqlama verən iqtisadçı ekspert Eyyub Kərimli Trend-ə bildirib ki, zaminlik kredit götürən şəxslə eyni öhdəlik yaradır: "Hər kim zamin durursa, anlamalıdır ki, kredit götürən qədər məsuliyyət daşıyır. Müqavilə imzalandığı vaxtdan etibarən zamin bank qarşısında məsuliyyət daşıyan şəxs hesab olunur. Çalışın, yaxından tanımadığınız insana zamin olmayın. Kredit alan şəxs əgər kredit borcunu geri ödəməkdə problem yaradarsa və kredit borcunu ödəməzsə, bu zaman bank zaminə qarşı tələb irəli sürə bilər. Həmin pul zaminin maaşından tutulur. Belə olduqda bir çıxış yolu var. Zamin kredit məbləğini tam ödədikdən sonra, borc götürəni məhkəməyə verə və ondan banka ödədiyi məbləği tələb edə bilər".
Ekspert qeyd edib ki, belə olduqda məhkəmələr də bu iddiaları təmin edir. Zamin məhkəmədə yetərincə sübut təqdim edə bilsə, maddi kompensasiya ala bilər.
1-11-2021, 21:03 | Son sutkada 263 vaksin vuruldu
Azərbaycanda son sutkada koronavirus (COVID-19) əleyhinə 263 vaksin vurulub.
Nazirlər Kabineti yanında Operativ Qərargahdan verilən məlumata görə, bir gündə birinci mərhələ üzrə vaksinasiya olunanların sayı 202, ikinci mərhələ üzrə vaksinasiya olunanların sayı 61 nəfərdir.
Ölkədə vurulan vaksinlərin ümumi sayı 9 661 131, birinci mərhələ üzrə vaksinasiya olunanların ümumi sayı 5 258 620, ikinci mərhələ üzrə vaksinasiya olunanların sayı isə 4 402 511 təşkil edir.
1-11-2021, 20:59 | İşədüzəltmə agentlikləri insanları necə aldadır? - AÇIQLAMA
Azərbaycanda əhaliyə müxtəlif işlər təklif edən işədüzəltmə agentlikləri fəaliyyət göstərir. Ölkədə fırıldaqçılıqla məşğul olan işədüzəltmə agentlikləri də mövcuddur.
Məsələ ilə bağlı Trend-ə açıqlama verən hüquqşünas Əlövsət Allahverdiyev bildirib ki, belə işədüzəltmə agentliklərinin fəaliyyəti tam qanunla nəzərdə tutulmuş fəaliyyət deyil:
"Bəzi işədüzltmə agentliklər işsiz insanların inamından istifadə edib dələduzluq edir. İşədüzəltmə agentliyinə yaxınlaşan insanlara anket verilir ki, bu anketi doldurun, biz sizi işlə təmin edəcəyik. Anketə görə 10-15 manat pul tələb edilir. İnsanlar dərhal bilməlidir ki, bu fırıldaqçılıqdır. İşədüzəltmə büroları göstərdikləri xidmətə görə işçidən qətiyyən pul almamalıdırlar. Azərbaycan Respublikasının Əmək məcəlləsində işə düzələrkən pul alınması deyə bir maddə yoxdur".
O qeyd edib ki, xarici ölkələrdə işədüzəltmə agentliyi vətəndaşı işə düzəldəndən sonra işə düzələnlərdən yox, işə götürənlərdən faiz alır. Bu qanunla tənzimlənmiş formada həyata keçirilir:
"Azərbaycanda olan işədüzəltmə agentliklərinin əksəriyyəti isə vətəndaş işə başlayandan bir müddət keçmiş hədələyir ki, ilk ayının maaşının yarısın bizə ver. Yoxsa işdən çıxaracağıq. Bütün bunlar qanuni şəkildə araşdırılıb sübuta yetirilməlidir. Şəxsin əməli sübut olunarsa, qanuni şəkildə məsuliyyətə cəlb olunmalıdır".
1-11-2021, 20:49 | Sabiq gömrük əməkdaşları məhkəmədə özlərini ittihamlarla təqsirli bilməyiblər
Bakı Ağır Cinayətlər Məhkəməsində Dövlət Gömrük Komitəsinin rüşvət almaqda təqsirləndirilən sabiq əməkdaşlarının işi üzrə məhkəmə prosesi keçirilib.
Hakim Əli Məmmədovun sədrliyi ilə keçirilən prosesdə prokuror ittiham aktının elan edilməsini yekunlaşdırıb. Təqsirləndirilən şəxslər özlərini ittihamlarla təqsirli bilməyib.
Daha sonra sübutların tədqiqinə başlanıb.
Təqsirləndirilən şəxslərin vəkilləri bildirib ki, təqsirləndirilən şəxslər ittihamları rədd etdiyi üçün prosesdə zərərçəkmiş kimi Dövlət Gömrük Komitəsinin nümayəndəsi və şahidlər dindirilsin.
Prosesdə bildirilib ki, zərərçəkmiş tərəf mövqeyini dəqiqləşdirsin və məhkəməyə bildirsin.
Proses noyabrın 15-də davam etdiriləcək.
İttihama görə, Dövlət Gömrük Komitəsindən gömrük rəsmiləşdirilməsi zamanı süründürməçiliyə yol verilməklə qeyri-qanuni tələblərin irəli sürülməsi barədə 30 mart 2021-ci il tarixdə daxil olmuş məlumat əsasında Baş prokuror yanında Korrupsiyaya qarşı Mübarizə Baş İdarəsində ilkin araşdırma aparılmaqla birgə əməliyyat-axtarış tədbirləri həyata keçirilib.
Aparılmış əməliyyat-istintaq tədbirləri zamanı Bakı Baş Gömrük İdarəsinin Xüsusi Gömrük prosedurları şöbəsinin rəisi Aydın Eylazov, həmin struktur qurumun Gömrük prosedurları və ödənişləri şöbəsinin baş inspektorları Elmar Mirzəyev və Emin Xəlilov, "İpək Yolu" gömrük postunda inspektor işləyən Mirağa Ağayev, gömrük əməkdaşı Orxan Zöhrabov habelə "Global Broker" MMC-nin direktoru olmaqla "D2D Logistics" MMC-də gömrük işləri üzrə mütəxəssis işləyən Ceyhun Şabanovun idxal olunmuş malların gömrük orqanından çıxarılmasının tezləşdirilməsi, eləcə də, müəyyən malların sərbəst dövriyyəyə buraxılışı üçün ödənilməli olan gömrük rüsumları və vergilərin 3 faizi miqdarında müəyyən edilmiş məbləğdən idxal və əlavə dəyər vergisi üzrə ödənilməli olan pul vəsaitinin büdcəyə ödənilməyərək malın gömrük nəzarətindən buraxılmasına şərait yaradılması müqabilində müxtəlif məbləğlərdə pul vəsaitini rüşvət qismində istəməklə almaları və vəzifə səlahiyyətlərin sui-istifadə etmələrinə əsaslı şübhələr müəyyən olunub.
Qeyd olunanlarla bağlı 17 may 2021-ci il tarixdə Korrupsiyaya qarşı Mübarizə Baş İdarəsində Cinayət Məcəlləsinin 311.3.2-ci (təkrar rüşvət alma) maddəsi ilə cinayət işi başlanıb. Toplanmış sübutlar əsasında adı çəkilən vətəndaşlar şübhəli şəxs qismində tutulublar.
Trend
1-11-2021, 20:33 | Keçmiş məhkum saxta pula görə saxlanılıb
Qobustan Rayon Polis Şöbəsinə oktyabrın 29-da şəhər ərazisində yerləşən iki yanacaqdoldurma məntəqəsində yanacaq müqabilində saxta əsginas verilməsi barədə məlumat daxil olub.
Daxili İşlər Nazirliyinin Mətbuat xidmətindən verilən məlumata görə, polis əməkdaşları tərəfindən aparılan araşdırmalarla müəyyən edilib ki, həmin gün gecə saat 3 radələrində avtomobillə yanacaqdoldurma məntəqələrinə gələn sürücü birinci məntəqədə operatora 15 manat dəyərində yanacaq müqabilində 200 manatlıq əsginas verərək 185 manat, ikinci məntəqədə isə 20 manat dəyərində yanacaq müqabilində 100 manatlıq əsginas verərək 80 manat geri alıb. Sonradan həmin əsginasların saxta olması aşkar olub.
Qobustan RPŞ əməkdaşlarının keçirdikləri əməliyyat-axtarış tədbirləri nəticəsində saxta əsginasları verməkdə şübhəli bilinən Bakı şəhər sakini, əvvəllər məhkum olunmuş A.Salayev müəyyən edilərək saxlanılıb. Araşdırma aparılır.
1-11-2021, 20:26 | AzTU-da 4 tələbə koronavirusa yoluxub, qrup distant təhsilə keçib
Azərbaycan Texniki Universitetində (AzTU) ötən həftə 4 tələbənin (Nəqliyyat və logistika fakültəsi -1 tələbə, Xüsusi texnika və texnologiya fakültəsi - 1 tələbə, Maşınqayırma və robototexnika fakültəsi - 1 tələbə, İnformasiya və telekommunikasiya texnologiyaları fakültəsi - 1 tələbə) COVID-19 testi pozitiv çıxıb.
Ali təhsil müəssisəsindən verilən məlumata görə, bu səbəbdən həmin tələbələrin təhsil aldığı qruplar distant tədrisə keçib.
Qeyd edək ki, bundan əvvəl koronavirusa yoluxan üç tələbə artıq sağalıb və onların qrupunda əyani tədris bərpa olunub.
22-10-2021, 09:28 | İsraildə koronavirusun yeni ştammına daha 5 yoluxma qeydə alınıb
İsraildə ötən sutka ərzində yeni növ koronavirusa (COVİD-19) 1 025 nəfər yoluxub.
Bu barədə ölkənin Səhiyyə Nazirliyindən bildiriblər.
Məlumata əsasən, yoluxma hallarından 5-i yeni aşkarlanan "delta" ştammına aid "AY4.2" variantıdır.
Bildirilir ki, ölkədə koronavirusa yoluxanların sayı 1 320 884 nəfərə çatıb. Hazırkı dövrədək koronavirusa yoluxanlardan 8 035 nəfəri ölüb, 1 298 172 nəfəri isə sağalıb. Aktiv xəstələrin sayı 14 677 nəfər təşkil edir.
Trend
22-10-2021, 09:07 | Azərbaycan UEFA əmsallar cədvəlində 26-cı pilləyə yüksəlib
Azərbaycan UEFA əmsallar cədvəlində 26-cı pilləyə yüksəlib.
Qarabağ"ın Konfrans Liqasının qrup mərhələsi çərçivəsində "Kayrat" üzərində qələbəsindən sonra ölkənin aktivinə daha 0,500 xal əlavə olunub və xalların sayı 16,000-a çatıb.
Beləliklə, Azərbaycan cədvəldə Macarıstan və Polşanı (hər birinin aktivində 15,875 xal) geridə qoyaraq 26-cı pillədə qərarlaşıb.
Trend
22-10-2021, 08:55 | Şəhər sakinlərinin problemi - xroniki intoksikasiya
Böyük şəhərlərdə yaşayan insanların əksər hissəsində xroniki intoksikasiyanın simptomları müşahidə olunur.
Bu ilk növbədə meqapolislərin pis ekoloji şəraiti ilə bağlıdır - burada hava və su müxtəlif toksiki maddələrlə olduqca zəngindir. Digər tərəfdən meqapolis sakilərin qəbul etdiyi qidanı da ekoloji təmiz hesab etmək çətindir.
İnsan orqanizmi özü-özünü təmizləmə və bərpa etmə xüsusiyyətlərinə malikdir. Bağırsaq, qara ciyər, böyrəklər, ağ ciyər yorulmadan ziyanlı maddələri zərərsizləşdirir və orqanizmdən xaric edirlər. Lakin bu maddələrin miqdarı çox olduqda bu orqanlar böyük yükləmələrlə işləyir ki, nəticədə bu orqanların fəaliyyətində pozulmalar baş verir.
Bundan əlavə orqanizmdə yığılan toksiki maddələr qana düşərək orqanizm boyu yayılır və müxtəlif orqanların fəaliyyətinə mənfi təsir edir. Xroniki intoksikasiya özünü bu kimi əlamətlərlə büruzə verir:
- səbəbsiz yorğunluq və zəiflik, əsəbilik, iş qabiliyyətinin aşağı olması, baş ağrıları, yuxunun pozulması. Bu xroniki intoksikasiyanın sinir sisteminə mənfi təsiri ilə bağlıdır. İntoksikasiyadan ilk növbədə məhz sinir sistemi əziyyət çəkir.
- immunitetin zəifləməsi - insan daha tez-tez soyuqdəymə xəstəliklərinə tutulur, daha gec sağalır, xroniki xəstəliklər və infeksiyalar kəskinləşməyə başlayır, insanda tez-tez allergik reaksiyalar olur və s.
- mədə-bağırsaq sisteminə pozulmalar - köp, ishal, qəbizlik, qarın ağrıları.
- dərinin vəziyyətinin pisləşməsi - dəridə tez-tez səpgilər əmələ gəlir, dəri öz elastikliyini itirir, solğun və qocalmış görünür.
- saçlar tökülməyə başlayır, daha cansız görünür.
- dırnaqlar kövrək olur, öz parıltısını itirir.
Əgər siz özünüzdə bu kimi əlamətlərin olmasını müşahidə edirsinizsə, bu o deməkdir ki, siz xroniki intoksikasiyadan əziyyət çəkirsiniz.
Xroniki intoksikasiya ilə mütləq mübarizə aparmaq lazımdır. Bunun üçün bu kimi sadə qaydalara əməl edin:
- Mümkün qədər çox təmiz su için (dükanlarda butulkalarda satılan su). Su orqanizmdən ziyanlı maddələrin çıxmasını sürətləndirir.
- Fast-fud qidalardan tam imtina edin, ev yeməklərinə üstünlük verin.
- Qidalanmanızda daim yerli və mövsümə uyğun meyvə-tərəvəz olmalıdır. Meyvə-tərəvəz qidalı liflərlə zəngindir. Bu liflər bağırsaqlarda olan ziyanlı maddələri "süpürüb" çıxardır.
- Süd məhsulları orqanizmə çox gözəl detoks təsiri göstərir. Süd məhsullarını (qatıq, ayran, xama, kəsmik və s.) mümkün qədər tez-tez qəbul edin.
- Yarmalar da (qarabaşaq, yulaf, darı, düyü və s.) bağırsaqların fəaliyyətinə çox müsbət təsir edir, bağırsaqları yaxşı təmizləyir.
- Bir çox müalicəvi bitkilər (çobanyastığı, itburnu, solmazçiçəyi və s.) orqanizmi ziyanlı maddələrdə təmizləmək xüsusiyyətinə malikdir. Apteklərdə qara ciyər, böyrəklər üçün olan xüsusi müalicə çaylar satılır. Bu çaylardan istifadə etmək olar.
- Orqanizmi əsaslı şəkildə təmizləmək istəyənlər özlərinə həftədə 1 dəfə detoks günü təyin etməlidir. Axşamdan 1 stəkan ilıq suda 1 xörək qaşığı buğda kəpəyi isladın və səhər acqarına qarışdırıb için. Gün ərzində yalnız çiy meyvə-tərəvəz yemək və bol su içmək lazımdır.
22-10-2021, 08:52 | Mançester klubları ispana görə rəqib oldu
"Leypsiq"in yarımmüdafiəçisi Dani Olmo karyerasını İngiltərədə davam etdirə bilər.
İspaniya millisinin üzvü uğrunda Mançester klubları mübarizəyə qoşulub.
"Barselona"nın transfer gündəmində olan Olmo üçün "Mançester Yunayted" və "Mançester Siti" də Bundesliqa təmsilçisi ilə danışıq aparmağa hazırdır. Lakin onlar yalnız "Barselona"nın maliyyə məsələsində "Leypsiq"lə anlaşmaması halında təmasa keçə biləcək. Çünki Olmo özü yetirməsi olduğu Kataloniya klubu ilə 5 illik şəxsi müqaviləni razılaşdırıb.
Qeyd edək ki, 23 yaşlı orta sahə oyunçusu "Leypsiq"ə ötən il Zaqreb "Dinamo"sundan keçib.
