14-12-2020, 06:34 | Bu gündən restoran, kafe və çay evləri yalnız çatdırılma xidməti göstərəcək
Xüsusi karantin rejiminin sərtləşdirilməsindən irəli gələrək bu gündən 2021-ci il 18 yanvar saat 00:00-dək ölkənin bütün ərazisində Azərbaycan Respublikasının Nazirlər Kabinetinin müvafiq qərarı ilə müəyyən edilmiş iş və xidmət sahələri istisna olmaqla digər sahələrdə iş və xidmətlər dayandırılıb.
Nazirlər Kabinetinin qərarına əsasən, bütün ticarət obyektlərinə, ictimai iaşə obyektlərinə, o cümlədən restoran, kafe və çay evlərinə müştərilərə yalnız çatdırma xidmətlərinin göstərilməsi və ya onlayn satışa icazə verilir.
Qeyd edək ki, 2020-ci il 14 dekabr saat 00:00-dan 2021-ci il 18 yanvar saat 00:00-dək bütün ölkə üzrə sərtləşdirilmiş xüsusi karantin rejimi tətbiq edilib.
12-12-2020, 04:06 | Dekabrın 14-dək ölkə ərazisində ictimai nəqliyyat işləməyəcək
Bu gündən dekabrın 14-ü saat 06:00-dək bütün ölkə ərazisində ictimai nəqliyyatın fəaliyyəti dayandırılıb.
Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.
Qərara əsasən, 12 dekabr saat 00:00-dan 14 dekabr saat 06:00-dək ölkə ərazisində ictimai nəqliyyat fəaliyyət göstərməyəcək.
Qeyd edək ki, Bakı metropolitenində sərnişindaşıma də dayandırılıb.
11-12-2020, 05:45 | Türkiyə Prezidenti Rəcəb Tayyib Ərdoğanın Azərbaycana rəsmi səfəri başa çatıb
Türkiyə Respublikasının Prezidenti Rəcəb Tayyib Ərdoğanın Azərbaycan Respublikasına rəsmi səfəri dekabrın 10-da başa çatıb.
AZƏRTAC bildirir ki, hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülmüşdü.
Türkiyə Prezidenti Rəcəb Tayyib Ərdoğanı və xanımı Əminə Ərdoğanı hava limanında Azərbaycan Respublikası Baş nazirinin birinci müavini Yaqub Eyyubov, xarici işlər nazirinin müavini Ramiz Həsənov və digər rəsmi şəxslər yola saldılar.
10-12-2020, 06:36 | Koronavirus qızdırmasına qarşı ən yaxşı dərman
Rusiya Ümumi və Kliniki Farmakologiya şöbəsinin müdiri, professor Sergey Zıryanov koronavirus pandemiyası zamanı hansı dərmanların faydalı olduğunu açıqlayıb.
Koronavirusda effektivliyi sübut olunan dərman azdır.
"Ən yaxşısı parasetamoldur. Çünki ibuprofen COVID-19-da bərpaedici xüsusiyyətə malik deyil. Burun damcıları da ala bilərsiniz"
Mütəxəssis insanları antibiotik almamağa çağırıb. O bildirib ki, dərmanı peşəkar həkim təyin etməlidir. Zıryanov əlavə edib ki, antiviral dərmanların istifadəsi yalnız həkim nəzarəti altında mümkündür, çünki arzuolunmaz reaksiyaları var.
Professorun sözlərinə görə, D vitaminindən sui-istifadə etməməlisiniz. Çünki artıq miqdarı damar zədələnməsinə, böyrək çatışmazlığına və digər problemlərə səbəb ola bilər. (medicina.az)
10-12-2020, 06:33 | Aspirin və kardiomaqnilin fərqi - Hansı effektivdir, kimlərə olmaz?
Koronavirus pandemiyasının məşhur etdiyi dərmanlardan daha biri: kardiomaqnil. İndi gənclər də virusla mübarizədə bu dərmanı içir, həkim reseptinin əsas preparatıdır.
Halbuki ötən ilə qədər bu dərmanlar yalnız ciddi ürək xəstələrinə, yaşlı insanlara təyin olunardı.
Qandurulducu olan aspirin və kardiomaqnilin fərqli cəhətlərini təqdim edir.
- Hər ikisinin tərkibində əsas təsiredici maddəsi asetilsalisil turşusudur.
- Kardiomaqnildə əlavə olaraq hidroksid maqniy də var. Bu element ürək əzələri və damarların işini aktivləşdirir.
- Kardiomaqnil trombositlərin aqreqasiyasını azaldır, tromb əmələ gəlmə prosesini bloklayır
- Ona görə kardiomaqnilin tromboz, ürək-damar problemi və infarkta qarşı qəbulu daha məqsədəuyğundur.
- Eləcə də kardiomaqnildə antasid maddəsi var ki, bu da mədənin divarını asitil turşusunun təsirindən qoruyur. Ona görə kardiomaqnil diabet, mədə-bağırsaq problemi və yaşlı insanlara da rahatlıqla təyin edilə bilər.
Aspirin və aspirin kardio isə həm də qızdırma salıcı, baş ağrı kəsici təsiri var. Adi aspirindən fərqli olaraq aspirin kardionun müdafiə təbəqəsi var ki, mədəyə təsir etmir.
Həm aspirin kardio, həm kardiomaqnil yeni nəsil antiaqreqantdır. Onlar antikoaqulyant deyillər.
Aspirin kardionun tərkibində isə yalnız asetilsalisil turşusu var.
Amma aspirindən fərqli olaraq kardiomaqnilin tez-tez qəbulu mədə selikli qişasına və ümumi orqanizmə elə də ciddi zərər vurmur.
Aspirin qəbulu hansı hallarda əks göstərişdir:
- Hamiləliyin ilk 3 ayı
- Diatez xəstəliyi
- Kəskin ürək çatışmazlığı
- Astma
- Qaraciyər çatışmazlığı
- Dərmana qarşı yüksək həssaslıq, bronxospazm
15 yaşına kimi xəstələrə aspirin Reye sindromu riski olduğu üçün təyin olunmur
Kardiomaqnil hansı xəstələrə olmaz:
- Ürəyin yüksək dekompensasiyası
- Qanaxmalara meyillilik
- Kəskin daxili xoraların olması
- Qaraciyər yetməzliyi
- Bronxial astma
Bu preparatları yalnız həkim təyin edir və doza həddini aşmaq olmaz. (medicina.az)
10-12-2020, 06:30 | Vətən müharibəsində xüsusi döyüş tapşırığı yerinə yetirən qazi
Vətən müharibəsində Şuşa şəhərinin azad edilməsində olduğu kimi, Hadrut döyüşlərində də düşmənə gözləmədiyi mövqedən zərbə vurmaqla ordumuz döyüş meydanında, sözün əsl mənasında, bir tarix yazdı. Bu döyüşlərdə iştirak edənlərdən biri Cəlilabadın Mirzəli kəndindən olan xüsusi təyinatlı qazi Səməd Mirzəyevdir.
Səməd Mirzəyev 14 ayın əsgəridir. Fiziki hazırlığı yüksək olduğu üçün ordu sıralarına qatılanda o, ordumuzun xüsusi təyinatlı qüvvələri sırasına seçilib. Elə döyüşlərə də xüsusi təyinatlı əsgər kimi qatılıb.
İgid döyüşçü cəbhənin şimal istiqamətində düşmənə qarşı döyüşdükdən sonra xüsusi döyüş tapşırığı yerinə yetirmək məqsədilə cənub istiqamətinə yollanıb. O, Hadrut döyüşlərində düşmənə gözlənilməz zərbə vurmaq üçün çətin relyefli, sıx meşələrdən keçənlərdən biri olub.
Cəlilabadlı qazi ağır döyüşlərdə aldığı zərbədən özünə gələ bilməyən düşmənin çarəsizlikdən mülki şəxsləri də döyüşlərə cəlb etdiyini deyir.
Düşmənlə ağır döyüşlər zamanı ayağından snayperlə vurulan Səməd Mirzəyev döyüş yoldaşları tərəfindən təxliyə olunub. O, bu barədə valideynlərinə xəbər verilməsini istəməyib.
Səməd Mirzəyevin də daxil olduğu Azərbaycan Ordusu keçilməz yollarda iz qoymaqla bizlərə Böyük Qələbəni yaşatdı. Qarabağ uğrunda müharibə artıq tarixin yaddaşına keçsə də, Azərbaycan əsgərinin qəhrəmanlığı illər ötəndən sonra da düşmənin yaddaşından çıxmayacaq.AZƏRTAC
10-12-2020, 06:27 | Koronavirusa ən çox yoluxma harda baş verir?
Rusiyada Rospotrebnadzor qurumunun rəhbəri Anna Popova koronavirusa ən çox yoluxma riskinin olduğu yeri açıqlayıb.
Onun sözlərinə görə insanlar daha çox ictimai nəqliyyatda, metroda, avtobusda yoluxur.
Ona görə nəqliyyatda maska geymək, qorunmaq xüsusilə vacibdir.
Məhz nəqliyyatda təmiz hava dövriyyəsi yoxdur, social məsafə gözləmək mümkün deyil.
Popova Yeni ili evdə və ya bağda yalnız məhdud sayda ailə üzvləri ilə keçirməyi tövsiyə edib. /medicina.az
10-12-2020, 06:25 | Azərbaycanlı alim: Xüsusi karantin rejiminin sərtləşdirilməsi vətəndaşların sağlamlığının qorunması üçündür
Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının tibb elmləri doktoru, azərbaycanlı alim Nuran Abdullayev Nazirlər Kabineti yanında Operativ Qərargahın virusun yayılmasının qarşısının alınması məqsədilə ölkə ərazisində tətbiq edilən xüsusi karantin rejiminin sərtləşdirilməsi ilə bağlı dekabrın 8-də verdiyi qərara münasibət bildirib.
Tibb elmləri doktoru bununla bağlı AZƏRTAC-a açıqlamasında deyib ki, karantin tədbirlərinin daha da sərtləşdirilməsi bütün dünyada olduğu kimi, ölkəmizdə də son aylarda yaşanan yüksək yoluxma səviyyəsi ilə əlaqədardır.
Onun sözlərinə görə, həyata keçirilən bütün zəruri tədbirlər vətəndaşların sağlamlığının qorunması üçündür: "Həm virusun ölkəmizdə yeni yayıldığı vaxtlarda, həm də yay aylarındakı çoxsaylı yoluxma hallarından sonra karantin qaydalarına və eləcə də virusdan qorunmaq üçün deyilən qızıl qaydalara əməl olunmaması vəziyyəti daha da ağır duruma gətirib çıxardı. İlk vaxtlarda insanlar arasında inamsızlıq karantin qadağalarının pozulmasına səbəb olurdu. Amma təəssüflər olsun ki, bu gün demək olar hər kəs ailə üzvləri arasında virusa yoluxma halını müşahidə edir. Bundan da daha pis nəticələr görməmək üçün hər kəs bilməlidir ki, bu dəfə tətbiq edilən sərt karantin qaydalarına əvvəlki vaxtlarla müqayisədə daha da ciddi riayət olunması hər bir vətəndaşın borcudur".
Azərbaycanlı alim bildirib ki, bu cür sərt karantin tədbirlərinin həyata keçirilməsinin ölkə iqtisadiyyatına, turizminə və digər sahələrə mənfi təsirləri qaçılmazdır: "Karantin tədbirlərinin iqtisadi zərərlərini göstərən və bu zərərin hətta virusa yoluxanların sayı ilə olan asılılığını sübut edən kifayət qədər elmi tədqiqatlar var. Amma bu tədbirlərin həyata keçirilməsi ilə dövlətimiz digər zərərlərin onun üçün ikinci planda olduğunu və əsas məqsədin vətəndaşların sağlamlığı olduğunu bir daha göstərdi. Bu, bir daha onu göstərir ki, Azərbaycan vətəndaşı, onun sağlamlığının qorunması və təhlükəsizliyinin təmin edilməsi dövlətimiz üçün əsas prioritet istiqamətlərdəndir. Eyni zamanda, karantin rejiminin sərtləşdirilməsi yoluxma hallarının geniş yayılmasının qarşısının alınmasına və vətəndaşların sağlamlığının qorunmasına hesablandığı kimi, eləcə də səhiyyə sisteminə dəstək olaraq onun müəssisələrinin də yüklənməsinin qarşısını almağa xidmət edəcək. Bununla da səhiyyə sistemi vətəndaşlara keyfiyyətli tibbi xidmət göstərə biləcək".
10-12-2020, 06:20 | Düşmənin kabusuna çevrilən "Paşam" ləqəbli şəhid Musa Əsgərov
İşğalçı düşmənin kabusuna çevrilən "Paşam" ləqəbli baş leytenant Musa Əsgərov "Murov" zirvəsini fəth etdikdən sonra şəhadətə yüksəlib. İndi hər kəsin qəhrəmanına çevrilən "Paşam"ı bir az yaxından tanıyaq...
1997-ci il fevralın 17-də Cəlilabadın Sabirabad kəndində dünyaya göz açan Musa Əsgərov körpə yaşlarından böyük qardaşı ilə anasının himayəsində böyüyüb. Anası Sevda Əsgərova oğullarının vətənpərvər, təhsilli böyüməsi üçün əlindən gələni əsirgəməyib. İdmanla məşğul olan Musa orta məktəbin 8-ci sinfindən Cəmşid Naxçıvanski adına hərbi liseyə, 2014-cü ildən isə Heydər Əliyev adına Ali Hərbi Akademiyaya daxil olur. 2018-ci ildə akademiyanı fərqlənmə ilə bitirən gənc leytenant XTQ-nin tərkibində hərbi xidmətə düşmənə ən yaxın mövqelərdən - Qazaxdan başlayıb. Sentyabrın 27-dən başlayan əks-hücum əməliyyatlarında düşmənin kabusuna çevrilib. Murov dağ yüksəkliyi istiqamətində düşmənin 30 il müddətində qurduğu onlarla pusqu və maneələri dağıdaraq hədəfə yaxınlaşıb. Sentyabrın 28-də Murov zirvəsinə qalxmaqla, həmin gün qəhrəmancasına şəhidlik zirvəsinə də yüksəlib.
Şəhid anası Sevda Əsgərova: "Müharibə başlayandan hər dəfə qapımızda avtomobil dayananda ürəyim düşürdü, özümdə bir narahatçılıq vardı. Torpaqlarımız işğalçılardan təmizləndi, indi rahatam. Oğlum şəhid olub, mən də şəhid anasıyam. Onunla qürur duyuram. Ölümündən sonra qardaşının oğlu dünyaya gəldi. Onu da Musa kimi böyüdəcəyəm, Musanın oxuduğu məktəbləri oxuyacaq, onun kimi cəsur hərbçi olacaq".
Hərbi müəllimi Möhübbət Əhmədov: "Yeddinci sinifdən Musaya dərs demişəm. Musa demək olar ki, məktəbin bütün yarışlarında iştirak edirdi. Həm gücünə, həm bacarığına görə bütün yoldaşlarından seçilirdi. Məktəbimizdə gələcəyin polad iradəli, döyüşkən komandiri böyüyürdü. Musa baş leytenant rütbəsinə kimi yüksəldi. Müharibə başladı, döyüş meydanında düşmənə qan udduran Musa şəhid oldu. Qürur hissi keçirirəm ki, mənim şagirdim bu zirvəyə yüksəldi. Allah rəhmət eləsin".
Bu gün ailədə Musanın yoxluğu hiss olunmur. Onun şəhadətə qovuşmasından bir həftə sonra dünyaya göz açan qardaşı oğlu şəhid Musanın adını daşıyır. İkinci qəhrəmanın böyüdüyü ailədə indi hər kəs bu körpə ilə nəfəs alır.AZƏRTAC
10-12-2020, 06:17 | Evdə virus yükünü necə azaltmalı - Bunu edin
Havada, olduğunu yerdə nə qədər çox virus konsentrasiyası varsa, koronavirusa yoluxma bir o qədər yüksəkdir.
Hazırda yoluxmalar ev və iş yerlərində, yəni qapalı yerlərdə daha çox baş verir.
Qış fəsli olduğundan olduğunuz məkanda, otaqda hava dəyişmir, vakuum effekt yaranır.
Rusiyalı infeksionist Vladislav Jemçuqov yoluxmanı azaltmaq üçün ev, ofis və iş yerlərində havanın tez-tez dəyişdirilməsini və pəncərələri açmağı tövsiyə edir.
"Daim evdə havalandırılma aparılmalı, nəm təmizlik işləri görülməli, hər yer silinməlidir.
İctimai nəqliyyatda da yaxşı havalandırma sistemi olmalıdır. Pis havalanan yerdə virusa yoluxma riski 3 dəfə çoxdur". (medicina.az)
