10-12-2020, 06:14 | İtaliyada tennis göydələni tikiləcək
İtaliyanın "CRA-Carlo Ratti Associati və Italo Rota" dizayner studiyasının arxitektorlarının maraqlı layihəsi əsasında tennis göydələninin tikintisi planlaşdırılır.
Layihə müəllifləri torpağın qiymətinin baha olduğu ölkədə 8 nəhəng tennis kortunu bir-birinin üzərində quraşdırmaq qərarına gəliblər. Tennis kortları yüngül konstruksiyalardan hazırlanacaq və burada idman verilişləri translyasiya olunacaq.
Uzunluğu 90 metr və ümumi sahəsi 5,5 min kvadratmetr olacaq göydələndə modulları - kortları istənilən formada yerləşdirmək mümkündür.
9-12-2020, 04:34 | Cənubi Koreya 44 milyon insan üçün peyvənd almağı planlaşdırır
Koreya Respublikası gələn il 44 milyon insan üçün koronavirusa qarşı peyvənd tədarükü üzrə müqavilə imzalayıb.
Bu barədə Koreya Respublikasının Səhiyyə naziri Pak Nın Hu jurnalistlər üçün təşkil olunan brifinqdə deyib.
Hökumət 34 milyon insanın vaksinasiyasına dair "AstraZeneca Plc", "Pfizer Inc", "Moderna Inc" və "Johnson & Johnson's Janssen" kompaniyaları ilə razılığa gəlib. Həmçinin 10 milyon insan üçün peyvənd dozaları Ümumdünya Səhiyyə Təşkilatının qlobal vaksinasiya layihəsi çərçivəsində əldə ediləcək.
"Biz ilkin olaraq 30 milyon insanı vaksinlə təmin etməyi planlaşdırsaq da, sonradan onların uğuru barədə qeyri-müəyyənlik və alışla bağlı güclü rəqabət səbəbindən daha çox preparat almaq qərarına gəldik", - deyə nazir bildirib. Onun sözlərinə görə, vaksinin ölkəyə çatdırılması mart ayından gec olmayaraq başlayacaq. Bu müddət ərzində hökumət preparatın tətbiqinin təhlükəsizliyini təmin etmək üçün onun başqa ölkələrdə təsirini müşahidə edəcək. Kütləvi vaksinasiya isə çox güman ki, gələn ilin ikinci yarısında start götürəcək.
Qeyd edək ki, pandemiyanın statistikasını aparan Worldometer saytının son məlumatına əsasən, Cənubi Koreyada indiyə qədər koronavirusa yoluxanların sayı 38 min 755 nəfərə, infeksiya səbəbindən ölənlərin sayı isə 552 nəfərə çatıb.
9-12-2020, 02:39 | Fransada quşçuluq təsərrüfatlarında minlərlə ördək məhv edilib
Fransada quşçuluq təsərrüfatlarını "quş qripi" bürüyüb. Bu təsərrüfatlarda ölüm səviyyəsi yüksəkdir.
Fransa Kənd təsərrüfatı Nazirliyi bu haqda məlumat yayıb.
Bildirilir ki, Land (Landes) departamentində ördək fermasında 6 min ördək məhv edilib. Quşçuluq zonalarında 10 kilimetr məsafədə sanitar qaydalara ciddi riayət olunması tələb olunur. Avropada vəhşi faunada "quş qripi"nin köçəri quşlar vasitəsilə geniş yayıldığı diqqətə çatdırılıb.
9-12-2020, 02:32 | Google Youtube-da təhqiredici şərhlər ilə mübarizə üçün yeni funksiyanı istifadəyə verib
Youtube kanalların müəllifləri tez-tez öz videolarının şərh bölmələrində digərləri tərəfindən təhqirlərə məruz qalırlar. Bu cür halların sayını aşağı salmaq üçün Google şirkəti Youtube üçün yeni funksiyanı işə salıb. Həmin funksiya təhqiredici şərhlərə avtomatik reaksiya verəcək. Söhbət, şərhin öncədən keçmiş moderasiyasından getmir. Belə hallar ilə mübarizə aparmaq üçün şirkət tamamilə fərqli yola üz tutub. Bu barədə 4pda saytı xəbər verib. Əvvəlcədən də düşünüldüyü kimi əgər sistem hansısa şərhi təhqiredici kimi qəbul etsə yeni funksiya avtomatik işə düşəcək.
Bu halda təhqiredici şərhi yazmış istifadəçi ortaya çıxan pəncərə formasında xəbərdarlıq əldə edəcək. Həmin pəncərədə isə ona şərhin mətninə Youtube siyasətinə əsasən düzəliş etmək təklif olunacaq. Bu cür xəbərdarlığa baxmayaraq istifadəçi öz şərhini saxlaya bilər. Google bildirib ki, sözügedən xəbərdarlığın ortaya çıxması heç də dəqiq şəkildə şərhin silinməsi demək deyil. Bu yeni funksiya artıq Youtube-un Android üçün olan versiyasında aktivləşdirilib. Yaxın zamanda o həmçinin iOS və desktop versiyaya da əlavə ediləcək.
9-12-2020, 02:03 | Avropada koronavirusa yoluxma hallarının sayı 20 milyonu ötüb
Avropada koronavirusa yoluxma hallarının sayı 20 milyon nəfəri ötüb.
Bu barədə Avropa ölkələrinin hakimiyyət orqanları tərəfindən verilən rəsmi məlumatlar əsasında hesablama aparan "France-Presse" agentliyi bildirib.
Pandemiyanın başlanğıcından bəri dünyada təxminən 67,6 milyon insan koronavirusa yoluxub, 1,5 milyondan çoxu ölüb. (Trend)
8-12-2020, 02:46 | Gürcüstanda koronavirusa daha 2501 nəfər yoluxub
Gürcüstanda ötən sutka ərzində yeni növ koronavirusa (COVİD-19) 2 501 yoluxma halı qeydə alınıb.
Trend-in "Gürcüstan onlayn" portalına istinadən verdiyi məlumata görə, ölkədə koronavirusa yoluxanların ümumi sayı 148 min nəfəri ötüb.
Məlumata əsasən, son sutka ərzində koronavirusdan 26 nəfər ölüb, ölənlərin ümumi sayı 1 540 nəfər təşkil edir.
8-12-2020, 02:30 | Aİ Türkiyə ilə dialoqun davam etdirilməsinin vacib olduğuna inanır - Almaniya XİN rəhbəri
Avropa İttifaqı (Aİ) Türkiyə ilə dialoqun davam etdirilməsinin vacib olduğuna inanır.
Trend-in "Anadolu"ya istinadən verdiyi məlumata görə, bunu Brüsseldə keçirilən Aİ ölkələrinin XİN rəhbərlərinin iclasının yekunları üzrə Almaniyanın xarici işlər naziri Hayko Maas deyib.
H.Maas bildirib: "Biz hesab edirik ki, Aİ-nin Türkiyə ilə dialoqu davam etdirməlidir. Türkiyə məsələsi Aİ liderlərinin sammitində müzakirə ediləcək".
Onun sözlərinə görə, Aİ ölkələri "Türkiyənin Şərqi Aralıq dənizindəki hərəkətlərinə reaksiya" barədə yekdil qərara gəlməlidirlər.
4-12-2020, 13:46 | ABŞ-a məxsus təyyarə DƏHŞƏT YAŞADI - Havada ikən...
ABŞ Hərbi Hava Qüvvələrinə məxsus B-52 bombardman təyyarəsi havada ikən alovlanıb.
Təyyarə İngiltərə Krallığı Hərbi Hava Qüvvələrinin bazasına təcili eniş edib.
"Express" qəzetinin məlumatına görə, təyyarə Aralıq dənizindəki missiyasını tamamladıqdan sonra geridönüş zamanı motorunda nasazlıq yaranıb. (publika.az)
4-12-2020, 13:21 | Gürcüstanda koronavirusa sutkalıq yoluxma sayı 5 mini ötdü
Gürcüstanda son sutka ərzində yeni növ koronavirus (COVID-19) infeksiyasına 5 068 yoluxma halı qeydə alınıb, 38 nəfər ölüb.
Bu barədə Gürcüstan hökumətinin koronavirusla mübarizə çərçivəsində yaratdığı xüsusi internet saytında məlumat verilib.
Bununla da qonşu ölkədə koronavirusa yoluxanların sayı 152 704 nəfərə, ölənlərin sayı isə 1 425 nəfərə çatıb.
Koronavirusa yoluxanlardan 126 904 nəfərin sağaldığı bildirilir.( APA)
3-12-2020, 12:39 | Gürcüstanda son sutkada 45 nəfər koronavirusdan öldü
Gürcüstanda son sutka ərzində yeni növ koronavirusa (COVID-19) 4 260 yoluxma halı qeydə alınıb, 45 nəfər ölüb.
Bu barədə Gürcüstan hökumətinin koronavirusla mübarizə çərçivəsində yaratdığı xüsusi internet saytında məlumat verilib. Bununla da qonşu ölkədə koronavirusa yoluxanların sayı 147 636 nəfərə, ölənlərin sayı isə 1 387 nəfərə çatıb.
Virusa yoluxanlardan 124 568 nəfərin sağaldığı bildirilir.
