11-05-2024, 09:10 | Zelenskidən müraciət: Xarkova əlavə qüvvələr cəlb edilir
Rusiya qoşunları Xarkov vilayətində Ukraynaya qarşı əməliyyatları genişləndirməyə cəhd edib.
axar.az-a istinadən xəbər verir ki, bu sözləri Ukrayna Prezidenti Vladimir Zelenski axşam müraciətində deyib.
"Hərbçilərimiz, artilleriyamız, pilotsuz təyyarələrimiz işğalçıya cavab verir. Mövqelərimizi lazımi səviyyədə qoruyan hər bir əsgərə, hər bir çavuşa, hər bir zabitə minnətdaram", - deyə o bildirib.
Zelenskinin sözlərinə görə, Xarkov istiqamətinə əlavə qüvvələr cəlb olunacaq.
Qeyd edək ki, ABŞ rəsmisi də rus qoşunlarının Xarkova hücuma başladığını açıqlamışdı.
11-05-2024, 09:04 | Rusiya ordusu bu istiqamətdə hücuma başladı - ABŞ
Rusiya Silahlı Qüvvələri Xarkova hücuma başlayıb.
Bu barədə Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi jurnalistlərə açıqlamasında bildirib.
"Deyə bilərəm ki, biz Rusiyanın Xarkova hücuma başlayacağını gözləyirdik, görünür, bu, indi başlayıb. Biz Ukrayna ilə sıx koordinasiyadayıq", - deyə Kirbi bildirib.
11-05-2024, 08:19 | Piterdə çaya düşənlər üçün suya atılan 3 müsəlman...
Batan sərnişinlərin köməyinə ilk gələn gənclər İdris İsmatulla oğlu Hacıyev, Şahban Cəbrayıl oğlu Cəbrayılov və Məhəmməd Ramazan oğlu Həsənovdur. Onların hamısı Dağıstandandır.
axar.az xəbər verir ki, bu sözləri Dövlət Dumasının deputatı Biysultan Həmzəyev öz Teleqram kanalında Sankt-Peterbirqda çaya düşən avtobus haqda qeyd edib.
Deputat bildirib ki, hər 3 gənc tikinti sənayesində işləyir, həmin vaxt da cümə namazına gedirlərmiş.
İdris Hacıyev Rusiya mediasına bildirib ki, öz hərəkətini qəhrəmanlıq hesab etmir:
"Biz məscidə cümə namazına gedirdik və körpüyə çatmazdan əvvəl avtobusun kanala düşdüyünü gördük. Tez yuxarı qaçdıq. Artıq suya atılmamaq variantı yox idi, çünki vəziyyət elə idi ki, insanlara 100% kömək etmək lazım idi. Bu qəhrəmanlıqdır? Məncə, yox, inanıram ki, hər bir insan çətinliyə düşən insana kömək etməlidir. Bacardığımız qədər kömək etdik".
Qeyd edək ki, qəza nəticəsində avtobusda olan 20 sərnişindən 6-sı ölüb.
Rusiya mediası avtobus sürücüsünün tacikistanlı 44 yaşlı Rəhmətşah Qurbanov olduğunu yazıb.
Milli.Az
11-05-2024, 07:50 | Bayden Ukrayna ilə bağlı əmr imzaladı
ABŞ Prezidenti Cozef Bayden Ukraynaya 400 milyon dollar həcmində hərbi yardımla bağlı əmr imzalayıb.
Bu barədə Ağ ev məlumat yayıb.
Bildirilib ki, ABŞ Prezidenti bu məsələ ilə bağlı müvafiq səlahiyyətləri dövlət katibi Antoni Blinkenə verib.
Paketə "Patriot" hava hücumundan müdafiə sisteminin mərmiləri, "Stinger" hava hücumundan müdafiə raketləri, "Bradley" piyada döyüş maşınları və digər döyüş sursatları daxildir.
10-05-2024, 10:36 | Yanvar-aprel aylarında Türkiyənin Azərbaycana kimyəvi maddə ixracının həcmi açıqlandı
Yanvar-aprel aylarında Türkiyənin Azərbaycana kimyəvi maddə ixracının həcmi açıqlandı
Türkiyə 2024-cü ilin yanvar-aprel aylarında Azərbaycana kimyəvi maddə məhsulları ixracını ötən ilin eyni dövrü ilə müqayisədə 0,2 faiz azalaraq 161,5 milyon dollara çatdırıb.
Bu barədə TurkicWorld-ə Türkiyə Ticarət Nazirliyindən bildiriblər.
"2024-cü ilin aprel ayında Türkiyənin Azərbaycana kimyəvi maddə məhsulları ixracı 2023-ci ilin eyni ayı ilə müqayisədə 5,3 faiz artaraq, 40,1 milyon dollara bərabər olub", - deyə məlumatda qeyd edilib.
Qeyd edək ki, Türkiyə 2024-cü ilin yanvar-aprel aylarında kimyəvi maddə məhsulları ixracını ötən ilin eyni dövrü ilə müqayisədə 7,3 faiz artıraraq 10,5 milyard dolları ötüb.
Bu barədə TurkicWorld-a Türkiyə Ticarət Nazirliyindən bildiriblər.
"2024-cü ilin aprel ayında Türkiyənin dünya bazarlarına kimyəvi maddə məhsulları ixracı 2023-ci ilin eyni ayı ilə müqayisədə 5 faiz artaraq, 2,5 milyard dollara bərabər olub", - deyə məlumatda qeyd edilib.
Qeyd olunub ki, son 12 ay ərzində (aprel 2023-aprel 2024) Türkiyə 31,2 milyard dollar məbləğində kimyəvi maddə məhsulları ixrac edib. //milli.az/
10-05-2024, 09:31 | 50 minlik rus ordusu sərhəddə: Bu tarixdə hücum olacaq
Ruslar Xarkov vilayətinə hücuma hazırlaşır.
Bu barədə Ukraynanın 92-ci Mexanikləşdirilmiş Piyada Briqadasının komandiri İvan Sirko Pavel Fedosenko "Ekonomist"ə müsahibəsində bildirib.
Onun sözlərinə görə, Rusiya mayın ortalarında Xarkov vilayətinə hücum edəcək. İndi 50 minlik rus ordusu sərhəd yaxınlığında cəmləşib:
"Ssenarilərdən biri Kiyevə gedən əsas yolu kəsərək şəhəri təcrid etməkdir. Digər variant isə təxminən 10 km yaxınlaşmaq, şəhərin şərq kənarını artilleriya məsafəsi daxilində qoymaq və Ukraynanın pilotsuz təyyarələrinin hücumlarına məruz qalan Rusiyanın Belqorod şəhərini qorumaq üçün bufer zonası yaratmaqdır".
O, həmçinin qeyd edib ki, rusların Donetsk vilayətinin bütün ərazisini işğal etmə ehtimalı 70% təşkil edir.
"Hər kəs bilir ki, biz Konstantinovka və Drujkovka uğrunda döyüşməsək, rus qoşunları bir neçə həftədən sonra Dneprdə, Xarkovda, Krivoy Roqda olacaq".
O vurğulayıb ki, Çasov Yar uğrunda döyüşlərin məqsədi Rusiyanın irəliləməsinə və əsas şəhərləri tutmasına mane olmaqdır. Eyni zamanda, Donbasda işğalçıların ləngiməsi həlledici əhəmiyyət kəsb edir.//axar.az
10-05-2024, 08:14 | İndi dollar və avro heç kimə lazım deyil - Lukaşenko
Bir çox ölkə dollar və avrodan istifadəyə marağını itirir.
Bunu Belarus Prezidenti Aleksandr Lukaşenko bildirib.
"İndi nə dollar, nə də avro heç kimə lazım deyil. Bu artıq təkcə Belarus və Rusiyada deyil, bu, bir çox ölkədə belədir", - Lukaşenko vurğulayıb.
10-05-2024, 07:55 | ABŞ Ukraynaya yeni silah və hərbi texnika göndərəcək
ABŞ yaxın bir neçə həftə ərzində Ukraynaya yeni silah və hərbi texnika göndərəcək.
Bunu Dövlət Departamentinin mətbuat xidmətinin rəhbəri Metyu Miller brifinqdə təsdiqləyib.
Miller təfərrüatı açıqlamayıb.
10-05-2024, 07:48 | Dırnaqlarımızla qələbə qazanacağıq - Netanyahu
İsrail Qəzza zolağındakı döyüşlərdə hətta kənardan dəstək olmadan, yalın əllə vuruşaraq, sözün əsl mənasında dırnaqları ilə qələbə qazanmaq niyyətindədir.
Bunu İsrail Baş naziri Benyamin Netanyahu deyib.
10-05-2024, 07:32 | Aya Yerin 275 dilinin olduğu kapsul göndəriləcək
Birləşmiş Millətlər Təşkilatının Təhsil, Elm və Mədəniyyət Təşkilatı (UNESCO) planetimizin digər mədəni irsi haqqında biliklərlə yanaşı, Ayda Yer kürəsinin 275 dili haqqında məlumatı qorumaq niyyətindədir.
Bu barədə qurumun rəsmi saytında məlumat verilib.
Məlumat kapsulu Yaponiyanın özəl "Ispace" şirkətinin "Hakuto-R" avtomatik modulunun göyərtəsində yerləşdiriləcək.
UNESСO-dan verilən məlumata görə, bu arxiv qlobal fəlakət baş verərsə, bəşəriyyətlə bağlı bəzi məlumatların saxlanılmasına kömək edəcək.
"Ispace"in ilk Aya eniş aparatı "Hakuto-R" 2022-ci ilin dekabrında şirkətin pilot missiyasının bir hissəsi olaraq buraxılıb. 25 aprel 2023-cü ildə Aya eniş cəhdi zamanı cihaz bort kompüterindəki xəta səbəbindən qəzaya uğrayıb.
"Ispace"in Ay səthinə çıxmaq üçün növbəti cəhdi 2024-cü ilin qışına planlaşdırılıb. Yeni "Hakuto-R" modeli ilə birlikdə Yerin peykinə kiçik bir lunoxod göndəriləcək.
"Ispace" artıq 2026-cı ildə baş tutacaq üçüncü Ay missiyasını planlaşdırır. Bu zaman 500 kiloqrama qədər faydalı yük daşıya bilən daha böyük və müasir "Apex 1.0 "modulundan istifadə ediləcək.
