27-11-2021, 07:24 | Azərbaycan və Ermənistan arasında sərhədin demarkasiyası üzrə ikitərəfli komissiya yaradılacaq
Azərbaycan və Ermənistan arasında sərhədin demarkasiyası üzrə ikitərəfli komissiya yaradılacaq.
AZƏRTAC-a istinadən bildirir ki, noyabrın 26-da Soçidə Azərbaycan Respublikasının Prezidenti İlham Əliyev, Ermənistan Respublikasının baş naziri Nikol Paşinyan və Rusiya Federasiyasının Prezidenti Vladimir Putin Bəyanat imzalayıblar.
"Azərbaycan-Ermənistan sərhədində sabitlik və təhlükəsizlik səviyyəsinin artırılması üzrə addımlar atmağı və Azərbaycan Respublikası ilə Ermənistan Respublikası arasında dövlət sərhədinin delimitasiyası, sonradan tərəflərin sorğusu əsasında Rusiya Federasiyasının məsləhət yardımı ilə sərhədin demarkasiyası üzrə ikitərəfli komissiya yaradılması barədə şərtləşdik" - deyə bəyanatda qeyd olunub.
26-11-2021, 13:32 | Türkiyə modern silahlar istehsal edərək dünyaya meydan oxuyur - Tarixçi-alim
Qardaş ölkədə baş verən valyuta böhranının Ərdoğan hakimiyyətinə ən çətin dövrünü yaşatdığını iddia etmək düzgün deyil. Türkiyə tarixində Atatürkdən sonra belə hadisələr çox olub və buna baxmayaraq, türklər bunun öhdəsindən layiqincə gəliblər. Eləcə də Türkiyə Prezidenti Rəcəb Tayyib Ərdoğan 20 illik iqtidarı dövründə bir çox çətinliklər yaşayıb. Hamısından qələbə ilə çıxa bilib.
Bu sözləri Axar.az-a tarixçi-alim, dosent Zaur Əliyev Türkiyədə baş verən son iqtisadi proseslər barədə danışarkən deyib.
"Dünyanın əksər ölkələrində pandemiyanın doğurduğu iqtisadi problemlər var. Bu o demək deyil ki, Türkiyədə baş verən valyuta böhranında Ərdoğan iqtidarı günahkardır. Mən tarixçiyəm, bilirəm ki, milləti və dövləti üçün böyük işlər görən şəxsiyyətlər bəzən kiçik böhran olan kimi ağır ittihamlara məruz qalıblar. Bizim öz tariximizdə bu gün Rəsulzadəni, Elçibəyi tənqid edən nə qədər insan var, amma onlar burunlarının uclarından kənarı görə bilmirlər. Eləcə də Türkiyədə Atatürk kimi şəxsiyyəti indi tənqid edənlər tapılır, halbuki Atatürk dağılmaqda olan böyük imperiyanın yerində güclü Türkiyə dövləti qura bildi", - alim bildirib.
Z.Əliyev qeyd edib ki, insan təbiətində nankorluq var:
"Ərdoğan Türkiyə üçün nələr edib, bunu bir görsünlər! Uzun əsrlərin böyük bir dövrünü, Osmanlı imperiyasını Ərdoğan tarixi irs kimi qəbul edib. Bu, açıq-aşkardır. Əslində burada qəbahətli heç nə yoxdur. Ərdoğan Türkiyəni Osmanlı dövlətinin əzəmətinə ucaldır".
Alimin sözlərinə görə, Ərdoğan Türkiyəni bölgənin əsas aparıcı dövlətlərindən birinə çevirib:
"Əvvəlki Türkiyəyə baxaq, indikinə də baxaq: Bu gün Türkiyə enerjidə xarici asılılığın azaldılması, yerli resurslardan istifadəsinin maksimum səviyyəyə yüksəldilməsi və iqlim dəyişikliyi ilə mübarizə hədəflərindən yola çıxaraq, yenilənə bilən enerji qaynaqlarının payını yüksəltmə və enerji səbətinə nüvə enerjini də əlavə etmə yolunda işlərini davam etdirməkdədir. Yenilənən enerji baxımından əhəmiyyətli bir potensiala sahib olan Türkiyə geotermal potensialı ilə dünyada 7-ci, Avropada isə 1-ci sırada iştirak etməkdədir. Buna əlavə, hidroelektrik qaynaqları, külək və günəş enerjisinin inkişaf etdirilməsi də prioritet seçilib. 2023-ci ilə qədər Türkiyənin cəmi enerji tələbinin 30%-nin yenilənə bilər enerji qaynaqlarından qarşılanması nəzərdə tutulur".
O bildirib ki, bu gün Türkiyə dünyaya modern silahlar istehsal edərək meydan oxuyur:
"Təkcə "Bayraqdar" dünyanın bütün ölkələrində tələb olunan texnoloji üstünlükdür. Ərdoğan ondan öncə ölkəni idarə edən prezidentlərdən fərqli olaraq qərar qəbul edərkən "Qərb nə deyəcək?" düşüncəsi ilə məsələlərə yanaşmır. O, Türkiyə üçün doğru olanlar barədə qərar qəbul edir, ölkəsinin dünyadakı tarixi nüfuzunu özünə qaytarır. Ərdoğan 2002-ci ildən Türkiyənin rəhbəri kimi fəaliyyət göstərir və bu illər ərzində ölkənin siması tamam dəyişib. Uzun illər Sevr və Lozanna konfranslarında qəbul edilən qərarların ağırlığını üstündə daşıyan Türkiyə Ərdoğanın hakimiyyəti illərində regional və beynəlxalq güc sahibi olan bir dövlətə çevrildi. "Ərdoğan nə edib" sualına tək bir cümlə ilə cavab vermək istəyirəm: Türkiyəni Böyük Səkkizlik səviyyəsində bir güc edib".
26-11-2021, 13:11 | Hərbi qulluqçulara sosial şəbəkələrlə bağlı qadağa qoyulur
Azərbaycanda hərbi qulluqçuların fəaliyyəti ilə bağlı qadağalar müəyyən edilir.
Bu, "Hərbi qulluqçuların statusu haqqında" yeni qanun layihəsində əksini tapıb.
Yeni qanun layihəsinə əsasən, hərbi qulluqçulara tətil etmək, seçkili orqanlarda vəzifə tutmaq, siyasi partiyalara, qeyri-hökumət təşkilatlarına, dini qurumlara və həmkarlar ittifaqlarına üzv olmaq, yığıncaqlarda, nümayişlərdə, küçə yürüşlərində və piketlərdə iştirak etmək, sahibkarlıq fəaliyyəti ilə məşğul olmaq, müddətli həqiqi hərbi xidmət hərbi qulluqçularına mülki peşə, orta ixtisas və ali təhsil müəssisələrində təhsil almaq, daimi yaşayış üçün xaricı getmək, siyasi və dini təbliğatla məşğul olmaq, dövlət sirrini yaymaq, komandirlərin (rəislərin) qanunla müəyyən edilmiş qaydada verilmiş əmrlərini, sərəncamlarını və göstərişlərini müzakirə etmək və ya tənqid etmək, hərbi xidmətlə bağlı kütləvi informasiya vasitələrinə və ya onların nümayəndələrinə komandirlərin (rəislərin) icazəsi olmadan birbaşa müsahibə vermək, hərbi xidmət vəzifələrinin icrasının dayandırılmasına yönəlmiş hərəkət (hərəkətsizlik) etmək, qadağan olunmuş əşya və ya texniki vasitələri (cihazları) hərbi hissənin ərazisinə və xidmət yerinə gətirmək və onlardan istifadə etmək, sosial şəbəkələrdə, internet informasiya ehtiyatlarında hərbi xidmətlə bağlı məlumatları yaymaq, xidməti mənsubiyyətini açıqlamaq qadağan edilir.
Trend
26-11-2021, 13:08 | Koronovirusun ən çox mutasiyaya uğramış yeni variantı tapıldı
COVID-19-un ən çox mutasiyaya uğramış variantı aşkar olunub.
Oxu.az-a istinadən xəbər verir ki, yeni virus Botsvana, CAR və Honqonqda tapılıb.
Alimlər onun vaksinlərə qarşı dözümlü ola biləcəyini qeyd ediblər.
Bununla yanaşı, virusun çoxsayda mutasiyaya uğraması səbəbindən qeyri-sabit olduğu və sürətlə yayılmadığı bildirilib.
26-11-2021, 12:09 | Daha 43 nəfər Almaniyadan Azərbaycana göndərilib - RƏSMİ
Noyabrın 25-də "Azərbaycan Respublikası ilə Avropa İttifaqı arasında icazəsiz yaşayan şəxslərin readmissiyası haqqında Saziş" çərçivəsində 43 nəfər Azərbaycan Respublikası vətəndaşı Almaniya Federativ Respublikasından ölkəyə geri qəbul edilib.
Bunu APA-ya açıqlamasında Dövlət Miqrasiya Xidmətinin İctimaiyyətlə əlaqələr idarəsinin rəisi Elnur Kələntərov bildirib. O qeyd edib ki, geri qəbul prosesi Nazirlər Kabineti yanında Operativ Qərargahın pandemiya ilə əlaqədar müəyyən etdiyi qaydalar çərçivəsində həyata keçirilib.
Qeyd edək ki, fəaliyyəti Dövlət Miqrasiya Xidməti tərəfindən əlaqələndirilən Reinteqrasiya üzrə İşçi Qrupu readmissiya olunan Azərbaycan Respublikası vətəndaşlarının üzləşdikləri çətinlik və problemlərin operativ həlli, onların cəmiyyətə səmərəli, dayanıqlı sosial-iqtisadi reinteqrasiyası işinin təşkili istiqamətində müvafiq tədbirlər həyata keçirir.
26-11-2021, 11:58 | Ordumuz Zəngəzurda necə irəliləyib? - FOTO
Ermənistan Müdafiə Nazirliyinin artıq keçmiş rəisi, general-mayor Arşak Karapetyanın bir sıra absurd və primitiv təxribatları ötən ilin noyabrında üçtərəfli sülh sazişinin imzalanmasından sonra regionda bərqərar olmuş sülhün nə qədər kövrək olduğunu üzə çıxarmış oldu.
Ermənistan tərəfindən ilkin razılaşmaların bəndlərinin gecikdirilməsi, sonra isə yerinə yetirilməməsi (hansı ki, münaqişədən sonrakı dövrdə uzunmüddətli qarşıdurmanın davamlı regional sülhə çevrilməsi üçün bir növ transformatora çevrilməli idi) siyasi həllin mahiyyətini təhlükə altına qoydu.
Milli.Az yerli mediaya istinadən xəbər verir ki, Ermənistan hakimiyyəti iki ölkənin sərhədlərinin delimitasiyası və demarkasiyası ilə bağlı ilk növbədə dialoq yolu ilə yekun qərar vermək əvəzinə, ənənəvi Paşinyan imitasiyasına əl atır. Ermənistan hökumətinin Azərbaycanın Qazax rayonunun işğal altında olan kəndlərini, Tovuz və Gədəbəyin ayrı-ayrı hissələrini, yaxud Naxçıvanın Kərki kəndini azad etməsini ləngitməsinin əsl səbəbi nədir? Azərbaycan Silahlı Qüvvələri elə edə bilər ki, Ermənistanla bütün ərazi məsələlərinin tezliklə siyasi həlli bu uğursuz formasiyanın hər bir vətəndaşının yeganə tələbi olsun. Bunu yaxın tarix göstərdi...
Kapitulyasiya elan edən ölkənin çarəsizliyinin bütün mənzərəsini təsvir edək.
Belə ki, Arşak Karapetyanın Qaragöl gölündə peyda olmasından və Azərbaycan Silahlı Qüvvələrinin təchizat yollarına qabion postu quraşdırmaq barədə həyasızcasına planından sonra Ermənistan ordusunun dörd dayaq məntəqəsi hərbçilərimizin nəzarətinə keçib. Demək olar ki, iki gün sonra, noyabrın 16-da Azərbaycan Silahlı Qüvvələrinin bölmələri daha iki postu zəbt edərək, düşməni qayıtmaq və ərazidəki istənilən prioritet əraziləri zəbt etmək imkanından məhrum edib.
Ustalıqla həyata keçirilən və ən əsası, qansız yerdəyişmənin nəticəsində cənub-şərq istiqamətində Çilligöl, Ermənistanın Verişen kəndi və Gorus şəhəri istiqaməti, həmçinin qərb istiqamətində göstərilən koordinatlara bərabər məsafədə - Şəki və İşxanasar şəhərlərinə vizual müşahidə və birbaşa atəş təsiri sektorları genişləndi.
Sonuncu deyilənlər ordu hissələrimizin dəniz səviyyəsindən 2794 metr hündürlükdə olan Kilsəli dağını və dövlət sərhədinin göstərilən perimetri boyunca bir sıra adı açıqlanmayan strateji əhəmiyyətli yüksəklikləri tutması nəticəsində mümkün olub.
Bunun sayəsində gölün şimal hissəsinə - Böyük İşıqlı vulkanik dağının arxasına aparan kommunikasiya yollarının təhlükəsizliyini təmin etmək və Sisian-Gorus avtomobil yolunun hissəsini birbaşa vizual nəzarətə götürmək mümkün oldu. Bu, Azərbaycan Silahlı Qüvvələrinə strateji zərurət yaranarsa, Ermənistanın bütün cənubunu paytaxtdan ayırmağa, Naxçıvana onsuz da qısa olan boğazı daraltmağa və ya de-fakto olaraq Laçın dəhlizinə çıxışı lokal şəkildə bağlamağa imkan verir.
Qeyd etmək lazımdır ki, bütün bu yerdəyişmələr və infrastruktur təkmilləşdirmələri qar yağıntılarından əvvəl aparılıb, bu isə, yamac ərazi boyunca təchizat yollarının təhlükəsizliyini təmin edir.
Erməni revanşistlərin noyabrın 16-da Azərbaycanın yeddi hərbçisinin ölümü və 10 hərbçisinin yaralanması ilə nəticələnən təxribatına baxmayaraq, ordumuz ölkələr arasında təbii sərhəd baryeri olan Şərqi Göyçə dağ silsiləsi üzərində tam nəzarətin qurulması ilə bağlı möhtəşəm planı sona qədər uğurla həyata keçirdi.
Məhv edilənlərin və əsir götürülmüş diversantların sayını bu günə kimi rəsmən elan edə bilməyən düşmənə sarsıdıcı dərs verən Azərbaycan Silahlı Qüvvələrinin bölmələri qarşıya qoyulan bütün tapşırıqları şərəflə yerinə yetiriblər. Xüsusən qeyd edək ki, düşmənin qənimət kimi götürülən silah-sursat, nəqliyyat vasitələri və texniki vasitələri arasında təkcə sərhəd xəttində növbə çəkmək üçün deyil, həm də məhz diversiya-terror fəaliyyətlərinin aparılması üçün istifadə olunan nümunələr də var.
Nəticədə, Kəlbəcər istiqamətində yalnız bir hissədə, ən hündür nöqtəsi dəniz səviyyəsindən 3008 metr yüksəklikdə olan Qatarqaya dağından başlayaraq, Şərqi Göyçə dağ silsiləsi boyunca cənub adsız yüksəklikləri və dəniz səviyyəsindən 2900 metr yüksəklikdə olan Dəmirdağ dağına qədər Azərbaycan ordusu bütün strateji əhəmiyyətli nöqtələri tutaraq yeni dayaq məntəqələri yaratdı. Qısa müddət ərzində onlara rabitə yolları və təhlükəsiz daimi təchizat yolları çəkildi. Terror və təxribat aktları törətmək üçün düşmənin ərazimizə daxil ola biləcəyi ərazilərdə nəzarət quruldu.
Qərbi Azərbaycanın Zod, Azad, Zərkənd, Nərimanlı kəndləri bütün yol infrastrukturu ilə, yəni məhz Basarkeçər-Zod yolu hazırda Silahlı Qüvvələrimizin tam atəş nəzarəti altındadır. Yüksəkliklərdə qurulan yeni dayaq məntəqələri sayəsində Azərbaycanın Kəlbəcər rayonunun bir neçə kəndinin təhlükəsizliyi təmin edilib.
Qeyd edək ki, bölmələrimiz tərəfindən dövlət sərhədində mühüm məntəqələrin tutulması ilə paralel olaraq düşmənin əldəqayırma, yük maşınlarının kuzovunda yaradılan postları və sığınacaqları məhv edilib.
Eyni silsilə boyu dəniz səviyyəsindən müvafiq olaraq 3036 və 3051 metr hündürlükdə olan Kumurdağ və Kömürdağ dağlarının tutulması Azərbaycan Silahlı Qüvvələrinin Əzizli kəndi və Qərbi Azərbaycanın Nərimanlı kəndinə gedən yol istiqamətində vizual müşahidə və birbaşa atəş təsiri sektorlarını genişləndirməyə imkan verib, cənubda olan Maraldağına qədər 3426 metr hündürlükdə olan Kötüdağ və ətrafdakı adsız yüksəkliklər üzərində tam nəzarətin yaradılması mövqelərimizə cinahdan gələn təhlükələri neytrallaşdırıb.
Sərhəddə strateji əhəmiyyətli yüksəkliklərin tutulması əməliyyatının başa çatmasından sonra Yuxarı Şorca və Aşağı Şorca kəndləri, habelə onların Qərbi Azərbaycanın Daşkənd kəndi istiqamətində lokal avtomobil yoluna yeganə çıxışı ovuc içi kimi görünməyə başladı. Ordumuz qarşıya qoyulan tapşırıqları yerinə yetirməklə yanaşı, həm də ətraf ərazinin tam təhlükəsizliyini təmin edib, yeni dayaq məntəqələrinin daimi və fasiləsiz təchizatını yoluna qoyub.
Sadə dildə desək, demək olar ki, bütün əsas yol qovşaqları və giriş yolları, eləcə də sərhədə çox yaxın kəndlər bundan sonra silahlı qüvvələrimizin cəza tədbirləri görə biləcəyi qədər əlçatan məsafədədir.
Düşmənin təxribatlarına baxmayaraq, silahlı qüvvələrimiz demək olar ki, cəmi iki-üç günə sərhədlərin demarkasiyası və delimitasiyasının həllinin daha çox yaxınlaşılmasına nail oldular. Bununla regionda hərtərəfli sülhə gedən yolları sadəcə, məsafə baxımından deyil, zaman baxımından da yaxınlaşdırdı...
Milli.Az
26-11-2021, 11:44 | Zakir Həsənov tapşırıq verdi: "Hər an hazır olun" - VİDEO - FOTO
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən Azərbaycan Ordusunun döyüş qabiliyyətinin daha da artırılması istiqamətində görülən işlər davam edir.
Müdafiə Nazirliyindən Milli.Az-a verilən məlumata görə, Müdafiə naziri general-polkovnik Zakir Həsənov və nazirliyin digər rəhbər heyəti yeni yaradılan əməliyyat (komando) hərbi hissəsində şəxsi heyətə beretlərin təqdim edilməsi mərasimində iştirak edib.
Əvvəlcə ümummilli lider Heydər Əliyevin hərbi hissənin ərazisindəki büstü və şəhidlərimizin abidəsi önünə əklil qoyularaq xatirələri hörmət və ehtiramla anılıb.
Müdafiə naziri beretlərin təqdim edilmə mərasiminə dəvət olunan Vətən müharibəsi iştirakçıları ilə görüşərək onların problemləri və istəkləri ilə maraqlanıb.
Sonra şəxsi heyətə beretlərin təqdim edilməsi mərasimi keçirilib.
Mərasimin açılışında ümummilli lider Heydər Əliyevin və ölkəmizin ərazi bütövlüyü uğrunda həlak olan şəhidlərimizin xatirəsi bir dəqiqəlik sükutla yad edilib. Azərbaycan Respublikasının Dövlət himni səsləndirilib.
"Komando hazırlığı" kursunu müvəffəqiyyətlə bitirənlərə beretlər təqdim olunduqdan sonra şəxsi heyət "Komando andı"-nı qəbul edib.
Mərasimdə çıxış edən Müdafiə naziri hərbi qulluqçuların peşəkarlıq səviyyələrinin daha da yüksəldilməsində Türkiyə Silahlı Qüvvələrinin təcrübəsinə əsaslanan "Komando hazırlığı" kurslarının əhəmiyyətini xüsusi vurğulayaraq şəxsi heyətə xidmətlərində uğurlar arzulayıb. Müdafiə naziri şəxsi heyətə Silahlı Qüvvələrin Ali Baş Komandanının yeni döyüş tapşırıqlarının icrasına hər an hazır olmaları barədə müvafiq göstərişlər verib.
General-polkovnik Z.Həsənov Azərbaycan Ordusunun hərbi qulluqçularının, eləcə də hərbi hissənin şəxsi heyətinin Vətən müharibəsində göstərdikləri şücaət və qəhrəmanlıqları yüksək qiymətləndirdiyini bildirib.
Komandolar üçün hazırlanmış xüsusi idman şəhərciyi ilə tanış olan Müdafiə naziri əməliyyat qruplarının fiziki hazırlıq üzrə nümunəvi çıxışlarını izləyib.
Sonda Müdafiə Nazirliyinin rəhbərliyi şəxsi heyətlə birgə nahar edib.
26-11-2021, 11:42 | Azərbaycan daha bir hərbçini və bir mülki şəxsi Ermənistana təhvil verdi
Azərbaycan humanizm prinsiplərini növbəti dəfə əsas tutaraq 26 noyabrda 2 nəfər erməni əsilli şəxsi Ermənistan tərəfinə təhvil verib.
Bu haqda Azərbaycan Respublikasının Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumat yayıb.
Sözügedən şəxslərdən biri 16 noyabr 2021-ci il tarixdə Ermənistanın təxribatları nəticəsində dövlət sərhədində baş vermiş döyüş əməliyyatları zamanı yaralı vəziyyətdə saxlanılan 03.03.1993-cü il təvəllüdlü Aramyan Arin Jirayeviçdir. Bu müddət ərzində Aramyan Arinə zəruri tibbi yardım göstərilərək müalicəsi təşkil edilmişdir.
Təhvil verilmiş digər şəxs - 13.09.2000-ci il təvəllüdlü Musaelyan Mihran Ernest Ağdam rayonu istiqamətində Azərbaycan hərbi qulluqçularının xidmət etdiyi əraziyə daxil olarkən saxlanılmışdır.
Aparılmış ilkin araşdırmalar nəticəsində Musaelyan Mihranın mülki şəxs olduğu və yolu azaraq Azərbaycan hərbi qulluqçularının xidmət apardığı əraziyə daxil olduğu müəyyən edilmişdir.
24-11-2021, 08:43 | Xəstə möminə savab hansı hesabla yazılır?
Bir gün Həzrət Peyğəmbər (s) səhabələrinin yanında əyləşmişdi və səmaya baxıb gülümsəyirdi. Orada olanlardan biri Həzrətə (s) sual verir: "Ya Rəsulallah! Bu gün sizi o halda gördük ki, başınızı səmaya qaldırmış və gülümsəyirsiniz?".
Həzrət Peyğəmbər (s) buyurur: "Bəli, doğrudur. Çünki yerə enən iki mələyə görə təəccüblənmişəm. Onlar Allah tərəfindən vəzifələndirilərək yerə eniblər ki, Allah bəndələrindən birinin əməllərini əməl dəftərinə yazsınlar.
Ancaq o şəxsi ibadət yerində tapmayan zaman hər iki mələk göyə geri qayıtdılar. Allaha ərz etdilər: "Pərvərdigara! Sənin mömin bəndəni ibadət yerində tapmadıq. Əslində o, xəstə yatağında idi".
Bu zaman Allah Təala buyurur: "O zamana qədər ki, bəndəm Mənim pənahımda ibadət və başqa işlərdən gücsüz və xəstə haldadır, əməl və ibadətlərini sağlam olan zaman Mənə etdiyi ibadətlər kimi yazın.
Həqiqətən, Mənə lazımdır ki, bəndəmə xəstə olan zaman da savab verim. Necə ki, o, sağlam olan zaman belə edirdim"".
24-11-2021, 08:40 | Hər şey Allahın izni ilə baş verirsə, o zaman hər şey Allahın istəyi ilə olur?
Əvvəlcə bunu izah edək ki, bizim dinimiz məntiqə yox, Qurana əsaslanır. Bu səbəblə sualınızı dinimizin tək mənbəyi olan Qurana əsaslandıraraq cavablandıracayıq. Uca Allah kitabında belə buyurur:
"Sənə gələn yaxşılıq Allahdandır, sənin başına gələn bəla isə sənin özündəndir. Biz səni insanlara elçi göndərdik. Şahid olaraq Allah kifayət edər". (Nisə, 4/79)
"Başınıza gələn hər bir müsibət öz əllərinizlə qazandığınız günahlar üzündəndir. Allah günahların çoxunu bağışlayır". (Şura, 42/30.)
Həqiqətən, Allah ədalətli olmağı, yaxşılıq etməyi və qohumlara (haqqını) verməyi əmr edir, iyrənc işlər görməyi, pis əməllər törətməyi və azğınlıq etməyi isə qadağan edir. O sizə öyüd-nəsihət verir ki, bəlkə düşünüb ibrət alasınız." (Nəhl, 90)
Bu ayələrdən gördüyümüz kimi Allah, yaxşı şeyləri əmr, tövsiyə və lütf edir. Pis şeyləri isə insanlara qadağan edir və onları bundan uzaqlaşdırır. Əgər pis şeyləri və günahları Allah yükləsəydi, onda "iyrənc işlər görməyi, pis əməllər törətməyi və azğınlıq etməyi isə qadağan edir." deməyinin bir mənası qalmazdı.
Burada başa düşülməyən məsələ və yaranan sual bu ola bilər (ki, sualınızın əsası da budur): "Əgər, hər bir şey Allahın izni ilə baş verirsə..." onda bunu Allah belə istəmişdir?!
Xeyr, Allah belə istəməyib. Hər şeyin Allahın izni ilə olması, hər şeyi Allah istədiyi kimi insana yükləyir anlamına gəlmir. Əgər belə olsaydı, onda imtahan da olmazdı. Bu, eynilə bir müəllimin imtahan etmədən, tələbələrinə pis ya da yaxşı qiymət verməsinə bənzəyər.
İnanan hər insan bilir ki, Allah bizi imtahan edir. Heç kimə də ayrı-seçkintilik eləmir. Biz, Allahın bizə verdiyi seçimlə yaxşı iş də, pis iş də görə bilərik. Yaxşı işlər də pis işlər də Allahın izni/icazəsi ilə qəbul edilir. Nəticədə bu işlərə görə axirətdə mükafat ya da cəza alacağıq.
Qısacası; biz, öz azad seçimimizlə etdiyimiz işləri Allaha yükləyə bilmərik. Əksi təqdirdə məcusi, pütpərəst, yəhudi, xristian və ənənə dininin mənsubları kimi bir qəza-qədər anlayışına sahib olarıq.
