22-09-2021, 05:51 | Sinqapur küçələrində asayişə robot nəzarət edir
Sinqapur küçələrində Xavier adlı avtonom robot istifadəyə verilib. Bu robot parkinq qaydalarının pozulub-pozulmamasına nəzarət edir və siqaret çəkilməsi qadağan edilmiş yerlərdə siqaret çəkən şəxsləri təyin edərək onlara xəbərdarlıq edir. Xəbərdarlıq edəndən sonra sözügedən robot mövcud məlumatları analitika və idarəetmə mərkəzinə göndərir. Xavier avtonom rejimdə çalışan robotdur və o, arzuolunmaz sosial davranışların aradan qaldırılması üçün nəzərdə tutulub.
Təqdim edilmiş videoda görmək olar ki, robot müəyyən şəxsə yaxınlaşır və ona olduğu yerdə siqaret çəkmənin qadağan olduğu xəbərdarlığını edir. Tərtibatçıların sözlərinə əsasən robot bu və ya digər qanun pozuntusunu aşkar edəndən sonra o bu barədə məlumatı operatorlara göndərir. Daha sonra robotda səsli müraciət tətbiqlərindən biri işə düşür və o, vətəndaşları qanun pozuntusu barədə xəbərdarlıq edir. Robotun ilk testinə 5 sentyabr tarixində start verilib və test müddəti 3 həftə davam edəcək.
Test müddəti ərzində robot siqaret çəkilməsinin qadağan olunduğu yerlərdə siqaret çəkən şəxsləri, qanunsuz ticarətçiləri, piyada yollarında dayanan motosikl və elektrosamokat sürücülərini və məhdud saydan daha çox insana sahib böyük insan qruplaşmalarını təyin edəcək. Qeyd etmək lazımdır ki, robotun daxilində 360 dərəcəlik kamera və gecə görüntüsü funksiyası mövcuddur. Gözləntilərə əsasən Sinqapur küçələrində bu cür robotların istifadəyə verilməsi öz növbəsində qanuna riayət səviyyəsini yüksəldəcək.
22-09-2021, 05:47 | Instagram-da yenilik olacaq
Instagram daxilində Favorites adlı yeni bölmənin testinə start verilib. Sözügedən yeni bölmə istifadəçilərə fərdi ana səhifəsi üzərində idarəni geri qaytarmaq imkanını verməlidir. Beləliklə test olunan Favorites adlı yeni bölmə sayəsində istifadəçilər özlərinə ilk növbədə maraqlı olan hesabları təyin edə biləcəklər. Bu üsul ilə onlar öz ana səhifələrində ilk olaraq məhz həmin hesabların paylaşımlarını görə biləcəklər.
Qeyd etmək lazımdır ki, hal hazırda Instagram-ın alqoritmi istifadəçilərə ən məşhur və yeni paylaşımları sərgiləyir. Bundan əlavə olaraq alqoritm müəyyən paylaşımların konkret istifadəçi üçün maraqlı ola biləcəyini təyin edir və həmin paylaşımları da istifadəçiyə təqdim edir. Təəssüflər olsun ki, çox zaman alqoritm istifadəçiyə maraqlı ola biləcək paylaşımları düzgün təyin edə bilmir. Bu səbəbdən də istifadəçiyə həqiqətən maraqlı ola biləcək paylaşımlar ondan yan keçirlər. Test olunan Favorites adlı yeni bölmə isə bu vəziyyəti aradan qaldırmalıdır.
21-09-2021, 14:58 | Bakı Ali Neft Məktəbinin İctimaiyyətlə əlaqələr şöbəsinə yeni rəis təyin olunub
Bakı Ali Neft Məktəbinin (BANM) İctimaiyyətlə əlaqələr şöbəsinə yeni təyinat olub. BANM-in rektoru Elmar Qasımovun müvafiq əmri ilə Aqşin Kamal Ali Məktəbin İctimaiyyətlə əlaqələr şöbəsinin rəisi vəzifəsinə təyin olunub.
Tələbəlik illərindən müxtəlif televiziya və dövri mətbuatda jurnalist kimi çalışıb. 2006-cı ildən 2012-ci ilədək Lider televiziyasında Xəbərlər departamentində fəaliyyət göstərib. 2012 - 2020 - ci illərdə isə Xəzər televiziyasında şöbə müdiri, Xəbərlər departamentində redaktor, aparıcı və telekanalın sözçüsü vəzifələrində çalışıb.
Aqşin Kamal 2015 - ci ildə Azərbaycanda KİV - in inkişafındakı xidmətlərinə görə Prezident İlham Əliyevin sərəncamı ilə "Azərbaycan Respublikası Prezidentinin fəxri diplomu" ilə təltif edilib.
21-09-2021, 14:27 | Yeni tədris ilinin ilk günü hava necə olacaq? - PROQNOZ
Sentyabrın 22-də gözlənilən hava şəraiti açıqlanıb.
Milli Hidrometeorologiya Xidmətindən verilən məlumata görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin gündüz yarımadanın bəzi yerlərində qısamüddətli az yağış yağacağı ehtimalı var.
Şimal-qərb küləyi gündüz cənub-şərq küləyi ilə əvəz olunacaq. Abşeron yarımadasında gecə 19-22° isti, gündüz 26-28° isti olacaq. Bakıda gecə 20-22° isti, gündüz 26-28° isti olacaq.
Atmosfer təzyiqi normadan aşağı 759 mm civə sütunundan 755 mm civə sütununa enəcək.
Nisbi rütubət 60-70 % olacaq.
Sentyabrın 22-də Abşeron yarımadasında meteoroloji amillərin zəif və mülayim tərəddüdü gözlənilir ki, bu da meteohəssas insanlar üçün əsasən əlverişlidir.
Azərbaycanın rayonlarında əsasən yağmursuz olacaq. Lakin axşam saatlarında bəzi dağlıq ərazilərdə şimşək çaxacağı, arabir yağış yağacağı gözlənilir. Səhər dağlarda duman olacaq.
Şərq küləyi əsəcək. Havanın temperaturu gecə 16-21° isti, gündüz 30-34° isti, dağlarda gecə 11-16° isti, gündüz 16-21° isti olacaq.
20-09-2021, 09:10 | Bu küçələrdə sıxlıq var - SİYAHI
Bakıda avtomobillərin hərəkətində sıxlıq yaranan küçə və prospektlərin siyahısı açıqlanıb.
Bu barədə Bakı Nəqliyyat Agentliyinin məlumatında bildirilib.
Paytaxtda müşahidə edilən sıxlıq aşağıdakı ərazilərdədir:
1. Alı Mustafayev küçəsi - 20 Yanvar dairəsindən Ziya Bünyadov prospekti istiqamətində;
2. Ziya Bünyadov prospekti - Abdulvahab Salamzadə küçəsi tunelin içi və kənar yol hər iki istiqamətində;
3. Bakı-Sumqayıt şossesi - şəhər istiqamətində;
4. Tbilisi prospekti - şəhər istiqamətində;
5. Üzeyir Hacıbəyli küçəsi - Cavanşir körpüsündə;
6. Koroğlu Rəhimov küçəsi - Həsən Əliyev küçəsi istiqamətində.
20-09-2021, 09:03 | Delta ştammı hər kəsi ovlayacaq! - ARAŞDIRMA
Delta ştammı peyvənd olunmayan hər kəsi ovlayacaq.
Axar.az xəbər verir ki, bu barədə İngiltərə alimlərinin apardığı araşdırmada bildirilib.
Alimlərin fikrincə, peyvənd olunmayan hər kəs bu ştamma yoluxacaq:
“BioTech peyvəndinin deltadan qoruma faizi 88-dir. Bu ştamm əvvəlkilərə nisbətdə daha yoluxucudur. Deltadan qorunmaq demək olar ki, mümkünsüzdür”.
20-09-2021, 07:29 | “Vüqar Həşimov” komandası Avropa kubokunda Moldova yığmasına böyük hesabla qalib gəlib
Makedoniyanın Struqa şəhərində kişi şahmatçılar arasında klublararası Avropa kuboku yarışı davam edir.
Turnirin ikinci turunun oyunları keçirilib. Yarışda Azərbaycanı təmsil edən "Vüqar Həşimov" klubu Moldovanın "Perfect" komandasına böyük hesabla (5,5:0,5) qalib gəlib.
Qeyd edək ki, komandamız birinci turda İrlandiyanın "Gonzaga" yığmasını 4,5:1,5 hesabı ilə məğlub edib.
Azərbaycanın digər qrossmeysterləri Şəhriyar Məmmədyarov yarışın reytinq favoriti olan Makedoniyanın "Alkaloid", Nicat Abasov isə İspaniyanın "Silla" komandasını təmsil edir.
İkinci turda "Alkoloid" Sloveniyanın "Sloven Ruma" yığmasına 5,5:0,5, "Silla" isə Belçikanın "Schachfreunde Wirtzfeld" komandasına 5:1 hesabı ilə qalib gəliblər.
Kişilərin yarışında 38 komanda mübarizə aparır.
Trend
20-09-2021, 07:26 | Alimlər koronavirusun daha qədim mənşəyini tapıblar
Parisin Paster Universiteti və Laos Milli Universitetinin tədqiqatçıları SARS-CoV-2 koronavirusunun təbii mənşəyinə dair yeni sübutlar açıqlayıblar.
Alimlər bir neçə ay ərzində Cənub-Şərqi Asiyada 46 növ yarasa üzərində müşahidələr aparıblar. Nəticədə Laosun mağaralarında yaşayan heyvanlarda koronavirusun Uhan tipinə bənzər üç virus aşkar edilib.
Mütəxəssislərə görə, BANAL-52, BANAL-103 və BANAL-236 virusları bu gün elmə məlum olan SARS-CoV-2-nin mənşəyi sayılır.
Lakin SARS-CoV-2-dən fərqli olaraq müəyyən edilmiş patogenlərin heç birində bədənə asanlıqla daxil olan infeksiyalar qeydə alınmayıb.
"Report"
20-09-2021, 07:18 | Sellülitlə ev səraitində necə mübarizə aparmaq olar?
Sellülit - müasir qadınların üzləşdiyi ən çox yayılmış kosmetoloji problemlərdən biridir. Sellülitdən həm kök, həm də arıq qadınlar əziyyət çəkirlər.
Qadın orqanizminin bəzi xüsusiyyətlərinə görə, ümumiyyətlə, bütün qadınlar sellülitə meylli olurlar. Sellülit zamanı piy hüceyrələrinin ölçüsü qeyri-bərabər olaraq böyüyür, birbiri ilə düyünlər şəklində birləşir, onların daxilinə toksinlər və şlaklar yığılır, bu nahiyədə qan və limfa dövranı çətinləşir. Nəticədə dəri qeyri hamar şəkil alaraq "portağal qabığına" oxşayır. Sellülitin müalicəsi üçün müxtəlif xüsusi salon müalicəsi üsulları istifadə olunur (ozonoterapiya - oksigenlə müalicə, mezoterapiya - dəri altına müxtəlif dərmanların yeridilməsi, talassoterapiya - dəniz yosunları ilə müalicə, palçıqla müalicə, krioterapiya - aşağı temperaturla müalicə, vakuumla masaj, banka ilə masaj, sıxılmış hava ilə masaj və s.). Müayinə və məsləhətləşmədən sonra həkim sizin sağlamlığınızı nəzərə alaraq, şəxsən sizə uyğun olan müalicə üsulları təyin edir (adətən, bir neçə növ proseduradan ibarət kompleks müalicə təyin edilir). Qeyd etmək lazımdır ki, əgər qadın müalicə müddəti ərzində müəyyən pəhriz rejimini yerinə yetirməzsə, heç olmasa minimal bədən tərbiyəsi hərəkətləri etməzsə, sellülitin müalicəsi gözlənilən nəticəni verməz.
Əlbəttə ki, sellülitin əmələ gəlməsinin və artmasının qarşısını almaq, onu müalicə etməkdən daha yaxşıdır. Düzgün və balanslaşdırılmış qidalanma və kifayət qədər fiziki hərəkət - sellülitin ən yaxşı profilaktikasıdır. Qida rasionu tərəvəzlərlə, meyvələrlə, bitki yağları ilə zəngin olmalıdır. Meyvə və tərəvəz şirələri, təzə göyərti, paxlalı bitkilər, yağsız süd məhsulları, suda bişirilən sıyıqlar da xeyirli hesab olunur. Rasiona balıq da daxil edilməlidir (balıq yağı qəbul etmək də yaxşıdır). Qara çörəyə üstünlük verin. Qızardılmış yeməklərdən, yağlı ətdən, vetçina, kolbasalar, hisə verilmiş məhsullar, şorabalar, şirin un məmulatları, kremli tortlar yeməkdən çəkinmək lazımdır. Süni qida əlavələri - rəngverici, aromatlaşdırıcı və s. - olan qidalardan istifadə edilməsi də məsləhət deyil.
Gün ərzində 1,5-2 litr maye (suplar daxil olmaqla) qəbul edilməsi də vacibdir (yaşıl çay və digər ot çayları çox xeyirlidir).
Əgər siz gözəl bədən quruluşuna malik olmaq istəyirsinizsə, mümkün qədər çox hərəkət edin - piyada gəzin, üzgüçülüyə gedin, velosiped sürün və s. İdman zalına getməyə vaxtınız yoxdursa, qarın, bud, sağrı əzələləri möhkəmləndirmək üçün, heç olmasa həftədə 2-3 dəfə (nə qədər çox olsa, o qədər yaxşıdır) 40-60 dəqiqə ərzində idman hərəkətləri edin.
Sellülitin başlanğıc dövrlərində gündəlik olaraq kontrast duş (soyuq və isti suyun növbələşməsi) qəbul edilməsi yaxşı profilaktik və müalicəvi üsul hesab edilir. Bu, birləşdirici toxumanın möhkəmlənməsinə imkan verir. Sağlamlığınızda ciddi problemlər yoxdursa, sauna və hamama getmək yaxşıdır. Bu, bədəni şlaklardan təmizləməyə imkan verir, dərini hamar edir. Daimi olaraq üz üçün krem və skrablardan istifadə edən qadınlar, adətən, çox nadir hallarda bədən üçün olan krem və skrablardan istifadə edirlər. Skrablanma bədənin dərisi üzərində yığılan ölmüş hüceyrələri xaric edir, nəticədə dəri daha yaxşı nəfəs alır, orada gedən maddələr mübadiləsi bərpa olunur. Həftədə 1 dəfədən az olmayaraq bədən dərisi üçün skrablardan istifadə etmək lazımdır. Bu cür dərin təmizlənmədən sonra müxtəlif antisellülit kremləri daha yaxşı effekt verir. Belə kremlərin tərkibinə dəridə maddələr mübadiləsini normallaşdıran və dərinin elastikliyini yaxşılaşdıran - kofein, A vitamini, müxtəlif fermentlər, efir yağları, müxtəlif otların və dəniz yosunlarının ekstraktları və s. bu kimi maddələr daxil edilir. Bu kremlər dərini qidalandırır, onun tonusunu artırır.
Uzun müddət ərzində (1 aydan az olmamaqla) istifadə edildiyi halda öz-özünü masaj etmək çox yaxşı effekt verə bilər. Onu isti vanna və ya duş qəbulundan sonra etmək daha yaxşıdır. Öncədən dəriyə masaj üçün krem və ya zeytun yağı, ən yaxşısı isə keyfiyyətli antisellülit krem sürtmək lazımdır. Belə masajı əllərinizlə və ya xüsusi masaj şotkası ilə etmək olar. Masaj zamanı bütün hərəkətlər yalnız aşağıdan yuxarıya doğru olmalıdır. Masaj ağrılı olmamalı və icra edildikdən sonra dəridə göyərmə sahələri qalmamalıdır. Əgər masajdan sonra dəridə göyərmiş sahələr qalarsa, demək, masaj vaxtı dəriyə lazım olduğundan artıq təzyiq göstərilmişdir.
1. Masaj edilməsi budların bütün səthi - diz oynaqlarından bud-çanaq oynaqlarına qədər və sağrı nahiyələrinin dərisi boyunca ovuclarınızla sığallanması hərəkətləri ilə başlayır. Bu hərəkətlər əvvəl çox yüngül, sonra isə bir qədər güclü olmalıdır.
2. Bir-birinə birləşdirilmiş barmaqlarınızın uc hissələri ilə yüngül dairəvi hərəkətlər etməklə, budların tam səthini - dizlərdən bud-çanaq oynaqlarına qədər və sağrı nahiyələrinin dərisini masaj edin.
3. Barmaqlarınızı yumruq şəklində büküb, barmaq sümükləri ilə budların tam səthlərini - dizlərdən bud-çanaq oynaqlarına qədər və sağrı nahiyələrinin dərisini qızarana kimi masaj edin.
4. Budlarınızın içəri səthini baş barmaqla digər 4 barmaq arasına almaqla sıxın və diz oynağından bud-çanaq oynağına qədər spiralşəkilli hərəkətlərlə hamarlayın. Bu hərəkətləri edərkən dərini çox sıxmayın - çünki dəridə göyərmələr əmələ gələ bilər.
Masajdan sonra kontrast duş qəbul etmək və dəriyə antisellülit krem sürtmək yaxşı nəticə verir.
Ev şəraitində tətbiq edilən vibromasaj aparatından istifadə edilməsi ilə daha yaxşı effekt almaq olar. Vibromasaj aparatından istifadə etməmişdən əvvəl dəriyə antisellülit krem də çəkmək məsləhət görülür.
Bal ilə masaj - ilkin başlayan sellülitin müalicəsi üçün çox xeyirli üsul hesab olunur. Bal orqanizmdən toksinlərin xaric edilməsinə kömək edir. Kurs müalicəsi 15 masajdan ibarət olub, günaşırı olaraq 5-10 dəqiqə ərzində aparılır. İstifadə edilən təbii bal xarlanmış şəkildə olmamalıdır. Bala aromatik yağları da (limon, adaçayı, pozmarin, lavanda və s.) əlavə etmək olar (1 çay qaşığı bal + 5 damcı yağ və ya yağların qarışığı). Bal ilə yağları masajdan bilavasitə əvvəl qarışdırırlar. Bu məqsədlə bir neçə yağdan istifadə edilirsə, əvvəlcə yağları bir-biri ilə qarışdırır, sonra isə üzərinə bal əlavə edərək bir daha yaxşı-yaxşı qarışdırırlar. Balı əllərin ovuc hissəsinə yaxın və onları sıx şəkildə dəriyə "yapışdırın". Sonra isə kəskin hərəkətlə ovuclarınızı dərinin üzərindən qaldırın. Bu cür döyəcləyici hərəkətlər tədricən daha kəskin və güclü olmalıdır. Masajın ilk seansları zamanı bəzi narahatlıqlar ola bilər. Lakin sonradan dəri bu proseduraya uyğunlaşdığı üçün masaj yüngül keçir.
Masajdan sonra balın qalıqlarını yumşaq hamam lifindən istifadə etməklə ilıq su ilə yuyub dəriyə nəmləndirici krem sürtürlər.
Bürünmələr - sellülitlə mübarizədə çox yaxşı vasitədir. Bürünmələri ev şəraitində də etmək mümkündür. Göy və ya ağ gili xamaya bənzər qatılıq alınana qədər su ilə qarışdırın, üzərinə bir necə damcı portağal və ya limon yağı, 1 çay qaşığı üyüdülmüş qəhvə, 1 çay qaşığı bal əlavə edib qarışdırdıqdan sonra dərinin problemli sahələrinə sürtün. Sonra bədənin bu maska çəkilən hissəsini sellofan plyonka ilə bürüyün və 1 saat ərzində üstünüzü yorğan və ya isti ədyal ilə örtüb uzanın. Şokolad ilə bürünmələr də çox yaxşı effekt verir. Acı şokoladı su hamamın üzərində əridin, ilıq şəkildə bədəninizə çəkin və plyonka ilə bürüyün. Sonra üstünüzü yorğanla örtüb 1 saat uzanın. Bürünmələrin digər reseptləri:
- 10 damcı limon yağı, 20 damcı kamfora yağı, çalınmış 2 yumurta sarısı, bir qədər su;
- dəniz yosunlarını (apteklərdə satılır) suda isladın və dərinizə çəkin;
- təbii alma sirkəsini eyni miqdarda su ilə qarışdırıb bədəninizə çəkin.
Bürünmələrdən sonra duş qəbul edin və antisellülit krem çəkin. Belə bürünmələri həftədə 2 dəfə etmək olar. Əgər sizdə ürək-damar sistemi xəstəlikləri və ya dərinizdə yaralar varsa, bürünmələrdən istifadə etməyin!
Ev şəraitində banka köməyi ilə masaj etmə də sellülitlə mübarizədə yaxşı effekt verir. Dəriyə antisellülit krem çəkib adi tibbi bankanı bərk "yapışdırın". Sonra bankanı bədənın bud və sağrı hissələrində "gəzdirin". Bütün hərəkətləri aşağıdan yuxarıya doğru etmək lazımdır. Bu masaj kifayət qədər ağrılı olur və hətta dərinizdə göyərmələr əmələ gələ bilər. Belə masaj həftədə 2 dəfə etmək lazımdır. Damar xəstəliklərindən əziyyət çəkən qadınlara bu masaj qadağan edilir.
Sonda bir daha qeyd etmək istəyirik ki, əgər siz pəhriz saxlamasanız və heç olmasa adi bədən tərbiyəsi hərəkətlərini etməsəniz nə evdə, nə də salonda aparılan antisellülit tədbirləri arzu olunan nəticəni verməyəcəkdir.
Milli.Az
20-09-2021, 06:57 | "Bəlkə də, rəhbərliyin mənə yazığı gəlir" - Sənan Qurbanov
"Hər dəfə məğlubiyyətdən sonra nəsə danışmaq çətindir".
Bildirir ki, bu sözləri "Keşlə"nin baş məşqçisi Sənan Qurbanov Azərbaycan Premyer Liqasının 4-cü turunda "Neftçi" ilə keçirilən oyundan sonra keçirilən mətbuat konfransında deyib.
0:3 hesablı məğlubiyyəti şərh edən çalışdırıcı bildirib: "Belə start gözləmirdik ki, 4 oyundan sonra xalsız qalaq. Bəlkə məşqlər bizi aldatdı, bəlkə transferlərdə tələsdik. Avrokuboklar bizi tələsdirdi. Təəssüf ki, səviyyə aşağı olan futbolçular gəldi. O pula daha yaxşısını almaq olardı. Bir az səbr edib başqa oyunçular gətirsəydim, bəlkə daha yaxşı olardı. Getmək asandır. İnsan nəyəsə inanır, çalışırsan ki, bəlkə düzələr. "Neftçi" də olsa, uduzmaq təsir edir. Əlimizdə düşən şanslardan istifadə edə bilmirik. Bu təzyiq üzərimizdə var. Qarşıdakı günlərdə nə olacaqsa olacaq".
Qurbanov istefanın gündəmdə olduğunu gizlətməyib: "Kuboku qazanandan sonra heç kim istefa barədə yazmırdı. Baş məşqçisiz necə kuboku qazanmaq olar? Hər məşqçi başa düşür ki, məğlubiyyət artdıqca çemodan dolur. Futbolda təsadüf olmur. Kuboku da təsadüfən qazanmamışıq. Rəhbərlik desə, hər zaman getməyə hazıram. İnsan düzəltməyə daha çox çalışmalıdır. İstefam gündəmdədir, burada təzminat söhbəti eləmirəm. Sabah rəhbərlik deyə bilər ki, sağ ol, işimiz bura qədərdir. İşimdən tutub yapışmamışam. Heç nədə qorxum yoxdur. İstefa lazım olsa, edəcəyəm. Bəlkə də, getməyim çıxış yoludur və ya əksinə. Yalvarıb burada qalmaq fikrim də yoxdur. Rəhbərlik nə əziyyət çəkdiyimi görür. Bəlkə də, rəhbərliyin yazığı gəlir ki, səhərdən axşama qədər əziyyət çəkir. Məğlubiyyətin birbaşa günahkarı mənəm. Legioner məşqçilərdən deyilik ki, təzminat tələb edək. Çıxış yolunu hamımız axtarırıq".
(apasport.az)
