24-06-2025, 10:30 | Prezident İlham Əliyev: Bu gün ölkəmiz dünya miqyasında sabitlik, inkişaf, tərəqqi məkanı kimi tanınır

Beş ildir ki, Azərbaycanda sülh tam təmin edilib və əlbəttə, hüdudlarımızın kənarında da sülh nə qədər tez təmin edilərsə, həm o ölkələr, həm də təbii olaraq bizim üçün bir o qədər yaxşı olacaq.

AZƏRTAC xəbər verir ki, bu sözləri Prezident İlham Əliyev Mingəçevirdəki "8 Noyabr" Elektrik Stansiyasının açılış mərasimindəki çıxışında deyib.

"Ancaq reallıq budur ki, bu gün bizim ölkəmiz dünya miqyasında sabitlik, inkişaf, tərəqqi məkanı kimi tanınır və bu adı biz öz əməyimizlə, zəhmətimizlə, düşünülmüş siyasətlə qazanmışıq", - deyə dövlətimizin başçısı əlavə edib.

24-12-2024, 08:46 | Müdrik Lider, qalib Sərkərdə

Nəsimi Nəsibov,
Ekologiya və Təbii Sərvətlər Nazirliyi yanında Meşələrin İnkişafı Xudmətinin 11 saylı Regional Meşə Təsərrüfatı Mərkəzinin direktoru;


Otuz ildən çox bizi birləşdirən milli ideya – erməni işğalına son qoyulması və ölkəmizin ərazi bütövlüyünün bərpası – hörmətli Prezidentimiz, Ali Baş Koman­dan İlham Əliyevin rəhbərliyi ilə qəhrəman Milli Ordumuz tərəfindən gerçəkləş­dirildi. Şəhidlərimizin qanı yerdə qalmadı, Azərbaycanın bütöv ərazisində suve­ren hüquqlarımız bərpa edildi.

Bu gün bizi birləşdirən əsas ideya milli birlikdir. Avropa Parlamenti, AŞPA, ABŞ Konqresi, Dövlət Departamen­ti, Fransa Senatı, Almaniya ölkəmizə qarşı xoşagəlməz addımlar atırlar. Ta­rixi şəraitin özü, xalqımızın beynəlxalq arenada üzləşdiyi ədalətsizlik və ikili standartlar, indiyəcən məruz qaldığı çətin sınaqlar milli birlik ideyasını bizə diktə edir. Yalnız vahid xalq olaraq və güclü lider ətrafında birləşərək, əsrlər­lə arzusunda olduğumuz azad, güclü, firavan, çiçəklənən Azərbaycan qura bilərik. Qarşıda bizi böyük hədəflər göz­ləyir: dövlətimizin müstəqilliyini möh­kəmləndirmək, azad edilmiş əraziləri bərpa etmək, böyük qayıdışı tamamilə gerçəkləşdirmək, sosial-iqtisadi inkişafı sürətləndirərək Azərbaycanı qabaqcıl ölkəyə çevirmək.

Əlbəttə, demokratik və plüralist cəmiyyətdə, çoxpartiyalılıq şəraitin­də siyasi mübarizə, siyasi maraqların toqquşması, ideoloji və taktiki fikir ayrı­lıqları təbii haldır. Lakin ümummilli ideya baxımından ən mühüm məsələ, fəlsəfi dillə desək, mübarizə edən əksliklərin vəhdətini qorumaqdan, yəni siyasi eh­tirasların cəmiyyətimizi parçalamasına imkan verməməkdən, mübarizə və mü­zakirələrin konstruktiv məcrada aparıl­masına nail olmaqdan ibarətdir. Müasir sivil dünyada bərqərar olmuş parlament quruluşunun özü də məhz bu zərurət­dən doğmuşdur və bunu tələb edir.

Biz daxili problemlərin həllinə siyasi şüar və bəyanatlarla deyil, sosial-iqtisa­di məsələlərin çözümünü təmin edəcək hüquqi baza və mexanizmlərin işlənib hazırlanması ilə nail ola bilərik. Bu da son nəticədə cəmiyyətin ahəngdar inki­şafının başlıca şərti kimi sosial ədalətin bərqərar olması ilə nəticələnməlidir.

Son illərdə ölkəmizin qazandığı böyük nailiyyətlərdən biri də, heç şü­bhəsiz, nəhəng səylər bahasına əldə olunmuş siyasi sabitlikdir. Bəşəriyyətin tarixi belə bir mühüm həqiqəti ortaya qoymuşdur: müdrik dövlət xadimi о kəsdir ki, cəmiyyətdəki stabilliyi qo­rumaqla, onun xaos və hərc-mərclik girdabına yuvarlanmasına imkan ver­mədən müxtəlif islahatlar aparmağı ba­carır. Möhtərəm Prezidentimiz, Ali Baş Komandan İlham Əliyev bu illər ərzində məhz belə bir müdriklik və məharət nü­mayiş etdirmişdir. Hesab edirəm ki, bu sabitliyi qorumaq, əslində, hər bir vətən­daşın borcudur. Odur ki, mövcud icti­mai-siyasi sabitliyi hər vəchlə qoruma­ğı, milli birliyin pozulmasına səbəb ola biləcək bütün cəhdlərə qarşı qətiyyətlə mübarizə aparmağı birinci dərəcəli və­zifə kimi qarşıya qoymalıyıq. Birlik və həmrəyliyimizin sarsılmazlığını təmin etmək üçün konstruktiv qüvvələrlə di­aloqu və əməkdaşlığı inkişaf etdirmək, vətəndaş həmrəyliyinin və milli birliyin həmişəlik bərqərar olmasına çalışmaq, ölkədə mülki cəmiyyətin möhkəm əsas­larının qurulmasına nail olmaq lazımdır. Bunlar həyata keçərsə, milli birliyimizin pozulmasına yönəlmiş cəhdlər təkcə dövlət strukturlarının deyil, bütövlükdə, cəmiyyətin müqaviməti ilə rastlaşar və təbii ki, uğursuzluğa düçar olar.

Bəllidir ki, ölkədə sabitliyin qorun­masında daxili amillərlə yanaşı, xarici faktorlar da mühüm rol oynayır. Odur ki, ölkəmizin müstəqilliyinin möhkəm­lənməsinə və beynəlxalq birliyə daha six inteqrasiyasına yönəlmiş tarazlaş­dırılmış xarici siyasət xətti dönmədən inkişaf etdirilməlidir.

Bu gün Azərbaycan ictimaiyyətini düşündürən məsələlər içərisində ikisi xüsusi əhəmiyyətə malikdir. Qazandığı­mız nailiyyətlər və ərazi bütövlüyümü­zün bərpası arxayınlıq doğurmamalı, Milli Ordumuzun döyüş qabiliyyətinin ar-tırılması istiqamətində fəaliyyət daim gücləndirilməlidir. Necə deyərlər, “sülh istəyirsənsə, müharibəyə hazır olmalı­san!”.

Sosial ədalətə yönəlmiş hüquqi mexanizmlərin işlənməsi ölkəmizdə azad vətəndaş cəmiyyətinin qurulması üçün etibarlı bünövrə rolunu oynaya­caqdır ki, bu da dövlətimiz üçün stra­teji bir vəzifədir. Göstərilən vəzifələrin yerinə yetirilməsi üçün xalqın bütün tə­bəqələri 7 fevral Prezident seçkilərində olduğu kimi, Vətənimizin cari və strateji maraqlarını təmin etmək qüdrətində olan güclü liderimiz, mahir diplomat, böyük qurucu şəxsiyyət, Qarabağ fate­hi İlham Əliyevin ətrafında birləşməli və bu milli birliyimizi bədxahlarımızın hər cür təcavüzkarlığı qarşısında möhkəm sipərə çevirməliyik

24-12-2024, 08:05 | Mehriban Əliyeva Prezident İlham Əliyevin doğum günü münasibətilə paylaşım edib - FOTO

Birinci vitse-prezident Mehriban Əliyeva rəsmi "Instagram" səhifəsində Prezident İlham Əliyevin doğum günü münasibətilə paylaşım edib.

Paylaşımda deyilir:

"24.12.2024. Doğum gününüz mübarək, cənab Prezident! Uca Allah Sizi və Azərbaycan xalqını qorusun!"

12-12-2024, 12:17 | Prezident və birinci xanım Heydər Əliyevin məzarını ziyarət ediblər

Müasir müstəqil Azərbaycan dövlətinin memarı və qurucusu, dünyaşöhrətli siyasi xadim, xalqımızın Ümummilli Lideri Heydər Əliyevin vəfatından 21 il ötür.

Dekabrın 12-də Azərbaycan Respublikasının Prezidenti İlham Əliyev və birinci xanım Mehriban Əliyeva Fəxri xiyabana gələrək xalqımızın Ümummilli Lideri Heydər Əliyevin məzarını ziyarət ediblər.

Prezident İlham Əliyev Ulu Öndərin məzarı önünə əklil qoydu.

Azərbaycan Respublikasının Dövlət Himni səsləndirildi.

Dövlətimizin başçısı İlham Əliyev və birinci xanım Mehriban Əliyeva Ulu Öndərin ömür-gün yoldaşı, görkəmli oftalmoloq-alim, akademik Zərifə xanım Əliyevanın da xatirəsi ehtiramla andılar, məzarı üzərinə gül dəstələri qoydular.

Tanınmış dövlət xadimi Əziz Əliyevin və professor Tamerlan Əliyevin də xatirələri yad edildi, məzarları üstünə gül dəstələri düzüldü.

Xəbər yenilənəcək

12-12-2024, 06:37 | Mehriban Əliyeva Ulu Öndər Heydər Əliyevin anım günü ilə bağlı paylaşım edib - FOTO

Birinci vitse-prezident Mehriban Əliyeva 12 Dekabr - Ulu Öndər Heydər Əliyevin anım günü ilə əlaqədar rəsmi "İnstagram" səhifəsində paylaşım edib.

Paylaşımı təqdim edir:

12-12-2024, 06:32 | Bu gün Ümummilli Lider Heydər Əliyevin anım günüdür

Bu gün Azərbaycan xalqının Ümummilli Lideri Heydər Əliyevin vəfatından 21 il keçir. Heydər Əliyev dahi siyasətçi idi, o, regional siyasətin aparıcı simalarından biri olaraq həm öz xalqı arasında, həm də beynəlxalq siyasi arenada böyük nüfuza malik idi.

Ümummilli Liderin xatirəsi Azərbaycanda, o cümlədən xarici ölkələrdə ehtiramla yad edilir.

Qeyd edək ki, Heydər Əlirza oğlu Əliyev 1923-cü il mayın 10-da Naxçıvanda anadan olub. 1944-cü ildən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqradda xüsusi ali təhsil alıb, 1957-ci ildə isə Azərbaycan Dövlət Universitetinin tarix fakültəsini bitirib. Azərbaycan SSR Kommunist Partiyası Mərkəzi Komitəsinin 1969-cu il iyul plenumunda Heydər Əliyev Azərbaycan SSR Kommunist Partiyası Mərkəzi Komitəsinin birinci katibi seçilib. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilib, SSRİ-nin rəhbərlərindən biri olub. Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və baş katib Mixail Qorbaçovun yeritdiyi siyasi xəttə etiraz əlaməti olaraq, tutduğu vəzifələrdən istefa verib.

Heydər Əliyev 1990-cı ilin 20 yanvarında sovet qoşunlarının Bakıda törətdiyi qanlı faciə ilə əlaqədar ertəsi gün Azərbaycanın Moskvadakı nümayəndəliyində bəyanatla çıxış edərək, Azərbaycan xalqına qarşı törədilmiş cinayətin təşkilatçıları və icraçılarının cəzalandırılmasını tələb edib. O, Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq, 1991-ci ilin iyulunda Sovet İttifaqı Kommunist Partiyasının sıralarını tərk edib. 1990-cı ilin iyulunda Azərbaycana qayıdan Heydər Əliyev ilk əvvəl Bakıda, sonra isə Naxçıvanda yaşayıb, həmin ildə də Azərbaycan Ali Sovetinə deputat seçilib. O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikası Ali Soveti sədrinin müavini olub.

Heydər Əliyev 1992-ci ildə Yeni Azərbaycan Partiyasının Naxçıvan şəhərində keçirilmiş təsis qurultayında partiyanın sədri seçilib.

1993-cü ildə xalqın tələbi ilə Heydər Əliyevin hakimiyyətə qayıdışı Azərbaycan üçün xilas yolu oldu. Ən çətin anda o, ölkəyə geri dönərək siyasi böhran və iqtisadi tənəzzüldən çıxış yolu tapdı. O, o zamankı bacarıqsız hakimiyyətin yaratdığı vəziyyəti düzəldə bildi, müharibəni dayandırdı, vətəndaş qarşıdurmasının qarşısını aldı və ölkəni tərəqqi yoluna yönəltdi. Məhz Heydər Əliyevin səyi ilə tarixi "Əsrin müqaviləsi" imzalandı. Ulu öndərin neft strategiyası Azərbaycanın iqtisadi inkişafına güclü təkan verdi. 1998-ci ildəki andiçmə mərasimində o, belə deyirdi: "Biz XXI əsrə daha da qüdrətli, müstəqil Azərbaycan dövləti çatdırmaq istəyirik. Gələcək nəsillərə daha xoşbəxt həyat yaratmaq istəyirik. Azad, sərbəst, demokratik ölkə kimi Azərbaycan inkişaf edəcək və Avropa ilə Asiyanın qovuşduğu bir yerdə öz tarixi xidmətlərini göstərəcəkdir".

Bu gün Azərbaycan güclü, nüfuzlu və həqiqətən müstəqil bir dövlətdir. Ulu öndərin qoyduğu möhkəm təməl üzərində Prezident İlham Əliyev Azərbaycanın misilsiz uğur hekayəsini yazdı. Ölkədə yoxsulluğun öhdəsindən gəlindi, möhtəşəm iqtisadiyyat quruldu, peşəkar ordu formalaşdırıldı və Azərbaycanın beynəlxalq arenada hesablaşılmalı bir oyunçu kimi möhkəm imici yaradıldı. Biz, qalib xalq olaraq, azad, sabit və çiçəklənən bir ölkədə yaşayırıq.

11-12-2024, 21:15 | İlham Əliyev ümumilli lider Heydər Əliyevin anım günü ilə bağlı paylaşım edib - FOTO

Prezident İlham Əliyev 12 Dekabr - Ümumilli Lider Heydər Əliyevin anım günü ilə bağlı sosial şəbəkə hesablarında paylaşım edib.

Paylaşımı təqdim edir:

11-12-2024, 20:21 | Heydər Əliyev fenomeni: Azərbaycanın geosiyasi hədəfləri

Nəsimi Nəsibov,
Ekologiya və Təbii Sərvətlər Nazirliyi yanında Meşələrin İnkişafı Xudmətinin 11 saylı Regional Meşə Təsərrüfatı Mərkəzinin direktoru;


Ulu Öndər Heydər Əliyev misilsiz xidmətləri ilə Azərbaycan xalqının qəlbində özünün abidəsini ucaldıb. Xalqımız, bütün dünya azərbaycanlıları Ulu Öndər Heydər Əliyevin əziz xatirəsini daim uca tutur, böyük ehtiramla yad edir. Tarixi təcrübə göstərir ki, xalqların rifahını, dövlətlərin isə yüksəlişini, intibahını və inkişafını təmin edən amillər sırasında lider fenomeni və ya liderlik faktoru xüsusi yer tutur. Analitiklər, tədqiqatçılar liderləri adətən tarixi şəxsiyyət kimi təsvir və təqdim edir. Amma yüksək idarəetmə mədəniyyətinə və qabiliyyətinə, zəngin dövlətçilik təcrübəsinə, vətənpərvərlik ruhuna və Vətən sevgisinə malik olan, xalqın dəstəyinə arxalanan liderlər yeni tarix yazır, yaradır və tarixə çevrilirlər – ictimai-siyasi yaddaşa əbədi həkk olunurlar. Eynilə Azərbaycan xalqının Ümummilli Lideri, müdrik dövlət xadimi Heydər Əliyev kimi.

Ulu öndər Heydər Əliyevin siyasi irsi, əslində dövlətçilik tarixidir. Çünki o, bir-birindən kəskin fərqlənən iki ayrı dövrdə - həm SSRİ dönəmində, həm də müstəqillik illərində respublikamıza uğurla rəhbərlik edib, milli tərəqqini – iqtisadi inkişafı, mədəni intibahı və siyasi yüksəlişi təmin etməyə müvəffəq olub. Ümummilli Liderin iki fərqli dövrdə və əsrdə gördüyü işlər Azərbaycanın siyasi simasını, milli obrazını formalaşdırıb.

İlk növbədə qeyd etmək lazımdır ki, Ulu Öndər Heydər Əliyev müstəqillikdən öncə respublikamızın perspektivi üçün güclü iqtisadi dayaqlar, siyasi sütunlar yaratmağa müvəffəq olub. 1969-cu ilin 14 iyulunda Azərbaycanda siyasi hakimiyyətə gələn Heydər Əliyev islahat xarakterli tədbirlər vasitəsilə respublikamızı tənəzzüldən xilas edərək inkişaf yoluna çıxmasını təmin edib. Azərbaycan aqrar ölkədən sənaye ölkəsinə çevrilib, güclü kadr bazası formalaşdırılıb. Ulu Öndərin 1969-1982-ci illərdə respublikamıza rəhbərliyi Azərbaycanın siyasi tarixinin mühüm səhifələrindən biridir. Bununla yanaşı, Heydər Əliyevin Naxçıvan Muxtar Respublikası Ali Məclisinin Sədri kimi fəaliyyəti də mühüm ictimai-siyasi və ideoloji əhəmiyyətə malikdir. Faktlara diqqət edək: Ulu Öndərin təşəbbüsü ilə ilk dəfə olaraq Naxçıvanda Azərbaycan Xalq Cümhuriyyətinin yadigarı olan üçrəngli bayrağımız qaldırılıb; Naxçıvan MSSR adından “Sovet Sosialist” ifadəsi çıxarılıb; 1990-cı il yanvar ayının 20-də Bakıda törədilmiş qanlı hadisələrə siyasi qiymət verilib; Naxçıvan əhalisinin SSRİ-nin saxlanılmasına dair keçirilən referendumda iştirak etməməsi haqqında qərar qəbul edilib; 31 dekabr tarixinin Dünya Azərbaycanlılarının Həmrəylik Günü elan olunması barədə qərar verilib.

Bütün bunlar Azərbaycan dövlətçiliyinin siyasi və ideoloji əsaslarının gücləndirilməsi baxımından mühüm əhəmiyyətə malik olmaqla yanaşı, müstəqilliyə gedən yolda müstəsna önəm daşıyıb. Bu gün haqlı olaraq qeyd edirik ki, Azərbaycan xalqı öz müstəqil, nüfuzlu və qüdrətli dövləti ilə qürur duyur. Və iftixarla vurğulamaq lazımdır ki, müasir müstəqil Azərbaycan dövləti Ümummilli Lider Heydər Əliyevin şah əsəridir. Müstəqillik illərinin hadisələri və prosesləri bu təkzibedilməz reallığı tam təsdiqləyir. Ümummilli Liderimizin Azərbaycan xalqı qarşısında ən böyük – misilsiz xidmətlərindən biri də siyasi varisliyin təmin olunmasıdır. Ulu Öndər özündən sonra Azərbaycana şərəflə, ləyaqətlə və uğurla rəhbərlik edərək xalqın rifahını, dövlətin isə mənafeyini təmin edəcək qətiyyətli lider yetişdirməklə tarixi missiya yerinə yetirdi. Heydər Əliyevin şah əsəri olan müasir müstəqil Azərbaycan Ulu Öndərin layiqli davamçısı Prezident İlham Əliyevin rəhbərliyi ilə möhtəşəm nailiyyətlər qazanaraq regionun lider dövlətinə, etibarlı və perspektivli tərəfdaşa çevrilib, qalib ölkə statusu qazanıb.

Bu gün Heydər Əliyev ideyaları, Prezident İlham Əliyevin siyasəti müasir müstəqil Azərbaycan dövlətinə möhtəşəm nailiyyətlər qazandırır. Şübhəsiz ki, çoxəsrlik dövlətçilik tarixində heç vaxt bu qədər qüdrətli olmayan Azərbaycan hər birimizin – dünya azərbaycanlılarının sonsuz qürur və iftixar mənbəyidir. Bu nailiyyətlərin əsasını qoyan Ulu Öndər Heydər Əliyevin ideyaları əbədi olaraq yaşayacaq!

11-12-2024, 20:14 | İlham Əliyev Qanun imzaladı

Azərbaycan Prezidenti İlham Əliyev Qanun imzalayıb.

Qanuna əsasən, Xəzər dənizinin Azərbaycan sektorunda Azəri, Çıraq yataqlarının və Günəşli yatağının dərinlikdə yerləşən hissəsinin birgə işlənməsi və neft hasilatının pay bölgüsü haqqında 14 sentyabr 2017-ci il tarixli Sazişə İkinci Qoşma qəbul və təsdiq edilib.

11-12-2024, 20:09 | Vaşinqtonun "çempion" saxtakarlığı: qanunsuzlar Bakıya qanun "öyrədir"

Amerikan sisteminin mərkəzində, Pentaqonda vergi ödəyicilərinin milyardlarla dolları mənimsənilir, amma bu, media səssizliyinin qalın dumanı ilə örtülür. Eyni zamanda, Co Bayden administrasiyası riyakarlıqla məşğuldur. ABŞ prezidenti oğlunu cinayət təqibindən qurtarmaq üçün hər cür vasitəyə əl atarkən, dünyanı korrupsiya ilə mübarizəyə öyrətməyə çalışır. Bu, yalnız Bayden administrasiyasının mənəvi üzünü açmaqla qalmır, həm də insan haqları və korrupsiya ilə mübarizə adı altında paylanan beynəlxalq mükafatların əsl mahiyyətini şübhə altına alır.

... ABŞ özünü qlobal korrupsiya ilə mübarizə aparan kimi təqdim edərək, "antikorrupsiya" ritorikasını geosiyasi manipulyasiya üçün silaha çevirib. Vaşinqton digər ölkələrdə satqınları tapıb onları "qəhrəman" kimi təqdim edir. Korrupsiya ilə mübarizə adı altında ABŞ Azərbaycanın da daxil olduğu ölkələrdə manqurtlar tapır - öz ölkəsinə qarşı yalan danışmağa, onun maraqlarını satmağa və reallığını təhrif etməyə hazır olan insanları. Həmin insanlara mükafatlar verilir, onları tərifləyir və dünyaya ədalətin müdafiəçisi kimi təqdim edirlər. Sevinc Vaqifqızının timsalında bu yanaşma aydın görünür.

Birləşmiş Ştatlarda korrupsiya ilə mübarizədə uğursuzluğunu gizlətməyə çalışan Bayden administrasiyası asanlıqla müxtəlif ölkələrdə müəyyən şəxsləri "ədalət və şəffaflıq uğrunda mübarizəni seçənlər" kimi mükafatlandırır. Jurnalistlər, hüquq müdafiəçiləri, hakimlər və dövlət məmurları bu siyahıya daxil edilsə də, onların əsl korrupsiya ilə mübarizə ilə nə əlaqəsi var? Bu insanlar çox vaxt ABŞ-nin xarici siyasətinin alətinə çevrilir, onların mükafatları isə digər ölkələrə təzyiq vasitəsi kimi istifadə edilir.

Məsələn, azərbaycanlı "müstəqil jurnalist" Sevinc Vaqifqızı ABŞ Dövlət Departamenti tərəfindən "antikorrupsiya çempionu" kimi təqdim edilsə də, Azərbaycanda qanun pozuntuları və böhtan ittihamı ilə tanınır. Onun fəaliyyəti illərlə korrupsiya ilə mübarizədən çox, Azərbaycanın dövlət hakimiyyətini nüfuzdan salmağa yönəlib. Vaqifqızı kimi digər "laureatlar" ABŞ-nin maraqlarına xidmət edir, öz ölkəsinin deyil. Vaşinqton belə insanları dəstəkləyərək ölkələrin suverenliyini sarsıtmağa və daxilində xaos yaratmağa çalışır.

Xanter Baydenin hekayəsi sadəcə prezidentin ailə dramı deyil. Bu, seçilmiş şəxslərin və hakimiyyətə yaxın olanların qanun və əxlaqa tabe olmadıqları, öz maraqlarına uyğun paralel bir reallıqda yaşadıqları sistemin çürüməsinin simvoludur. Bu, cəzasızlıq, riyakarlıq və ikili standartlar hekayəsidir ki, hətta ən səbirli müşahidəçini belə hiddətləndirə bilər.

Amerikalı əmlak icarədarı Şon Maqvayr ictimaiyyətə açıqlayanda ki, Xanter Bayden onun ailəsinə 300 min dollardan çox borcludur, bu, bir növ kömək çağırışına bənzəyirdi. ABŞ-da orta statistik vətəndaş ipoteka və ya kirayə ödənişini gecikdirəndə hər şeyini itirmək təhlükəsi ilə üzləşir. Amma prezidentin oğlu qanunların onun üçün qayda deyil, məsuliyyətdən qaçış vasitəsi olduğu bir dünyada yaşayır. 2,9 milyon dollar məbləğində aliment borcu, 1,4 milyon dollar ödəmədiyi vergilər, silah və narkotik maddələr - adi bir amerikalını illərlə həbsə sala biləcək bu cinayətlər, Xanter Bayden üçün sadəcə müzakirə mövzusudur.

Amerika məhkəmə sisteminin reaksiyası necədir? Gördüyümüz yalnız sonsuz sövdələşmələr, razılaşmalar və vəkillərlə prokurorlar arasındakı nəzakətli görüşlərdir. Heç kim Baydenin oğlunu real məsuliyyətə cəlb etmək istəmir. Yaşanan olaylar daha çox günahkarın həmişə qalib gəldiyi bir səhnələşdirilmiş tamaşaya bənzəyir. Vaşinqtonun qürurla bəyan etdiyi "qanunun aliliyi" bu mudur?

"Atamı biznes əməliyyatlarıma heç vaxt cəlb etməmişəm", - deyə Xanter Bayden Konqresdə bəyan edib. Amma bu sözlərə kim inanır? Onun biznes fəaliyyətləri - istər beynəlxalq sövdələşmələr, istərsə də daxili layihələr - həmişə Co Baydenin qeyri-rəsmi himayəsi ilə müşayiət olunurdu. "Bayden" soyadı yalnız bir marka deyil, həm də müqavilələrə, pullara və hakimiyyətə qapı açan universal açardır. Xanter atası olmadan yalnız bir şey əldə edə bilərdi: müttəhimlər kürsüsündə yer.

Xanter Baydenin qalmaqalları təkcə bir ailənin deyil, həm də ABŞ sisteminin necə çürüdüyünün göstəricisidir. Bu sistemdə qanun və ədalət yalnız sadə insanlar üçün mövcuddur, elitaya isə yalnız imtiyazlar verilir. ABŞ demokratiyanı ixrac etməkdən danışır, amma onun daxilindəki riyakarlıq bütün dünyaya bəllidir. Bu teatrın nə qədər davam edəcəyini yalnız zaman göstərəcək. Amma aydındır ki, dünyada getdikcə daha az insan bu riyakarlığa inanır.

Tragikomediyaya baxın ki, Xanter Bayden özünün saysız-hesabsız problemlərini həll etməyə çalışdığı bir zamanda, Co Bayden bütün dünyaya ədalət və korrupsiya ilə mübarizə dərsləri verir. Belə çıxışlar həqiqi demokratik prinsiplərə inananlar üçün təhqir kimi səslənir. Pentaqonda milyardlarla dollar yoxa çıxır, antikorrupsiya araşdırmaları bürokratiya okeanında batır, amma Ağ Ev dünyanın müxtəlif ölkələrində "korrupsiya ilə mübarizə çempionlarını" mükafatlandırmaqla məşğuldur.

İkiüzlülük rekord vurur. Xüsusilə də ABŞ Dövlət Departamentinin Azərbaycanın jurnalisti Sevinc Vaqifqızını "korrupsiya ilə mübarizə çempionu" elan etməsindən sonra. Görünür, bu nə azadlığa dəstəkdir, nə də şəffaflıq naminə atılmış addımdır. Əksinə, bu, suveren dövlətlərin sabitliyini pozmaq üçün həyata keçirilən siyasi təzyiq alətidir.

Xanter Baydenin hekayəsi təkcə bir ailə dramı deyil. Bu, Amerika demokratiyasının çürümüş sisteminin güzgüdəki əksidir. Bu sistemdə "bərabərlik və ədalət" şüarları seçilmiş elitlərin imtiyazlarını gizlətmək üçün bir örtükdür. Dünyaya "doğru dəyərləri" öyrətməyə çalışan bu sistem özü isə cəngəllik qanunları ilə idarə olunur.

İllər boyu davam edən qalmaqallar, saxtakarlıqlar və ABŞ elitası tərəfindən ört-basdır edilən cinayətlər ölkə daxilində və xaricində inamın itirilməsinə səbəb olub. Xanter Bayden təkcə bir ad deyil. O, qanunun güclülərin müdafiə alətinə çevrildiyi bir sistemin simvoludur. Amma dünya dəyişir, və insanların dözümü sonsuz deyil. Ağ Ev anlamalıdır ki, ulduzlu-bəndli bayraq altında gizlədilmiş ikiüzlülük Amerikan sistemini məhv edən çürüməni sonsuza qədər gizlədə bilməz.

Çox gec olsa da Co Bayden administrasiyasının bir şeyi başa düşməsinin vaxtı gəlib çatıb: Azərbaycan nə Gürcüstandır, nə də Ukrayna. Bu, heç bir xarici diktatın və ya kənar iradənin təsir edə bilməyəcəyi müstəqil, suveren bir ölkədir. Azərbaycanın sabitliyini sarsıtmağa yönəlmiş bütün cəhdlər iflasa məhkumdur. Bu ölkədə xarici müdaxilələrin qarşısını almaq üçün güclü mexanizmlər mövcuddur və bu mexanizmlər daim təkmilləşdirilir.

Vaşinqton yenidən yalançı şüarlarla - "korrupsiya ilə mübarizə" və "söz azadlığının dəstəklənməsi" adı altında köhnə taktikasını işə salır. Azərbaycanın maraqlarına qarşı çıxan şəxsləri mükafatlandırmaq cəhdi nə real korrupsiya ilə mübarizədir, nə də ədalətin dəstəklənməsi. Bu, başqa dövlətlərə təzyiq göstərmək üçün gözəl niyyətlərə bürünmüş bir alətdir.

Fəqət Azərbaycan - oyun meydançası deyil. Bu ölkə hər cür təxribatlara cavab vermək üçün güclü siyasi iradəyə malikdir. İnsan hüquqları müdafiəçisi və ya antikorrupsiya fəalı kimi təqdim edilən şəxslərdən istifadə edərək sabitliyi pozmaq cəhdləri sərt və prinsipial bir cavabla qarşılaşır. Əgər Dövlət Departamenti hələ də bunu başa düşməyibsə, zaman onlara Azərbaycanın torpağında bu ssenarinin işləməyəcəyini göstərəcək.

Azərbaycan müstəqilliyinə və suverenliyinə dəyər verən bir dövlətdir. Özümüzü Qərb elitalarının əlində alətə çevirmək niyyətində də heç deyilik. Azərbaycanın mürəkkəb şəraitdə illərdir öz maraqlarını müdafiə etməsi onu başqa ölkələrin təzyiqi qarşısında təslim olmamaq üçün daha güclü edib.

Həqiqi korrupsiya ilə mübarizə yalnız gerçək islahatlarla, dövlət institutlarının gücləndirilməsi ilə və xalqın maraqlarına xidmət edən fəaliyyətlə mümkündür. Bu sahədə Azərbaycan bir çox ölkələrə, o cümlədən onu tənqid edənlərə dərs verə bilər. Bayden administrasiyası başa düşməlidir ki, Azərbaycanın suverenliyi heç bir gözəl sözə, yalançı mükafata və ya siyasi təzyiqə satılmayacaq.

Həqiqi korrupsiya ilə mübarizə, ABŞ Dövlət Departamentinin irəli sürdüyü ucuz piardan ibarət deyil. Bu, yalnız gerçək islahatlar, dövlət institutlarının gücləndirilməsi və xalqın maraqlarına xidmət edən fəaliyyətlə mümkündür. Bu baxımdan, Azərbaycan bir çox ölkələrə, o cümlədən, onu tənqid etməyə çalışanlara dərs verə biləcək mövqedədir.

Bayden administrasiyasının Azərbaycana öz qaydalarını diktə etməyə çalışması yalnız bölgənin reallıqlarını anlamadığını göstərir. Burada başqa yerlərdə istifadə olunan manipulyasiya sxemləri işləmir. Azərbaycan xarici maraqlara xidmət edən və öz xalqını satmağa hazır olan manqurtlara yer olmayan bir dövlətdir. Azərbaycanın suverenliyi boş sözlər deyil, onun siyasətinin əsaslı dayağıdır. Dövlətimiz bunu həm keçmişdə, həm də bu gün sübut edib və sübut etməkdə davam edir.

Xarici oyunçular başa düşməlidirlər: Azərbaycan nə demokratiya, nə də korrupsiya ilə mübarizə mövzusunda kənar dərslərə ehtiyac duymur. Azərbaycan xalqı və onun rəhbərliyi milli maraqların nə olduğunu və onların necə qorunacağını yaxşı bilir. İstər ayrı-ayrı şəxslərin satın alınması, istərsə də beynəlxalq qaralama kampaniyaları ilə ölkənin sabitliyini pozmağa yönəlmiş cəhdlər kökündən boğulacaq.

Azərbaycan heç vaxt kənar oyunların vasitəsinə çevrilməyəcək. Bu, güclü, suveren bir dövlətdir, aydın mövqeyə və hər cür təzyiqə qarşı müqavimət iradəsinə malikdir. Vaşinqton bunu nə qədər tez başa düşsə, onların özləri üçün də bir o qədər yaxşı olar. Çünki Azərbaycan heç vaxt xarici diktə qarşısında baş əyməyəcək.

ABŞ-nin korrupsiya ilə mübarizə adına təqdim etdiyi mükafatlar getdikcə daha çox siyasi təzyiq aləti kimi qəbul edilir. Vaşinqton korrupsiya ilə mübarizəni suveren dövlətlərin daxili işlərinə müdaxilə, sabitliklərini sarsıtmaq və zəiflətmək üçün bir pərdə kimi istifadə edir. ABŞ bu oyununda dəyişməz bir strategiyaya sadiq qalır: əvvəlcə marionetləri dəstəkləmək, sonra isə onları yerli hakimiyyətlərə təzyiq üçün istifadə etmək.

Son olaraq qeyd etmək lazımdır: nə Co Bayden, nə də onun Dövlət Departamenti Azərbaycanı ədalət mövzusunda öyrətmək haqqına malik deyil. Öz korrupsiya qalmaqallarını ört-basdır edən bir ölkə digər dövlətlərə dərs verə bilməz. Azərbaycan bir daha sübut edəcək ki, onun suverenliyi və müstəqilliyi nə yalançı "mükafatlar", nə də gurultulu şüarlar qarşılığında satılmır.

Bu qədər bəsit...

Elçin Alıoğlu
TREND