29-12-2023, 06:12 | İkardi və Ceko mübahisə zamanı bir-birlərinə nə deyiblər? - DETALLAR
Türkiyə Super Liqasında ötən həftə baş tutan "Fənərbağça" - "Qalatasaray" matçında (0:0) Mauro İkardi və Edin Ceko arasında mübahisə yaşanmışdı.
Respublica.Az offsideplus.az-a istinadən xəbər verir ki, İtaliya mətbuatı ulduz futbolçular arasında yaranan gərginliyin səbəbini açıqlayıb.
Bosniya və herseqovinalı futbolçu İkardinin penalti istədiyi epizodda sərt reaksiya göstərdi və "nəhənglər" "kəllə-kəlləyə" gəldi. İtalyanlar İkardi və Ceko arasında keçən dialoqu yayımlayıb:
Ceko: "Öz işinlə məşğul ol"
İkardi: "Eləməsəm, nə olacaq?"
Ceko: "Nə deyirsən?"
İkardi: "Yenə deyirəm, öz işimlə məşğul olmasam nə olacaq?".
Respublica.Az
29-12-2023, 06:02 | "Biz düşünmürük ki, "Qarabağ" büdcəsi özündən 10-20 qat yüksək olan klublarla savaşa bilməz"
Respublica.Az "Qarabağ"ın direktoru Emrah Çelikelin qol.az saytına müsahibəsini təqdim edir
- Emrah bəy, başa çatmaqda olan 2023-cü il "Qarabağ" üçün müəyyən əlamətdar hadisələrlə yadda qaldı. Siz bu ili necə dəyərləndirirsiniz?
- Əvvəlcə sizin və bütün Qol.az oxucularının qarşıdan gələn Dünya Azərbaycanlılarının Həmrəyliyi Günü və Yeni il bayramını təbrik edirəm. Bəli, 2023-cü il bizim üçün bir çox əlamətdar hadisələrlə yadda qaldı. Ümumi götürsək, komandamız üçün uğurlu olduğunu düşünürəm. Hər mövsümdə bir dönəm müəyyən azarkeşlər tərədindən komandaya qarşı narazılıqlar olur. Amma biz həmişə sonda görmüşük ki, baş məşqçimiz Qurban Qurbanovun qərarı düzgün olub. Bu il "Qarabağ"ın klub kimi inkişafında da yeni addımlar atmışıq. Komandanın nəticələri ilə yanaşı klubun administrasiyasında da inkişaf gedir. Bu ildən klubumuzun iki əməkdaşı öz işini təkmilləşdirmək üçün xarici universitetdə təhsil almağa başlayıb. Klubumuzun baş meneceri Asif Əsgərov Avropa Klublar Birliyində idarə heyətinin üzvü seçildi. Bu, seçki yolu ilə və çoxunun Asif bəyə səs verməsi ilə baş verdi. Bu, ayrıca bir fəxr olunası hadisədir. Cənab Prezidentimizin onu "Tərəqqi" medalı ilə təltif etməsi isə həm Asif Əsgərov, həm də klubumuz üçün daha böyük bir şərəfdir. Təbii ki, bunlar bizim üçün həm də böyük bir məsuliyyətdir. Çünki biz həmişə çalışırıq ki, hər il daha yaxşısını edək. Şükürlər olsun ki, bu, "Qarabağ"da alınır. Bundan sonra da onun davamının gəlməsi üçün əlimizdən gələni edəcəyik.
- 2023-cü il həm də "Qarabağ"ın Azərbaycan futbolu tarixində ilk dəfə Avropa Liqasının pley-offuna yüksəlməsi və Xankəndidə oyun keçirməsi ilə tarixə düşdü.
- Birinci Xankəndinə səfərimizi qeyd etmək istəyirəm. Bu, bizim üçün Avropa Liqasının pley-off mərhələsindən daha üstündür. Orda oyun keçirmək böyük sevinc və fəxr idi.
Avropa Liqasına gəldikdə biz məsuliyyətimizi dərk edirik. Nə etməli olduğumuzu bilirik. Komandanın oyunu haqda heç vaxt danışmırıq. Bizim işimiz ondan ibarətdir ki, komandaya nə dərəcədə dəstək ola, nə qədər irəli apara bilərik. Baş məşqçimizin istəklərini tez və yerində həll etmək də əsas işimizdir. İşlərimizi bu yöndə inkişaf etdiririk.
- Avropa Liqasında pley-offa yüksəlmək hər halda komandanın həvəsini artırıb. Bu həvəsə, istəyə nələr daxildir?
- Əlbəttə ki, "Qarabağ"ın çörəyini yeyən bir işçi, həm "Qarabağ"ı sevən bir azarkeş kimi çox istəyərəm ki, lap finala qədər gedək. Bu istək hamıda olduğu kimi məndə də var. Amma indiyə kimi bizdə heç vaxt mövsümün əvvəlində və ya ortasında rəhbərlik tərəfindən komandanın qarşısına şərt qoyulmayıb ki, siz bu il mütləq pley-offa çıxmalı və ya finala yüksəlməlisiniz. Bu nəticələr hamısı özü gəlir. Mənə görə, bunlar görülən doğru işlərin nəticəsidir. Bu işlər nə qədər ki, belə davam edəcək, "Qarabağ"ı daha da yüksəklərdə görmək bizə nəsib olacaq.
- Pley-offdakı rəqibiniz "Braqa" haqda nə deyə bilərsiniz? Portuqaliya klubu "Qarabağ" üçün necə rəqibdir?
- Bu mərhələdə zəif rəqib olmur. Burada hansısa bir münasib rəqib gözləmək yersizdir. Bilirəm ki, Braqa şəhəri ilə Bakı arasında 8 saatlıq uçuş var. Çox uzaq məsafədir. Amma biz ora getdiyimiz kimi, onlar da Bakıya gələcək. Biz hamımız bir yerdə ən yaxşısını etməyə çalışacağıq. Burada rəqibin kim olmasının fərqi yoxdur.
- Avropa Liqasının pley-off mərhələsindəki komandaların büdcələri "Qarabağ"dan qat-qat çoxdur. "Qarabağ" siyahıda sonuncudur. Əslində bu, bir tərəfdən "Qarabağ"ın uğurudur. Sizcə, bunun çətinliyi necə, özünü göstərəcəkmi?
- Konfrans Liqasındakı komandaların büdcələri də bizimkindən yüksəkdir. Əslində biz bununla ancaq fəxr edə bilərik. Yetərincə fəxr ediləsi bir faktdır. Bunlar görülən işlərin, edilən transferlərin düzgünlüyünü göstərir. Elə bir qayda yoxdur ki, uğur qazanmaq üçün mütləq çox pul xərcləməlisən. Mənə görə, az büdcə ilə yüksək nəticə əldə edən ən yaxşı komandadır. Bunu bir futbol funksioneri kimi deyirəm. Biz düşünmürük ki, "Qarabağ" büdcəsi özündən 10-20 qat yüksək olan klublarla savaşa bilməz. Heç vaxt bunu fikirləşməmişik. Bu cür rəqiblərə qalib də gəlmişik, məğlub da olmuşuq. Hamı da görüb ki, komanda ən yaxşısını etməyə çalışıb.
- "Qarabağ"ın futbolçularının parlaq oyunlarından sonra onlara təkliflər gəlibmi? Məsələn, Andrey Lunyov özünü yaxşı tərəfdən göstərdi. Romao və digər futbolçuların da xarici klubların maraq dairəsində olması haqda xəbərlər yayılıb.
- Bu xəbərlər həmişə olub, bundan sonra da olacaq. Amma əsas kluba rəsmi təklifin gəlib-gəlməməyi məsələsidir. Demək istəyirəm ki, bizim hər hansı bir oyunçumuz üçün rəsmi təklif gəlməyib. Biz də belə xəbərləri eşidirik və üzülürük. Çünki futbolçularımızın başlarını qarışdırırlar. Menecerlər arasında, yaxud futbolçuların özləri ilə birbaşa danışanlar olur. Biz bunun qarşısını almırıq. Çünki futbolçulara telefonu qadağan edə bilmərik.
Bizim komandamızın gözəlliyinin biri də odur ki, aramızdakı mənəvi bağlar maddiyatdan daha güclüdür. İnanın ki, bütün futbolçularımıza aid olan məsələdir. Dəfələrlə şahidi olmuşam ki, futbolçumuza bizdə aldığı puldan dəfələrlə artıq gəlir təklif ediblər, ancaq o, komandada qalmağı üstün tutub.
- Bəlkə, maraq üçün o faktlardan birini deyəsiniz.
- Bunlar keçmişdə qaldığına görə çox danışmaq istəmirəm. Əsas mövzunun özüdür ki, futbolçular məhz "Qarabağ"da oynamağa üstünlük verir. Qeyd etdiyim hal bir yox, bir neçə dəfə təkrarlanıb.
- "Qarabağ" bu qış transfer edəcəkmi?
- Transfer işləri davam edir. Bizim komandamızda oyunçulara baxan 4-5 nəfərdən ibarət bir qrup var. Onlar həmişə axtarırlar və dəyərləndirirlər. Artıq futbolçunun transferi ilə bağlı maliyyə məsələləri danışılanda biz işə qoşuluruq. Hazırda bu iş getmir, amma nə vaxt belə bir istək olsa, sponsorumuz və klub rəhbərliyi həmişəki kimi bizə dəstək olacaq.
- Xankəndidə MOİK-lə keçirilən oyundan sonra baş məşqçi Qurban Qurbanov bildirmişdi ki, orada yenə kubok oyunu keçirmək istəyirsiniz. Bununla bağlı müvafiq qurumlara müraciətiniz olub?
- Belə bir müraciət hələ ki, etməmişik. Amma biz böyük məmnuniyyətlə ora gedərik. Xankəndidə olmaq özü bizim üçün şərəfdir. Xankəndi bizim müqəddəs torpağımızdır. Bəli, Qurban Qurbanov oyundan sonrakı açıqlamasında kubok oyunlarımızla bağlı istəyimizi dedi. Mənə də elə gəlir ki, biz kubok oyunlarımızı yenidən Xankəndidə keçirə bilərik. Amma hansı oyunun olacağı üçün məsləhətləşməyimizə ehtiyac var. İcazə olsa, oynamağa hazırıq.
Respublica.Az
28-12-2023, 15:39 | Azərbaycan və Türkiyə birgə hərbi təlimlər keçirib
Azərbaycan və Türkiyə birgə hərbi təlimlər keçirib.
Respublica.Az Trend-ə istinadən xəbər verir ki, bu barədə Türkiyə Milli Müdafiə Nazirliyinin sözçüsü Zeki Aktürk həftəlik brifinqdə çıxışı zamanı bildirib.
"26-28 dekabr tarixləri arasında Azərbaycanda "Hibrid Təhdidlərə Cavab Təlimi" keçirilib", - o qeyd edib.
"Regional və qlobal sülhə dəstək çərçivəsində "İki dövlət, bir millət" anlayışı ilə bərabər olduğumuz Azərbaycana dəstəyimiz davam etməkdədir", - Z.Aktürk əlavə edib.
Respublica.Az
28-12-2023, 14:50 | Sabah 8 dərəcə şaxta olacaq
Sabaha gözlənilən hava proqnozu açıqlanıb.
Milli Hidrometeorologiya Xidmətindən verilən xəbərə görə, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Lakin gecə və səhər bəzi yerlərdə arabir yağıntılı olacağı, Abşeron yarımadasının şimalında yağışın qısa müddətə sulu qarla qarışıq yağması ehtimalı var. Şimal-qərb küləyi gündüz mülayim cənub-qərb küləyi ilə əvəz olunacaq.
Havanın temperaturu gecə 2-6°, gündüz 8-11° olacaq. Atmosfer təzyiqi 771 mm civə sütunundan 774 mm civə sütununa yüksələcək. Nisbi rütubət 60-70% olacaq.
Azərbaycanın rayonlarında havanın əsasən yağmursuz keçəcəyi gözlənilir. Lakin gecə və səhər bəzi yerlərdə arabir yağıntılı olacağı, dağlıq ərazilərdə qar yağacağı ehtimalı var. Bəzi rayonlarda arabir duman olacaq. Qərb küləyi bəzi yerlərdə arabir güclənəcək.
Havanın temperaturu gecə 1-6°, gündüz 8-13°, dağlarda gecə 3-8° şaxta, gündüz 0-3° şaxta olacaq.
Respublica.Az
28-12-2023, 06:33 | "Qarabağ" Medinanın yerinə 1,2 milyonluq transfer edir?
"Qarabağ" uzun müddətə sıradan çıxan futbolçusu Kevin Medinanın əvəzedicisini tapıb.
Respublica.Az sportinfo.az-a istinadən xəbər verir ki, offsideplus.az-ın əldə etdiyi məlumata əsasən, Ağdam təmsilçisinə Gürcüstan millisi və hazırda APOEL (Nikosia) formasını geyinən Laşa Dvali təklif olunub.
28 yaşlı mərkəz müdafiəçisini bəyənən klub qarşı tərəfə rəsmi təklif göndərib və hazırda cavab gözlənilir.
Futbolçunun "Transfermarkt"də dəyəri 1,2 milyon manat (600 000 avro) civarındadır.
Dvali karyerası ərzində "Ferentsvaroş", "Kasımpaşa" klublarında çıxış edib.
Respublica.Az
27-12-2023, 05:12 | “Virus infeksiyaları daha çox 5 yaşa qədər uşaqlarda rast gəlinir”
Kəskin respirator virus infeksiyalarına yoluxma daha çox 5 yaşa qədər uşaqların payına düşür.
Respublica.Az "report"a istinadən bildirir ki, bu barədə Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunun həkim-infeksionisti Günay Əliyeva deyib.
O bildirib ki, kəskin respirator virus infeksiyaları (KRVİ) kəskin yoluxucu virus xəstəliklərinin böyük qrupunu özündə birləşdirir: "Əsasən, tənəffüs yollarının selikli qişasının zədələnməsi ilə xarakterizə olunur. Bu qrup xəstəliklərə qrip, paraqrip, adenovirus, rotavirus, respirator sinisitial, rivovirus, reovirus və s. aiddir. Xəstələnmə ən çox 5 yaşa qədər uşaqların payına düşür. Bu, həmin yaş qrupuna aid artıq kəskin respirator virus infeksiyalarına yoluxan uşaqların uşaq müəssisələrinə getməsi ilə əlaqədardır. Təkrar xəstələnmə halları uşaq orqanizminin mühafizə qüvvəsinin zəifləməsinə, xroniki infeksiya ocaqlarının formalaşmasına səbəb olur".
G.Əliyeva bildirib ki, kəskin respirator virus infeksiyalarının yayılması daha çox yaz və payız aylarında müşahidə edilir: "Bunun əsas səbəbi yaz aylarında immunitetin zəifləməsi, digər səbəbi isə soyuğun təsirindən tənəffüs yollarının selikli qişasının zədələnməsi nəticəsində tənəffüs yolları xəstəliklərinin baş verməsidir. Yenidoğulmuşlar və 6 aya qədər uşaqlar digər yaşdakı uşaqlara nisbətən təcrid olunduğuna görə və anadan transplasentar yolla alınmış passiv immunitet saxlanıldığından xəstəliyə daha az hallarda yoluxurlar. Anadangəlmə immunitet zəif olduğu hallarda yenidoğulmuş və xüsusilə erkən doğulmuş uşaqlar da KRVİ ilə xəstələnə bilər".
Respublica.Az
26-12-2023, 08:07 | Yeni İl süfrəsində hansı yeməklər olmalıdır?
Yeni ildə süfrədəki yeməklərdən tez-tez dadmaq həzm pozğunluğuna və mədə ağrısına səbəb ola bilər.
Respublica.Az publika.az-a istinadən xəbər verir ki, bu barədə diyetoloq Marina Makişa Lenta.ru-ya açıqlamasında deyib. O, yeməkləri müəyyən qaydada yeməyi tövsiyə edib və hansı qidaların həzmə kömək etdiyini vurğulayıb:
"Əvvəlcə bir az tərəvəz, sonra yağsız balıq, kiçik bir hissə fermentləşdirilmiş qidaların, sonra isə digər yeməklərin dadına baxa bilərsiniz. İlk növbədə çoxlu lif ehtiva edən tərəvəzlər və göyərtilərə üstünlük verin".
Mütəxəssisin sözlərinə görə, onlar həzm sistemini stimullaşdırır və kifayət qədər az miqdarda kalori ilə toxluq hissi yaradır. Buna görə də, Yeni il şənliyinə tərəvəz ilə başlamaq daha yaxşıdır - təxminən 200-300 qram.
"Tərəvəz salatı da əla seçim olacaq və onu ağır olivye salatından əvvəl yemək tövsiyə olunur. Süfrədə müvafiq olaraq kələm və ya pomidor kimi turşu delikateslər də ola bilər. Fakt budur ki, bu məhsullar fermentləşdirilib və artıq həzmə kömək edən müəyyən miqdarda probiotik bakteriyaları ehtiva edir. Yeni il süfrəsinə nişastalı qidaları daha yaxşı həzm etməyə kömək edən fermentləşdirilmiş ət məhsulları da qoya bilərsiniz", - Marina Makişa bildirib.
Respublica.Az
26-12-2023, 07:39 | Sağ əlin verdiyini sol əl bilməməlidir
Atalarımızın gözəl bir sözü var: "Sağ əlin verdiyini sol əl bilməməlidir". Elə müqəddəs dinimiz Islamın da göstərişi budur.
Dinimizdə başqalarına yardım etmək, ətrafdakılara qayğı göstərmək, çətinliyə düşənlərin əlindən tutmaq nə qədər təkid olunmuşsa da, bunu minnət qoyaraq, başa qaxanc vuraraq etmək də bir o qədər günah sayılıb. Insan yaxşılığı Allahın razılığını qazanmaq naminə etməlidir. Unutmamalıdır ki, ehsan etmək gücünü də ona Allah verib. Əgər Allahın istəyi və yardımı olmasa, heç kim əlini əlinin üstündən götürə bilməz. Köməksizə, kimsəsizə verdiyimiz hər qəpiyin əldə edilməsi üçün Ulu Yaradana borcluyuq. Necə deyərlər, Allah bir kəsin ruzisini başqasının əli ilə yetirir.
Etdiyimiz yaxşılığı reklama çevirmək naminə, camaatın diqqətini cəlb etmək xatirinə, "filankəs necə səxavətlidir, necə ürəyi yumşaqdır" söyləsinlər deyə, hər nə etsək belə, qəbula yetməyəcək. Allah hamının əməlinin əvəzini niyyətinə görə verir və yalnız xalis niyyətli insanların əməlini qəbul edib mükafatlandırır. Bir kəsə yaxşılıq edəndən sonra bunu onun üzünə vursaq, nəinki qazandığımız savabı pozmuş oluruq, hətta üstəlik günah da qazanırıq. Çünki müsəlmanı incitmək - hansı yolla olursa olsun, istər əməllə, istərsə də dillə - günahdır. Kömək etdiyimiz adam bizim rişxəndli eyhamlarımızı, ətrafa car çəkdiyimiz elanları görəndə yəqin ki özünü narahat hiss edəcək və qəlbi sınacaq.
Verdiyimiz pul onun üçün ağır yükə, ehsan etdiyimiz xörək onun üçün zəhərə çevriləcək. Buna görə də müqəddəslərimiz bir kəsə yardım göstərərkən bunu adətən başqalarından gizli tutmağa çalışırdılar. Hətta həmin adamın əskilib xəcalət çəkməməsi üçün bəzən özlərinin kimliyini ona tanıtdırmırdılar. Imamlar gecələr öz çiyinlərinə ərzaqla dolu torba yükləyib, kimsəsizlərin məhəlləsinə daşıyır, hər kəsin payını qapısının ağzına qoyub qayıdırdılar.
Həzrət Əli (ə) vəfat etdikdən sonra Kufənin miskin müsəlmanları onlara gətirilən ərzağın bir müddət kəsildiyini görüb başa düşdülər ki, yemək payını onlara gətirən xəlifənin özü imiş. Kərbəlada Imam Hüseynin (ə) cənazəsini dəfn edənlər Onun çiynində döyənək yeri olduğunu gördülər. Əvvəlcə müharibədə qazanılmış yara olduğunu zənn etdilər. Amma sonra bildilər ki, bu, Mədinə yoxsulları üçün çiynində daşıdığı çörək torbasının izidir. İslam Peyğəmbəri və imamlar öz ətrafındakıları da bu ruhda tərbiyə etməyə çalışırdılar. Əhli-beytin əxlaq məktəbindən dərs almış şəxsiyyətlər hər kəsə təmənnasız yaxşılıq etməyi özlərinin bəndəlik borcu bilirdilər. Bir gün Imam Mühəmməd Təqinin (ə) şagirdlərindən biri o həzrətin yanına gəlmişdi. Imam gördü ki, bu adam çox xoşbəxt görünür. Soruşdu: "Bu cür sevinməyinin səbəbi nədir?".
O adam cavab verdi: "Ey Peyğəmbərin övladı! Atanızdan eşitmişdim ki, insan üçün ən xoşbəxt və sevincli gün ehsan və xeyirxahlıq etdiyi, öz din qardaşının çətinliyini aradan qaldırmağa imkan tapdığı gündür. Bu gün bir neçə yerdən ehtiyaclılar yardım üçün mənə müraciət etmişdilər. Mən Allahın köməyi ilə on nəfərin çətinliyini həll edə bildim. Bu üzdən sevinirəm". Imam buyurdu: "And olsun ki, sevinməyə layiq bir haldır. Amma bu şərtlə ki, öz xeyir əməllərini zay və batil etməyəsən".
Sonra Imam Qurandan aşağıdakı ayəni oxudu: "Ey iman gətirənlər! Sədəqələrinizi minnət qoymaq və əziyyət verməklə puça çıxarmayın" (Bəqərə, 264). Imamlarımız bunu öyrədirdilər ki, əsl mömin öz yaxınlarının vəziyyəti ilə daim maraqlanmalı, yardıma ehtiyacı olanın çətinliyini o ağız açmazdan əvvəl həll etməyə səy göstərməlidir. Qohumlar bir-birinin dolanışığına bələd olmalıdırlar, qonşular bir-birinin ac ya tox olduğunu bilməlidirlər. Imam Cəfər Sadiqin (ə) bu barədə bir sözü çox təsirlidir.
O həzrət öz tərəfdarlarına tövsiyə edirdi ki, ehtiyaclı insanı arayıb-axtarsınlar, o öz dərdini deməzdən əvvəl ona kömək etsinlər. Imam buyururdu ki, ən gözəl yaxşılıq bir kəs sənə ağız açmazdan əvvəl etdiyin yaxşılıqdır. Xahiş və yalvarışdan sonra edilən bəxşiş yalvaran adamın abır-həyasının və mənliyinin qiymətidir. Müqəddəslərimiz bəzən ehtiyaclı adamın yalvarış dolu səsini eşitməmək üçün tapşırırdılar ki, insanlar öz istəklərini yazılı şəkildə onlara bildirsinlər. Pul üçün gələnlər lazım olan məbləği ya kağıza yazır, ya da torpağın üzərində cızırdılar. Imamlar da bu məbləği adətən qapının və ya pərdənin arxasından həmin adama verirdilər.
Çünki o şəxsin dilənməkdən utanan üzünü və xəcalətli gözlərini seyr etmək istəmirdilər. Bir gün Imam Rza (ə) öz səhabələri ilə oturub söhbət edirdi. Adamlar şəriət və din barədə suallarını o həzrətə verib cavabını eşidirdilər. Bu zaman uca boylu qaraşın bir adam daxil olub Imama salam verdi və dedi: "Ey Peyğəmbərin övladı! Mən Sizin və ata-babalarının tərəfdarlarından (şiələrdən) biriyəm.
Yol pulum qurtarıb, öz şəhərimə qayıda bilmirəm. Məsləhətdirsə, mənə bir qədər pul borc verin ki, vətənimə gedib-çatım. Mən imkanlı adamam, amma mal-mülküm vətənimdədir. Söz verirəm ki, evimə çatandan sonra öz malımdan həmin məbləğdə pul ayırıb Sizin adınızdan kasıblara sədəqə verərəm". Imam qalxıb öz otağının qapısını açdı və içəri keçdi. Az sonra qapını aralayıb iki yüz dinar pulu oradan çölə uzatdı və buyurdu: "Bu iki yüz dinarı al və yol xərcini tədarük et.
Vətəninə çatandan sonra bu pulu mənim adımdan sədəqə verməyə də ehtiyac yoxdur. Mən bu pulu sənə hədiyyə edirəm. Indi get ki, nə mən səni görüm, nə də sən məni görəsən". Həmin adam pulu Imamın əlindən alıb çıxdı. Sonra Imam da otaqdan çıxıb camaatın yanına gəldi. O həzrətdən soruşdular: "Siz bu adama hörmət etdiniz, ona yardım göstərdiniz. Niyə pulu qapının arxasından verib onunla görüşmədiniz?". Imam buyurdu: "Belə etdim ki, onun üzündəki xəcaləti görməyim".
26-12-2023, 06:45 | Siyasət Əsgərov Türkiyə klubundan ayrıldı
Azərbaycanın qadın futbolçulardan ibarət yığmasının baş məşqçisi Siyasət Əsgərov Türkiyənin "Fomget" klubundan ayrılıb.
Respublica.Az qol.az-a istinadən xəbər verir ki, bu barədə Türkiyə klubu məlumat yayıb. Tərəflər müqaviləyə qarşılıqlı razılaşma əsasında xitam veriblər.
Komandanı bundan sonra Əsgərovun köməkçisi çalışdıracaq. Klub mütəxəssisə əməyinə görə təşəkkür edib və ona gələcək karyerasında uğurlar arzulayıb.
Qeyd edək ki, "Fomget" Əsgərovun rəhbərliyi altında Türkiyə Qadınlar Superliqasının son mövsümünün çempionu olub.
Respublica.Az
25-12-2023, 06:13 | İnfarkt öncəsi bu ağrılar olur - Diqqət
İnfarktdan öncə infarktönü vəziyyət yaranır. Çox xəstələr bu məqamı gözdən qaçırır.
Respublica.Az Medicina.az-a istinadən xəbər verir ki, kardioloq Anastasiya Fomiçeva ürək üçün tipik olmayan kardial simptomları açıqlayıb.
"Tipik simptomlara döş qəfəsində ağrı, sancı, təngnəfəslik, təzyiqin qəfil düşməsi, ürək ritminin pozulması - ya aritmiya, ya bradikardiya aiddir. İnfarkönünün qeyri-tipik simptomları: qəfil zəiflik, tərləmə, ürəkbulanma, qusma, öyümə, qarında ağrı, öskürək, huşun itməsi, ölüm qorxusu, ayaqların gücsüzləşməsi.
Aşağıdakı simptomlar isə artıq infarktın kəskin fazasını göstərir:
- Sinədə sanki beton plitə varmış kimi ağırlıq;
- Sinədə alov, yanma hissi;
- Sanki öndən və arxadan bıçaq kəsirmiş kimi hiss;
- Ağrının boyun, çənə, qola, qarına yayılması;
- Nitroqliserin qəbulundan sonra da ağrının kəsməməsi;
- Ağrı 20-30 dəqiqədən tutmuş 5 saata kimi davam edə bilər", - kardioloq qeyd edib.
Respublica.Az
