20-05-2021, 06:43 | Laçın və Qubadlının bəzi yaşayış məntəqələri də geri alınıb - SON VƏZİYYƏT
"Qaragöl ətrafındakı məsələlərə görə narahatçılığa səbəb yoxdur".
Bunu milli.az-a açıqlamasında ehtiyatda olan polkovnik, hərbi ekspert Şair Ramaldanov deyib.
Polkovnik bildirib ki, Azərbaycan Ordusu hazırda öz sərhədlərini bərpa etməklə məşğuldur:
"O istiqamətdə Ordumuzun qarşılaşdığı bir problem yoxdur. Artıq delimitasiya ilə bağlı bu məsələlər hamısı öz həllini tapıb. Nikol Paşinyanın və onların müdafiə nazirliyinin "Qara göl yaxınlığındakı dövlət sərhədlərini qorumaq üçün əlavə qüvvələrin cəlb olunduğunu elan etdik və məsələni hərbi yolla həll etməyə hazır olduğumuzu bildir "Qara göl yaxınlığındakı dövlət sərhədlərini qorumaq üçün əlavə qüvvələrin cəlb olunduğunu elan etdik və məsələni hərbi yolla həll etməyə hazırıq" kimi açıqlamaları gözlənilən reaksiyadır. Gözlənilən ona görədir ki, ermənilər heç vaxt sərhəd tanımayıblar, çünkü onlar Azərbaycan torpaqlarını işğal ediblər. Geninə-boluna Azərbaycan ərazisində istədikləri yerə gediblər, istədikləri yerdə olublar və istədikləri işləri görüblər.
Digər tərəfdən səbəb ondan ibarətdir ki, bilirik ki, hazırda orada seçkilər prosesinə hazırlıq gedir. Seçki qabağı bu prosesləri müəyyən bir şəkildə gərginliyə çevirmək istəyən və gərginlik səviyyəsinə gətirib çıxarmaq istəyən qüvvələr var. İnsanlar da hansı ki, mariflədirilməyiblər ki, Azərbaycan tərəfi indi sadəcə olaraq sərhədlərini bərpa edir, bu sərhədlərin bərpası hansı əsasla aparılır, hansı sənədlərə əsasən gedir, hansı xəritələrə uyğun gedir. Bilirik ki, üçtərəfli (10 noyabr) bəyanatda Azərbaycanın ərazi bütövlüyünün bərpası ilə bağlı bənd var. Azərbaycanın öz sərhədlərini bərpa etməklə bağlı orada qarşı tərəfləin razılıq məsələsi var. Sadəcə indi Ermənistanda eə bir siyasi vəziyyətdir ki, müəyyən siyasi qüvvələr hərşeydən divident qazanmaq istəyirlər və sərhədlərin delimitasiyası məsələsindən manipulyasiya etmək istəyirlər. Əgər Azərbaycanla sərhəd zonasında yaşayan erməni əhaliyə çatdırılsa ki, münaqişədən öncə bu sərhəd sovet respublikaları arasında mövcud olan xəritəyə əsasən qurulur, o zaman əhali bəlkə də prosesləri anlayışla qarşılayar. Əhali arasında marifəndirmə çox zəifdir.
İş orasındadır ki, bu gün o ərazidə Rusiyanın da hərbi qüvvələri var. Sərhəddi dəqiqləşdirəndə Rusiya tərəf də bu prosesdə iştirak edir. O xəritələr 1976-cı ildə çap edilmiş xəritələrdir, və Rusiya tərəfində də, erməni tərəfində də, Azərbaycan tərəfində də o xəritələr var. Və onun əsasında indi bu saat sərhədlərin dəqiqləşdirilməsi gedir. Azərbaycanın öz ərazi bütövlüyünü bərpa etmək o deməkdir ki, Azərbaycan öz sərhədlərini bərpa edir. Və sərhəd hansı xəttlə gedirsə, hansı ərazidən keçirsə o ərazidə də artıq Azərbaycan öz sərhəd xidmətinin atributlarını qoyacaqlar və xidmətini təşkil edəcəklər. Ermənilər istəsələr də, istəməsələr də Azərbaycan bunu edəcək.
Artıq Laçın və Qubadlının bəzi yaşayış məntəqələrindən ermənilər geri çəkiliblər. Yəni, delimitasiya, demarkasiya prosesi gedir. Ermənistanla sərhəd xəttinin çəkilməsi yolunun əvvəlindəyik, təzə başlamışıq. İndi orada istər Nikol Paşinyan, istər müdafiə nazirliyi tərəfindən olsun bu kimi hallar, reaksiyalar, belə açıqlamalar, populist söhbətlər, çağırışlar və s. olacaqdır. Çünkü onlar indi seçkiqabağı marafondadırlar. Paşinyanın dövləti həmişə populizmlə məşğul olub. Bizim bundan artıq məlumatımız var.
Prezident, Ali Baş Komandan İlham Əliyev birmənalı deyib, Azərbaycan torpağına əgər hər hansı bir təcavüz olarsa, Dəmir yumruğu yenidən işə salacağıq. Ona görə də Azərbaycanın heç bir qarış torpağında heçkimin gözü olmamalıdır, Azərbaycanın da heç bir dövlətin torpağında gözü yoxdur, o cümlədən Ermənistan torpağında.
İndi məndə olan məlumata görə tərəflər Qaragöl ətrafında müəyyən razılığa gəliblər. Bir şeyi bilin, Azərbaycanın maraqlarına zidd heç bir qərar qəbul edilə bilməz. Bu proses belə də davam edəcək. Ermənistan bu gün elə bir durumda deyil ki, Azərbaycana, Azərbaycanın maraqlarına zidd addım ata bilsin. Digər tərəfdən də rəsmi xəritə var, peyk vasitəsi ilə də o xəttin keçməsi metrəyə qədər dəqiq görünür. Əgər bu xətt buradan keçirsə, kim mənə deyə bilər ki, bu xətti geri çək? Bu xəritəni də Azərbaycan çəkməyibki?! Sovet dövründə mövcud olan bu sərhəddi də Azərbaycan müəyyən etməyib heç. Bu, o vaxtkı sərhəddir və beynəlxalq ictimaiyyət Azərbaycanın ərazi bütövlüyünü məhz bu sərhədlər çərçivəsində tanıyıb.
İndi Azərbaycanın hər bir addımı ermənilərdə qıcıqla qarşılanır. Təbii ki, yaraları hələ təzədir. Və indi orada müəyyən qüvvələr var ki, aranı qarışdıran, insanları çaşbaş salan müxtəlif məlumatlar yayırlar. İndi onlarda sosial şəbəkələrdə də vəziyyətləri xaotkdir. Vəziyyətdən istifadə edən müəyyən qüvvələr seçkiqabağı vəziyyəti gərgin saxlamaq üçün guya "Azərbaycan onların ərazilərini işğal edir" kimi yalan məlumatlar yaymaqla erməni əhalisi arasında gərginliyi saxlayırlar.
Silahlı Qüvvələrimizin 15 min şəxsi heyyətlə başlayan təlimlərinin də Qaragöldəki vəziyyətlə bir bağlılığı yoxdur. Bu, planlı təlimlərdir və bu təlimlərdə də qarşıya qoyulan hədəflərə nail olacağıq. O hədəflər də bəllidir.
Azərbaycan maraqlarına zidd, torpaqlarının bir metrəsini də olsun işğal etməyə heç kəsə imkan verməyəcək və adekvat addımın layiqincə atacaq".
Təhməz Əsədov
Milli.Az
20-05-2021, 06:37 | Vətən müharibəsində canını fəda edərək şəhidlik zirvəsinə ucalan İsmayıl Salmanov - VİDEO - FOTO
Şəhid İsmayıl Salmanov Vətən müharibəsində canını fəda edərək şəhidlik zirvəsinə ucaldı. 24 yaşı tamam olan İsmayılın şəhadətdə olan ilk doğum günü qeyd edilir. İsmayıl cismən həyatda olmasa da, şanlı tariximizin səhifələrində əbədi yaşayacaq.
AZƏRTAC bildirir ki, Salmanov İsmayıl Rəhman oğlu 1997-ci ilin bu günündə məcburi köçkün ailəsində İmişli rayon Bəhrəmtəpə qəsəbəsində dünyaya göz açıb. Hələ kiçik yaşlarındaykən ermənilərin Azərbaycan xalqına etdiyi zülmlər haqda valideynlərindən məlumat alıb. Birinci Qarabağ müharibəsində şəhid olan dayısının qəhrəmanlıqlarından xəbərdar olan İsmayıl vətənpərvər ruhda böyüyərək gələcəyin hərbçisi olacağına qərar verib. Yeniyetmə çağlarında isə İsmayıl və ailəsi Zobucuq qəsəbəsində məskunlaşır. Orta məktəbdə oxuyarkən hərbi akademiyada təhsil almaq istəsə də, bəzi çətinliklər səbəbindən onun arzusu gerçəkləşmir. Həqiqi hərbi xidmətə yollanan İsmayıl ön cəbhədə qulluq edir. Hərbi xidməti başa vurduqdan sonra mülki işdə çalışmağa başlayır. İsmayıl hərbçi olmaq arzusunun arxasınca gedir, mülki işindən imtina edərək hərbçi olur və həmlə taborunda Vətənin keşiyində dayanır.
Şəhid anası Yeganə Hüseynova söyləyib ki, İsmayıl işğal altında olan torpaqlarımızın azad ediləcəyi günə inanırdı. Ana yurdu Xocavənd, ata yurdu isə Füzuli rayonu olan İsmayıl öz ailəsinə "sizləri o torpağa qovuşduran biz olacağıq", - deyə söz verib. O, sözünə sadiq qalaraq torpaqlarımızın azadlığı uğrunda son damla qanına qədər qəhrəmancasına döyüşüb. Ata və anasına isə "torpaqlarımız azaddır", - deyə müjdəsini çatdırıb.
Şəhid İsmayılın qəhrəmanlığından danışan dayısı Namiq Hüseynov bildirib ki, İsmayıl kimi qəhrəman oğulların şücaəti nəticəsində torpaqlarımız düşmən tapdağından azad oldu. Hələ 1990-cı illərdə erməni vəhşiliyinə şahid olan şəhidin dayısı söyləyib ki, ermənilər dinc əhaliyə qarşı amansızlıq törədərək bizləri doğma torpaqlarımızdan didərgin saldılar. Vaxtilə torpaqlarımızda qucaq açdığımız ermənilər bizlərə qarşı namərdlik etdi. Lakin bu gün qəhrəman oğullarımız torpaqlarımızı azad etməklə şəhidlərimizin qisasını aldı. İsmayılın döyüş yolundan söhbət açan şəhid dayısı deyib ki, sentyabrın 27-də düşmənin hücumunun qarşısını almaq məqsədilə başlayan əks-həmlə əməliyyatlarında İsmayıl ilk döyüşə atılanlardan oldu. Onun döyüş yolu Cəbrayıl, Xocavənd, Füzulidən keçib. Həmlə taborunda snayperçi olan İsmayıl düşmənin xeyli canlı qüvvəsinin məhv edilməsində yaxından iştirak edib. Vətən müharibəsinin 28-ci günündə, oktyabrın 24-də İsmayıl Füzuli rayonu ərazisində İlandağ deyilən yerdə gərgin döyüşdə qəhrəmancasına şəhidlik zirvəsinə ucalıb. İsmayıl Füzuli rayonu Alxanlı kəndində torpağa tapşırılıb. Qeyd edək ki, İsmayıl döyüşlərdə göstərdiyi şücaətinə görə ölümündən sonra "Vətən uğrunda", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə" medalları ilə təltif edilib.
20-05-2021, 06:11 | 65 yaşlı kişi avtobusda gördüyü qadına görə Elgizin verilişinə çıxdı - VİDEO
65 yaşlı azərbaycanlı kişi avtobusda tanış olduğu qadını axtarır.
Vasib adlı şəxs bunun üçün "Elgizlə izlə" verilişində müraciət edib:
"Firuzə adlı qadını axtarıram. Onunla avtobusda tanış olmuşam. Dedi ki, yoldaşım rəhmətə gedib. Baxdım, yaxşı qadındır. Mən gələn il pensiyaya çıxacam. Xahiş edirəm ki, onu tapın. Düz 8 aydır Bakıda qalır. Yoldaşım 2013-cü ildə rəhmətə gedib, iki qızım var. Tək yaşayıram". lent.az
20-05-2021, 06:05 | Azərbaycanda nikahların və boşanmaların sayı azalıb
Bu ilin ilk üç ayında Ədliyyə Nazirliyinin rayon (şəhər) qeydiyyat şöbələri tərəfindən 10334 nikah və 3704 boşanma halları qeydə alınıb.
Əhalinin hər 1000 nəfərinə nikahların sayı 4,2, boşanmaların sayı isə 1,5 olub.
Qeyd edək ki, 2020-ci ilin 3 ayında 12 311 nikah dövlət qeydiyyatına alınmışdı. Boşanmaların sayı isə 3940 təşkil etmişdi. Hər iki göstərici üzrə ötən illə müqayisədə azalma qeydə alınıb.Trend
19-05-2021, 07:14 | Sahibə Qafarova Manlio Di Stefano ilə görüşüb
Milli Məclisin Sədri Sahibə Qafarova İtaliyaya rəsmi səfəri çərçivəsində mayın 18-də İtaliya Respublikasının Xarici işlər və beynəlxalq əməkdaşlıq nazirliyinin dövlət katibi, Azərbaycan Respublikası və İtaliya Respublikası arasında İqtisadi Əməkdaşlıq üzrə birgə Hökumətlərarası Komissiyanın həmsədri Manlio Di Stefano ilə görüşüb.
Bu barədə Milli Məclisin Mətbuat və ictimaiyyətlə əlaqələr şöbəsi məlumat yayıb.
Bildirilib ki, Manlio Di Stefano Azərbaycan nümayəndə heyətini salamlayaraq, İtaliyaya gerçəkləşən rəsmi səfərin uğurlu olacağına ümidvar olduğunu bildirib. Azərbaycana son səfərini məmnunluqla xatırlayan Di Stefano ölkəmizdən xoş təəssüratlarla ayrıldığını vurğulayıb.
Milli Məclisin Sədri Sahibə Qafarova səmimi görüşə görə təşəkkür edərək, rəsmi səfərin İtaliya Senatının Sədri Maria Elisabetta Alberti Kasellatinin dəvəti əsasında baş tutduğunu bildirib, Azərbaycan və İtaliya arasında münasibətlərin yüksək səviyyədə olduğunu diqqətə çatdırıb. Bildirib ki, İtaliya Prezidenti Sercio Mattarella 2018-ci ildə Azərbaycana, 2020-ci ildə Azərbaycan Prezidenti İlham Əliyevin İtaliyaya rəsmi səfərləri əlaqələrin inkişafına böyük töhfə verib.
Mədəni əlaqələrin inkişafına toxunan Sahibə Qafarova Azərbaycanın Birinci vitse-prezidenti Mehriban xanım Əliyevanın Heydər Əliyev Fondunun prezidenti, ICESCO-nun və UNESCO-nun xoşməramlı səfiri kimi İtaliyada həyata keçirdiyi layihələri vurğulayıb. Qeyd edilib ki, bu cür layihələr ölkələrimiz və xalqlarımız arasında münasibətlərin daha da dərinləşməsinə xidmət edir.
Daha sonra Milli Məclisin Sədri 44 günlük Vətən müharibəsi və artıq başa çatmış münaqişə barədə məlumat verib. Qeyd edilib ki, hazırda Azərbaycan işğaldan azad olunmuş ərazilərdə böyük quruculuq işlərinə başlayıb.
Ermənistanın münaqişə başa çatdıqdan sonra da tutduğu qeyri-konstruktiv mövqeyə toxunan Sədr bildirib ki, Ermənistan minalanmış ərazilərin xəritəsini təqdim etmir və bu yolla ərazilərdə bərpa işlərini və məcburi köçkünlərin öz torpaqlarına dönüşünü ləngidir. Eyni zamanda Ermənistan həqiqəti əks etdirməyən məlumatlar yayaraq, münaqişə başa çatdıqdan sonra saxlanılan terrorçuları "hərbi əsir" kimi qələmə verməyə çalışır. Milli Məclisin Sədri vurğulayıb ki, Azərbaycan sülh tərəfdarıdır, regionda bütün insanların sülh içində yaşamasını istəyir.
Görüşdə qarşılıqlı maraq doğuran digər məsələlər ətrafında fikir mübadiləsi aparılıb.
17-05-2021, 07:39 | Fransanın XİN rəhbəri Ceyhun Bayramova zəng etdi - Sərhəddəki vəziyyətə görə
Bu gün qarşı tərəfin təşəbbüsü ilə xarici işlər naziri Ceyhun Bayramovla Fransanın Avropa və xarici işlər naziri Jan İv Lö Drian arasında telefon danışığı baş tutub.
XİN-dən milli.az-a verilən məlumata görə, nazirlər Azərbaycan-Ermənistan sərhədində baş verən son gərginliklə bağlı məsələləri müzakirə ediblər.
Nazir Ceyhun Bayramov uzun müddətdən sonra Ermənistanla sərhədlərin gücləndirilməsi tədbirlərinin həyata keçirildiyi, bu xüsusda Azərbaycan sərhəd qüvvələrinin ölkəmizə aid mövqelərdə yerləşdiyi, tərəflər arasında mövcud olan fikir ayrılığı və yaranmış gərginliyin aradan qaldırılması üçün Azərbaycanın nümayiş etdirdiyi konstruktiv yanaşma, o cümlədən, Dövlət Sərhəd Xidmətinin rəhbərliyinin dərhal bölgəyə ezam edildiyi və qarşı tərəflə danışıqların aparılması ilə bağlı qarşı tərəfə məlumat verib.
Nazir Ceyhun Bayramov sərhəd gərginliyi məsələsinin şişirdilməsi və siyasiləşdirilməsinin yolverilməz olduğunu və bu kimi məsələlərin danışıqlar yolu ilə həllinin vacibliyini qeyd edib.
Nazirlər, həmçinin, münaqişə sonrası məsələlər ətrafında ümumi fikir mübadiləsi aparıblar.
15-05-2021, 06:08 | Damarların tıxanması və qanın qatılaşması xəstəlik yox, simptomdur - Həkim əsl səbəbi AÇIQLADI
Tanınmış həkim, manual terapevt doktor Şişonin ateroskleroz kimi tanınan damar tıxanmasının əsl səbəbini açıqlayıb.
O bildirib ki, ateroskleroz onurğa arteriyalarında qan dövranın pisləşməsini göstərən simptomdur, ayrıca özlüyündə yaranan xəstəlik deyil.
Bu problemi olan xəstələr onurğa və boyun arteriyalarının UZİ-sini etdirməlidir. Onurğa arteriyaları beyin kökünü qidalandırır.
Damarlarda yaranan pitraqlaşmalar köpüklü olur, onlar qanın köhnəlmiş makrofaqlarıdır, hansı ki, damarların divarından içəri sızıb və burda pis xolesterini yeyərək bərkiyir.
Bu mübadiləni aparan mərkəz isə beyindəki hipotalamusdur. O, lazım olan qədər qanla qidalanmadıqda, onurğaya gedən qan dövranı pozulur, damarların içində atrerosklerostik tıxanmalar yaranır.
Normal hipotalamus makrofaqlara düzgün əmr verir və onlar damarın içində lazım olmayanı yeyib, digər yerə aparmalıdır.
Burdan belə aydın olur ki, təzyiq xəstəliyi, diabet, damarların tutulması heç də müstəqil xəstəlik yox, beyin kökü və hipotalamusun oksigen aclığı və qan dövranı pozulmasının nəticəsidir.
Hipotalamusu qidalandıran onurğa arteriyalarıdır. Bu arteriyaların sıxılması, hərəkətsizlik, ostexondroz, protruziya və s. hipotalamusun işini pozur. Ona görə də gənclər yuxarıdakı xəstəliklər yaranmasın deyə, onurğa və boyun arteriyalarının yaxşı işləməsini yoxlamalı və onurğanı daim hərəkətdə saxlamalıdırlar. /medicina.az
15-05-2021, 05:49 | Uşaqlar üçün YENİ TƏHLÜKƏ - Mütəxəssislərdən MÜHÜM XƏBƏRDARLIQ
Pandemiya səbəbilə uşaqların rəqəmsal ekranlar qarşısında keçirdiyi orta vaxt artıb.
Mütəxəssislər bunun göz quruluğu, rəqəmsal göz yorğunluğu, baş ağrısı və bulanıq görmə kimi şikayətlərə səbəb olduğunu xəbərdar edirlər.
Türkiyə Sağlamlıq Elmləri Universitetinin göz sağlamlığı və xəstəlikləri mütəxəssisi professor Yelda Özkurt COVID-19-un tənəffüs sisteminə olduğu kimi, gözlərə də ciddi təsir edə biləcəyini, hətta ilk tapıntıların belə gözdə görülə biləcəyini bildirib.
Y.Özkurt uşaqlarda göz qapaqlarının iç hissəsini və göz bəbəyini əhatə edən kəskin iltihab, sulanma, qızartı, şişlik kimi halların müşahidə edildiyini deyib.
Professorun sözlərinə görə, xarici mühitlə davamlı təmasda olan əllərin gözlərə sürtündüyü zaman, göz vasitəsilə COVID-19-a yoluxma üçün zəmin hazırlanır: "Bu, araşdırmalar əsasında sübut olunub. Buna görə də infeksiyaya yoluxma riskinin qarşısını almaq üçün gözlərin qorunması ağız və burun qədər vacibdir. Bütün viral xəstəliklərdə olduğu kimi, gözlə təmasda olan və daha sonra digər insanlara və səthlərə toxunan əllər tərəfindən də yoluxma ehtimalı olduğunu unutmamalıyıq".
Y.Özkurt vurğulayıb ki, pandemiya səbəbiylə əksər yerlərdə məktəblərin bağlı olması uşaqların planşet, kompüter və telefon kimi rəqəmsal ekranlar qarşısında keçirdikləri müddəti artırıb ki, bu da onların səhhətinə mənfi təsir edir. Professor tövsiyə edir ki, göz yorğunluğunun olmaması və göz xəstəliklərinin artmaması üçün uşaqları mümkün qədər ekran qarşısından çəkindirmək lazımdır.
O deyib ki, son 5 ildə Çində 6-8 yaş qrupundakı təxminən 125 min uşağın göz qüsuru hesablamalarına əsaslanan araşdırmada, zəif görmə 6 yaşındakı uşaqlarda 3 dəfə, 7 yaşındakılarda 2, 8 yaşındakılarda isə 1,4 dəfə artdığı müəyyən edilib. Bu səbəbdən də Y.Özkurt son zamanlarda göz müayinəsindən keçməmiş bütün uşaqların müayinə olunmalı və mövcud nöqsanların müəyyən edilərək müalicə olunmasının vacibliyini ifadə edib və bildirib ki, xüsusilə əl ilə göz təması azaldılmalı və ümumi gigiyena qaydalarına ciddi riayət edilməlidir. (publika.az)
15-05-2021, 05:45 | XƏBƏRDARLIQ: Marketdən evinizə gətirdiyiniz "ölüm yağı" - XƏRÇƏNG YARADIR
Yağlardan istifadə zamanı nəyə diqqət etmək lazımdır?
Qida rasionunda yağların düzgün və yaxşı mənimsənilməsi üçün ümumi yağın 70%-i heyvan, 30%-i isə bitki yağı olmalıdır. Yağların isti emal zamanı qidalıq dəyərlərinin dəyişilməsi temperaturdan və isti emalın davametmə müddətindən asılıdır. Bunlar artıq olduqda, bioloji aktiv maddələrin artmasına səbəb olur.
200°C-dən yuxarı temperaturada qızdırdıqda və dəfələrlə istifadə edildikdə, yağlar kanserogen olur və bəd şişlər əmələgətirmə qabiliyyətinə malik olur. 20-30 q bitki yağı, insan orqanizminin doymamış yağ turşusuna olan gündəlik tələbatını ödəyir. Onların çatışmaması orqanizmin inkişafını zəiflədir və sağlamlığa mənfı təsir göstərir. Onların qida rasionunda gündəlik norması sutkada tələb olunan kaloriliyin 1%-ni, yaxud 7-8 qram təşkil edir.
Hansı yağı seçmək lazımdır?
Bu gün bazarlarda "bitki yağı" adı altında tərkibində palma yağı və palma qozu yağı olan ərzaq məhsulları kifayət qədərdir. Bir çox Avropa ölkələrində qadağan olunmasına baxmayaraq, ucuz olması səbəbindən dünyanın bir çox ölkəsində həmin yağ qida məhsulları və kosmetika sənayesində də tətbiq edilir. Palma yağı otaq temperaturunda bərkiyir və digər yağlarla yaxşı qarışır. O, günəbaxan yağı kimi yüksək temperaturda xarab olmur.
Digər bitki yağları ilə müqayisədə palma yağının tərkibində doymuş yağların miqdarı xeyli yüksəkdir - tərkibində doymuş yağların faizi nə qədər yüksək olarsa, bitki yağı o qədər daha az zərərli sayılır.
İstehlakçıları palma yağının zərərsizliyinə və ya hətta xeyirli olduğuna inandırmağa çalışsalar da, aparılmış araşdırmalar nəticəsində dünyanın 23 ölkəsində palma yağı istehlakının artması ilə işemik ürək xəstəliklərinin artması arasında əlaqənin olduğunu müəyyən ediblər. Həkimlər eləcə də şübhə etmirlər ki, palma yağı ateroskleroz əmələ gətirən qandakı "pis xolesterini" artırır.
Palma yağından istifadə piylənmə və qlobal miqyasda xroniki xəstəliklərin inkişafına gətirib çıxarır, eyni zamanda ekologiyaya da ciddi ziyan vuraraq tropik meşələrin məhvinə səbəb olur.
Beynəlxalq təşkilatlar zərərli yağlara qarşı hansı tədbirlər görüblər?
Hələ 2003-ci ildə ÜST və BMT-nin Ərzaq və Kənd Təsərrüfatı Təşkilatı (FAO) palma yağının sağlamlığa mümkün zərərlərinə diqqət çəkib. Lakin o zamandan bəri palma yağının dünyada istehsalı və istehlakı ikiqat artıb, 1995-ci ildən 2017-ci ilədək müddətdə isə palma yağı istehsalı dörd dəfə artıb. Bu cür artımın səbəblərindən biri məhsullarını bazarlara çıxarmaq üçün güclü lobbi yaratmış hazır yemək və yarımfabrikat istehsalçılarında görürlər. Məhz həmin istehsalçılar tərəfindən istehlakçıları aldatmaq məqsədilə palma yağının orqanizmə faydaları haqqında bir çox saxta məlumatlarla dolu məqalələr də dərc olunub. Hətta bu mövzulu doqquz məqalədən dördünün Malayziya Kənd Təsərrüfatı Nazirliyinin sənayenin inkişafına cavabdeh olan şöbəsinin əməkdaşları tərəfindən hazırlanması belə aşkar edilib.
İnqrediyentlər siyahısında, palma yağı 200-dək alternativ ad altında göstərilə bilər. Sadəcə "bitki yağı kimi" yazılması ən böyük hiylələrdən biri hesab oluna bilər. Odur ki, yağ seçərkən diqqətli olun. (MediaBaku)
13-05-2021, 00:30 | Azərbaycanda Ramazan bayramı qeyd olunur
Bu gün Azərbaycanda Ramazan bayramıdır. Qafqaz Müsəlmanları İdarəsinin (QMİ) fətvasına əsasən, Eydül Fitr - Ramazan bayramı Şəvval ayının 1-i - Ayın üfüqi ərazimizdə görünməsindən asılı olaraq mayın 13-nə təsadüf edir.
Koronavirus pandemiyasına görə hazırda Azərbaycanda məscidlər bağlıdır və sabah məscidlərdə bayram namazı qılınmayacaq. İnsanlar ailəsi ilə birlikdə evdə bayram namazı qıla bilər.
İslama görə Ramazan ayının orucu bütün həddi-buluğa çatmış, xəstə və müsafir olmayan müsəlmanlara vacibdir.
Ramazan (orucluq) ayında günün işıqlı vaxtı yemək, içmək, siqaret çəkmək və s. olmaz. Bunlardan yalnız uşaqlar, xəstələr, hamilə qadınlar, cəbhədə vuruşanlar, uzaq yola çıxanlar azad olunurlar. Orucluq Ramazan ayında təzə ay çıxandan başlanır və 29-30 gün davam edir. Qurani-Kərimdə yazılır: “Sübh açılınca, ağ sap qara sapdan fərqlənincəyə qədər yeyib için; sonra gecəyə qədər orucunuzu tamamlayın”.
QMİ-nin fətvasında deyilir ki, oruc ibadəti insanları mənəvi cəhətdən saflaşdırır, onların günahlardan tövbə etmələrinə və Allah-təala yolunda xeyirxah işlər görmələrinə səbəb olur.
Orucun mühüm əməllərindən biri olan fitrə zəkatının vaxtı Ramazan ayının son günüdür. Fitrə canın sədəqəsidir və hər bir imkanı olan müsəlmanın ailəsinin hər bir üzvü üçün fitrə zəkatı çıxarıb imkansızlara, ehtiyacı olan ailələrə verməsi vacibdir. QMİ Qazılar Şurasının qənaətinə görə, bugünkü günə uyğun olaraq adambaşına 5-10 manat arası fitrə zəkatının verilməsi məsləhət görülür.
Allah oruc və namazlarınızı qəbul etsin! Amin!
Qeyd edək ki, Ramazan ayı aprelin 14-də başlamışdı.
Qeyd edək ki, Nazirlər Kabineti yanında Operativ Qərargahın qərarı ilə Ramazan bayramı ilə əlaqədar iş günlərinə və karantin rejiminə dəyişiklik edilib. Qərara əsasən, Azərbaycan Respublikasının ərazisində iş və istirahət günlərinin ardıcıllığını təmin etmək məqsədilə 2021-ci ilin 11 və 12 may iş günləri ilə müvafiq olaraq 8 may və 16 may istirahət günlərinin yerləri dəyişdirilib. Bununla da Ramazan bayramı günləri də daxil olmaqla mayın 9-dan 15-dək qeyri-iş günləridir. İş həftəsi mayın 16-dan başlayacaq.
