16-06-2022, 08:12 | Telefon üzərindəki bakteriyalar hansı xəstəliklərə yol açır?
Smartfonun səthində və korpusunda olan çirkin dəri dermatiti yaratmaq riski yüksəkdir.
Bu barədə "Ornament" profilaktik tibb tətbiqinin tədqiqatçısı Elina Şərifullina "Gazeta.ru"ya müsahibəsində bildirib.
"Telefonu istifadə edərkən onu birbaşa qulağa sıx yaxınlaşdırmaq həm qulaq siniri, həm də dəri üçün təhlükəli ola bilər, çünki qadjetlər dəri dermatitinə səbəb ola - bəzilərində, məsələn, nikel duzları ola bilər.
Mümkünsə telefon istifadəçiləri sevdikləri tətbiqləri kompüterə yükləsin. Həm hər axşam smartfonu və korpusunu təmizləməlisiniz. Bunun üçün tərkibində spirt olan xüsusi təmizləyici spreylərdən istifadə etmək daha yaxşıdır. İstifadəçilərimiz ağıllı telefonları sağlamlıqlarını izləməyə və bir çox xəstəliklərin qarşısını almağa kömək edən bir vasitə kimi istifadə edirlər. Lakin smartfonların səthində yaşayan bakteriya və virusların təmizliyinə nəzarət etməsəniz, təəssüf ki, problemlər də gətirə bilər" , - ekspert qeyd edib
16-06-2022, 08:00 | Çayın orqanizmə nə kimi faydaları var?
Çayın faydalı olması hamıya məlumdur. Bir stəkan isti çay qışın soyuğunda insanı isidir, xoş ətri yaxşı əhval-ruhiyyə və gümrahlıq verir.
Sağlamlığı qoruyur
Çay qanda xolesterinin səviyyəsini aşağı salır. Bu ətirli içkini qəbul etmək ürək-damar xəstəlikləri üçün əla profilaktikadır. Belə ki, çayda olan faydalı maddələr damarları təmizləyir və elastikliyini artırır.
İmmuniteti qaldırır
Alimlərin araşdırmaları göstərir ki, gündə bir neçə stəkan çay içən adamların immun sistemi daha aktiv olur. Bu içki xüsusilə mövsümi soyuqdəymələr zamanı faydalıdır.
Orqanizmi nəmləndirir. Bir tərəfdən çay susuzluğu əla yatırır, digər tərəfdən isə nəmi orqanizmin hüceyrə və toxumalarında saxlayır.
Dişləri qoruyur
Düzdür, dişlərə əsasən şirnisiz çay faydalıdır. Tərkibində olan tanin və ftor birləşmələri damaqları və diş minasını möhkəmləndirir, antioksidantlar isə kariyesə qarşı təsirə malikdir. Çaya şəkər qatmaqla onu faydalı xüsusiyyətdən məhrum etmiş olursunuz.
Yaşıl çayla dişləri yaxalamaq damaq xəstəliklərinin qarşısını alır. Bundan ötrü hər dəfə çay içərkən onu ağız boşluğunda bir qədər saxlayın. Çay dişlərdə sarı-qəhvəyi ərp saxlayır, ona görə hər dəfə çay içəndən sonra dişləri adi su ilə yaxalamaq lazımdır.
Arıqladır
Çay pəhriz üçün əla vasitədir, çünki kalorisizdir. Çay vasitəsilə maddələr mübadiləsini yaxşılaşdırmaq olar. Mütəmadi çay içməklə (faydalı bitkilər əlavə etməklə) artıq kalori və çəkidən azad olmaq mümkündür.
İriyarpaqlı qara çayı qurudulmuş rozmarinlə qarışdırıb dəmləmək və hər axşam isti halda, səhərlər isə soyuq halda içmək lazımdır. Bu içki şişkinliyi yatırdır, oynaqları hərəkətləndirir, ağrıların qarşısını alır.
Gözəllik açarı
Ətirli içki təkcə orqanizmin daxili üçün deyil, həmçinin xarici gözəllik üçün də faydalıdır. Yaşıl çay antibakterial və cavanlışdırıcı təsirə malik olduğundan, ondan bir çox kosmetik vasitələrdə istifadə edirlər. Yaşıl çay üz rəngini yaxşılaşdırır, dəri yorğunluğunu aradan qaldırır və elastikliyi artırır.
Hər gün üzü yaşıl çayla və ya buz kubiklərilə yumaq məsləhətdir. Tənzifi çay dəmləməsində isladaraq üzdə 15-30 dəqiqə saxlamaq əla canlandırıcı effekt verəcək. Yaşıl çayın xeyri çoxdur - tərkibində olan antioksidantlar, kofein, B2, P, C vitaminləri iltihaba qarşı təsir göstərir, qanda mikrosirkulyasiyanı yaxşılaşdırır. Ona görə bu içkidən problemli dəri üçün hazırlanan kosmetik vasitələrdə istifadə edirlər.
Həmçinin çaydan saçlara qulluq vasitəsi kimi də geniş istifadə olunur. Belə ki, çay baş dərisinin qidalanması və nəmlənməsi üçün faydalıdır. Yaşıl çaydan yaxalayıcı balzam kimi də yararlana bilərsiniz, saçlarınız incə və hamar olacaq. Qara çay dəmləməsi ilə saçları yaxalamaq onlara qızılı-qəhvəyi çalar verəcək.
16-06-2022, 07:51 | Hansı emosiyalar hansı XƏSTƏLİKLƏRİ yaradır? Hipertoniya, xora, mioma...
19-cu əsrin əvvəlində alman psixiatrı İohan Haynrot tibbi "psixosomatika" (psycho - ruh, somos - bədən) termini daxil edib.
Alim öz təcrübəsindən belə qərara gəlib ki, bir çox bədən xəstəliklərinin səbəbi ruhdur, yəni emosiyalardır. Təbii ki, söhbət mənfi emosiyalardan, mənfi hisslərdən gedir. Xüsusilə insan bu hisləri uzun müddət ərzində yaşayır, onları gizlədir, boğur, onlardan əziyyət çəkirsə, bu somatik xəstəliklərin inkişafına təkan verir.
Saglamolun.az bildirir ki, müasir elm də mənfi emosiyaların insan sağlamlığına olan təsirini təsdiq edir və psixosimatikanı daha dərin öyrənir.
Belə ki, psixosomatika mütəxəssislərinin fikrinə görə, qastrit və xora xəstəliyi daha tez-tez daim özündən narazı olan, öz hərəkətlərini, sözlərini daim analiz edən, özündə səhvlər axtaran, keçmişdə baş vermiş səhvləri, inciklikləri unuda bilməyən insanlarda inkişaf edir.
Hipertoniyaya həddindən artıq məsuliyyətli, işgüzar, istənilən işi sona qədər çatdırmaq üçün hər şeydən keçən, istirahət edə bilməyən insanlarda daha tez-tez rast gəlinir.
Qadın xəstəlikləri (mioma, kista və s.) xəyanətlə üzləşmiş, həyat yoldaşını sevməyən, ona etibar etməyən, öz qadınlığından imtina edən qadınlarda daha tez-tez təsadüf edilir.
Qaraciyər xəstəliklərinin riski qəzəbli, kinli, tez hirslənən, özündən çıxan insanlarda daha çoxdur.
Dəri xəstəlikləri (psoriaz, dermatitlər və s.) öz həyatından, işindən narazı olan, onlarda heç bir dəyişiklik edə bilməyən və daim bundan qıcıqlanan insanlarda inkişaf edə bilər.
Ürək xəstəlikləri sevinməyi, sevməyi bacarmayan, hirsi, kədəri, qorxuları daim dəf etməyə çalışan insanlarda daha tez-tez aşkar olunur.
Beləliklə, sağlam olmaq istəyirsinizsə, mənfi hisləri və emosiyaları atmağa, onları unutmağa çalışın, özünüzü və ətrafdakıları sevin, sevinin, insanları bağışlamağa bacarın, hirsi, kədəri, inciklikləri özünüzdə saxlamayın.
16-06-2022, 07:47 | Səssizlik sinirləri və ürəyi müalicə edir
Müasir dövrdə insanlar daim səs-küyün içində yaşayır. Maşınların, məişət və ofis texnikasının, televizorların, müxtəlif gəcetlərin səsi bizi daim əhatə edir.
Xüsusilə bu şəhər sakinlərinə aiddir.
Saglamolun.az bildirir ki, müxtəlif ölkələrdə aparılmış araşdırmalar sübut edib ki, səs-küy insan sağlamlığına ciddi ziyan vurur - ürək-damar, sinir, cinsiyyət, immun sisteminin fəaliyyətinə mənfi təsir edir. Güclü səs orqanizmdə stress hormonlarının (adrenalin, noradrenalin, kortizol) ifrazını artırır. Bu hormonların səviyyəsinin orqanizmdə daim yüksək olması baş ağrılarına, arterial təzyiqinin artmasına, yuxusuzluğa, piylənməyə, hətta sonsuzluğa səbəb olur.
Amerika alimləri sübut edir ki, aeropot və ya trass yollarının kənarında yaşayan insanlarda ürək-damar sistemi xəstəliklərinə, infarkt və insulta sakit yerlərdə yaşayan insanlarla müqayisədə daha tez-tez rast gəlinir. Daily Mail xəbər verir ki, alimlərin fikirinə görə, güclü səs insan həyatını qısaldır.
Əksinə isə səsssizlik insanın sağlamlığına çox müsbət təsir edir - təzyiqi və nəbzi normallaşdırır, sinirləri sakitləşdirir, beyinin fəaliyyətini, yaddaşı, təfəkkürü yaxşılaşdırır, immun və cinsiyyət sisteminin fəaliyyətinə müsbət təsir edir.
Alimlər insanlara sakit yerlərdə (meşə, dağlar, dəniz kənarı və s.) tez-tez olmağı, evdə və ofisdə səsin səviyyəsini azaltmağı tövsiyə edirlər.
16-06-2022, 07:42 | "Tək səninəm" dediyiniz biri var?" sualına Məleykənin cavabı belə oldu
Xalq artisti Məleykə Əsədova "7 canlı" proqramında qonaq olub.
axşam.az-a istinadən xəbər verir ki, aktrisa şəxsi həyatı ilə bağlı sualları cavablandırıb. O, aparıcı Vüsalə Əlizadənin "Tək səninəm" dediyiniz biri var?" sualına belə cavab verib:
"Zamanında olub, indi qızımdır. Sabah nə olacaq bilmirəm, amma mənə lazım deyil, çünki qız övladı böyüdürəm. Böyük danışmayım. Real deyil, həyatım Allahıma və qızıma aiddir. Qızım özüm boydadır, oxuyur. Universitetə daxil olsun. Vaxtım var ki, başqa nəyəsə? Qaçıram harasa. Sevgi ancaq övladıma, Allahımadır. Övladıma düzgün anayam".
Qeyd edək ki, M.Əsədovanın Gülər adlı qız övladı var.
16-06-2022, 07:38 | Havanın qəfil soyuması bu xəstəlikləri kəskinləşdirəcək - Kimlər ehtiyatlı olsun?
Azərbaycanda temperaturun qəfildən kəskin enməsi, oktyabrda bölgələrə qar yağması bir sıra xroniki xəstəlikləri olan şəxslərə təsirsiz ötüşməyəcək
Kimlər risk altındadır, soyuq havanın orqanizmə fəsadları nələrdir.
Soyuq havanın kəskinləşdirdiyi xəstəlikləri təqdim edirik:
-Astma - bronxit xəstəliyi, boğulması olanlar
-Şəkərli diabet xəstələri
-Meteohəssas insanlar
-Yüksək təzyiqi olanlar
-Ürək-damar xəstəliyi, qan damarlarında ateroskleroz olanlar infarkt, insult keçirmiş insanlar,
-Panik atak, nevroz və depressiyada olanlar
-Gözlərində problemi, iltihabi xəstəliyi olanlar
-Artroz, ostexondroz, artrit, revmatizması olanlar
-Rinit, sinusit, haymoriti olanlar, faringit
Yüksək rütubət, aşağı temperatur və soyuq iltihabi prosesləri aktivləşdirəcək.
Qeyd edək ki, orqanizmin havaya və kəskin iqlim dəyişməsinə reaksiyası meteopatiya adlanır.
Nə hiss edə bilərsiniz?
-Xüsusi təhlükəli hava şəraitində insanlarda səbəbsiz həyəcanlanma, qıcıqlanma, özündən çıxma, əsəbilik, yuxusuzluq və ya depressiv əlamətlər, süstlük, gərginlik tipli baş ağrıları artır.
-Belə günlərdə həkimlərə və təcili yardıma səbəbsiz hal dəyişmələrdən, ağrılardan müraciətlər çoxalır.
-Arterial təzyiqdə qəfil enmələr, qalxmalar müşahidə oluna bilər.
-Bəzən qarın boşluğunda və beldə spastik ağrılar başlayır, bunu zəhərlənmə ilə səhv də salırlar.
Təəssüf ki, belə havalarda və məqamlarda ürək-damar, beyin insultu səbəbindən ölüm hallarının sayı artır.
Sürətli külək səbəbindən yollarda kiçik travmalar alan şəxslərin də xəstəxanalara düşmə ehtimalı olur.
Nə etməli?
-Valideynlər xəstə, zəif, arıq və ya xüsusi xəstəliyi olan uşaqları həmin gün qapalı şəraitdə, özləri də yanında olmaqla saxlamalı
-Yaşlı, təzyiqi olan insanlar evdə qalmalı, təzyiq tənzimləyici dərmanlarını vaxtında qəbul etməli, sakitləşdiricilər içməli, evdə fikirlərini maraqlı və xoş bir şeylə məşğul etməlidirlər
-Boğulması, astma bronxiti olanlar küləkli havada çölə çıxmamalı, dərmanları yanında olmalıdır
-Gözlərində iltihabı, kataraktası, zəifliyi olanlar, rinit, haymoriti olanlar da maksimum evdə və qapalı yerdə olmalı. Küçəyə çıxarlarsa, qayıdanda göz damcısı tökməli, burunlarını dəniz suyu ilə yumalıdırlar.
-Əsəbi, nevrozu, depressiyası olanlar isə mütləq sakitləşdiriciləri qəbul etməli, evdə və ya işdə maksimum xoş təsir verən informasiya qəbul etməlidirlər, sosial şəbəkələrdən uzaq durum
-Diabet xəstələrinin aşağı ətrafları soyuq havadan daha sürətlə soyuduğundan və damarları tutulduğundan onlarda əl-ayaq uyuşması, sancmalar, keyimələr və qan dövranı pozulmasından ürəkdə, başda ağrılar ola bilər. Onlar da qan durulaşdırıcı və kardio aspirin kimi tabletlərini qəbul etməlidirlər.
-Əgər havada qəfil təhlükəli vəziyyətdən özünüzü yaxşı hiss etməsəniz, valerian, korvalol damcısından 10 damcı bir az suya damcıladaraq qəbul edə bilərsiniz.
-Ürək damarlarında əməliyyat olanlar, stend taxılan insanlar narahatlıq hiss edən kimi həkimi ilə əlaqə saxlasın
Məsləhət görərdik ki, havanın, küləyin təsirindən maksimum qorunmaq, orqanizmdə baş verəcək dəyişiklikləri nəzarətdə saxlamaq və bir şey olduğu halda özünüzə kömək etmək üçün bu günlərdə vacib olmadığı halda evdən çıxmayın.
16-06-2022, 07:33 | Pis ağız qoxusunun TƏHLÜKƏLİ SƏBƏBLƏRİ
Bir çox hallarda pis ağız qoxusunun səbəbləri diş və damaq problemləri və natamam ağız boşluğu gigiyenasıdır.
Lakin bəzən pis ağız qoxusu daha təhlükəli pozulmalara işarə edir.
Münxen Texniki Universitetinin nəznində Klinikum rechts der Isar klinikasının həkimi professor Uve Himann bildirir ki, pis ağız qoxusunun səbəbləri arasında xroniki tonzillitdir (angina). Bu xəstəlik zamanı böyümüş badamcıqlarda bakteriyalar yığılır, irin əmələ gəlir ki, nəticədə pis qoxu yaranır.
Saglamolun.az xarici KİV-lərə istinadla bildirir ki, professorun sözlərinə görə, bu yayılmış problemin digər səbəbi şəkərli diabetdir. Ağızdan gələn şirin "meyvəli" qoxu diabetə işarə edir.
Ağır böyrək xəstəlikləri, böyrək çatışmazlığı zamanı ağızdan ammiak, sidik qoxusu gələ bilər. Böyrəklər pis işləyəndə qanı yaxşı təmizləmir, nəticədə qanda yığılan toksiki maddələr ağciyərdən ifraz olunmağa başlayır ki, bu da pis ağız qoxusuna səbəb olur.
Ağciyər absesləri və ağciyər xərçəngi zamanı da nəfəsdən pis qoxu gəlir.
Mədə xəstəlikləri və o cümlədən mədə xərçəngi zamanı ağız qoxusu çox kəskin olur.
16-06-2022, 07:24 | Şuşada doğulan Zülalov soyadının haqqını verən aktyor - Nadir fotolar
Cəfər Cabbarlı adına Azərbaycan Dövlət Teatr Muzeyi tərəfindən həyata keçirilən "Cənnətim Qarabağ!" adlı rubrikanın bu dəfəki təqdimatı Əməkdar artist Əli Zülalova həsr olunur.
Teatr muzeyindən teleqraf.com-a verilən məlumata görə, layihə Prezident İlham Əliyevin 2022-ci ilin ölkədə "Şuşa ili" elan edilməsi haqqında Sərəncamına əsasən həyata keçirilir.
Layihə çərçivəsində muzeyin fondundan aktyorun yaradıcılığına dair bir neçə eksponat təqdim edilib.
XIX əsrin ortalarından başlayaraq Azərbaycan mədəniyyətinin inkişafındakı xüsusi töhfələri olan Zülalovlar ailəsinin nümayəndələrindən biri, milli opera səhnəmizdə özünəməxsus ifa tərzi ilə şöhrət qazanan Əli Əbdül oğlu Zülalov 1893-cü ildə Şuşada anadan olub. Erkən yaşlarından atasını itirdiyindən əmisi - dövrünün məşhur xanəndəsi Əbdülbaqi Zülalovun (Bülbülcan) himayəsində böyüyür.
Onun sənətinə olan rəğbətin təsirindən uşaq vaxtından musiqiyə maraq göstərməyə başlayır. Hələ 9 yaşında ikən mahnılar ifa edən Ə. Zülalovun müğənniliyə olan həvəsi onu teatr sənətinə gətirir.
Əmisi Bülbülcanla dostluq edən bəstəkar Üzeyir Hacıbəyli Əli ilə söhbət zamanı gəncin gur, xarakterik səsinə valeh olur. Elə bu səbəbdən onu özünün rəhbərlik etdiyi truppanın xor bölməsinə qəbul edir.
Ətraflı
Beləliklə, Ə. Zülalov səhnədə ilk addımlarını "Zülfüqar bəy və Üzeyir bəy Hacıbəyli qardaşlarının müdiriyyəti"nin truppasında atır və Əhməd Ağdamskidən sonra qadın rollarının ilk ifaçılarından olur. Bununla yanaşı təhsilini davam etdirmək niyyətində olan aktyor Bakı Musiqi Texnikumunu və Azərbaycan Dövlət Konservatoriyasını bitirir.
Təhsildən sonra yenidən səhnəyə qayıdan sənətkar Qarabağ xanəndəlik məktəbinin ənənələrini yaşadaraq Azərbaycan Dövlət Opera və Balet Teatrında müxtəlif rollara imza atır. Onun məlahətli ifası, səsindəki yanıqlıq tamaşaçıların ürəyinə sirayət edirdi.
Belə ki, Ü.Hacıbəylinin "Leyli və Məcnun" operasında Məcnunun anası, Zeyd, Leylinin atası, Məcnunun atası kimi müxtəlif partiyalarda çıxışı ilə şöhrətlənən aktyor, həm də Ü.Hacıbəylinin "Arşın mal alan", "Əsli və Kərəm", "Koroğlu", M.Maqomayevin "Şah İsmayıl", "Nərgiz", Z.Hacıbəylinin "Aşıq Qərib" və s. opera və operettalarında Süleyman, Paşa, Osmanlı, Keşiş, Ehsan paşa, Əbu Həmzə, Molla Mütəllim, Şahvələd obrazlarını da bənzərsiz məharətlə oynayıb.
(M. Maqomayev "Nərgiz" operası/ ADOBT,1938-39 - cu illər/ Ə.Zülalov - Molla Mütəllim)
1938-ci ildə Moskvada keçirilən Azərbaycan ədəbiyyatı və incəsənəti ongünlüyünün iştirakçısı olan Ə.Zülalov M. Maqomayevin "Nərgiz" operasındakı ifasına görə "Şərəf nişanı" ordeninə layiq görülüb. Mənbələrdə göstərilir ki, Ə. Zülalov cürbəcür hiylədən çıxan Molla Mütəllim obrazının xislətini o qədər canlı, peşəkarcasına yaradıb ki, onun bu çıxışı tamaşa boyu gurultulu alqışlarla müşayiət olunub.
Azərbaycan musiqi mədəniyyətinin tarixində nadir rast gəlinən - Zülalov soyadının haqqını layiqincə daşıyan Əli Zülalov 1963-cü ildə Bakıda vəfat edib.
15-06-2022, 16:23 | Başıbəlalı İsmayıllı meşələri məhv olma ərəfəsindədir- Məhv edilən meşələrin yerində tikilən restoranlar, otellər kimlərə məxsusdur..?
Ekologiya və Təbii Sərvətlər Nazirliyi ilə bağlı araşdırma yazısı yazarkən maraqlı bir məlumata rast gəldim.
Sabiq nazir Hüseynqulu Bağırovun rəsmi tərcümeyi-halında göstərilir ki, guya onun sələfi olmayıb, yəni ondan qabaq nazirlik, nazir mövcud olmayıb, Hüseynqulunun xələfi isə indiki nazir Muxtar Babayevdir.
Sözün düzü, bu məlumatı savadsızlıq hesab etdim. Yəni inanmıram ki, burada qərəz-filan olsun.
Belə ki, Eldar Mansurov adlı şəxs 1992-1997-ci illərdə Azərbaycan Respublikası Dövlət Ekologiya və Təbiətdən İstifadəyə Nəzarət Komitəsinin sədri olub.
1997-ci ildə nazirliyin adı dəyişib deyə, o demək deyil ki, tarixi yalan yazaq.
Ən maraqlı məqam odur ki, ümumiyyətlə, Ekologiya və Təbii Sərvətlər Nazirliyinin adı həmişə mənfi nənada hallanıb.
Təsəvvür edirsiniz, Bakı Dövlət Universitetinin tarix fakültəsini bitirən, yəni ixtisasca tarix müəllimi olan Hüseynqulu Bağırov hara, Ekologiya hara..?
Özü də nazir....
Yumor-filan bir yana, axı ekologiya elmi ilə tarix elmi arasında 1 faiz də əlaqə yoxdur. Heç olmasa Hüseynqulu biologiya, yaxud coğrafiya müəllimi olsaydı, nəsə düşünmək olardı.
İndi buradan keçid edək, Hüseynqulunun xələfi, yəni təzə ekonazirimiz Muxtar Babayevə.
Bəli, Muxtar Babayev 1991-ci ildə Moskva Dövlət Universitetinin fəlsəfə fakültəsini bitirib.
Sonra 1991-1992-ci illərdə Azərbaycan Respublikası Dövlət Planlaşdırma Komitəsində çalışıb.
1992-1993-cü illərdə Azərbaycan Respublikası Xarici İqtisadi Əlaqələr Nazirliyində işləyib.
İxtisası fəlsəfə olan adam, “QosPlan”da, İqtisadiyyat nazirliyində necə işləyə bilərdi..?
Deməli, iki mühüm nazirlikdə işləyən bu filosof Moskva Dövlət Universiteti kimi mühüm təhsil ocağından sonra Allah qoymasa, “Narxoz”a girib.
Sonra SOCAR-ın Ekologiya üzrə vitse-prezident vəzifəsində işləyib. 2010-2018-ci illərdə SOCAR-ın “Azərikimya” İstehsalat Birliyinin Müşahidə Şurasının sədri vəzifəsində çalışıb. 2010 və 2015-ci illərdə Azərbaycan Respublikası Milli Məclisinin deputatı seçilib. 2018-ci ilin aprelin 23-dən Azərbaycan Respublikasının Ekologiya və Təbii Sərvətlər naziridir.
Sözümüzün canı odur ki, bütün bu problemlərin kökündə kadr siyasəti dayanır. Necə olur ki, tarix müəllimini, sonra isə filosofu ekologiya naziri qoyurlar ?
Axı, orada illər uzunu yetişmiş kadrlar, peşəkarlar var idi…
Bir məsələni də qeyd edək….
İki gün öncə xəbər yayıldı ki, xaricdən həkim gətiriblər ki, Bakı şəhərindəki xəstə küknar ağaclarını müalicə eləsin, dərman versin, iynə vursun ağaclara…
Rəsmi xəbərdə qeyd edilir ki, hər ağaca fərqli dozada məhlul vurulur. Məhlullar Türkiyədən gətirilmiş dərmanlar əsasında hazırlanıb. Təcrübə Mərkəzi Nəbatat bağında nömrələnmiş 12 ağac üzərində müxtəlif istiqamətlər üzrə aparılacaq.
Bunlar cəmiyyəti nə hesab edirlər?
Bir gecədə Bakıda 50 ağacı kəsib parking, anbar və s tikənlər siz deyilsiniz..?
Hamısının da arxasında rüşvət və korrupsiya dayanır.
Belə olmasaydı, sabiq nazir Hüseynqulu Bağırovun ölkədə və xaricdə 100 milyonluq mülkləri nəyin hesabına olardı..?
İndi də həmin əməlləri təzə nazir Muxtar Babayev davam etdirir. Özü də yaxın dostu, nazirliyin Dövlət Ekoloji Ekspertiza Agentliyinin İdarə Heyətinin sədri Mirsalam Qənbərovun əli ilə.
Bunlar gecə-gündüz ağacların dibinə müxtəlif maddələr töküb məhv edirlər, sonra həmin ərazidə obyektlər tikib satırlar.
İndi utanıb qızarmadan deyirlər ki, ağaclara iynə vurub sağaldacağıq.
Əslində isə Mirsalam Qənbərovun ekspertləri sağlam ağaclara xəstə rəyi yazıb məhv edirlər.
Guya camaatın Balakəndə, Qəbələdə, İsmayıllıda və başqa rayonlarımızda məhv edilən ağaclardan, yaşıllıqdan və onların yerində tikilən restoran və istirahət mərkəzlərindən xəbəri yoxdur..?
Bəli, İsmayıllı meşələri qırılaraq mebelə, kömürə, tikinti materialına çevrilir. Məmurlar isə milyonlar qazanır.
Görəsən, meşələrimizi məhv edən erməni vandallarla bəzi məmurların nə fərqi var..?
Bəs görəsən, bəh-bəhlə yaradılan Regional Ekologiya idarələri hara baxır..?
Axı, bunlar dövlətdən hər ay maaş alırlar.
Onu da qeyd edək ki, uzun illlər meşə terrorunun başında ekonazirin müavini Firdovsi Əliyev dayanıb.
Son illlər isə PA-nın sabiq rəhbəri Ramiz Mehdiyevin yaxın adamı olan nazir müavini Vüqar Kərimov meşələri kəsməklə məşğuldur.
Görəsən nazir müavini Vüqar Kərimov İsmayıllıda kəsilən ağacların yerində tikilən otellərin sahiblərini tanımır..?
Bəs nazir-filosof-ekoloq Muxtar Babayev hara baxır..?
Niyə bunları görmək istəmir..?
Bütün bunların bir adı var: millətə qarşı düşmənçilik.
Sonda məşhur filmdən Söylü bajının dediyini Muxtar Babayevə demək istəyirik:
Eqolojiya, budur, Muxtar müəllim..?
Qarşı tərəfin mövqeyni dərc etməyə hazırıq.
gundelik baki.com
15-06-2022, 12:11 | Türk generaldan Yunanıstana XƏBƏRDARLIQ: Bilsinlər ki, yarım saata ora...
1860-cı illərdə Yunanıstan Avropanın böyük gücləri Fransa, İngiltərə və Almaniya tərəfindən dəstəklənərək, Osmanlı imperiyasına qarşı çıxmışdı. Amma Osmanlıda 400 il hakimiyyəti altında yunanların nə dinlərinə, nə dillərinə, nə də mədəniyyətlərinə qarşı bir assimilyasiya edilmişdi".
Bunu milli.az-a açıqlamasında Türkiyənin Azərbaycandakı keçmiş hərbi attaşesi, ordunun ehtiyatda olan generalı Yücel Karauz deyib.
Türkiyəli general bildirib ki, Yunanıstan bu təhdidlərinə və beynəlxalq hüquqa zidd davranışlarını davam etdirdiyi təqdirdə Türkiyə də artıqlaması ilə cavab verəcək:
"I Dünya Müharibəsində yunanların himayədarı ingilislər idi. Onların aranı qızışdırması nəticəsində yunanlar 15 may 1919-cu ildə Anadoluya hücum etdilər, sonra da 9 sentyabr 1922-ci ildə dənizə tökülmək vəziyyəti ilə üz-üzə qaldılar.
Sonra isə bu dəfə Amerikanın himayədarlığı ilə Türkiyəyə qarşı onların bu aqressiyaları II Dünya Müharibəsinə qədər davam edib. İkinci Dünya Müharibəsindən sonra Yunanıstan 1952-ci ildə Türkiyə ilə birgə NATO-ya üzv olub. 1952-ci ildən etibarən davamlı olaraq Türkiyə ilə arasındakı problemləri şişirdərək böyük dövlətləri özünün həm dini, həm də keçmiş "Yunan mədəniyyəti" adı altında ətrafına yığaraq Türkiyəyə qarşı silahlanıb, Qərbi Trakyadakı azlıqları yox etməyə çalışıb, ərazi suları və hava ərazisi ilə bağlı problemlər yaradıb.
1960-cı ilə qədər və 1960-ci ildən 1974-cü ilə qədər də ENES-US planı çərçivəsində Kiprdəki türkləri məhv etməyə çalışıb. Və indi isə "Megali İdea" planı çərçivəsində də "Böyük Yunanıstan" xəyalı ilə böyük dövlətlərin dəstəyi ilə nəsə etməyə çalışır.
Ətraflı
İndi də yenə Amerikanın, Avropa Birliyinin dəstəyi ilə, xüsusilə də Fransanın köməyi nəticəsində Türkiyəyə qarşı silahlanmaq yarışına girib. İndi dünyada son 3 ildə silahlanmağa dövlət büdcəsindən qeyri-sabit olaraq ən çox pul xərcələyən dövlət Yunanıstandır. Yunanıstan bu silahlanmağı Bolqarıstana, Makedoniyaya, Bosnia-Hersoqovinaya qarşı etməsi mümkün deyil. Bunu digər qonşularına qonşularına qarşı etmirsə, kimə qarşı edir? Türkiyəyə qarşı edir"
Eyni zamanda ABŞ vasitəsilə də 9 hərbi baza qurub. Dolayısı ilə prosesi Türkiyə-Yunanıstan gərginliyi olaraq görməkdən əlavə, prosesi Türkiyə-Amerika, Türkiyə-Avropa Birliyi olaraq görmək lazımdır. Bütün arsızlıqlarının, ərköyünlüklərinin, bütün sərsəm bəyanatlarının, yersiz təhdid dolu cümlələrinin arxasında bu qüvvələr var. Və sonuncu olaraq ABŞ Senatında Yunanıstan baş naziri öz siyasətlərini bir qırağa qoyaraq Türkiyəyə silah verilməməsi, Türkiyəyə təzyiq göstərməklə əlaqədar çıxışı ilə diqqət mərkəzinə düşdü. Bundan sonra Türkiyə ilə yarım saatlıq məsafəsindəki adalara gələrək Türkiyəni təhrik etməyə çalışdı.
Beynəlxalq hüquq sənədlərinə görə (1947-ci il Paris sazişinə görə) silahlanması qadağa olan adaları silahlandırmaqdadırlar. Xüsusən də Yunanıstan indi Amerikanın maşasıdır və Ağ Evin verdiyi təlimatları yerinə yetirməyə çalışır. Amma mən hər fürsətdə qeyd edirəm ki, Yunanıstan 9 sentyabr 1922-ci ili unutmasın.
Dünya tarixində "kukla" dövlət olan heç bir ölkənin dövlətinə, millətinə xeyiri olmayıb. Buna görə də Yunanıstan ağlını başına yığmalıdır. Yoxsa, Birinci Dünya Müharibəsindəki vəziyyət yenə onları gözləyəcək.
Təbii ki, Türkiyənin birinci hədəfi bu məsələni savaşla həll etmək deyil. Bizim təməl prinsipimiz "Yurdda sülh, cihanda sülh" fəlsəfəsi ilə qonşularımızla yaxşı qonşuluq münasibətləri çərçivəsində işlər görməkdir. Lakin Türkiyənin təhrik və təhdid edilməsi yolverilməzdir. Adaların bir qismi Yunanıstana 8 saatlıq məsafədə, Türkiyəyə yarım saatlıq məsafədədir. Yəni qışqırdığında eşidiləcək, Türkiyə sahillərindən baxdığın zaman işıqları görünən adalar var. İndi belə bir vəziyyətdə öz gücünə, öz dövlət strukturuna, öz silahlı qüvvələrinə güvənmədən bu cür təxribatçı davranışlar sərgiləyən Yunanıstan bilməlidir ki, Türkiyənin də səbrinin həddinin bir sonu var. Amma təbii ki, hər gərginliyi, münaqişə vəziyyətini də savaşla həll etmək mümkün deyil.
Öncə onu qeyd edim ki, Türkiyə xalq diplomatiyası ilə, eynilə NATO İttifaqı içərisində olan bir ölkəyə qarşı müharibə mövzusu bir az fərqli bir məsələdir. Amma təbii ki, səbrimizin də bir həddi var. Necə ki, 1960-dan 1974-cü ilə qədər Kipr üçün səbr edib, sonda Kipr Sülh Korpusunu yaratdıqsa, Yunanıstan bu təhdidlərinə və beynəlxalq hüquqa zidd davranışlarını davam etdirdiyi təqdirdə Türkiyə də artıqlaması ilə cavab verəcəkdir. Amma mən yaxın bir müddətdə hər hansı savaşın baş verəcəyini düşünmürəm".
Təhməz Əsədov
