21-11-2023, 07:27 | Birminqemdə medal qazanan gimnastlarımız Vətənə qayıdıb
Böyük Britaniyanın Birminqem şəhərində keçirilən batut gimnastikası və tamblinq üzrə keçirilən dünya yaş qrupları yarışlarında medal qazanan gimnastlarımız Vətənə qayıdıb.
Idmançıları Heydər Əliyev Beynəlxalq Aeroportunda Azərbaycan Gimnastika Federasiyasının, idman ictimaiyyətinin nümayəndələri, həmkarları, habelə qohumları, yaxınları və media nümayəndələri qarşılayıblar.
Xatırladaq ki, batut üzrə yığma komandasının üzvləri İbrahim Mustafazadə və Əmmar Baxşəliyev batut gimnastıkası üzrə sinxron proqramda gümüş medal qazanıblar. Sinxron proqramında Samirə Hüseynova və Ayan Şabanova da gümüş medal qazanıblar. Qeyd edək ki, bu nəticə Azərbaycan gimnastikası tarixində qadınlar arasında sinxron tullanma proqramında yaş qrupları arasında keçirilən dünya arışlarında ilk nailiyyətdir.
Akrobatik tullanma (tamblinq) üzrə Azərbaycan milli komandasının üzvü Aleksey Karataşov yaş qrupları arasında keçirilən dünya yarışlarında bürünc medala layiq görülüb.
Vətənə qayıdan idmançılar və akrobatika (tamblinq) üzrə Azərbaycan milli komandasının baş məşqçisi Adil Hüseynzadə yarışda iştirakla bağlı təəssüratlarını media nümayəndələri ilə bölüşüblər.
Adil Hüseynzadənin sözlərinə görə, tamblinq üzrə yeniyetmələr komandası çox perspektivlidir:
"Aleksey Karataşov bacardığından artığını edib. Rəqibləri çox güclü və bir az yaşlı idilər. İndi bizim əsas vəzifəmiz ondan ibarətdir ki, Aleksey Karataşov gələn ilin aprelində Qimaraynş şəhərində (Portuqaliya) keçiriləcək Avropa çempionatında yaxşı nəticə göstərsin".
Tamblinq üzrə yığmamızın baş məşqçisi noyabrın 9-12-də Birmin1emdə keçirilən batut gimnastikası və tamblinq üzrə 37-ci dünya çempionatında Azərbaycan gimnastlarının nəticələrinə də toxunub.
Xatırladaq ki, Azərbaycan gimnastikası tarixində ilk dəfə olaraq komanda üzvü Mixail Malkin tamblinq proqramı üzrə dünya çempionatında qızıl medal qazanıb. Həmçinin, M.Malkin və tamblinq üzrə Azərbaycan milli komandasının üzvləri - Tofiq Əliyev, Adil Hacızadə, Elnur Məmmədov milli gimnastika tarixində ilk dəfə komanda yarışında qızıl medal qazanıblar.
"Dünya çempionatında biz iki tarixi medal qazana bildik. Mütəxəssislər qızıl medal qazana biləcəyimizi proqnozlaşdırırdılar. Və uşaqlar ora qalib gəlmək üçün getdilər!", - deyə Adil Hüseynzadə əlavə edib.
Gimnastlar Samirə Hüseynova və Ayan Şabanova növbəti yarışlarda birinci yeri tutmağa çalışacaqlarını vurğulayıblar.
"Yaş qrupları arasında dünya yarışları yaxşı keçdi və biz hər şeydən həzz aldıq. Amma daha çox çalışmaq lazımdır. Böyük dəstəyə görə Azərbaycan Gimnastika Federasiyasına, məşqçimizə təşəkkür edirik", - deyə S.Hüseynova bildirib.
"İkinci yeri tutanda çox sevindik. Yaş qrupları arasında dünya yarışlarında hazırlıq yaxşı keçdi və biz də nəticədən çox razı qaldıq. Gələn il Avropa çempionatında iştirak edəcəyik, birinci yeri tutmaq üçün buna ciddi hazırlaşacağıq", - deyə Ayan Şabanova əlavə edib.
İbrahim Mustafazadə və Əmmar Baxşəliyev yarışların gözəl keçdiyini, onların yaddaşında çoxlu xoş anlar yaşadıqlarını qeyd ediblər.
"Yaş qrupları arasında dünya yarışlarında yaxşı nəticələr göstərdik. Məşqçilərimizə təşəkkür edirik, onların ümidlərini doğrultmağa çalışdıq. Ümid edirik ki, qarşıdan gələn Avropa çempionatında birinci yeri tutacağıq", - deyə idmançılar bildiriblər.//Trend/
21-11-2023, 06:40 | Azərbaycanda yeni rayon yaradılır
Azərbaycanda Ağdərə rayonu yaradılır.
Bununla bağlı Milli Məclisə Ağdərə rayonunun yaradılması ilə bağlı qanun layihəsi daxil olub.
Layihəyə əsasən, rayonun ərazisi Kəlbəcər, Tərtər və Ağdam rayonlarının ərazisindən təşkil edilir.
Qeyd edək ki, Azərbaycanda 1930-cu ildə yaradılan Ağdərə rayonu 1992-ci ildə ləğv edilmiş, kəndləri Kəlbəcər, Ağdam və Tərtər rayonlarına verilmişdi.//publika.az/
21-11-2023, 06:38 | Market və apteklərdə qiymətlər ucuzlaşa bilər – Tariflər azaldılıb
Mərkəzi Bank tərəfindən bir sıra "interchange" tariflər üzrə yuxarı hədlərin müəyyənləşməsi sahibkarların xərclərinin azaldılması məqsədi daşıyır.
Bu barədə Trend-ə Milli Məclisin deputatı Vüqar Bayramov deyib.
O bildirib ki, eyni zamanda burada əsas məqsədlərdən biri də, banklar tərəfindən təklif edilən xidmətlər üzrə xərclərin azaldılması və buna uyğun olaraq əlçatanlığın genişləndirilməsindən ibarətdir.
"Ona görə də hesab edirəm ki, bu istiqamətdə tariflərin azaldılması, eyni zamanda həmin sahibkarların, ərzaq və dərman satan obyektlərin xərclərinin azalmasına gətirib çıxaracaq. Gözləntilər ondan ibarətdir ki, xərclərin azalması həmin məhsulların daha ucuz qiymətə təklif edilməsinə səbəb ola bilər", - deyə o, qeyd edib.
Qeyd edək ki, AMB interchange tariflərinin yuxarı-orta həddini müəyyən edib. Bu hədd orta hesabla 36 % azaldılıb. Xüsusilə bu hədd həssas xidmət növləri olan ərzaq mağazaları, apteklər üzrə qəbul edilən ödənişlər üzrə 33 %, yanacaq doldurma məntəqələrində 55 %, digər proqramlar üzrə isə 22 % azaldılıb.
21-11-2023, 06:32 | Bayden onu İsrailə göndərdi - Livanla müharibə...
ABŞ Prezidenti Co Baydenin enerji və infrastruktur üzrə baş müşaviri Amos Hokşteyn Livanla müharibənin qarşısını almaq üçün İsrailə səfər edib.
Barədə "Wall News" qəzeti məlumat yayıb.
Bildirilib ki, Hokşteyn İsrailə səfəri çərçivəsində başda müdafiə naziri Yoav Qallant, strateji işlər naziri Ron Dermer və Baş Qərargah rəisi Herzi Halevi olmaqla rəsmi şəxslərlə bir sıra görüşlər keçirəcək.
Ətraflı
Qeyd olunub ki, Hokşteynin səfəri İsrail ordusu ilə "Hizbullah" arasında gərginliyin artdığı bir vaxta təsadüf edib.
Xatırladaq ki, oktyabrın 8-dən İsrail ordusu ilə "Hizbullah" arasındakı sərhəddə vaxtaşırı toqquşmalar yaşanır.//qafqazinfo/
21-11-2023, 06:08 | Helikopter yerə düşüb, ilk atəşi o açıb, sonra… - 32 illik sirr
Qarakənddə içərisində Azərbaycanın rəsmi şəxslərinin olduğu helikopterin vurulması ilə bağlı olayın üzərindən 32 il keçməsinə baxmayaraq, hələ də bəzi iddialar və müəmmalar davam edir.
Onlardan bəzilərini tarixçi alim, dosent, əslən Ağdamdan olan Zaur Əliyev bölüşüb.
O bildirib ki, hadisəni eşidib ora gələn şəxsləri və jurnalistləri Ağdamın Mərzili kəndində hərbiçilər saxlayıb, əraziyə bir sutka heç kəsi buraxmayıblar:
"Tam əminliklə demək olar ki, helikopter yerə düşmüş və yerdə yandırılmışdır. Bu yanğını törədənlərdən hələlik 3 nəfərin adı bəllidir: Rus general A.Dunçiv, Xankəndidə vaxtilə taksi sürücüsü olmus Robert Avagimyan və polis işçisi, kapitan İqoryan".
Alimin sözlərinə görə, üzə çıxan faktlar bunlardır:
1. İsmət Qayıbovun qolunu kəsiblər;
2. Tofiq İsmayılovun başından güllə ilə vurublar;
3. Taxdığı kəmərə görə Məhəmməd Əsədovun meyiti müəyyən edilib. Amma meyit yox idi, hamısı parçalanmış ət, sümük parçaları idi. O dövrdə belə danışırdılar ki, Məhəmməd Əsədov və onunla birgə iki rus generalının da meyiti yoxa çıxmışdı;
4. İstintaq zamanı məlum olub ki, hadisə yerinə hərbiçilər gələnədək helikopter tamamilə talan edilib. Azərbaycan Televiziyasının müxbirlərinin cihazları, 12 tapança, qiymətli əşyalar və hətta helikopterin müəyyən bahalı cihazları yoxa çıxıb;
5. Mİ-8 N72 helikopterində yanğından əvvəl atışma olub. Ehtimala görə, ilk atəşi helikopteri idarə edən Gennadi Domov açıb. Bunu yanıb dağılmış helikopterin qalıqlarında içəridən açılan güllələrin diametri, açıq yerləri təsdiqləyir (İstintaq sənədlərində bu, aydın görünür). Və müəmma burda yaranır: Hadisə yerində tapılan cəsədlər içərisində onun da nəşi tapılmır. Və bundan sonra onun barəsində heç bir məlumat verilmir.
6. Tapılan meyitləri görənlər danışırlar ki, helikopter eniş edəndən sonra ekipaj üzvlərinin bəziləri sonradan güllə yarası alıblar və üstlərinə benzin tökülərək yandırılıb.
Qeyd edək ki, Qarakənddə helikopter 1991-ci il 20 noyabrda vurulub. Həlak olanlar arasında dövlət katibi Tofiq İsmayılov, baş prokuror İsmət Qayıbov, dövlət müşaviri, sabiq daxili işlər naziri Məhəmməd Əsədov, millət vəkilləri Vaqif Cəfərov, Vəli Məmmədov, baş nazirin müavini Zülfü Hacıyev, Prezident Aparatının şöbə müdiri, jurnalist Osman Mirzəyev, Qazaxıstan daxili işlər nazirinin müavini Sanlal Serikov, Azərbaycan Dövlət Televiziyasının jurnalisti Alı Mustafayev də olub. Ümumilikdə qəza nəticəsində 22 nəfər ölüb. Kult.az
20-11-2023, 18:24 | MN: Bu ərazilərdə silahsızlaşdırma prosesi davam edir
İşğaldan azad olunmuş ərazilərdə 44 günlük müharibədən sonra 10 000-dən çox piyada əleyhinə, 3000-dən çox tank əleyhinə minalar aşkarlanıb.
Bunu Xarici İşlər Nazirliyi və Müdafiə Nazirliyinin birgə brifinqi zamanı Müdafiə Nazirliyinin Mətbuat Xidmətinin rəisi polkovnik Anar Eyvazov deyib.
O bildirib ki, bu ərazilərdə hələ də silahsızlaşdırma prosesi davam edir, yeni silah anbarları aşkarlanır.
"19 sentyabra qədər qeydiyyatdan keçirilmədən qeyri-qanuni yollarla bu ərazilərə silahlar daşınmağa davam edib. Erməni silahlı qüvvələri mülki insanlara dronların hərbi məqsədlə istifadəsi ilə bağlı təlimlər keçib ki, bu dronlar vasitəsilə Azərbaycanın hərbi və mülki infrastrukturuna zərbələr vurulsun", - Anar Eyvazov qeyd edib.//APA//
20-11-2023, 18:20 | Azərbaycanın bu universitetində yeni fakültə açılır
Azərbaycan Memarlıq və İnşaat Universitetində (AzMİU) yeni Dizayn fakültəsi fəaliyyətə başlayacaq.
Bundan sonra dizayn Memarlıq fakültəsinin tərkibində ixtisas kimi deyil, yeni fakültə olaraq fəaliyyət göstərəcək.
Rektor Gülçöhrə Məmmədova dizayn ixtisası üzrə ilk kadr buraxılışının 25 illiyi ilə bağlı keçirilən Dizayn Sərgisində bildirib ki, yeni fakültənin yaradılması bu ixtisas üzrə keyfiyyətli və kadr sayının daha da artırılması zərurətindən yaranıb:
Ətraflı
"Azərbaycanda bu ixtisas ilk dəfə bizim universitetdə 1994-cü illərdə mühit dizaynı ixtisası olaraq yaradılıb. Daha sonra 1998-ci ildə Memarlıq fakültəsinin nəzdində Dizayn kafedrası yaradıldı və bu ixtisas üzrə tələbə qəbulu həyata keçirildi. 1998-ci ildə "mühit dizaynı" ixtisası üzrə ilk bakalavr, 2000-ci ildə isə magistr buraxılışları reallaşdırıldı. Universitetdə dizayn ixtisasının yaradılmasından sonra bu istiqamətdə tədqiqatlar başladılıb, beynəlxalq əməkdaşlıqlar qurulub. Yeni fakültənin yaradılması dizayn üzrə kadr hazırlığının genişləndirilməsi və keyfiyyətin artırılması məhz bu çağırışa adekvat cavabdır. Dizayn ixtisasına tələbat getdikcə artacaq, heç bir süni intellekt onu əvəz edə bilməyəcək".
O qeyd edib ki, ölkədə dizayn ixtisasının inkişafında 2018-ci ildə Azərbaycan və İtaliya Prezidentlərinin iştirakı ilə imzalanan "Azərbaycan Memarlıq və İnşaat Universiteti ilə İtaliyanın Milan Politexnik Universiteti arasında Anlaşma Memorandumu"na əsasən universitetdə İtaliya-Azərbaycan Dizayn Mərkəzinin yaradılması olub: "Azərbaycanda dizayn üzrə ali təhsilin Avropa standartlarına uyğun formalaşdırılmasında bu mərkəzin böyük əhəmiyyəti olub".//report//
20-11-2023, 15:38 | “SƏNƏT” Uşaq Musiqi və İncəsənət Mərkəzi ölkənin mədəni təbəqəsinin formalaşmasına öz töhfəsini verir
"SƏNƏT" adlı uşaq musiqi və incəsənət mərkəzinin təsis olunması ölkənin mədəniyyət sahəsinə müsbət təsir etmişdir, və təsirini qısa zamanda təsdiq etmişdir. Uşaqlar gələcəyin aynasıdır və bu anlayış "SƏNƏT" mərkəzinin əsas istiqamətini təyin edir. Son altı ay ərzində mərkəzin tələbələri ölkənin önəmli festival və mədəni tədbirlərində uğurla iştirak ediblər.
Trend-ə istinadən bildirir ki, 2023-cü ilin 1 iyununda Şuşa şəhərinin tarixində ilk dəfə olaraq "HEYDƏR ƏLİYEV - TÜRK DÜNYASI BİRLİYİNİN BÖYÜK CARÇISI" adlı beynəlxalq uşaq rəqs festivalı keçirilmişdir.
"SƏNƏT" adlı uşaq musiqi və incəsənət mərkəzinin baş rəqs kollektivi öz iştirakı ilə festival tamaşaçılarının diqqətini çəkdi. Beynəlxalq rəqs festivalının məqsədi türk xalqlarının ənənələri ilə uşaqları tanış etmək və dünyada layiqincə öz mədəniyyətlərini təmsil etmək üçün platforma yaratmaqdır.
"SƏNƏT" mərkəzinin baş rəqs kollektivi festivalda uğurla iştirak etdiyi üçün fəxri fərmanla təltif edilmişdir.
Mərkəzin rəqs kollektivi ölkənin müxtəlif mədəni tədbirlərində iştirak edərək öz fəaliyyətini nümayiş etdirmiş və Azərbaycan Respublikasının tarixi qələbəsinə həsr olunmuş "ZƏFƏR" adlı musiqi və teatr festivalında yenidən səhnəyə çıxmışdır. Həmçinin, Elm və Təhsil, Mədəniyyət nazirlikləri, Heydər Əliyev Mərkəzinin birgə təşkilatçılığı ilə ümummilli lider Heydər Əliyevin 100 illik yubileyinə həsr edilən I Uşaq İncəsənət Festivalında "SƏNƏT" mərkəzinin kiçik rəqs kollektivi müasir rəqs nominasiyası üzrə birinci yerə layiq gorülüb.
"SƏNƏT" mərkəzinin metodologiyası yalnız rəqs tədrisinə istiqamətli deyil. Mərkəzin musiqi sinifi də istedadlı tələbələr yetişdirir. Məsələn, musiqi sinifinin tələbəsi Aytən Nağızadə Heydər Əliyev Fondunun dəstəyi ilə təşkil olunmuş ikinci Bakı Piano festivalında dünyanın müxtəlif ölkələrinin musiqiçiləri ilə səhnəni paylaşdı. Gənc musiqiçilərin konserti Müslüm Magomayev adına Azərbaycan Dövlət Akademik Filarmoniyasının Kamera və Orqan Musiqisi zalında baş tutmuşdur və konsertdən sonra Aytən Nağızadə festivalın diplomu ilə təltif edilmişdir.
Oktyabrın 7-də "SƏNƏT" mərkəzinin konsert zalında keçirilən gala-konsertdə ölkənin mədəniyyətinə əvəzolunmaz təsiri olan tanınmış musiqiçilər səhnədə çıxış etdilər. Alim Qasımov, Emil Əfrasiyab, Arslan Növrəsli, Nicat Məsimov, Elvin Novruzov, Alp Əliyev, Vurğun Vəkilov, Saleh Məmmədov,
Elvin Bəşirov kimi musiqiçilər öz musiqisi ilə tamaşaçıları sevindirdilər. Konsertdə Vaqif Mustafazadə, Rafiq Babayev, Əzizə Mustafazadə, Fikrət Əmirov kimi bəstəkarların əsərləri səsləndirilmişdir. Musiqi proqramı müasir caz aranjimanında təsvir edilən Azərbaycan musiqisini əks etdirdi.
20-11-2023, 15:20 | “Nə siyahı görmüşəm, nə ev bölmüşəm” - Çingiz Abdullayev
Xəbər verdiyimiz kimi, Azərbaycan Yazıçılar Birliyi (AYB) tərəfindən 21 nəfərə ev verilməsi müzakirələrə səbəb olub.
Həmin şəxslərin bir çoxunun katibələrdən, sürücülərdən, təsərrüfat içilərindən, bir sözlə texniki heyətdən ibarət olduğu vurğulanır.
Məsələ ilə bağlı qurumun katibi Elçin Hüseynbəylinin "Report"a açıqlamasında "Anar müəllim kimi məsləhət bilibsə, evlər həmin şəxslərə verilib", deməsi müzakirələri bir az da qızışdırıb.
AYB-nin birinci katibi Çingiz Abdullayev də mövzuya münasibətsiz qalmayıb.
Ev bölgüsü ilə bağlı "Qafqazinfo"ya danışan Xalq yazıçısı Çingiz Abdullayev bunları deyib:
"Mən Bakıda deyildim, iki ay idi Almaniyada idim. Almaniyada tələbələrlə görüşlərdə iştirak edirdim. Bu məsələni mən Bakıda olmadığım halda, mənsiz həll ediblər. Nə siyahı görmüşəm, nə də ev verilənlərin adını. Ona görə xahiş edirəm ki, mənim adım çəkilməsin. Deməsinlər ki, Çingiz Abdullayev siyahı tərtib edib, ev bölüb, ev verib. Mən Bakıda olmamışam, baş verənlərdən də xəbərsizəm".
Respublica.Az
20-11-2023, 15:15 | Son bir həftədə COVID-19-a yoluxanların sayı AÇIQLANIB
Azərbaycanda son 1 həftə ərzində (13-19 noyabr) koronavirus (COVID-19) infeksiyasına yoluxanların və peyvənd olunanların sayı açıqlanıb.
Nazirlər Kabineti yanında Operativ Qərargahdan verilən məlumata görə, həmin müddətdə infeksiyaya 21 yeni yoluxma faktı qeydə alınıb.
COVID-19-a yoluxan 13 nəfər sağalıb. Həftə ərzində analiz cavabı müsbət çıxan 6 nəfər ölüb.
İndiyədək ölkədə ümumilikdə 834 135 nəfərin xəstəliyə yoluxması faktı müəyyən edilib, onlardan 823 729 nəfər müalicə olunaraq sağalıb, hazırda 39 aktiv xəstə var. Bu günə qədər 10 367 nəfər vəfat edib.
Məlumata görə, son həftə ərzində yeni yoluxma hallarının müəyyənləşdirilməsi ilə əlaqədar 3 042, bu günə qədər isə ümumilikdə 7 711 925 test icra olunub.
Qeyd edək ki, son həftə ərzində virus əleyhinə vaksinasiya etdirən olmayıb.
